Mi pahnih kut atangin Heroin Hawng 12 man

Aizawl : Excise & Narcotics Department leh 14th Bn. Assam Rifles thawk dun chuan June 23, 2026 (Thawhlehni) zan khan Zote – Bulfek kawngpui, Champhai District-ah Heroin gram 141.420 (Hawng 12) an man.

  Heroin neitu nia puh mi pahnih – Nianglamnuami (26) d/o Kapchinluna leh Lalnunmawii (30) d/o C. Rohlira (L), Mual Nuam Bethel, Champhai-a khawsa ve ve nia inchhalte an man. Ruihhlo vanga mante hi NDPS Act, 1995 tlawhchhanin thubuai siamsak an ni a, June 24, 2026 khan Courtah hruai nghal an ni.

Lirthei chesual tanpui tumtuten zu thahnem tak man

Aizawl : June 22, 2026 khan Sekhum khaw chhungah Maruti Eeco Van (AS 01 GJ 6605) chesualin culvert-ah a tla a. Lirthei chesual tanpui tumtute chuan zu a phur ngei nia an hriat avangin Lunglei Police te an hriattir.

  Lunglei Police te hian lirthei khalhtu Debojit Bhattacharjee (26) Assam mi nia inchhal chuan zu te hi ama ta ngei a nih thu a puang a, thubuai ziahluh ngha a ni. An zu man te hi McDowells Rum um 99 (74.25 litre) niin, Rs.1,18,800/- man hu a ni. 

Ruihhlo Dona Ni pualin Cheng Vaibelchhe 94 chuang man ruihhlo halral

Aizawl: Excise & Narcotics Department chuan kum 2026-a Khawvel puma Ruihhlo Dona Ni, International Day Against Drug Abuse & Illicit Trafficking denchhenin June 25, 2026 (Ningani) khan Bethani Multipurpose Farm, Phunchawng-ah Court-a case 600 chinfel tawh atangin ruihhlo thahnem tak chu C. Lalruaia, MPS, Secretary to the Govt. of Mizoram, Excise & Narcotics Department hovin an halral.  

  He ruihhlo halralnaah hian Mizoram Police atangin Aizawl DEF atangin ruihhlo engemaw zat halral tel a ni bawk. Ruihhlo halral hi Cheng 94,83,93,855.00 man niin chhuat a ni a. Ruihhlo halralna hun hi Mizoram Police, Narcotics Control Bureau leh Central YMA (CADS) ten an hmanpui a ni.  

Chapchar Kut Post Souvenir tlangzarh

Aizawl: Chief Minister Lalduhoma, Chapchar Kut Organising Committee chuan June 25, 2026 khan Chapchar Kut Post Souvenir 2026 a tlangzarh.

  Lehkhabuah hian Aizawl leh district capital-a Chapchar Kut an hmanna te, India ram khawpui danga an hmanna te, ram pawn lama an hmanna thenkhatte report a awm a. Mizo Article 12 awmin chung zingah chuan Kut Pa, Chief Minister Lalduhoma thusawi pawh ziaka dah a ni a. English section, Article 5 awmna a awm bakah Kut hmanna thlalak tha tak tak dah a ni bawk.

Support price aia sanga sawhthing hralhna man Rs.1,99,833 hlan let

Aizawl: Agriculture & Farmers’ Welfare Minister PC Vanlalruata kaihhruaina hnuaiah June 25, 2026 khan a office chamber-ah Mizoram Agriculture Marketing Board (MAMB) chuan Mualkawi Secondary Collection Centre te hnena minimum support price aia sanga sawhthing hralhna man tlingkhawm, Rs. 1,99,833 hlan letna hun an hmang.

  2026 chhung hian Mualkawi SCC te chuan sorkar flagship programme kaltlangin an bial chhunga farmer te sawhthing thar chhuah chu auction kaltlangin an hralh chhuak a. Sawrkarin minimum support price (MSP) Rs. 50 per kg a ruat aia sangin sawhthing hi an hralh a, an hralhna rate sang ber chu Rs. 59 per kg a ni. MSP aia sanga an hralhna pawisa Rs.1,99,883/- pawisa tlingkhawm hi MAMB hnenah Mualkawi SCC chuan an chhung lut a. An pawisa chhun luh ang ang chu MAMB hian a hlan let leh a ni.

AMMSAF General Assembly hmanpui

Aizawl: Rural Development & Administration Department Minister Prof. Lalnilawma hovin June 25, 2026 khan Vanpa Hall-ah All Mizoram MGNREGA Staff Federation General Assembly Vawi 4-na neih a ni.

