CADC-ah BJP chak

Aizawl : Chakma Autonomous District Council (CADC)-a Village Council inthlan March 13, 2025-a neih zawh takah BJP chuan Village Council 88-ah khaw 64-ah sawrkarna an la.

   CADC inthlan ah hian BJP Mizoram chuan hnehna changin, Village Council 88 awm-ah Village Council 64-ah BJP Sawrkarna an siam thei a, Seat awm zawng zawng 516 atangin Seat 364 lai BJP chuan an la a ni.

Village Profile Apps tlangzarh

Aizawl : March 12, 2025 khan Central YMA Committee Room-ah ram chhunga veng leh khua leh mihring chengte dinhmun dah kimchang dah khawmna tur 'YMA Village Profile Apps' tlangzarhna hun hman a ni a, Lalhmachhuana Central YMA President in a tlangzarh.

   Village Profile Apps hi Lailen Consulting Private Ltd siam a ni a, Mizoram Sawrkar nen tang tlang siam a ni. YMA mai bakah Sawrkar tana Data tangkai tak tur a ni. Village Profile siamna atan hian Home Department atangin Rs. Nuai 10 an dawng. Village Profile App hi Aizawl City Branch 6 ah hman chhin phawt tura ruahman a ni.

Khawlrinpuii kutah Zakapa Award hlan

Aizawl : Women & Child Development, Government of Mizoram chuan March 11, 2025 khan International Women’s Day Lawmna leh Zakapa Award semna hun an hmang a, International Women’s Day lawmna puala Mizo Lal huaisen, hmeichhiate humhimna kawnga thawhhlawk, Zakapa hming chawia Award siam Zakapa Award chu Khatla South nu Khawlrinpuii hnenah hlan a ni.

   Dawrpui Multipurpose Centre, Dawrpui Aizawla hun buatsaih-ah hian Lalrinpuii, Minister, SWTA & WCD chu khuallian niin Baryl Vanneihsangi, MLA leh Prova Chakma, MLA te chu khual zahawm an ni. He ni puala buatsaih chawimawina dawng mi 33 te hnenah Women Awardees for IWD Awards 2025 hnuaiah award te hlan a ni.

PHC tan Ambulance hlan

Aizawl : March 10, 2025 khan Old Secretariat Building-ah Lalmuanpuia Punte Adviser to CM chuan a bial chhung Khawlailung Primary Health Center - a hman turin Ambulance a hlan a, Dr. Vanlalhruaii Medical Officer chuan PHC, Khawlailung aiawhin a dawng.

   Lalmuanpuia Punte Adviser to CM leh Hrangturzo Bialtu MLA ni bawk chuan, "Khawlailung PHC hian tehna paltlang ngai 'IPA' a tlin theihna tur atan Ambulance an mamawh a, chumi avanga pek an ni. Hrangturzo bial mipui pawhin a zar kan zo zel ang a, mi ngaih ah chuan thil ropui tak ni lo mah se, mipui mamawhna anga hma laknaah sawrkar nen tangkawpin a zar kan la zo zel pawh ka beisei bawk a ni," a ti.

YMA dintu zingami tupa in Central YMA a tlawh

Aizawl March 10, 2025 khan YMA dintute zinga mi leh Treasurer hmasa ber Rev David Edwards (Zorema Pa) tupa Dr. Owain Edwards leh a fapa Joseff Edwards ten Central YMA Office an tlawh a, Central YMA President Lalhmachhuana leh hruaitu dang ten an lo dawng sawng.

   Dr. Oswain Edwards leh a fapa te hian an pu, Rev David Edwards (Zorema Pa) leh Zosap Missionary dang ten YMA an lo din chungchang leh tun thlenga YMA lo ding chho zel an hmuhin ropui an ti a, an ngaihlu hle a ni.

   Rev David Edwards( Zorema Pa) kha YMA Treasurer hmasa ber niin kum 1935,1937, 1938-ah Treasurer a ni.

MYC leh Taiwan Consulting firm ten inremna ziak

Aizawl: Mizoram Youth Commission (MYC) leh TOP International Human Resources Management Consulting, Taiwan te chuan March 14 khan Labour, Employment, Skill Development & Entrepreneurship (LESDE) Minister Lalnghinglova Hmar kaihhruainain, MYC Chairman Office Chamber, MINECO, Khatla-ah thawhhona tura bultanna 'Letter of Intent (LOI)' an ziak.

   Mizoram Youth Commission aiawhin Chairman Malsawmzuala Ralte leh TOP International Human Resources Management Consulting aiawhin Chairman Angus Shih ten hming an ziak. Mizoram Youth Commission aiawhin V. Lalmuanpuii, Secretary, MYC leh Jonathan Lalremruata, OSD to CM bakah TOP International Human Resources Management Consulting hotute'n an tawiawm a ni.

Ni khat awh Purple Fair nei

Aizawl : Department of Empowerment for Persons with Disabilities, Ministry of Social Justice & Empowerment bultumin March 12, 2025 khan National Institute for Persons with Disabilities - Regional Centre- Aizawl chuan Pianphunga Rualbanlote tan, an themthiamna hrang hrang entirna leh intihhlimna hun bakah, hnam lam leh zaite entir a, an thil siamte zawrh chhuah na hun "Purple Fair," chu AR Lammual, Aizawlah a buatsaih a. He hun hi Er. Lalhriatpuia Deputy Commissioner, Aizawl chuan khuallian niin a hmanpui.

   He hunah hian rualbanlote tan an thilsiam te an zawrh chhuah na hmun tur stall 15 siamsak an ni a. Hnam lam hrang hrang Chheih lam, Siktuithiang lam, Sarlamkai leh live band te entira ngaihthlak niin, infiamna chi hrang hrang hmanga intihhlimna hun hman a ni a. Rualbanlote hmanraw mamawh hrang hrangte sem nghal a ni.

