The Mizo Marriage and Inheritance of Property (Amendment) Bill 2026 pass

Aizawl: Mizo Hmeichhia ten hnamdang an neih hnua an inneihna chu Mizo dana pawm a nihlohna dan leh Tribal an nihna an fa ten an chhawm theihlohna tur, The Mizo Marriage and Inheritance of Property (Amendment) Bill, 2026 chu Assembly chuan lungrual takin tunkar khan an pawm a.

  He Dan siamthat turah hian Section 2-na an tih danglam chuan hmeichhia leh mipa Mizo an nih ve ve leh Mizo mipa hnamdang nupui a neite a huap dawn a, Mizo hmeichhia in hnamdang pasal a neihin a huap ve tawh dawn lo a. Hnamdang pasala nei Mizo hmeichhiate chuan hnam anga chanvo an hloh nual dawn a, an fate chuan an nu te Tribal nihna te an claim thei tawh dawn lo.

  Dan tharah chuan nupui pakhat aia tam neih (bigamy) a khap a, nupui pasal then ten midang an nei leh dawn a nih chuan an nupui/pasal hmasa te nen an inthen chiang tawh tih nemnghehna tur Divorce Certificate phut a ni tawh dawn a. 

     Hmeichhiain sum an chhuah chuan inneiha a chhawmluh piah lamah an nupaa an thawhchhuah dun atanga zaa 50 pel lovin hmeichhia in a chang ve thei tawh dawn a. 

  Sec 3 ah chuan Mizo tih sawifiahin Mizo leh Mizo kara piang chu Mizo an ni reng dawn a, dan anga fa lak pawh a huam a ni.

Heroin tam tham tak man

Aizawl: Central YMA-in City Branch YMA-te zone hrang hranga a then, Zone Anti Drugs Squad (ZADS) zinga Zone II-te chuan ni February 23 zan khan Heroin (No.4) Tic Tac bur 6 an man a. Hemi hnu hian CADS te kuta hlan niin, an ruihhlo lakna an chhuina kalzelah khawchhak lam atanga Heroin a hlawma lalluttu ber Vanlalena (43) s/o Zachunga (L) chu Thuampui Veng-ah an man.

  Vanlalena hian a Heroin semchhuah bang a dahna dik tak a sawi mai duh loh avangin a la dahna hmun a sawite chu tlaivar a umzui in, February 24 zan khan an inah a nupui a dah thattir thu a sawi a. A nupui thuzawhfiah a nih hnuah Heroin hawng 2 chu commode-a a paih vek tawh thu a sawi zet a, mahse an in a cheng ve an unaupa Lalrinkima (49), s/o Zachunga (L) chu ramhnuaiah a dah thattir thu a sawi leh ta zawk a ni.

  CADS, Excise Narco leh Thuampui Branch YMA-te chuan ramhnuai chu dapin, Heroin hawng 2 thuhruk chu an manchhuak ta a ni.

MAMB-in District 7 te tan inrawnkhawmna hun buatsaih

Aizawl: MAMB chuan February 24, 2026 khan Mizoram hmar lam district 7 - Aizawl, Serchhip, Champhai, Kolasib, Mamit, Khawzawl leh Saitual district-a District Agricultural Marketing Committee (DAMC) member te, Secondary Collection Centre (SSC) puipa te leh Society hruaitute te tan inrawnkhawmna hun, 'consulative meeting on thlai thar market' chu I&WR Auditorium, MINECO-ah a buatsaih.

  Inrawnkhawmna meeting hi Pi Ramdinliani, Secretary, A&FW Dept. & Member Secretary, MAMB chuan kaihhruaiin, Dr. KC Lalmalsawmzauva, Adviser to CM (HHP) & Co-Chairman, MAMB chuan consultative meeting khuhhawnna hun hmangin, PPT hmangin thlai thar lei leh hralh chungchanga Sawrkar thiltum (Visions and Objectives) kalkhawmte hrilhhriatna hun a hmang bawk.

  Inrawnkhawmna-ah hian sawhthing rate (Reserved Price) siam dan turte leh Thlai thar lei leh hralh kaihhnawih thil pawimawh hrang hrang khunkhan taka sawiho a ni hnuah Zohmingthanga, Member, MAMB chuan vote of thanks sawiin hun a khar ta a ni.

