Sazuk kapa puh mi pangnga Jail-ah khung

Aizawl : March 4, 2024 khan North Vanlaiphai Divisional Forest Officer hovin Sailulak khuaa Sazuk kapa puh East Lungdar tlangval pangnga te chu man an ni a, Court-a hruai an nih hnuah Serchhip District Jail, Chhiahtlang-ah khung nghal an ni.

North Vanlaiphai Divisional Forest Officer C. Lalkhawthanga hnen atanga ZALEN thudawn danin East Lungdar tlangval te hian Sailulak ramah hian sa an kap niin Sailulak atangin thu an dawng a, a kap tua puh te hi chuan satlaw an chhar niin an insawi thung. DFO chuan satlaw pawh ni mah se, sa humhalh bik an nih avangin leh India dan hnuaiah sawrkar ta a nih angin hma lak a nih thu a sawi.

Vaivakawn-ah chenna In kang

Aizawl : March 5, 2024 zing dar 4 rik hma deuh khan Vaivakawn ah Assam Type in pakhat a kang a, In kan chhan hi hriat mai theih a la ni lo.

Vaivakawn Branch YMA hruaitute hnen atanga ZALEN thudawn danin dar 4 rik hma deuh khan Vaivakawn Section-I, High School bula Zasangi In Assam type, PC Lianzika te luah chu a kang a, in dang kangkai lovin thelh a ni a, he in leh a chhung bungrua engemawzat a kang a. In luahtu nu Vanlalhluti hian hliam na vak lo a tuar a ni.

In hi a chhawng niin, a chung zawk chu In neitu Zasangi'n luahin, a bungraw dah nan hman a ni a, In kangah hian a bungruate chhan hman a ni. Hetihlai hian In hnuai (sethlam a sak) a awm PC. Lianzika te erawhin an bungrua an chan nual thung. In kan chhan hi he thu ziahlai thleng hi chuan hriat theih mai a la ni lo.

Aizawl-ah Zoram Ni hmang

Aizawl : Mizo Zirlai Pawl (MZP) General Headquarters, Aizawl buatsaihin March 5, 2024 hian School Education Conference Hall, Treasury Square-ah kum 1966 March 5-a Bomb hmanga Mizoram beih a nih champhaphak 'Zoram Ni' hman a ni a, Home Minister K. Sapdanga chuan khuallian niin a hmanpui.

Khuallian Home Minister K. Sapdanga chuan, "Mizo hnamin kan tawrhna hi theihnghilh chi a ni lova, MZP in a tha zawnga kumtin a hmang hi a lawmawm ka ti hle a. Jet Fighter hmanga Mizoram beih champhaphâk hi hnam hmangaih tharna a nih ngei ka beisei a ni," a ti a. "Khawvel hmun dangah pawh an ram leh hnamin harsatna an tawh ni hi a tha zawngin an hmang thin a. Japan rama America-in Hiroshima leh Nagasaki a bomb ni chu 'World Peace Day' tia hman thin a ni," a ti bawk.

Sumo atangin Saphu kawr an man

Aizawl : Environment, Forest & Climate Change Department Kolasib Division chuan dan lova lakluh Saphu kawr Kg 98 leh a phurtu March 6, 2024 khan an man.

Kolasib DFO Margaret Lalramchhani hnen atanga thudawn danin saphu kawr te hi phailam atanga Sumo service ML10B 6858 hmanga phurhluh a ni a, Vairengte Excise Checkgate-ah an bungrua te enfiah a nih hian saphu kawr an phur tih hriat a ni a, Forest department hotute hriattir an nih hnuah Excise department chuan Kolasib DFO Office thleng an rawn chhawm (escort) chho a ni.

Sumo khalhtu Daniala (29) s/o Ranjit, Salganga, Cachar chuan Shillong leh Aizawl inkar service thin a nih thu leh a thilphurh te chu Happy Valley, Shillong-a Sumo counter atanga a phurh thu a sawi a, counter nghaktute hian vawksa sarep tia sawiin Aizawl sumo counter-a dah turin an hrilh niin a sawi. 

Larsap leh MYC Chairman ten Sri City tlawh

Aizawl : March 6, 2024 khan Larsap Dr. Hari Babu Kambhampati leh MYC Chairman Malsawmzuala Ralte te chuan Andhra Pradesh-a Sri City Special Economic zone an tlawh a, Sri City Managing director leh thawktu dang ten lo dawngsawng.

SEZ chhunga inbun company hrang hrang heng - ISUZU, Colgate, Pepsico, Foxcon, Daikin, Havels, Kobelco etc. aiawhte nen thukhawmin, mizo thalaite tana hnathawh ve theih dan tur an sawiho.

Baryli'n Assembly rorel a kaihruai

Aizawl : March 7, 2024 khan Assembly budget session ah Baryl Vanneihsangi chu Panel of Chairman a nih angin, house rorel inkhawm a kaihruai a, hetiang a hmeichhia in rorel a kaihhruai hi Mizoram a thlen vawi khatna nia hriat a ni.

