Lokayukta chairperson thar

Aizawl : March 13, 2024 khan Larsap chuan Mizoram Lokayukta chairperson a tan Lalmalsawma, IAS (Rtd) a ruat.

   Lokayukta chairperson kum 5 chhung emaw, kum 70 a tlin thleng emaw a thawk ang. Chairperson atana ruat Lalmalsawma, IAS (Rtd) hi Mizoram chief secretary hlui niin, CS a nih lai a pension a ni.

   Lokayukta chairperson hmasa ber leh la awmchhun chu C. Lalsawta, IAS (Rtd) niin, sawrkar hmasa hunlai khan chairperson atan lakluh a ni a, IAS (Rtd) vek in a thlak dawn a ni.

MZP-in CAA Rules hal || AMC hnalak sut turin phut

Aizawl : MZP General Headquarters, Adviser & Extended OB Meeting chu March 12, 2024 khan an thukhawm a, India Citizenship (Amendment) Rules, 2024 nimina tihchhuah chungchang leh Aizawl Municipal Coorporation (AMC) hnuaia hnalak dan diklo chungchang an rel.

   MZP chuan he hna la tur hian Dan angin Advertisment chhuah a nih loh bakah, State sawrkar phalna-in an lak hriat a ni lo a, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan diklo hi MZP chuan tun kar chhung (March ni 15) ral hma ngeia sut turin AMC hotute an ngen a ni.

   Citizenship (Amendment) Rules 2024, March 11, 2024 a tihchhuah chu North East Students’ Organisation (NESO)-in tunhma atanga a dodal tawh a nih avangin, North East State tinah a order copy hal tura tih angin MZP chuan Citizenship (Amendment) Rules 2024 copy chu MZP pisapui kawtah a hal a ni.

ZPM Thalai President thar Jeje Lalpekhlua

Aizawl : March 11, 2024 khan ZPM Party General Headquarters President Lalliansawta chuan party dan bu 14:1 (5) in thuneihna a pek hmanga thuchhuah siamin Jeje Lalpekhlua, South Tuipui Bialtu MLA chu Thalai President thar atan a ruat.

   Jeje Lalpekhlua, South Tuipui Bialtu MLA, bakah hian a thawhpui tur Vice President pahnih - Laltanpuia Zote, Bethlehem Vengthlang leh Zoramchhana Sailo, Chanmari bakah Treasurer atan R. Lalmalsawma, Huntharte chu ruat an ni bawk.

T.A.P For Training of Tourist Service Providers in Mizoram hmang

Aizawl : March 11, 2024 khan ni thum awh ‘Tourism Awareness Programme (T.A.P) For Training of Tourist Service Providers in Mizoram’ chu Chaltlang Tourist Lodge, Conference Hall-ah Tourism Minister Lalrinpuii chuan khuallian niin a hawng.

   Mizoram sorkar chuan Allocation of Business a tih chhuah ah, Tourist Service Providers-te: Travel Agents, Tour Operators, Accommodation Units, Catering Units leh Restaurants, Spa leh Resort te chu Tourism Department hnuaiah dahin, Tourism Department guidelines, Mizoram Registration of Tourist Trade Act-2020 chu a duang a ni. Hemi hnuaiah hian Tourist Service Providers-te hi in register vek tura duan a ni.

Chief Minister leh College zirtirtu te inkawm

Aizawl : Chief Minister Lalduhoma chuan March 12, 2024 khan Assembly House CM Recess Roomah Mizoram College Teachers' Association hruaitute a kawm a. An harsatna te a ngaihthlaksak.

   Chief Minister hian, sawrkarin Mizoram Education Service siam a tum thu leh an thil thlen te chu mithiam zawkte nena an lo zirchian tur thu a hrilh a ni.

   MCTA hruaitute hian sawrkar thar chibai buk pahin an pawl khawmpuiin a lo rel tawh thil pawimawhte a hnenah an thlen tih an sawi a. Ram mamawh mila UGC dan ang thlapa zirtirtu lak (direct recruitment) zel tha an tih thu thlenin zirtirtu chi hrang tam lutuk chu tha lo va an hriat thu leh hei hian kan higher education quality a tichhia nia an ngaih thu an sawi.