Mizoram-ah a vawikhat nan Laparoscopy hmangin Pancreas cancer zai

Aizawl : Zoram Medical College and Hospital, Falkawn ah Ril leh Pum lam (Gastroenterology) zir hona leh Surgical Workshop chu February ni 24, 2026 khan neih a ni a. He workshop hi Department of Surgery, ZMC&H leh Association of Surgeons of Mizoram te ?ang hoa buatsaih niin, Mizoram-a a hmasa ber turin Pancreas Cancer chu Verh (Laparoscopy) in zai a ni.

  Gastroenterology zirhonaah hian Manipal Hospital, Salt Lake, Kolkata atanga lo kal Doctor tan Pancreas Cancer hi an khawih a. Dr. Benjamine Khiangte, Medical Gastroenterologist (Gastro & Liver Clinic) nen tang hoin Endoscopic Ultrasound (EUS) chu a mamawh damlo mi pariat tan a thlawn veka tihsak an ni bawk. EUS hi sawrkar hospital ah Mizoram ah kalpui vawikhatna a ni bawk. 

  ZMC&H doctor-te chuan EUS khawl chu khawl tangkai tak a nih thu leh Mizoram pawna damlo thenkhat refer ngaih chhan a la nih avangin mipui tam zawk banphaka sawrkar hospitala neih ve theih hunah chuan harsatna tam tak a sutkian ngei an beisei thu an sawi.

Tuirial Bawlhhlawh paihna hmuna thawktu te tan Free Health nei

Aizawl : National Health Mission, NHM leh Aizawl Municipal Corporation (AMC) tangkawp-in Solid Waste Management System, Tuirial-a thawktu te tan February 23, 2026 khan One Day Health Check-up buatsaih a ni a, thawktu 100 chuang te hriselna endik an ni.

  He One Day Health Check-up hi Aizawl Day lawmna puala buatsaih a nih thu Joint Municipal Commissioner Lalremruata Kullai, chuan sawiin hnathawktu te chu he Health Checkup hi ngaipawimawh a, tangkai taka hmang turin a chah.

  He Health Check-up ah hian Test chi hrang hrang 13 vel a thlawnin tihsak niin ABHA Health ID siamsak zel an ni a, inentirte hi a thlawn in Damdawi pek an ni. An mamawh ang Vaccine pawh pek nghal an ni bawk.

  Specialist Doctor te, Sihphir UPHC, Zemabawk UPHC, Lawipui UPHC-a Doctor leh Staff te bakah MMU Aizawl East leh Tuirial UHWC a thawktu ten an hriselna hi an endik a ni.

ASF vawk suatte zangnadawmna nuai 89+ sem, Mizoram pumah nuai 1,559+ sem dawn

Aizawl: AH&Vety Minister C. Lalsawivunga chuan vawiin khan a office chamber-ah kum 2024 chhunga African Swine Fever (ASF) avanga vawk suatte zangnadawmna (ASF Culling Compensation) Rs.89,39,671.60/- chu beneficiary mi 10 hnenah a sem a, Mizoram puma ASF beneficiary-te hnena pek chhuah tur chu Cheng nuai 1,559.34 chu vawiin vek hian District khawpui tinah ASF Culling Compensation hi sem zui nghal tura ruahman a ni.

  African Swine Fever(ASF) avanga vawk suatte zangnadawmna (ASF Culling Compensation) hi sawrkar laipui chuan rate bitukin, Kg 15 hnuai lamah Rs.2,200, Kg 15-40 inkarah Rs.5,800, Kg 70-100 inkarah Rs.12,000 niin, Kg 100 chin chung lamah Rs.15,000 a ni a. AH&Vety Minister Office Chamber-a zangnadawmna sem zinga dawng hnem ber Zabiakthara, Hunthar Veng, Aizawl chuan Rs. 36,12,166.60/- a dawng a ni. 

EMS website ‘ems.mizoram.gov.in' tlangzarh

Aizawl : Sports & Youth Services Minister Lalnghinglova Hmar chuan February 26 khan Empowering Mizoram Sports hnuaia training/coaching dil duhte’n mobile phone hmanga awlsam zawka dilna an theh luh theihna tura duan EMS website ‘ems.mizoram.gov.in’ a tlangzarh. 

