Assembly House-a Chief Minister thusawi nawtreh turin ngen

Aizawl : Mizo Hmeichhe Insuihkhawm Pawl (MHIP) chuan Mizoram Legislative Assembly-in February 24, 2026-a ‘Mizo Marriage and Inheritance of Property (Amendment) Bill’ a pass tum a Chief Minister thusawi thenkhat chu nawt reh turin March 11, 2026 khan Assembly Speaker-ah ngenna an theh lut.

  MHIP chuan House-a bill put luh chungchang a sawi zauna-ah Chief Minister hian a bill chhunga awm si lo, Mizo Hmeichhia te rilru hlianna tam tak a sawi chu Speaker hnenah hian nawhreh turin an ngen a ni. 

  Governor hnenah pawh he bill hi ennawn-a siamthat a nih theih nan lehkha an thehlut bawk a, he bill-a Mizoram Hmeichhe Insuihkhawm Pawl tih a ziah chu Mizo Hmeichhe Insuihkhawm Pawl tih a siamthat a ni se tih an tarlang.

  Heng bakah hian he bill section 25-a Nupa inthen-a bungraw insem dan tur 50/50 tih anga sawi pawh a bill-ah chuan not exceeding 50% tih a ni a, hei pawh hi 50% tih a dah ni se an duh tih Governor-ah hian an thlen.

  MHIP chuan 2014 bill-a awm thin paih tawh a, hmeichhe personal property humhimna kha paih lovin a hma mi ang khan kalpui leh ni se tih chu an thlen bawk.

Aizawl District DCC/DLRC/D DLSC Meeting nei

Aizawl : March 10, 2026 khan Aizawl DC Pisapui Hall-ah District Consultative Committee(DCC)/ District Level Review Committee (DLRC)/ District Level Security Committee (DLSC) (for quarter ended December, 2025) meeting neih a ni. 

  Meeting hi DCC/DLRC/DLSC Chairman aiawhin Zoremsiama Hmar, Addl.DC chuan kaihruaiin,meeting-ah hian Quarter ended December 2025 thlenga Aizawl district chhunga Bank hrang hrang te hnathawh leh hmalakna te, Sawrkar Department nena sawrkar laipui schemes leh Projects hrang hrang te tih hlawhtling tura thawhho dan te leh Bank Security chungchang te thlir hova, huang zau taka sawi ho a ni.

  Quarter ended December 2025-a Aizawl District pumpuia overall CD ratio hi 45.46% niin, Quarter ended September 2025 (CD Ratio-51.69%) a ni laiin, quarter ended December 2025- ah chuan 6.21% a tla hniamin, CD Ratio hi 45.46 chauh a ni. Quarter ended December 2025 chhunga CD Ratio tam ber hi Indian Bank niin, 489.45% a ni a. A tlem ber hi YES Bank niin, 4.62% a ni thung.

  Aizawl district chhungah hian Bank 24 awmin, chung zing atang chuan CD ratio 20% hnuailam Bank 4 an awm a. 20% to 30% inkar nei Bank 1 awmin, 30% to 40% inkar nei bank 2 a awm a. 40% aia tam CD Ratio neih Bank 17 an awm mek a ni.

High School academic calendar chungchang ngaihtuah

Aizawl: School Education Minister Dr Vanlalthlana kaihhruainain 12.03.2026 khan High School academic calendar chungchang chu a pisa-ah School Education Department official-te nen sawi ho a ni.

  Meeting hian Mizoram Education Reforms Committee thut khawm vawi 14-na leh 15-na rawtna chu zir hovin a ngaihtuah a. Kum 2026-2027 High School academic session chu April ni 1, 2026 (Nilaini)-ah tan ni se tiin a rel.

  First Term exam leh result puan chu July ni 7 atanga July ni 17, 2026 chhunga peih fel hman tura tih a ni a. Second term chu July ni 21, 2026-a tan tura tih niin exam leh result puan chu October ni 19 atanga October ni 30, 2026 chhunga peih fel tura tih a ni.

  Third term hi November ni 3, 2026-a tan tura tih niin December ni 21, 2026 atanga January ni 5, 2027 inkar chu thlasik chawlh atana tih a ni a. Third term exam leh result puan hi January ni 18, 2027 atanga January ni 29, 2027 chhunga tih fel tura rel a ni.

Waste to Wealth Exhibition cum Competition

Aizawl : March ni 12 (Ningani) khân Mizoram Pollution Control Board (MPCB) chuan Dawrpui Multipurpose Hall-ah School leh College Eco-club-te tân thil/bungrua hman hlui/hluihlâwn tawh atanga thil hlû leh tangkai dang siamchhuah leh pho lanna leh inelna hun Waste to Wealth Exhibition cum Competition a buatsaih. 

  He hunah hian Mizoram hmun hrang hrang atangin zirlai naupangte’n thil hlui chi hrang hrang atanga an thil siam chhuah an pho chhuak a ni. He Exhibition cum Competition hi Category pathuma then niin Category I-ah Primary leh Middle School an inel a, Category II-ah High School leh Higher Secondary School-te leh Category III-ah College leh a chunglam. Category tina lâwmman latute chu Liankima Lailung, IFS (Rtd.), Chairman, MPCB-in lâwmman pawisa-fai leh Certificate a hlân a ni.