UD&PA Minister K. Sapdanga'n Vaivakawn Bazar enfiah

Aizawl : March 14, 2024 khan Urban Development & Poverty Alleviation Minister K. Sapdanga chuan Vaivakawn Bazar chu a enfiah a, Minister of State Prof. Lalnilawma, Minister of State Lalnghinglova Hmar (bialtu MLA ni bawk) leh W. Chhuanawma, MLA te a tel bawk.

   He hunah hian YMA, Local Council leh veng chhung mi dangten an lo dawngsawng a, a hmunhma leh a chhung lam fan puiin harsatna awm chi hrang hrang te an sawi pui a. RK Road, Vaivakawn an en bawk a, siamthat dan tur leh mipui tana kawng awlsam zawk siam dan tur an en bawk.

   Minister Lalnghinglova Hmar, Vaivakawn YMA leh Local Council lam hotuten thu an sawi tel bawk a ni.

Short Film lawmman sem

Aizawl : March 14, 2024 khan I&PR Auditorium-ah Department of Information & Public Relations leh Mizoram Film Forum-te tang kawpin a an buatsaih Short Film Making Competition Result Puanna chu I&PR Director C.Lalnunkima kaihhruaina hnuaiah neih a ni a. Teresy Vanlalhruaii, Secretary, I&PR chuan khuallian niin a hmanpui.

   Short Film Making Competition buatsaihah hian lawmman dawngtute chu:

Pakhatna : "Romawii" (Orientation Media te siam)

Pahnihna : "Sal Nula" (FJS Pictures Production te siam)

Pathumna : "Lawmpa" (Mart VIsual Inc. te siam)

   Pakhatna hian cheng Nuai 2 a dawng a. Pahnihna hian cheng Nuai 1.5 dawngin Pathumna hian cheng Nuai 1 a dawng a ni. Hei bakah hian an vaiin citation an dawng vek bawk a ni.

   Consolation Prize hi Raldawna leh Tumchhingi, AZ Entertainment siam te, Slice of Insurgency, Image Station siam te leh Liankhama Hun Laia Thil Thlengte, AZV Production siamte chu hlan an ni bawk.

   Huang hrang hranga lawmman dawngtute an ni.

Best Director : T.C. Vanlalzauva (Romawii)

Best Actor : Jason Lalrinngheta Khiangte (Slice of Insurgency)

Best Actress : Melody Lalrindiki (Romawii)

Best Screenplay : Zova Hnamte (Romawii)

ASCL in Motor khu endikna Mobile Pollution Testing Vehicle 5 MPCB hnenah hlan

Aizawl : Aizawl Smart City Limited (ASCL) hmalakna hnuaiah motor khu endikna lirthei ‘Mobile Pollution Testing Vehicles’ panga (5) lei chu te chu mipuite hman theih turin March 14 khan Lalmalsawma Pachuau, Secretary, Urban Development & Poverty Alleviation in Mizoram Pollution Control Board (MPCB) hnenah a hlan.

   He ruahmanna hi Smart Cities Mission hnuaia hmalakna niin motor khu endikna lirthei panga man hi nuai 55 a ni a, a enkawl zui hna leh a hman dan tur duan fel hi MPCB kutah a awm a ni. Heng pollution testna lirthei te hian harsatna leh hun tam tak sen ngai thin chu a chhawk zangkhai beisei a ni.

Project Monitoring Committee thukhawm

Aizawl : Mizoram State Project Monitoring Committee te chu an Chairman Lalduhoma, Chief Minister hovin CM Conference Hall-ah March 14, 2024 khan an thukhawm a, an hnathawh dan tur thil pawimawh te an rel.

   Project Monitoring Committee te hian Mizorama hmasawnna hna thawk mektu contractor zawng zawngte chu tha taka Monitoring Committee hi lo thawhpui turin a sawm a, mipuite pawh an khua leh venga hnathawh mekte tha tawk lova an hriat chuan Project Monitoring Committee hnenah thlen thin turin an ngen a ni.

AH&Vety Minister C.Lalsawivunga’n Thenzawl Vety farm a tlawh

Aizawl : March 15, 2024 khan Animal Husbandary and Veterinary (AH&Vety) Department changtu C Lalsawivunga chuan Thenzawla AH&Vety farm a tlawh a. Tihchangtlun lehzual dan tur ngaihtuahin an hmalak mekna leh hmachhawp te a hmunah a enfiah.

