Vision IAS in pe
Ningani khan Vision IAS Academy, New Delhi atangin DC Office, Aizawl chuan PPE kit 2000, N95 mask 2000, Surgical Mask 2500 leh Pulse Oximeter 150 te a dawng a. Heng bakah hian Oxygen concentrator leh medical equipment dang pawh hun reilote ah doner dang atanga dawn leh beisei a ni. Heng hmanrua te hi Frontline worker-te tan leh hrileng dona kawngah tangkai taka hman tum a ni.

SPARASH A HIM LO
une 4, 2021 khan Lalsawma,Controlling & Licensing Authority,
Directorate of Health Services, Government of Mizoram chuan Mizoramah Hand Sanitizer lo lut, Guwahati, Assam a siam Sparash chu him lo tih hmuhchhuah a nih thu a sawi.

DCA Semester I 
Director, Higher & Technical Education leh Chairman, Examination Committee, Mizoram State Council for Technical Education (MSCTE) chuan June 4, 2021 khan MSCTE hnuaia Session 2020 atana DCA Semester I Examination chu July ni 1, 2012 dar 11:00 am leh dar 4:00 pm inkarah neih a nih tur thu exam tur te a hriattir.

Kum 18-44 inkar tan
Dr Eric Zomawia, Mission Director, National Health Mission & State Immunization Officer chuan June 3, 2021 khan thuchhuah siamin  COVID-19 vaccine pek tur a tarlang a, June ni 4, 2021 (Zirtawpni) atang hian Aizawlah Kum 18-44 inkar tan Vaccine pek tan a ni a, nitin (Pathianni tiam lohvin) zing dar 8:00 ah booking hawn thin a ni ang.

Containment Area/Zone
June 3, 2021 khan I & PR Auditorium-ah Aizawl DC Dr. Lalhriatzuali Ralte kaihhruaina hnuaiah Aizawl khawpui chhunga COVID-19 hripui dona leh khuahkhirh kawnga Containment Area/Zone puan dan chungchang thlirletna ‘review meeting’ neih a ni. Meeting ah hian Aizawl SP aiawh; State Nodal Officer, ISDP; State Containment & Surveillance Management Unit aiawh, CMO Aizawl East leh West aiawhte, IMA aiawh, Aizawl khawpui chhunga Incident Commander te leh COVID damlo enkawlnaa mawhphurtute an tel a ni.

TANPUINA HLAN
June 3, 2021 khan hripui leng mek avanga harsatna hrang hrang thleng mekah, Aizawl West-I Bialtu MLA Pu Zothantluanga chuan a bial chhung mipuite thlamuan tur leh hri dona atana an hmanraw mamawh hrang hrangte a sem.

HMANRUA PE
Deputy Chief Minister Tawnluia, Tuichang Assembly Constituency bialtu MLA in a bial chhunga African Swine Fever leng mek dona tur hmanrua chi hrang hrang a pekte chu June 3, 2021khan District Veterinary Hospital, Khawzawla Veterinary Officer Dr.Phillip Lawmsangzuala hnenah hlan a ni.

LAWMTHU SAWI
School Education Minister Lalchhandama Ralte chuan hrileng kara HSLC Examination 2021 leh result buatsaih a ni chu thawktute thahnemngaihna leh inpekna a ni a, a chhuanawm hle a ni a ti.

LLTF LEH CCCC  TANPUI
Sports Minister Pu Robert Romawia Royte leh Aizawl East-II Bial MLA  ni bawk chuan June 2, 2021 khan a bial chhung fangin LLTF leh 4C te puih nan sumfai Rs 5,00,000/-(Cheng nuai nga) leh Oxygen Concentrators 4, PPE full sets 25, Sanitizers leh hand gloves te bakah mamawh dangte a sem chhuak.

PM NGEN
Chief Minister Zoramthanga chuan Prime Minister Narendra Modi hnenah special category state-te tan a thlawna COVID-19 vaccine pe tura ziakin 2.6.2021 khan a thlen.

Director, Hospital & Medical Education Lungleiah
Director, Hospital & Medical Education, H&FW Department Dr T Lalhmangaihi chuan June 2, 2021 khan Lunglei tlawhin Lunglei Civil Hospitala Trauma Centre sak mek, RT-PCR Laboratory buatsaihna hmun tur, H&FW Department quarter sak mekte a enfiah bakah Covid-19 hrileng darh zel chungchanga Lunglei District H&FW Department hnathawktute hmalak mek dan leh mamawh an neih te a enfiah.

CM Relief Fund hmanna 
Committee on Utilization of Chief Minister’s Relief Fund for COVID-19 chuan 2.6.2021 an thutkhawm a an lo rel tawh angin, COVID-19 avanga harsatna tawkte puihna tur a hnuai ami ang hian CM Relief Fund for COVID-19 atangin a pechhuak a, district tin DC te bakah Golgotha Camping Center, Vairengte leh Mizorama pawna Mizo Covid vei pahnih te tan sum a hlan a, sum an hlan tlingkhawm hi Cheng 1,17,46,000 zet a tling.

DM&R IN TANPUINA HLAN
May 31, 2021 khan DM&R Minister Lalchamliana chuan nimin chhuna kang  Tawngtai Bethel Camping Centre, Sakawrtuichhun, Aizawl tan rangva bundle 12 a pe a. Heng rangva te hi Pu John LT Sanga, Director, DM&R leh Pu Lalrinawma Traite, Jt. Director (Operations) ten TBCC hmunah an zuk thlen a ni. DM&R Department hian Tlabung leh Lawngtlai a COVID-19 dona atan PPE 200 ve ve an lo pe chhuak tawh a, Mizoram Police te tan surgical glove box lian 2 leh PPE 300 an pe chhuak bawk a ni.