President of India nen inkawm hona-ah Mizo zirlai paruk tel

Aizawl : India President Droupadi Murmu chuan June 2, 2026 khan Rashtrapati Bhavan-ah ram chhunga tribal scholar dawng thlan chhuah bik mi 202-te a kawm a. He hunah hian mizo zirlai paruk an tel.

  Heng zirlai thlan chhuah bikte hi India ram chhung Ministry of Tribal Affairs hnuaia —National Fellowship for Scheduled Tribes (NFST), National Overseas Scholarship (NOS) leh Top Scholarship for ST (TSST) lo dawng tawh te an ni. President Murmu chuan zirna hi ram chhung hmasawnna leh mahni inrintawkna hmanrua a nih thu sawiin, "Viksit Bharat 2047 thlenna tura hmachhawp inziah hunah inbul tanna hnar (roots) hi theihnghilh ngai suh u," tiin a fuih a ni.

Zu kawl leh in phalna 'Red card' permit dil theih

Aizawl: Excise & Narcotics Department. Government of Mizoram chuan hriselna kaihhnawih vanga IMFL kawl leh zu in phalna 'Red Card' an pechhuak dawn tih June 2, 2026 khan thuchhuah an siam.

  Zu kawl leh in phalna "Red Card' permit dil duh chuan a dil theih a. Coomissionerate of Excise & Narcotics, Khatla, Aizawl. Opposite Aijal Club-ah leh District hrang hranga Excise & Narcotics office-ah dilna form lak theih a ni. Dilna form man hi Rs. 50/- (Cheng sawmnga) a ni a. Red card hi a diltu hnena pek a nih chuan, Red Card fee hi kum 1 atan Rs. 5,000/-a a ni ang.

Mobile phone bo 40 hmuh let a neitute hnenah hlan

Aizawl : June 02, 2026 khan Aizawl police station in kumin March atanga May thla chhunga mobile phone bo 40 an hmuhlet chu a neitute hnenah an pe kir.

  Mobile phone bo te hi Central Equipment Identity Register (CEIR) system hmanga hmuhlet an ni a, a neitute hnena pekkirna hun hi 2nd OC, Aizawl PS room-ah neih a ni. 

  CEIR hi phone kan hloh pawha kan block hmak theihna leh, khawiah nge a awm tih zawn hmuh (track) theihna tura Government of India (Department of Telecommunications) hmalakna hnuaia siam, central system (khawlpui) pakhat a ni.

ZMC&H-ah thilpek hlanna hun hmang

Aizawl: Health & Family Welfare Minister Lalrinpuii chuan June 5, 2026 khan Indian Oil Corporation Limited (IOCL)-in Corporate Social Responsibility (CSR) initiative hnuaia Zoram Medical College & Hospital-a damlo na zual enkawlna tur critical care equipment leh advanced life support ambulance an hlanna inkhawm ‘asset handing over ceremony’ chu khuallian niin a hmanpui.

  Minister Lalrinpuii chuan Indian Oil Corporation Limited te chungah lawmthu sawiin Mizoram Healthcare Service hmasawn zelna atan cheng 62,38,548/- zet hu (C-arm machine, Diathermy Machine leh advanced life support ambulance) hmanga an puihna chu khawtlang hriselna leh damlote himna an ngaihpawimawhzia tilangtu a ni, a ti.

Corporator leh Local Council pualin EMS Awareness Campaign nei

Aizawl: Sports & Youth Services Department Minister Lalnghinglova Hmar chuan Mizoram Infiamna kawnga hmasawnna a awm theih nan leh vengchhunga Infiamna pawimawhna hriattir nan, "Empowering Mizoram Sports (EMS) Awareness Campaign" chu June 4, 2026 khan Aizawl Municipal Corporator leh Local Council te Administrative Training Institute (ATI) Auditorium, MINECO-ah a hmanpui.