   C Lalsawivunga chuan Thenzawl Vety farm hi chipchiar takin a fang a. Se vulhna hmun te, Ar vulhna (poultry farm) te, Kel chi tha inthlahpunna tur hmunhma te, zovawk farm te, Fodder siamna hmunpui te a tlawh a. Heng an hmalak mekna te chak leh zuala a kal theih nan Vety farm humhalh a tulzia sawiin C Lalsawivunga chuan khawtlang hruaitute, VC leh mipui mimir ten a hmunhma humhalh pui turin a ngen a. Department lam pawhin fencing tha zawk siam dan tur ngaihtuah an tum thu a sawi bawk.

H&FW Department Review Meeting nei

Aizawl : Ni 2 chhung awh tur National Health Mission State Level Review Meeting chu March 14, 2024 Directorate of Hospital & Medical Education Auditorium, MINECO ah neih a ni a. H&FW minister Lalrinpuii chu khuallian niin, Esther Lalruatkimi, Principal Secretary, H&FW Department chuan Review Meeting hi a kaihruai a ni.

   Khuallian Lallrinpuii, Hon’ble Minister, H&FW chuan vawiin hi World Kidney Day a ni a, Kidney hrisel tura kan inzirtir nasat a tul thu thuhma-ah a sawi a. National Health Mission hi Ministry pawhin a ngaih pawimawh em em a ni a, thawktu te pawhin hlawh lak nana thawk mai ni lova, mipuite hrisel nana thawk kan ni tih hrereng chunga thawk turin a chah.

   Hun vawn dik kawngah hmasawn zel tura chah in, Programme Officer te leh Staff zawng zawng te chu mahni programme theuh-a thahnemngai taka thawk turin leh Health Department tana theihtawp chhuah zel turin a chah bawk.

IG Assam Rifles (East)-in Governor kawm

Aizawl : Major General Suresh Kumar Bhambhu, SM, IG Assam Rifles (East) chuan March 12 khan Governor Dr Hari Babu Kambhampati chu Raj Bhavan-ah a hmu.

   Major General Suresh Kumar Bhambhu chuan Governor hnenah Assam Rifles-in Mizorama an hmalakna tur pawimawh, a bik takin recruitment process chungchang an sawi ho a ni. Courtesy meeting-ah hian Assam Rifles officers dang ho pawh an tel ve a ni.

LESDE Department leh Mizoram KVIB ten thawhhona thuthlung ziak

Aizawl : March 12, 2024 khan Labour, Employment, Skill Development and Entrepreneurship Department, Govt. of Mizoram leh Mizoram Khadi & Village Industries Board chuan Minister of State Lalnghinglova Hmar chamber-ah thawhhona thuthlung an ziak fel.

   He hunah hian Minister of State Lalnghinglova Hmarin Mizo thalaiten skill development an mamawh zia sawiin, hetiang thawhhona thuthlung an siam thei hi lawmawm a tih thu a sawi. Thawhhona tha tak an neih theih nan theih tawp chhuah a ngaih thu a sawi a, thawhhona dang pawh a awm zel theih a beisei thu a sawi bawk.

   Thawhhona thuthlung an ziahah hian skill development activity chi hrang hrang a inpui tawn turin thu an tiam a, LESDE department-in sawrkar scheme leh programme a lo buaipui ang a, KVIB hian KVI training centre leh thil dang hman theih turin a lo ruahman ang.

I&PR Minister-in MJA Press Tour of Tripura vailiam

Aizawl March 14, 2024 khan I&PR Minister Dr. Vanlalthlana chuan Information & Public Relations Department-in a buatsaih, Press Tour of Tripura a kal chhuak tur Journalist 15 leh Official 2 te chu I&PR Office kawt atangin a vailiam.

   Press Tour of Tripura-ah hian Tour Leader chu Malsawmsanga, Dy. Director, I&PR Department niin Lalrinmawia Sailo, Gen. Secretary, MJA Gen Hqrs. chu Asst Leader a ni thung. He press Tour atan hian District hrang hrang atangin MJA member thlanchhuah niin an vaiin mi 15 an tel thei a, I&PR Department atangin Officer pakhat leh Staff pakhat an tel bawk a ni.