"Hmeichhia an la thut loh avangin Pi Chairman kan ti mai ang a, ti fuh kan tam dawn nge ti fuh lo kan tam dawn a hriat loh a, tihsual palh a awm pawhin helai hmun hi a zahawm avangin fiamthu nan leh hun khawhral nan hmang lo ila a tha a nge...," tiin speaker thutna a luah tirhin thuhma a sawi.

Union Minister-in JERC member thar ruat

Aizawl : 07.03.2024 khan Er. Benjamin L. Tlumtea chu Mizoram state aiawh member, Joint Electricity Regulatory Commission for Manipur & Mizoram atana appoint chu sawrkar laipuia Cabinet Minister for Power, New & Renewable Energy R. K. Singh hmaah video conferencing hmanga rinawmna thuthiam la in lak luh a ni.

Electricity Regulatory Commission hi Ministry of Power hnuaia statutory body (quasi-judicial) niin, electricity kaihhnawih tinrengah State a thuneitu sang ber niin Electricity Act, Rules, Standard of Performance a kenkawh bakah, Regulations leh Tariff te tichhuakin Manipur leh Mizoram state tan a thawk mek. He commission member-te pawh hi Ministry of Power, Govt. of India atanga thlanchhuah an ni a. Mizoram leh Manipur state aiawh member pakhat ve ve awmin Chairperson hi kum tin inthlakin, tunah hian Manipur state aiawh R. Thanga chu chairperson a ni mek a ni.

State Level Workshop on Sports and Gender hawng

Aizawl : Mizoram Football Association leh Women and Child Development, Govt. of Mizoram tangkawp chuan March 7, 2024 khan Police Headquarters Multipurpose Hall, Khatla-ah 'State Level Workshop on Sports and Gender - Challenges and Way Forward' an buatsaih. He hun hi Sports and Youth Services Minister Lalnghinglova Hmar chuan khuallian niin a hawng.

He hunah hian Minister Lalnghinglova Hmar chuan United Nations Sustainable Development Goal 5-na chu gender equality (mipa leh hmeichhe intluktlanna) a ni tih sawiin, sawrkarin hmeichhe hamthatna a ngaih pawimawh thu a sawi a, kumin 2024-25 budget-ah pawh gender budgeting a tel thu a sawi bawk a ni. Mizo hmeichhe infiammite tan a hmanrua leh hmunhmate (facility) a that tawk loh thu leh sawrkarin a theih ang ang a tihhmasawn a tum thu a sawi. 

State Level Skills Competition-2024 nei

Aizawl : Labour, Employment, Skill Development & Entrepreneurship (LESDE) buatsaih ni hnih awh State Level Skills Competition-2024 chu March 6, 2024 khan a vawikhat nan neih niin, State aiawha National Level Competition tel turin mi 16 thlanchhuah an ni.

Kharna programme ah thusawiin LESDE Department Addl. Secretary K Lalhmingliana chuan Mizo te Skills lama kan san zia leh India ramah pawh langsar thama an awm theih thu sawiin, Skills hmangin ram leh hnam hi nasa taka chawikan theih thu a sawi a. Thalaiteah Skill Development lama harhtharna a thleng zel a, heng avang hian kan ITI-a zir duhte pawh an in chan vek lo thin tiin, lehkha kan zir rualin thiam thil zirna ngaih pawimawha tul hle a ni a ti.

Dr Malsawmkimi leh NB Sanga Award hlan

Aizawl : March 5, 2024 khan Indian Institute of Horticultural Research (IIHR), Hesaraghatta Lake Post, Bangalore chuan Dr Malsawmkimi, Senior Scientist and Head, KVK Khawzawl chu Award of Excellence for Promotion and Spread of ICAR- IIHR Technologies an pe.

Award hi IIHR, Bengaluru-ah Proj. Sanjay Kumar Singh, Deputy Director General (Horti Science), ICAR, New Delhi chuan a hlan a ni. NB Sanga Chhangte, Rabung chu he hunah hian ‘Best Farmer Award’ pek a ni bawk.

Dr. Malsawmkimi hi IIHR Technology te kuthnathawktute hnena hlan chhawn kawngah a thawh that avangin chawimawina hi hlan a ni a. A kaihhruaina hnuaiah KVK Khawzawl hian fur laia Tomato Mizoramin a chin ve theih loh chhan te an lo zirchiang tawh a ni.

Silchar-a Mizoram Sawrkar hmunhmate tlawh

Aizawl : Mizoram Legislative Assembly Deputy Speaker Lalfamkima chuan March 4 khan Assam state-a Silchar hmuna Mizoram Sawrkar hmunhma - Mizoram House, Mizoram State Transport Terminal leh Mizoram Public Works Department (MPWD)-in hmunhma pathum an neih te a tlawh.

Deputy Speaker Lalfamkima chuan Mizoram Sawrkarin Silchar-a hmunhma a neihte dinhmun hre chiang tura tlawh a nih thu sawiin, he'ng hmunhmate hi humhalh a, chei that bakah, mipuite chhawr theih tura tihchangtlun lehzual a tul thu a sawi a. MPWD hmunhma pakhat Circuit Road-a awm chu, a luahtu chhungkaw hnihte an chhuah duh loh avanga harsatna awm chu a tul anga hma lakna kalpui a nih tur thu a sawi bawk.