MyGOV Mizoram ngaihtuahin thukhawm
Aizawl : March 13 khan Chief Secretary hovin MyGOV Mizoram chungchang ngaihtuahin sawrkar Department hotute an thutkhawm.
    Chief Secretary chuan MyGOV platform tha taka kalpui anih theihna turin deparment te thawhpuina tha a ngen. MyGOV platform hian a tum ber chu mipui hnena sawrkar hnuhhnaih a ni a, sawrkarin thutlukna a siam turah mipuite tel ve a, mipuiten sawrkar an khalhngil theihna tur pawimawh tak anih thu a sawi.

Mizo hmarchate Kg. 7500 USA-a thawn tur vailiam
Aizawl : March 14, 2023 khan Lunglei, Siaha leh Lawngtlai District a tharchhuah Mizo hmarchate (Bird's Eye Chilli) Kg. 7500 chu Nevada, USA a thawnchhuah program chu YMA Run, Haulawng, Lunglei District-ah neih a ni a, Agriculture Minister C.Lalrinsanga chuan a vailiam a ni.
    Mizo hmarchate USA-a thawnchhuah hi International Competence Centre for Organic Agriculture (ICCOA) leh Mission Organic Mizoram (MOM), Department of Agriculture te tangkawp hmalakna niin Mission Organic Value Chain Development for North Eastern Region (MOVCD-NER) hnuaia hmalakna a ni.

Minister portfolio tidanglam
Aizawl : Mizoram Sawrkar Political and Cabinet Department chuan March 14 khan hriattirna tichhuakin Mizoram Chief Minister rawtna angin Minister/Minister of State te Department chan chu a tidanglam.
    Minister R. Lalzirliana chan thin District Council & Minority Affairs Deptt. chu Minister Robert Romawia chanah dah a ni. Ti hian Robert Romawia Royte, Minister of State hian Sports & Youth Services Deptt., Tourism Deptt., Information & Communication Technology Deptt. leh District Council & Minority Affairs Deptt hi a chang ta a, R. Lalzirliana Minister hian Power & Electricity Deptt., Art & Culture Deptt., Land Resources, Soil & Water Conservation Deptt te a chang ta a ni. 

LMC Candidate leh Election Agent te zirtirna pe
Aizawl : March 15 khan Lunglei-ah Lunglei Municipal Council (LMC) Election 2023 Candidate leh Election Agent te pualin Election kaihhnawih a hriat tur leh zawm tur hrilhhriatna neih a ni.
    District Municipal Election Officer & Lunglei Deputy Commissioner Ramdinliani chuan LMC-in Election a vawikhat hmachhawnna a nih avangin Municipal Election a official kaihhnawih, Candidate leh Election Agent te tan thil thar a ni, tiin State Election Commission-in guideline fel tak a siam, inthlan felfai leh muanawm  neih theih nan guideline zawm theuh turin a chah.

World Consumer Rights Day
Aizawl : ‘World Consumer Rights Day’ chu March 15, 2023 khan Mizoram-ah pawh district hrang hrangah hman a ni a, Aizawl-ah chuan Central YMA Hall Tuikhuahtlang-ah hman a ni a, Food Civil Supplies & Consumer Affairs Minister K.Lalrinliana chuan khuallian niin a hmanpui.
    Khuallian chuan Mizoram ah he hun pawimawh tak, khawvel ramdangte ruala hman a ni chu lawmawm a tih thu a sawi a. Mipuite hi consumer an nih ang takin an dikna chanvo leh hamthatnate an ngaipawimawh tur a ni a ti.

Mizoram State Budget zirhona CM hovin hmang
Aizawl : Mizoram Journalists' Association (MJA) chuan 15.03.2023 khan an member te tana state budget inzirtirna - Seminar on Mizoram State Budget chu Aijal Club ah a buatsaih a. Chief Minister  Zoramthanga'n a hmanpui.
    Chief Minister chuan mipuite hnena thu puangdarh a chanchinthar thehdarhtute'n state budget zirchianna an buatsaih chu lawmawm a tih thu leh hun hlawkthlak tak an hman a duhsak thu a sawi a. Kum engemawzat Finance department changtu Minister a lo nih tawha a tawnhriat leh tun sawrkar sum dinhmun a sawi. 

Trade Facilitation Fair 2023 a hawng
Aizawl : March 16 khan Commere and Industries Minister Dr R Lalthangliana chuan SELCO Foundation buatsaih Mizoram Trade Facilitation Fair 2023 chu a hawng.
    Hawnna inkhawm Millennium Centre a buatsaih ah hian Commerce and Industries Minister Dr R Lalthangliana chuan Mizoram mamawh Ni zung chakna khawl hman tangkaina tur a rahbi pawimawh tak Mizoram Trade Facilitation Fair buatsaih a ni chu lawmawm a tih thu a sawi a.

CM hovin AB PM-JAY NE Region meeting nei

Aizawl : Chief Minister Zoramthanga chuan 16.03.2023 khan Mizoram State Health Care Society in a buatsaih, ni hnih awh Ayushman Sangam - North Eastern Regional Review Meeting chu khuallian niin a hmanpui. 
    Meeting hi Aijal Club-a neih niin National Health Authority (NHA) bultum a ni a. NHA hi Ministry of Health and Family Welfare-in health care scheme flagship programme a siam Ayushman Bharat Pradhan Mantri Jan Arogya Yojana (AB PM-JAY) kalpui tura ruat a ni. Hmarchhak state tin atangin aiawhte an kalkhawm a ni.

P&E-in Works Review Meeting nei

Aizawl : March 16 khan Power & Electricity Department Minister R. Lalzirliana hovin E-in-C Conference Hall, MINECO-ah Power & Electricity Department hnathawh dan leh hnathawh mekte thlirhona ‘Works Review Meeting’ neih a ni a. Review Meeting-ah hian Commissioner & Secretary, P&E Pu H. Lalengmawia chu khualzahawm niin Mizoram district hrang hrang atangin P&E Department-a thawk Engineer-te an kalkhawm a ni.

Best Police Station of Mizoram 2022
Aizawl : Ministry of Home Affairs, Government of India-in Annual Ranking of Police Stations 2022 a neihah ‘Best Police Station of Mizoram 2022’ atana a thlanchhuah Lunglei Police Station chawimawina hun chu March 16 khan SP Conference Hall, Lunglei ah H. Ramthlengliana, IPS, Deputy Inspector General of Police (Southern Range) hovin hman a ni.
    IGP (Southern Range) chuan Inspector LP Zohmangaiha, Officer In Charge, Lunglei Police Station hnenah chawimawina Certificate of Excellence a hlan. Certificate-ah hian India Home Minister Amit Shah leh Home Secretary Ajay Kumar Bhalla ten hming an ziak a ni.