Balu khur chimah mi 3 an thi

Aizawl : June 27, 2024 chawhma dar 11 vel khan Melbuk atanga km 3 vela hla Tiau lui, Ui lui ah balu khur a chim a, mi 3 an boral.

   Melbuk atanga ZALEN thudawn danin, Ui lui an tih ah hian balu lakna khur a awm a, hnathawk pawh engemawzat an awm. Balu la te hian feet 7 emaw vel a thuk in an lai puk a, a hmunah Melbuk khaw mi pahnih an boral a, hliam tuar pahnihte damdawiin panpui an nih laiin, Myanmar raltlan pakhat, Melbuk a kar hnih vel khawsa tawh chu kawng lakah a boral ve leh a ni.

Vanduaina tawk a boralte

1. Laltandika (20) s/o Liankhawnang, Tahan, Myanmar, Saikhua, inhlawhfa (raltlan) a Melbuka awm

2. Lalmalsawmdawnga (16) s/o Samuela, Melbuka

3. Lalmuankima (18) s/o Lenkhupa (L), Melbuk

Tiau lui a tla tui tla ruang hmu

Aizawl : June ni 25, 2024-a Tiau luia tla Malsawmtluanga (22), Champhai Dinthar Veng ruang chu June 27, 2024 chhun khan Kelkang Ngawi Li-ah hmuh a ni.

   Tarlan tawh angin Malsawmtluanga hi June ni 25, chawhnu dar 3:30 vel khan Tiau luiah a tla hlum a, zawn zui nghal niin, June 27, 2024 chhun khan hmuh a ni.

   A ruang hi a chenna Champhai Dinthar-ah lak a ni a, zaninah lumen niin a tukah vui a ni.

Thehlei leh Thuro kaptu hrem

Aizawl : Kolasib Chief Judicial Magistrate Casy Malsawmtluangi Ralte chuan Thehlei 4 leh Thuro 1 kaptu mi 2 chu ni 5 chhung jail tang tur leh Rs. 10,000 ve ve chawi turin June 26, 2024 khan hremna a tichhuak.

   Court order-a a lan danin Lalramzaua s/o Ngunduma (L) leh Lalmuanthanga s/o Lalramzauva, Phunchawng te chuan kumin March ni 10 khan Khamrang ram chhungah phalna nei lovin Airgun nen ram an vak a, Thehlei leh Thuro te hi an kap a ni.

   Heng nungcha te hi schedule II hnuaia mi niin an thiltih avang hian Range Officer, Kawnpui chuan an lakah complaint a siam a, anmahni leh an nungcha tihhlum bakah an tihlumna hmanrua airgun te chu man a ni.

Leilawn atangin tlahlum

Aizawl : Zarzokima (35) s/o Chhanhima, Sihphir kawnveng chu June 26, 2024 khan a rawtuai khawrhna ah Leilawn zawh sualin a tla hlum.

   Sihphir atanga ZALEN thudawn danin Zarzokima hi Daklalui-a an huan bulah leilawn zawh sualin, a hnuai luikawrah a tla a, ka chhawn lovin a boral a ni.

   A chesual lai hmu tu an awm lo a, nu pakhat feh haw in hmu in, khawtlang hruaitute a hriattir a, mi tlawmngai ten a ruang la chhuakin, vawiin tlai dar 5 vel khan an in thlenpui a ni.

   A tlakna kawr hi a sang vak lo a, a rawtuai khawrh a ah te leh chawhmeh dang a ah hnem avangin a inveng tha hman lo nia ngaih a ni.

Mizoram Police ten cheng 11,598,000 man hu heroin man

Aizawl : 24.6.2024 khan Zokhawthar Police te chuan Immigration Check Post, Zokhawthar-ah random checking an nei a. Land Custom Building bula lirthei pakhata mi satha bag pathum chu ringhlelin an endik a, a chhungah hian sahbawn bawm 330 (bag khatah bawm 110 zel) atangin heroin Kg 3.866 (gram 3866) a rit, cheng Rs. 11,598,000 man hu an man.

   Heng ruihhlo leh a bag neitu hi hriat a la ni lova, Zokhawthar PS ah Case No. 55/24 Dt. 24.6.2024 u/s 21(c) ND&PS Act ziah luh niin ngawrh taka a kaihhnawih awmte chhui zui mek a ni.

State Level Buyers-Sellers Meet for Medicinal and Aromatic Plants

Aizawl : Health & Family Welfare Minister Lalrinpuii chuan 25.06.2024 khan Aijal Club ah ‘State Level Buyers-Sellers Meet for Medicinal and Aromatic Plants’ buatsaih a hawng.

   He buyers-sellers meet hi sawrkar laipuia Ministry of AYUSH hnuaia National Medicinal Plants Board (NMPB) in a bultumin State Medicinal Plants Board (SMPB), Mizoram, Directorate of AYUSH in a buatsaih a ni. “Forward and Backward Linkage Supply Chain of Medicinal Plants – Under Integrated Component Project” kalpui mek hnuaia buatsaih a ni.

MCS, MFAS leh MIS Probationary ten Governor kawm

Aizawl : June 27, 2024 khan Governor Dr. Hari Babu Kambhampati chuan Mizoram Civil Services, Mizoram Finance & Account leh Mizoram Information Services-a officer lak tharte Durbar Hall, Raj Bhavan-ah a kawm.

