MC-ah Information Kiosk leh Sanitary Vending machine hawng

Aizawl : Deputy Chief Minister Tawnluia chuan May 29 khan Millenium Centre Atrium-ah Tourist Guidance Information Kiosk leh Sanitary Napkin Vending Machine te hawngin mipui leh a mamawh apiangten tangkai taka an hman atan a hlan nghal a ni.
    Deputy Chief Minister chuan khualzin miten Mizoram chungchang hrilhhriatna, khualzinmite tana tangkai leh bengvarthlak tak, an veivahna leh hawiharh nan leh khawchhunga hotel leh hmun pawimawh hriattirna 'Information Kiosk' hawn a nih chu hmasawnna ropui tak a ni a ti a. Hmeichhiate tana awlsam zawk leh an mamawh huna hman mai tur Sanitary Napkin Vending Machine mipuite hnena hlan a ni bawk chu lawmawm a tih thu sawiin, a bultumtu UD&PA Department hnuaia Smart City bakah Tourism Department-te chu fakawm a tih thu a sawi a ni.

CM-in Ministry-ah Mizoram mamawh thlen

Aizawl : Chief Minister Zoramthanga chuan 29.05.2023 khan Union Minister for Road Transports & Highways Nitin Gadkari chu a chenna inah hmu in, 28.5.23 khan Prime Minister Narendra Modi, Union Finance Minister Nirmala Sitharaman leh Minister of State for DoNER BL Verma chu a a lo hmu tawh bawk a ni.
    Chief Minister hian Prime Minister leh Union Minister te hnenah hian Mizoram mamawh te a thlen a. May ni 27, 2023 a NITI Aayog Governing Council thukhawm a thu a lo thlen tawh te, sawrkar laipui a Mizorama hmasawnna hna thawhna tur project thehluh hrang hrangte Chief Minister hian a bawhzui a ni.

Governor-in tualchhung Chanchinbu chhuahtute a kawm

Aizawl : Governor Dr Hari Babu Kambhampati chuan May 30 khan Tualchhung Chanchinbu chhuahtu thenkhat te a kawm a. Mizoram tana thil pawimawh nia a hriat te a titi puiin Media lam ngaihdan leh an ngaih pawimawh te pawh a zawt..
    Governor Dr Hari Babu Kambhampati chuan Print Media Publisher te kawmnaah hian a hna pawimawh ber chu, Mizoram sawrkar leh central sawrkar inkar ah thawk palai, central a nawr tul apiang te nawr a, state mamawh state official ten an thehluh te umzui bakah a tul anga state tana theihtawp chhuah a ni a ti a. Mizoramah hmasawnna atan Media ten hna pawimawh tak an thawk nia a hriat thu sawiin theih tawp chhuah chhunzawm turin a chah. Mizoram hmasawnna atana pawimawh leh tih tul deuh nia hriat te sawiho a ni a. Media in engtin nge hma a lak ang tih te sawiho a ni bawk.

Horticulture Fair hawng

Aizawl : Ni li chhung awh Horticulture Fair 2023, Aijal Club Park-a neih chu May 30 khan Dy. Chief Minister Tawnluia chuan khuallian niin a hawng. 
    Dy. Chief Minister Tawnluia chuan ‘Horticulture Fair’ hawnna inkhawmah hian farmer-te leh Horticulture Department thawktute chu Mizoramin ei leh bar a hmasawnna a neih theih nan a thawktu pawimawh tak an nih thu sawiin, hmalakna tur ruahmanna an siamah uluk taka ngaihtuahna seng turin a bik takin department thawktute a chah a. State pawn atanga sawm bik lo kalte chu Mizoramah a lo lawm tih sawiin fair neih leh hunah pawh lo tel zel turin a sawm bawk. 

NEIGRIHMS ah Mizoram leh Arunachal Pradesh ten MBBS seat nei tawh dawn lo

Aizawl : Higher & Technical Education Department chuan June 1, khan thuchhuah siamin, NEIGRIHMS ah Mizoram in MBBS zirna atan Quota seat a neih tawh dawn lo ti hriattirna a chhuah.
    Director, NEIGRIHMS, Shillong hnen atanga 10.5.2023-a lehkha an hmuh angin Mizoram leh Arunachal Pradesh te chu mahni puala Medical College an neih tak avangin NEIGRIHMS, Shillong a MBBS seat tum tina kan lo nei thin Mizoram (3-seats) leh Arunachal Pradesh (4-seats) te chu kum 2023-24 Academic Session atangin an nei dawn tawh lo tih Mizoram mipuite an hriattir a ni.

HSLC & HSSLC 2023 Topper te hnenah CM Award hlan

Aizawl : June 1, 2023 khan Chanmari YMA Hall, Aizawl-ah School Education Department buatsaihin kumin 2023 HSLC (High School Leaving Certificate) leh HSSLC (Higher Secondary School Leaving Certificate) exam a topper te hnenah Chief Minister's Award hlanna neih a ni.
    Chief Minister Zoramthanga chuan khuallian niin he hun hi a hmanpui a, School Education Minister Lalchhandama Ralte chu khualzahawm a ni. Chief Minister hian HSLC topper mi pakhat hnenah leh HSSLC topper mi pathum te hnenah lawmpuina thu ziak (citation) leh tangkafai Rs. 50,000/- theuh a hlan a ni.

Remna Ni Pual thisen pek runpui hawng

Aizawl : Remna Ni pualin kumin June thla chhung hi Mizoram sawrkar hnuaia General Administration Department leh Association for Voluntary Blood Donation (AVBD) leh Central YMA tangho-in an buatsaih thisen pek runpui chu June 1, 2023 atanga khan kalpui tan a ni. 
    June thla hi Blood Donation Month ah puangin June 1 khan Dawrpui Multipurpose Hall ah he thisen pek runpui hawnna programme hi Chief Minister Zoramthanga hovin hman a ni. Chief Minister chuan Remna Ni puala thisek pek runpui hawn a ni ta chu midangte tan malsawmna nihna tur remchang tak a nih thu a sawi a. Mizo mipui tana remna hlutzia sawiin, rambuai avanga tawrhna nasa tak ramin a tawh dan te leh hnam chhan nan a mi tam takin an nun an hlan dan te a sawi. Chung mite inhlanna avanga vawiina remna leh muanna kan nei thei ta chu vawn him zel a pawimawh thu a sawi a. India hmarchhaka ram buai ber thin muanawm bera a chang ta chu Pathian kaihhruaina leh remruatna a nih thu a sawi bawk.

Mizorama Sikserh (Malaria) dinhmun thlirho

Aizawl : Mizorama Sikserh Malaria dinhmun, a invenna leh malaria case tih tlem nan Mizoram Sawrkar hotute sawipui tura Mizoram lo zin mek Central Team chuan June 1 khan MINECO Conference Hall ah Health & Family Welfare Minister Dr. R. Lalthangliana leh Department hotute nen hemi chungchang hi an thlirho. 
    Ministry official te hi tunhnaia Health Minister Delhi a zin tuma a sawmna ngaipawimawha sikserh chungchanga review meeting nei tura lokal an ni a. Central Team hi Ministry of Health  & Family Welfare a Joint Secretary Rajiv Manjhi'n a ho a, an vaiin mi 6 an ni.