NERPC meeting vawi 31 na Aizawl-ah neih a ni

Aizawl: North Eastern Regional Power Committee (NERPC) Meeting vawi 31-na chu, KTP Youth Recreation Centre, Falkland, Aizawl-ah march 12, 2026 khan neih a ni. 

  Power & Electricity Department Minister F. Rodingliana’n hun hmanpuiin, Meghalaya Power Minister leh NERPC Chairman ni bawk Metbah Lyngdoh te, NERPC Member Secretary B. Lyngkhoi te bakah hmarchhak state hrang hrang atanga mi thiam leh hotu lian tak takte he hunah hian an tel a. Energy-a intodelhna tur te, kawlphetha leh infrastructure lama hmasawnna tur chungchangte sawi ho a ni.

  NERPC Meeting vawi 31-naah hian hma lak ho theihna dan tur hrang hrangte rel niin India hmarchhaka ramngaw leh tui chakna te chu hlawk tak leh dik taka hman a nih theih dan turte sawi ho a ni.

  NERPC hi India hmarchhak State 7 te'n power supply hnianghnar leh rintlak an neih theih nan Electricity Act, 2003 hnuaia din a ni.

Damlo awmpuitute riahna tur 'Patient's Attendants' Shelter' hawng

Aizawl: DAY-NULM hnuaia sak, damlo awmpuitute riahbuk 'Patient's Attendants' Shelter' Dinthar Unit chu March 10, 2026 khan hawn a ni a. Lalmalsawma Pachuau, Commissioner & Secretary, Urban Development & Poverty Alleviation (UD&PA) Department chuan khuallian niin a hmanpui a, lungphun a hawng nghal bawk.

  Dinthar-a damlo enkawltute riahbuk hi Shelter for Urban Homeless (SUH), DAY-NULM hnuaia sak niin, 160.84 square metre-a zau a ni a. Chhawng thum niin, khum 15 dah sa bakah Dinthar Branch YMA thahnem ngaihna-in khum engemaw zat dah belh a ni a. Mutbu leh bungrua engemawzat awmin, project cost hi cheng 48,32,023 a ni.

NEC-in atangin Mizoram vaibelchhe 5.73 dawng

Aizawl: North Eastern Council (NEC) chuan February 2026 chhung khan Hmarchhak bial puma hmasawnna hna hrang hrang thawh nan Rs. 67,41,09,587/- a sem chhuak a. He sum sem chhuah zingah hian Mizoram chuan Rs. 5,73,69,245/- a dawng tih sawrkar thuchhuak chuan March 9, 2026 a tarlang.

  Mizoram-a Project Pawimawh Thlante:

• West Phaileng Market Building: Mamit District-a thlai thar zawrhna hmun (Market Building) sakna tur.

• Potato Seed Farm: Tissue Culture leh ARC thiamna hmanga Alu chi tha siam chhuahna tur.

• Central Medical Warehouse, Aizawl: Damdawi leh inenkawlna hmanrua vawn thatna leh sem darhna hmunpui dinna tur.

• State Veterinary Information and Resource Centre: Ran vulhtute tana thiamna leh hriatna thar inhrilh hriatna hmun dinna tur.

UD&PA-in Bungraw inthleng runpui buatsaih

Aizawl: Urban Development & Poverty Alleviation (UD&PA) Department buatsaih ‘Sikul Bungraw Inthleng Runpui – Swap and Save Campaign’ chu March 9, 2026 khan Sanitation Site Office, Tuikual-ah Lalmalsawma Pachuau, Commissioner and Secretary, UD&PA chuan khuallian niin Aizawl leh District hrang hranga hlawk taka mi hrang hrangin an hman theih nan a hawng.

  Nikum khan Swap and Save Campaign hi Aizawl veng pasarih (7) leh District headquarters tinah neih niin, mipuiin an hlut hle a. Nikuma campaign neih chhunga bungraw lut zawng zawng chu 20,386 niin, chhuak zat 12,596 a ni.

  March ni 9 – 21, 2026 chhungin he campaign hi kalpui a ni ang a. Centre hi Aizawl khawpuia veng pariat (8)-ah leh district headquarters tinah hawn a ni. He Centre hi zirlai naupang session thar kai mai turte’n an zirlaibu hman tawh loh, uniform hak tawh loh te leh zirlai kaihhnawih (school items) an rawn donate theih nan leh, a la hmang tangkai turte’n an hman nawn ve leh theih nana awlsam zawk leh a thlawna an lak theihna tur hmun a ni.

  3R Centre awmna hmun te: Govt. Multiutility Centre, Thakthing ; AMC Plaza, Bawngkawn ; Sanitation Site Office, Near Solomon’s Cave, Tuikual ; Dawrpui Middle School, Dawrpui ; Local Council House, Vaivakawn ; Local Council House, Durtlang North ; Local Council House, ITI leh Community Hall, Armed Veng South