The Week that Was on June 9, 2024
![](https://zalen.s3.ap-south-1.amazonaws.com/images/news/1717850141_The%20Week%20that%20vwas%20logo%20tur.jpg)
GAWSS Phase I tui lakna thianfaiin Zotrek thawkchhuak
Aizawl : Tunhnaia ruahsur nasa in Aizawl khawpui tui tlan tur lakna Greater Aizawl Water Supply Scheme Phase I chhehvela hnawl a chhekkhawm thianfaiin adventure club - Zotrek chu June 6, 2024 khan an thawkchhuak.
GAWSS Phase I lama leivung awmkhawm leh thing lian in tui lakna hmanrua leh thawktute awmna a nek chhiatna na lai vel an thianfai a. Midangin an la khawih ngam loh lai te tihfel puiin, PHE department thawktute nen thing zai ngai an zai a ni.
Dum leh balu-in tui pump-na a hnawh vek a. Hei vang hian tui pump lamah pawh harsatna a la awm a, tun tuma Zotrek-in an puihna a pawimawh hle tih thawktute chuan an sawi.
Kum 7 mi tuiah tla hlum
Aizawl : Nilaini, June ni 5, 2024 tlai khan North Khawbung khaw naupang Vanlalliansangzela (7) chu tuiah a tla hlum.
Vanlalliansangzela te hi a unaute leh a thiante nen Buangtui tuikhuahah an cheng a, tlai dar 4 velah Vanlalliansangzela hi chesualin, tuikhuah ah hian a tla a, naupangte hian midang punna chang an hre lawk lo a, Lalbiakchhunga fanu tuikhuah a zu kalin a zawh atangin a thiante hian tuiah a tla tih an lo hrilh a ni.
ND&PS Court rawk a ni
Aizawl : Aizawl District Court building-a awm ND&PS Court chu rawk a ni a, June 3, 2024-a he thu ziah lai hian a rawk hun hi hriat a ni mai lo a. Nuai 25 vel rukchhuah a nia thudawn niin Zirtawpni leh Pathianni inkara rawk nia ngaih a ni hrih a, chhuizui mek a ni.
Aizawl Police Station atanga thudawn danin rukru te hian ND&PS Court pawisa dahna 'safe' hi an tum ber niin an ngai a,'safe' chhungah hian Cheng Nuai 55 vel awm nia ngaih niin rukru te hian Cheng Nuai 25 vel an lachhuak niin an hria a, office bungrua engmah dang an khawih lo nia ngaih a ni.
Court building chhungah hian CCTV installation tih a ni lo hrim hrim tih Aizawl PS OC chuan a sawi a, hei hian hnu chhui pawh a tih harsat a rin thu a sawi bawk.
Ruang zawn kharna hmang
Aizawl : 28.05.2024 (Thawhlehni) a ruah sur nasa tak avanga Lei tawlhin a hnawl mitthi ruang la hmuh loh 5 te zawn hna chu June 3, 2024 tlai khan a kharna hun hman a ni.
Ruang zawn kharna hun hi Central YMA buatsaihin Melthum RV ah hman a ni a. Lalhmachhuana, President, Central YMA in a kaihhruai a, Hlimen Bialtu Pastor ( PCI) Pastor H. Zalianchama’n hunserh a hmang.
A pumpuiah mitthi zawng zawng -34 ( Mizo-26, hnamdang-8); ruang hmuh loh -5
Ruang zawn kharna inkhawmah hian Hlimen leh Melthum Branch YMA aiawh ten thu an sawi a, ruang la hmuh loh chhungkaw pahnih aiawh ten thu an sawi bawk.
Assembly speaker bungalow a thingkung kih a ni
Aizawl : Centre for Environment & Social Justice (CESJ) in Assembly speaker bungalow a thingkih a nih chungchang a hmala tura ngenna June 4,2024 khan forest department ah an thlen.
Divisional Forest Officer hnen a ngenna an thlen a an tarlan danin, Assembly speaker bungalow a thingkung kih fai deuh vek a ni chu CESJ chuan a hremthiam lo hle a, sawrkar hmun pawimawh a thingkung kih a nih chhan leh thingkih phalna pek an nih leh nih loh an hrechiang duh tih an tarlang.