  Minister chuan Aizawl Municipal Corporator-te leh Local Council hruaitute telloin an thawh theih loh thu sawiin, mahni vengchhung theuhah tan la tur leh theihtawp chhuah turin a chah a, "Corporators leh local council-te telloin kan che thei lo. Olympic 2036, India rama thleng tura ruahmanah Mizo Infiammi 1 tal an luh ve kan duh a ni," tiin kalkhawmte chu naupangte theihna hai chhuaktu leh chherchhuaktu ni turin a chah a ni. 

NEC Plenary-ah CM-in rawtna thlen

Aizawl : June 4, 2026 khan Meghalaya State Convention Centre, Shillong-ah NEC Plenary vawi 73-na Union Home Minister Amit Shah, Chairman, NEC ni bawk hovin neih a ni a. Chief Minister Lalduhoma chuan Ministry of DoNER hnuaia Convener a nihna High Level Task Force on Northeast Economic Corridor (NEEC) Final Report bu chu Amit Shah hnenah hian a thehlut a, thusawina hun a hmang bawk.

  Chief Minister chuan, Prime Minister-in India hmarchhak bialte tana a hmathlir Act East hi a tha a, India ram hmasawnna thlentu bulpui ni thei khawpin hmarchhak bial hi a awmna a remchang a, natural resource-ah te, mipuiah te, culture lamte thlengin theihna a nei a ni, a ti. 73rd Plenary hi Amit Shah hian a kaihruai a, DoNER Minister Jyotiraditya Scindia, Minister of State for DoNER Dr. Sukanta Majumdar te leh hmarchhak state Chief Minister te leh official pawimawh te an tel a ni.

Heroin tam tham tak man

Aizawl: Saitual DEF Special team te chuan June ni 1, 2026 (Thawhtanni) khan Heroin 587 gms, Rs. 1,17,40,000 man hun an man.

  Saitual DEF Special Team chuan Keifang kualmawia random checking an kalpui laiin, Churachandpur atanga Aizawl lam pan motor chu June ni 1, 2026 zing khan tih din a ni. Motora chuang zinga pakhat Nengshi Haokip (51) d/o Jangsem Haokip of Salbung, Churachanpur, Manipur chu an endik a, a taksa an enfiahna lamah hian, sahbawn bawm 50, a chhunga heroin awm chu a thawhnaw chhungah thuhruk a ni tih hmuhchhuah a ni a, a bag ken te pawh endik nghal a ni. 

Mi 277 te hnenah Orientation training leh package semna hun hmang

Aizawl : June 2, 2026 khan Vana Pa Hall-ah DC office buatsaihin Bana kaih (Handholding) scheme hnuaia CM's Special Package Grant phase -II dawngtu progress partners 277 te hnenah Orientation training leh package semna programme neih a ni.

  Orientation Training-ah hian CM’s Package semna hun hman a ni thung a, CM’s Special package semna hun hi Aizawl bawrhsap Er. Lalhriatpuia'n kaihhruaiin, Dr. KC Lalmalsawmzauva, Adviser to Chief Minister, Handholding Scheme leh Vice Chairman Mizoram State Policy Coordination Committee (MSPCC) ni bawk chuan khuallian niin hun a hmanpuia, CM’s special package grant phase-II, progress partners te hnenah certificate a sem nghal a ni.

Project pahnih leh workshop hawng

Aizawl : Chief Minister Lalduhoma chuan June 2, 2026 khan Youth Recreation Hall (YRC), Falkland-ah Mizo Ginger USP Mission Project te, Price Support Scheme for Arhar Dal, Chhawhchhi leh Nihawi te bakah NCEL Ginger Export Awareness Workshop te a hawng.

  Chief Minister hian Project pahnih leh workshop te a hlawhtlin theih nan a mawhphurtute zawng zawng theihtawp chhuah turin a chah. Heng project leh workshop hawn hi Speaker Lalbiakzama, Minsiter C. Lalsawivunga, Minister PC Vanlalruata, Deputy Speaker Lalfamkima, Lalchhuanthanga, MLA leh Dr. KC Lalmalsawmzauva, Adviser to CM ten an telpui a ni.

  Project pahnih leh workshop hawnna inkhawmah hian District hrang hrang atangin loneitute, FPOs te leh Cooperative society mi leh sa mi 250 vel an kalkhawm a ni.