  AMMSAF ah hian Mizoram pumah Sub-Hqtrs. 11 awmin, member 900 dawn an awm a, General Assembly ah hian mi 600 chuang an kal khawm a ni. Chawhnu lamah Rorel Inkhawm leh Hruaitu thar thlanna an nei nghal a ni.

CM hovin International Day against Drug Abuse & Illicit Trafficking

Aizawl: June 25, 2026 khan International Day against Drug Abuse & Illicit Trafficking chu Dawrpui Multipurpose Hall-ah hman a ni a, Chief Minister Lalduhoma chuan khuallian niin a telpui. 

  Chief Minister chuan Zirlai naupang kalkhawm leh a thusawi ngaithlatu zawng zawngte hnenah ruihhlo chu an ban phak maiah a lo awm reng a nih pawhin hnar ngam a, tichhin lo turin a chah a. "In nunna chhuhsak tur cheu a Setana thlemna hmanrua a ni. Mi tam takin an tichhin a, an inrin hman hmain a bawihah an lut a, an chhungkua a tichhe vek phawt a, thlanmualah a umlut zui thin," a ti.

  He ni pual hian mi bik thlanchhuahte hnenah chawimawina hlan an ni a. Chung mite chu:

Category I: Infiamna huang-ah Cindy Remruatpuii Colney, Footballer & Samuel Zadeng, Boxer

Category II: Rahbi tleu enkawltu huang-ah New Life Home Society Jeriko Khualbuk, rahbi tleu hmeichhiate enkawlna, mi 5000 an enkawl tawhtu.

Category III: Ruihhlo sima, ngawlvei chhantu ni zuite huang-ah Jimmy LNS Tluanga, kum 23 chhung ngawiveite chhanchhuah hna lo thawk tawh leh B. Lalrinpuii, kum 7 ngawlveite tana thawktute an ni.

  International Day against Drug Abuse & Illicit Trafficking ni tak hi June 26 kha a ni a, sawrkar chawlh (Holiday) a nih avangin June 25 hian hman a ni ta zawk a ni.

Free UPSC Coaching Programme hawng

Aizawl: Mizoram Youth Commission (MYC) chuan Drishti IAS coaching institute nena tangkawpa an buatsaih 'Free UPSC Coaching Programme' chu June 24, 2026 khan MYC Auditorium, MINECO, Khatla-ah hawn a ni a. Chief Secretary Khilli Ram Meena chuan khuallian niin Coaching programme hi a hawng a ni.

  He programme hnuaiah hian General Studies class chu offline-in neih a ni a, Optional subject paruk -Political Science & International Relations, Geography, Sociology, Anthropology, History leh Public Administration chu online-in zirtir a ni bawk dawn a. Aizawl pawna mi zirlaite tan hostel facility pawh siam a ni.

Quarterly Review Meeting nei

Aizawl: School Education Minister Dr Vanlalthlana hovin June 24, 2026 khan School Education Complex Conference Hall MacDonald hill-ah School Education Department Officer ten Quarterly Review Meeting vawi 8-na an nei.

  Quarterly Review meeting-ah hian Department hnathawh leh hmalakna chi hrang hrangte thlirho a ni a, School Education Directorate-in hna lakna tura rules leh syllabus ennawn mek an buaipui dan te report a ni a, SCERT, MBSE leh Samagra Shiksha hmalakna te leh hnathawh te thlirho a ni bawk a. Department chhunga hmalakna leh hmachhawp te an sawiho bawk.

MBSE leh NCERT tangkawpin Training buatsaih

Aizawl: Mizoram Board of School Education (MBSE) leh Performance Assessment, Review, and Analysis of Knowledge for Holistic Development (PARAKH), NCERT, New Delhi te hmalaknain June ni 22 leh 23, 2026 khan MBSE Office, Chaltlangah ni hnih awh Master Trainers’ Training on Holistic Progress Card (HPC) at Secondary Stage chu neih a ni.

  He training programme hi MBSE in tun academic session a HPC pilot implement na atana inbuatsaihna a ni a, MBSE chuan an Affiliated sikul sawm (10)-ah HPC hi enchhinna (pilot implementation) nei turin inbuatsaihna a kalpui mek a ni.

Resource Mobilization Committee thukhawm

Aizawl: Mizoram Resource Mobilization Committee (MRMC) chu an Chairman, Chief Minister Lalduhoma hovin June 23, 2026 khan CM Conference Hall-ah an thukhawm a. Haukhuma Hauzel, IAS (Rtd), Vice Chairman, Ministers -Lalrinpuii, F. Rodingliana leh MRMC member te an tel.