Chief Minister’s Inventors Challenge nei

Aizawl : March 11, 2025 khan Chief Minister’s Bana Kaih Scheme hnuaiah khawl thar siamtute tan Inventors’ Challenge Serchhip DC Meeting Hall-ah buatsaih a ni a, he inelna atan hian Khawl siam dan tur idea chauh emaw, khawl siam tawh (prototype) emaw pawh pawm niin, mi 7 in an thil siamte an entir a ni. 

   Khawlte hi endikna neih nghal niin lawmman sem nghal a ni a, lawmman dawngtute chu- Pakhatna- Lalhruaitluanga, New Serchhip niin Rs. 25000 hlan a ni a, pahnihna- Lalchhuangliana, Serchhip hnenah Rs.15000 leh pathumna- J. Lalremruata, Chhiahtlang hnenah Rs. 10000 hlan a ni a, State Level inelnaah an tel chhunzawm dawn a ni. Anni bakah hian Consolation prize mi 4 hnenah pek an ni.

NH Monitoring Team ten kawngpui siam endik

Aizawl : Kolasib District National Highway Monitoring Team te chuan National Highway thawmthat leh Black Topping kalpui mek ; Kolasib to Kawnpui Area, Balaji construction company te hnathawh mek chu March 11, 2025 khan a hmunah an tlawh.

   Monitoring team te ina Thingdawl khawchhung Area a Kawngpui siam mek a Complaint an neih te chu a siamtu, Balaji lam hian thuam that nghal an tum thu dawn a ni a. Contractor te hnathawh mek chu a tha thawkhat ni a an hmuh thu leh, an khawl leh hmanraw dang te pawh a lungawi thlak niin an sawi.

Sanjha Utsav (SHG Mela) Festival of Togetherness hawng

Aizawl : March 10, 2025 khan Aijal Club Park-ah Urban Development & Poverty Alleviation Department buatsaih, 'Sanjha Utsav (SHG Mela) Festival of Togetherness’ hawnna hun hman a ni a. Urban Development & Poverty Alleviation Department Minister K.Sapdanga chuan ni 5 awh tur Self Help Group Mela hi khuallian niin a hawng.

   SHG Mela hawnna hun ah hian SGH hma la tha panga; Chawngtinleri SHG, Jenny SHG, Mass SHG, Nui hiau SHG leh Sari SHG-te hnen ah lawmpuina thilpek hlan a ni a. Mela hi March ni 14 thleng neih a a, SHG kutchhuak thil chi hrang hrang phochhuahna stall 27 leh eitur zawrhna stall 7 a awm a ni.

One Day Training for Anganwadi Workers nei

Aizawl: Science Technology & Innovation Hub Mizoram leh Women & Child Development Department tangkawpin an buatsaih, One Day Training for Anganwadi Workers on Health & Nutrition, Ayurveda & Digital Safety chu March 10, 2025 khan Rural Development changtu leh Minister of State ni bawk Prof. Lalnilawma chuan Synod Conference Centre, Mission Veng, Aizawlah khuallian niin a hmanpui.

   Training-ah hian Tlangnuam Block huamchhunga Anganwadi Workers 80 chuang an kalkhawm a. Hun hniha then niin, Thupui hrang hrang hmangin STI Hub Project Staff te chuan zirtirna an pe a ni.

   STI Hub Mizoram hi Mizoram University leh Amrita Vishwa Vidyapeetham, Kerela te tangkawpin an enkawl a ni.

NIT Mizoram chungchang House-ah sawichhuak

Aizawl : Parliament Budget session thawh hnihna tan ni ah 10.3.2025 khan Mizoram Rajya Sabha MP K.Vanlalvena chuan NIT Mizoram in hun rei tak atanga harsatna a tawh chung chang a sawi chhuak.

   K.Vanlalvena chuan he harsatna sutkian sak tura Union Minister of Forest and Climate Change Bhupendra Yadav-a hnena a ngenna te tihhlawhtlin a nih avanga lawmthu a sawi a, NIT Mizoramin Forest Dept hnena pawisa kan chawi tur zat chu nasa taka tih hniam ni tawh mahse Mizoram sum harsatna hriat saka a bo a bang awm lova nuai bo sak turin Rajya Sabha MP chuan sawrkar laipui a ngen a ni.

Hmun hniha kawlpetha tihchangtlunna hawng

Aizawl : March 8 khan Power Minister F Rodingliana'n hmuh hnih ah kawlpetha tihchangtlunna a hawng a. Minister hawn te hi Sihmui atanga Zuangtui (Luangmual paltlanga) Sub-Station 132 kV Single Circuit Line leh 2X10MVA 33/11kV Chite Sub-Station bun thar te an ni.

   Chite Sub-Station hawnna ah hian Minister Pu C Lalsawivunga leh Ex- Minister R. Lalzirliana Power & Electricity lo enkawl thin te pawh an tel a ni.

   132kV line Sihhmui to Zuangtui Via Luangmual Sub-Station hawnna hi 132kV Sub-Station, Zuangtui Control Room-ah neih niin, hemi hnu hian 2x10MVA, 33/11kV Chite Sub-Station hawnna chu Chite Sub-Station hmunah neih zui nghal a ni.

   132kV (Sihmui to Zuangtui) line thar hian Mizoram 132kV Sub-Station lian pathum - Zuangtui, Luangmual leh Sihhmui te a thlun zawm vek a ni.

   Chite Sub-Station hi Ministry of DoNER hnuaia North Eastern Special Infrastructure Development Scheme (NESIDS) atangin thawh a ni a, senso zawng zawng Rs 10,28,57,992.00 hi DoNER in a tum vek a ni.