CESJ hian an ngenna hi 4.6.24 hian an thlen a, an pawl president leh general secretary ten hming an ziak.
PHE tui pump na hmun tlawh
Aizawl : 5.06.2024 (Nilaini) chawhnu khan Central YMA hnuaia Health & Sanitation Sub- Committee te chuan Reiek kai, Tlawng luia PHE Tui Pump-na hmun, tunhnaia ruah sur nasa in a tihchhiatna hmun te an tlawh a. PHE Department atangin EE, SDO, JE leh thawktu dang ten an lo dawng sawng.
PHE Department hotute hian tunhnaia tuilianin Tui Pump-na hmun a tihchhiat dan te an hrilhfiah a, hmunhma te an fan kual pui bawk. Central YMA hruaituten an report danin Tui lianin a chim vang a bungrua a tih chhiat leh bungrua a len bo te hi Rs. vbc. 13 vel hu ni a hriat a ni.
Central YMA leh PHE Department te hian Tuihna humhalh chungchang leh Faina leh Thianghlimna chungchangah thawhhona thuthlung ziakin Coordination Committee siamin an thawkho mek a ni.
Aizawl DC Thuchhuah
Aizawl : Cyclone Remal avangin Aizawl District-a chhawmdawlna leh chhanchhuahna hna thawh mekah June 1, 2024 khan inspection (Melthum leimin na hmun) an neihna a an hmuh chhuah angin In 3 (pathum) chu ruahtui tam zawk a tlak zel avanga him lo theia ngaih anih avangin thuchhuah a siam.
Section 30 (2)(iii) of the Disaster Management Act, 2005 in thuneihna a pek angin Nazuk Kumar, IAS, Deputy Commissioner & Chairman, Aizawl District Disaster Management Authority chuan June 6, 2024 khan thupek a chhuah
"Ni 28.5.2024 a Melthum-a chhiatna thlen na bul hnaia in ding 3 (pathum) (list enclosed) a cheng te hi ruah a sur zel chuan a hlauhawm theih dawn avangin, heng in a cheng te hi thuleh awm hma chu an in chhuahsan rih tur a ni."
HOUSE TO BE EVACUATED AT MELTHUM
Sl. No Family Head
1. Malsawmzuala
2. KK Thanga
3. Hrangkhuma
World Environment Day 2024 hmang
Aizawl : World Environment Day (WED) 2024 June 5, 2024 khan khawvêl puma lawm a nih rualin Mizoram Pollution Control Board chuan Chanmari YMA Hall-ah lawmna hun an hmang.
MPCB Chairman Liankima Lailung (IFS Rtd.) chuan he hun hi a hmanpui a, leilungte chu uluk lehzuala enkawl a ngai a, tui leh boruak thianghlim tam zâwk neih theihna tur a ni a, ngaihtuahna thar pû-in tunah hian bul kan tan nghal a ngai a, khawvêl lo hi mihringte hian chênna tur khawvêl dang kan nei lo tih hre tharin leilung leh tui leh boruakte enkawl that a pawimawhzia a sawi.
Benjamin Lalnunsanga Colney, P.O, Mizoram EIACP Hub chuan kumin World Environment Day puala MPCB chêt vêlna report a pe bawk a, MPCB hian WED pual hian zirlaite nen District hrang hrangah Mass Rally neiin Aizawl vêng hrang hrangah E-Waste Management Drive neih a ni a, item hrang hrangah inelna siamin lâwmman pawisa fai leh Certificate-te sem a ni bawk.
Lok Sabha MP atan Richard Vanlalhmangaiha thlan tlin a ni
Aizawl : Lok Sabha inthlanpui 2024-ah Mizoram aiawha seat awmchhun luah turin Zoram People’s Movement (ZPM) candidate Richard Vanlalhmangaiha chuan vote 2,08,552 hmu-in tlinga June 4, 2024 KHAN puan a ni. Amah hnaih ber tu Mizo National Front (MNF) candidate K. Vanlalvena chu vote 68,288 in a hneh a ni.