  Tlangzarhna inkhawm hi Minister Office Chamber-ah buatsaih niin Sports & Youth Services Department leh Mizoram State Sports Council hotute leh mi pawimawh dangte he hunah hian an tel a ni. Minister chuan EMS chu Mizo thalaite’n infiamna lama hma kan sawn theihna tur leh kum 2036-a India-in Olympic Games a thlen tura Mizo thalai tam lehzual an lan theihna tura sawrkar hma lakna pawimawh tak a nih thu sawiin Mizoram pum tuamchhuak sports coaching leh talent haichhuahna liantham kalpui tum a nih thu a sawi a, hmun kilkhawr zawka naupang kum 8–15 inkar talent nei tha tak tak, training mumal dawng si lote chu zawn chhuah a, an bana kaih a, Mizoram leh India aiawh thei tura chher chhuah tum an nih thu a sawi.

Budget pharh zawh-ah CM-in Press Conference nei

Aizawl : Chief Minister Lalduhoma, Finance Minister ni bawk February 26, 2026 khan Assembly House-ah Mizoram budget 2026-27 a pharh a. Chu mi zawhah Assembly Annexe Conference Hall-ah chanchinbumite kawmin Budget a pharh tak sawifiahna hi a nei zui a ni.

  16th Finance Commission in Horizontal Devolution 0.564% a Mizoram chan tur a rawn tihsan avangin kum 2026-27 chhung hian share of Central Taxes & Duties atangin Rs. 8608.08 crore a rawn ni a. 15th Finance Commission aia a sanna hi Rs. 976.80 crore a tling.

  Budget Estimate 2026-27 chuan Gross State Domectic Product (GSDP) hi Rs. 43,817.09 Crore ni turin a chhutlawk a, Revenue Receipts hi Rs. 2475.60 Crore niin Capital Receipts hi Rs. 2475.60 Crore a ni ang. A vaia belh khawm (Grant total of receipt/ Consolidated Fund) chu Rs. 17469.91 Crore a ni. Gross Expenditure chu Rs. 17076. 92 Crore a ni ang.

  Kum 2026-27 budget total receipt hian total expenditure hi Rs. 392.99 Crore in a khum dawn a. A khumna hi Public Account Liability tihhniamna atana hman tur a ni.

District Disposal Committee-in heroin no. 4 Rs. 9,18,000/- man hu hal ral

Aizawl: February 24 tlai khan Lunglei AP Tlanga Incinerator Centre-ah Lunglei District Disposal Committee (DCC) chuan an Chairman, Lunglei District Superintendent of Police J. Lalmuankima kaihhruaiin ruihhlo (heroin no. 4) gram 56.77 (Rs. 9,18,000/- man hu) an hal ral.

  Ruihhlo hal ralnaah hian DDC member-te - Lunglei Sub-Divisional Officer (Sadar), Lunglei Excise & Narcotics Assistant Commissioner, Lunglei Sub-Divisional Police Officer leh an ai awhte an tel a. Heroin no. 4 hal ral tak hi Lunglei Judicial Magistrate First Class-I-in phalna a pek anga hal ral (pre-trial dispose) a ni.

Aizawl East leh West DCSO building sak thar tur lungphum phum

Aizawl: Food, Civil Supplies and Consumers Affairs (FCS&CA) Department Minister B. Lalchhanzova, chuan Februaryr 25, 2026 khan Aizawl East leh Aizawl West District Civil Supplies Office (DCSO) building sak thar tur lungphum chu MINECO-ah a phum.

  Aizawl East leh West DCSO building hi cheng Vaibelchhe 8 senga SASCI 2024-25 (Part - I) atanga sak tur niin, Mizopa chhiara chhawng 6-a sak tur a ni a. A building pum hi square feet 18,341 tura ruahman a ni a, thla 30 chhunga sak zawh tura ruahman a ni. A sak hna hi Eastmen Consultancy, Aizawl ten an thawk dawn a ni.

  Lungphum phumna hun hi FCS&CA Secretary Teresy Vanlalhruaii’n a kaihruaia a, a sak hna thawk tur Eastmen Consultancy-ten hna kalpui dan turte sawifiahin, FCS&CA Addl. Secretary Dr Andrew H. Vanlaldika’n kalkhawmte lawmthu hrilhin hun a khar a ni.