Larsap-in Khet Bachao Abhiyan kalpui tur a hawng

Aizawl: India ram puma June thla chhunga kalpui tur 'Khet Bachao Abhiyan' chu June 1, 2026 khan Mizoram Larsap General (Dr) Vijay Kumar Singh chuan Lok Bhavan, Aizawl-ah a hawng. 

  Khet Bachao Abhiyan hi Ministry of Agriculture and Farmers' Welfare kaltlanga lei da zel tur ven kawnga hmalakna a ni a. Hemi hmang hian lei tak dan zirchianna neih hmasak zet hnuah inpawlh rual leh him zawk hmanga lei tha hman bakah leilung nena inrem taka lo neih chu ngaihpawimawh a ni.

Central leh Mizoram media thawhhona IMPCC thukhawm

Aizawl: Central sawrkar media unit hrang hrang leh Mizorama sawrkar department thenkhatte thawhhona IMPCC (Inter Media Publicity Coordination Committee) chu June 1, 2026 chu All India Radio (AIR) Conference Hall, Tuikhuahtlangah an thukhawm.

  Meeting-ah hian PIB (Press Information Bureau), All India Radio, Doordarshan, Department of Information & Public Relations (DIPR) leh state media hrang hrangte tha zawka an thawhho dan tur sawi a ni a. DDK Aizawl Director Nampibou Marinmai-a’n chairman niin a kaihruai a. PIB Guwahati Joint Director Pavni Gupta chuan telpuiin central leh state sawrkar department te pawh he meeting-ah hian an tel a ni.

NCB atanga motor dawnte Central YMA kutah hlan

Aizawl: Narcotics Control Bureau, Ministry of Home Affairs atanga ruihhlo donaa hman tur motor dawn chu June 1, 2026 khan Excise & Narcotics Minister Lalnghinglova Hmar chuan Central YMA kutah a hlan. 

  Conference Hall, Commissionerate of Excise & Narcotics-ah inhlanna hun siamah hian Minister hian CYMA hi Bolero Camper leh Eeco Van pathum ve ve a hlan niin, Bolero Camper pathum dang chu kawngah a thang mek bawk a ni.

  END chuan Home Minister Amit Shah-a’n Mizoram a rawn tlawh tuma Central YMA dilna thehluh kal zel atanga motor te chu lei a nih thu a sawi. Ministry of Home Affairs thurawn angin dilna chu Excise & Narcotics Department kaltlanga thehluh niin, January 21, 2026 khan Bolero Camper paruk leh Maruti Eeco Van pathum lei nan cheng nuai 88.95 phalna hmuh a nih thu a tarlang a ni.

SNA SPARSH hmangtu te inhmukhawm

Aizawl : SNA SPARSH hmangtu Department Administrative Head-te pualin SASCI & SNA SPARSH chungchang Meeting cum Workshop chu June 1, 2026 khan buatsaih a ni a. Chief Minister Lalduhoma, Finance Minister ni bawk chuan a telpui.

  Workshop hi Institute of Government Accounts & Finance leh Mizoram sawrkar Finance Department te tangkawpin an buatsaih a ni a. Vanlaldina Fanai, Commissioner, Finance in a kaihruai a, a hawnna neih zawh hian mithiamten zirtirna an pe zui a ni.

Bul tiak 20000 (singhnih) vailiam

Aizawl: Sericulture Minister Lalthansanga chuan June 1, 2026 khan muga pangang khawina tur atana Central Silk Board, Boko, Guwahati nursery atanga lak chhuah Bul tiak 20000 (singhnih) chu Mualpheng leh Keifanga Progress Partners mi 41 te phun turin Directorate of Sericulture, Chaltlang atangin a vai liam.

  Heng bul tiak te hi acre (tin) 61 hmun vel a zauva phun tur a ni a, Hand Holding scheme hnuaiah Sericulture Department leh Mizoram Khadi and Village Industries Board tang kawp (joint venture) project hi Saitual District khua Mualpheng leh Keifangah te kalpui mek a ni.