  Mizoramin ama puala High Court a neih theih dan tur te, MRMC hian Chief Secretary leh Secretariat-a officer ten household MR an kawl zat a lo tihtlem sak tawh te, Mizoram Police officer te’n orderly an kawl mek mi 346 hi mi 118 a tihthlak (tihtlem) tha an tih thu te, District Administration chak zawk din a pawimawh thu te, Mizoram sawrkar hnuaia thawk doctor ten NPA dik taka an lak theih nan ‘Monitoring System’ siam te, Lung atanga chhiah lak belh theihna te, sawrkar inrelbawl dan tha zawk neih dan tur leh sum inrenchemna lam thil eng emaw zat an sawi bawk.

Govt. Aizawl College Building inhlanna thuthlung ziak

Aizawl: Planning & Programme Implementation (P&PI) Department Committee Room-ah Higher & Technical Education Department leh Mizoram Presbyterian Church (Synod) te chuan June 23, 2026 khan Govt. Aizawl College (GAC) Building, Sikulpuikawn inhlanna thuthlung "Deed of Agreement" an ziak fel. 

  Inremnaah hian Mizoram Synod chuan building hlut zawng (depreciated value), sawrkar dan ding lai anga chhut chhuah sa Rs.3,18,92,300/- chu Mizoram sawrkar (H&TE Department) ah chhung lutin, pawisa a chhun luh ni atang hian Government Aizawl College Building, Sikulpuikawn ami neitu nihna chu Mizoram Presbyterian Church kutah a awm nghal dawn a ni. 

International Olympic Day 2026 hmang

Aizawl: International Olympic Day 2026 pualin Mizoram Olympic Association chuan June 23, 2026 khan Olympic Day Run leh Plantation Drive a buatsaih a. Infiammi 631 ten Chanmari kawn, Dinthar leh Sikulpuikawn atangin Lammual an pan a, Environment Forest & Climate Change Minister Lalthansanga’n khuallian niin hun a hmanpui.

  Olympic Day Run ah hian Infiamna pawl chi hrang hrang 15 chuang atangin pawl tlan tam te hnenah lawmman sem a ni a, Mizoram Table Tennis Association chu pakhatna niin cheng 10,000 hlan an ni a, Mizoram Football Association leh Mizoram Wrestling Association ten lawmman pahnihna cheng 5000 an la a, Hockey Mizoram leh Mizoram Amateur Taekwondo Association ten lawmman pathumna cheng 4000 an la bawk a ni. Lawmman pawisa fai an sem rual hian thing tiak hlan tel nghal zel an ni bawk.

  Olympic Day lawmna hi Mizoram Olympic Association President Robert Romawia Royte chuan kaihruaiin, MOA Secretary General, V Lalzawmliana hnen atangin report ngaihthlak a ni a, MOA Senior Vice President F Lalnienga’n lawmthu sawina in hun a khar a. Lammual a hun hman zawh hian, Muallungthu a Mizoram State Sports Council Ground-ah thing tiak phunna hun hman chhunzawm nghal a ni.

Mizorama NHIDCL hnathawhte thlirho

Aizawl: Chief Minister Lalduhoma chuan June 22, 2026 khan Dr. Krishan Kumar, MD, NHIDCL chu Mizorama NHIDCL hnathawhte thlirhona (Review) meeting CM Conference Hall-ah a neihpui a, Chief Minister hi PWD Minister Vanlalhlana, EF&CC Minister Lalthansanga, Advisers to CM - TBC Lalvenchhunga, H. Ginzalal leh Dr. Lorrain Lalpekliana Chinzah bakah official pawimawh ten an tawiawm a. DC leh CALA ten online-in an zawm bawk.

  He hunah Aizawl - Thenzawl Road National Highway-a siam tura DPR siamtu tur zawn te, Seling - Tipaimukh National Highway-a Tuirini lei leh Tuivai lei a rang lama siam that a tul thu te, NH 6, Vairengte - Sairang kawngpui repair and maintenance chungchang te, Khamrang to Sairang siam that hna zawh a ni thu te, Kolasib lam section pawh an thawh zel thu te, NH Tlabung - Kawrpuichhuah hi NHIDCL kuta dah tawh tur tihfel thuai ni se, an ti.

  Four Lane National Highway Vairengte - Sairang/Aizawl hnathawh meka harsatna hrang hrang te, Aizawl - Tuipang NH thawh mek te, Thingfal khuaa Biak In chim leh School sawn ngaite sak thatna tura hmalakna te, bakah hna an thawhna lama NHIDCL in harsatna an tawhte pawh an sawi a ni.