   Governor Dr. Hari Babu Kambhampati chuan officer lak tharte chu an hlawhtlinnaah a lawmpui tih a sawi a. Mizoram sawrah hna pawimawh tak, mipui rawngbawl hna thawk tura lak an nih tih in hre chiang chunga buk tan turin a fuih.

   MCS, MFAS leh MIS officer lak thar te hi tunah hian Administrative Training Institute, Aizawl-ah Foundation Training an nei mek a. ATI faculty aiawhin ATI hotute pawh meeting-ah hian an tel a ni.

State Level Science, Mathematics & Environment Exhibition and Edutech Festival 2024

Aizawl : June 27, 2024 khan SCERT tualzawl, Chaltlang-ah Education Minister Dr. Vanlalthlana chuan ‘42nd State Level Science, Mathematics & Environment Exhibition and Edutech Festival 2024’ a hawng.

   42nd State Level Science, Mathematics & Environment Exhibition atan hian District 5 atangin school 13 an tel a, Model/Exhibit 43 an phochhuak a ni. Exhibit 43 te hi uluk tak a endik an nih hnu ah National Level Exhibition-a tel tur thlan chhuah a ni ang. EduTech Festival 2024 atan hian Stall 10 phochhuah a ni a, chungte chu Mizoram Scholarship Board, Mizoram State e-Governance Society, Buannel Studio Pvt. Ltd, Netsurf Internet Service, Reliance Jio Infocomm Ltd., NIELIT, Aizawl, Aricky Camera & Accessories, Click Studio, NeVA leh ICT, SCERT-te an ni.

Saitual-ah a tum khat nan MPSC Exam buatsaih

Aizawl : Saitual District-a a vawi khatna June 27, 2024 khan Mizoram Public Service Commission (MPSC) Combined Competitive Examination neih a ni a, Centre hi District Level Observer leh DC ni bawk Dr Lalngura Tlau chuan a tlawh a, Exam Centre Supervisor leh SDO (Sadar) Lalthakima Chhangte, chuan a tawiawm a ni.

   Exam Centre hi Govt Higher Secondary School Building, Saitual exam bei tura inziaklut mi 44 ah mi 29 in an exam thei a, heng zingah hian Mipa 18 leh Hmeichhia 11 in an exam a ni. Exam beitu zingah District chhung mi leh sa bakah hmun dang atanga Saituala sawrkar hnathawka awm mek engemaw zat an awm bawk.

AMC Ward XIX By-Election-ah ZPM tling

Aizawl : AMC Ward XIX Corporator seat ruak hnawhkhahna tur atana State Election Commission in by-election ruahmanna a siam angin June ni 25, 2024 khan vote thlak a ni a. 27.06.2024 khan DC Office ah vote chhiar niin, round hnih ah vote hi chhiar zawh a ni. Vote 3544 hmu in ZPM Candidate Dr. C. Malsawmtluangi chu tling a puan a ni.

   Returning Officer Lalmuansanga Ralte chuan candidate Dr. C. Malsawmtluangi hnenah hian Certificate of Election a hlan.

   `By-election ah hian ZPM candidate hnaih ber tu chu MNF Candidate Dr. Lalrinzuali Hrahsel niin vote 2502 a hmu a (vote 1042 in an inthlau a ni); INC candidate Effie Vanlalhmangaihi chuan vote 1170 hmu in, BJP Candidate K. Vanlalruati chuan vote 102 a hmu a. NOTA vote 24 an awm a, Vote hi 55.02% a tla a ni.

Mizoram Police ten ruihhlo halral

Aizawl : International Day against Drug Abuse & Illicit Trafficking denchhenin ni 26.06.2024 (Nilaini) khan Mizoram Police chuan Ruihhlo an mante halralna hun an hmang a. Ruihhlote hi Aizawl Zoological Park, Lungverh, Aizawl-ah incinerator hmangin an halral. Ruihhlo halralna hun hi Lalbiakthanga Khiangte, IPS, IGP (L&0)/ DGP in a hmanpui.

   CID Crime, Aizawl DEF, Saitual DEF, Hnahthial DEF leh Lunglei DEF ten ruihhlo an man sa a hnuaia mi ang hian halral a ni a, heng an thil halral te hi Rs.14,03,25,585 man niin chhut a ni.

   Hemi rual hian district Headquarters hrang hrangah Mizoram Police ten ruihhlo an man halralna an nei bawk. 26.06.2024-a Mizoram Police ten Ruihhlo an halral hi Rs. 1,40,79,97,842 man niin chhut a ni.

   Mizoram Police chuan ruihhlo do kawngah theihtawp chhuahin hma a la chho zel a, kum 2024 January atanga June ni 24 thlenga Mizoram Police ten Ruihhlo an man chu Rs. 66,82,35,070 man hu a ni.

CM-in Drugs hmansual dona ni hmanpui

Aizawl : International Day Against Drug Abuse & Illicit Trafficking, 2024 chu June 26, 2024 khan Vanapa Hall ah hman a ni a. Chief Minister Lalduhoma chuan he hun hi hmanpuiin; Mizoram mipui zawng zawngte chu ruihhlo leh dan lova ruihhlo phurh dona hna thawhpuiah a sawm.

   He ni hi UN General Assembly in kum 1987 December thlaa Resolution a pass anga khawvel puma hman zui tak a ni a. Kumin thupui hi "Kan dinhmun a chiang e, Invenna kawngah tan ila ang u" tih a ni.