Candidate te vote hmuh zat (an hmuh tam dan indawtin) tarlan a ni :-
Sl. No. Name of Candidate Party Name Valid EVM Votes Valid Postal Votes Total
1. Richard Vanlalhmangaiha ZPM 206377 2175 208552
2. K. Vanlalvena MNF 139532 732 140264
3. Lalbiakzama INC 97761 834 98595
4. Vanlalhmuaka BJP 33009 524 33533
5. Lalhriatrenga Chhangte Independent 4663 43 4706
6. Rita Malsawmi MPC 3681 112 3793
7. NOTA 1866 27 1893
TOTAL 486889 4447 491336
Vote tla zawng zawng hi 4,91,529 a ni a, Postall Ballot vote tla zingah vote thi (invalid vote) 193 a awm a ni.
Lok Sabha Inthlanpui 2024 neih zawh taka lawmthu sawina
Aizawl, : Lok Sabha Inthlanpui 2024-a Mizoram Parliamentary Constituency atana Returning Officer Nazuk Kumar, Aizawl DC ni bawk chuan inthlanpui neih zawh takah 5.6.2024 khan lawmthu a sawi.
Election Commission of India in General Election to Lok Sabha, 2024 inthlanpui neih hun tur a rawn puan atanga inthlanna tluang tak leh hlawhtling taka neih a nih theih nana hmalatu tam tak te chungah lawmthu a sawi a. Chief Electoral Office in min kaihhruaina te, District dang Deputy Commissioners/ ARO te leh Aizawl District-a Asst. Returning Officers tha tak tak te min tawiawmna hlu tak avangin an chungah lawmthu ka sawi a, team hrang hranga Nodal Officers te, Assembly Segment tina Officers-in-Charge te leh Master Trainers te, Sector Officers te leh Election Officers zawng zawng te bakah Aizawl DC Office staff zawng zawng te chungah min tawiawmna tha tak avangin lawmthu a sawi a ni.
ZAGCS Collection Centre tlawh
Aizawl : June 5, 2024 khan Horticulture Minister Prof. Lalnilawma chuan ZAGCS (Zo Anthurium Growers Cooperative Society Ltd.) Collection Centre, Ramhlun North a mi a tlawh.
Prof. Lalnilawma chuan thu sawiin Horticulture Department-in ZAGCS-te Anthurium hlawhtling taka chin leh market a nih theihna tura hma a lakpuina-ah lawmawm a tih thu sawiin, an thawnchhuah tur sawngbawlna hmun a tak ngeia a hmuh atanga ZAGCS te'n hma an lak nasatzia leh Anthurium hmanga Mizoram an tihhmingthatna-ah lawmthu a sawi a. ZAGCS te'n an harsatna tawh neuh neuh an thlen-ah a theih ang anga hmalakpui an nih tur thu leh Anthurium chu Mizo te’n tourism kan promote-na pakhat pawimawh tak a nih avangin Anthurium festival neih zel theih nise tih ZAGCS hruaitute rawtna pawh hmalakpui an nih mek thu a sawi bawk.
AMC Ward XIX Bye Election 4 ten nomination file
Aizawl : Aizawl Municipal Corporation (AMC) Ward XIX atana Bye Election neih tura candidate te hming thehluh theih hun (filing of nomination) chu June ni 6, 2024 tlai dar 3:00 PM thleng khan hun hawn a ni a. Political Party hrang hrang atangin candidate ten nomination an thehlut.
1) Effie Vanlalhmangaihi, Venghnuai
Symbol: Hand
Political Party: INC
2) Dr. Lalrinzuali Hrahsel, Kulikawn
Symbol: Star
Political Party: MNF
3) C. Malsawmtluangi, Hlimen Vengthlang
Symbol: Hat
Political Party: ZPM
4) K. Vanlalruati, Tlangnuam Vengthar
Symbol: Lotus
Political Party: BJP
Election Officer, Aizawl District Lalnunfela Chawngthu hovin a pisa ah he Bye Election atana campaign senso awm thei te leh a man zat tur bituk in (rate fixation) Municipal Returning Officer Lalmuansanga Ralte, Assistant Municipal Returning Officer KC Zalena, Election Expenditure Monitoring Nodal Officer Dr. K. Lalnghinglova, Media Nodal Officer Emily Lalrinpuii leh Political party pali aiawhte an thukhawm a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024