Phaia Zirlai vih hlum ruangin Mizoram thleng

Aizawl: Kerala-a chemtea Mizo zirlai vih hlum, Valentine VL Chhana (Tin tin-a), kum 23 ruang chu Thawhlehni chawhnu khan Mizoram thlenpui a ni a, Lengpui Airport-ah hmuah a ni.

   Mechanical engineer zirlai, Tintin-a a hi Pathianni zing dar 1:05 khan a zirlaipui, Mizo vekin vitin a thi.

   A ruang hi Lengpui Airport-a tumpui a nih hnuah hian hunserh hman a ni a. Falkland, Aizawl-a C. Lalbiaka inah chawlhpui/thlahna hun hman leh niin zanah an khua, Pangzawl panpui a ni a, Nilaini khan vui a ni.

Mamit SP-in Bungthuam thihna chungchang chhui chin sawichhuak

Aizawl : Mamit SP Pukhraj Kamal, IPS, chuan February 24 khan Lalfakmawia, 59, Bungthuam Ni 12.02.2025 zana bo, a tuk Ni 13.02.2025-a ruang chhar thihna chungchang an chhui dan chin thutharthehdarhtute hnenah a sawichhuak.

   Lalfakmawia, 59 Bungthuam khua thihna avanga Police te'n an man te hi 1) Sondorung Reang (27) Bungthuam, 2) Ramnunmawia (39) Bungthuam, 3) Ajit Kumar Reang (35) Assam, 4) Bimal Reang (60) Bungthuam te chu rinhlelh an nih avangin man a ni a, 23.02.2025 zing dar 4 velah 1) Banik Reang (35) Assam, 2) Kochomoni Reang (26) Assam leh 3) Khirud Reang (28) Assam te man niin tualthahna atana inhnamhnawihte chu man kima an inhriat thu an tarlang a, Lalfakmawia ruang luia paihna atana an hman Auto Rickshaw chu chhui zui mek a nih thu an sawi bawk.

Tlangval a chenna-ah thiin hmu

Aizawl : February 24, 2025 khan Hosana Lalrinpuia (Hos-a), kum 42 chu a chhenna In Tuikhuahtlang, Republic Road kawng chhak lama Kapthanga, Section I In luah chu thi a chhar a ni.

   Hosana Lalrinpuia hi amaha cheng niin PHE Department, Tuikhuahtlang-a hnathawk a ni a, Inrinni khan office pawh a kal a, a thih hun hi hriat chiah a ni lo a, a ruang hi a rimchhiat deuh tawh avangin February 22, 2025 zan lama thi tawh a ngaih a ni. A ruang hi a u (cousin), Ch Lalmuanpuia, Venghlui chuan a la a, tlaivarpui niin a tukah vui a ni.

Huan a hnathawk tur chesualin a thi

Aizawl : February 24, 2025 khan Rothuama kum - 40 Melthum cheng mêk chu Hlimen ah mi huana in hlawh tur chesualin a thi.

   ZALEN thudawn danin, Rothuama hi zing dar 9 vel khan Melthum atangin Hlimen-ah hnathawk turin a kal a, huan thlen hma deuhah chesualin, kawng thlang feet 4 vela sangah a lu sawh zawngin a tla a ni. A ruang hi an khua Vaphai (Saikhumphai), Champhai District pan pui a ni.

Union Minister-in Saitual District tlawh

Aizawl : Union Minister of State for Road transport & Highways and Corporate Affairs Harsh Malhotra chuan February 27, 2025 khan Saitual District a tlawh.

   Saitual District-a office hotute, Village Council leh NGO hruaitute nen inkawmhona hun hmangin, Saituala District Hospital, Govt. High School leh Tamdil te a tlawh nghal a ni. Union Minister of State hi District Bawrhsap Dr. Lalngura Tlau bakah District chhunga officer te leh NHIDCL lama hotuten an lo dawngsawng a ni. 

   He hunah hian Saitual District-a office hrang hrang ten an department chungchang te, an hmalakna te leh central scheme an kalpui dan te chu PowerPoint Presentation hmangin an sawifiah a. Village Council leh NGO hruaitute pawhin Harsh Malhotra hnenah an mamawh te an thlen a ni. 

SASCI Part-II hnuaiah department 17 lirthei hlan

Aizawl : Transport Minister Vanlalhlana chuan February 27, 2025 khan Department 17 te hnenah Lirthei thar 27 a hlan. Voluntary Vehicle Modernization Policy (V-VMP), Vehicle Scrapping Policy (VSP) ti pawha hriat hi (SASCI Part-II) hi Ministry of Road Transport and Highways (MoRTH) in lirthei hlui tawh te hluihlawna, a thar a thlak tura lirthei neitute tana ruahmanna a siam.

   He huna technical report petu Er.R.Lalrammawia chuan V-VMP in a tum chu Air Polution tih tlem, kan Environment te tih thianghlim, Lirthei hlui tawh lutuk avanga chetsualna thleng thin te tihtlem bakah fuel efficiency tih san a, maintenance cost tihtlem a ni. Automotive, Steel leh Electronic Industry te tan Recycle hmanga man tlawm zawkin Raw material tihtam leh mi tam tak tan eizawnna siam a ni, a ti.

Israel mithiamin Horticulture hmalakna rawn tlawh

Aizawl : Indo-Israel Agriculture Programme (IIAP) hnuaia Horticulture Department hmalakna tur - Centre of Excellence (CoE) for Vegetable, Zawlpui Zau, Serchhip District endik turin Uri Rubinstein chuan Mizoram a rawn tlawh.

   February 25, 2025 khan Centre of Excellence for Fruit, Lunglei a tlawh hmasa a. February 26, 2025 khan CoE for Vegetable Proposed Site a tlawh chhunzawm a - Zawlpui Vegetable Growers te nen inkawm hona hun tha tak an hmang.

   Israel Agriculture Mithiam Uri-a hian Horticulture Minister Prof. Lalnilawma pawh a kawm a. An pahnih hian hmalak dan tur hrang hrang an sawi bawk a ni.

Mizoram Anthurium Singapore-ah thawn

Aizawl : APEDA-Agriculture Product Export Development Authority of India, Horticulture Department Mizoram leh Zo Anthurium Growers Co-operative Society te tang kawp chuan a vawi khatna atan Mizoram Anthurium te chu Singapore a thawn turin February ni 26, 2025 khan Agriculture Secretary, Ramdinlianin a vai liam.

   Ram pawn a hralhchhuah hian Anthurium chingtute tan a hlawk zawk theih beiseina a san avanga Singapore a thawnchhuah na hi ruahman a ni a. First Trial shipment atana Anthurium Singapore a an thawnchhuah zawng zawng hi par 1008 niin kg. 70 a rit a ni.

CM leh leh NITI Aayog Member Dr. Vinod Kumar Paul inkawm

Aizawl : February 26, 2025 tlai khan Aijal Club-ah Chief Minister Lalduhoma leh Dr. Vinod Kumar Paul, Member, NITI Aayog ten meeting an nei a. Mizoram sawrkar Council of Ministers, official pawimawh leh NITI Aayog officials pawimawi te an tel.

   Chief Minister chuan, "Dr. VK Paul in min rawn tlawh hi vannei kan inti a, India ram tana hna a thawh tawh ropui tak tak leh sawrkar laipuia a tangkaizia hmutu ka ni a. Vawiina min rawn tlawh hian rah tha tak a chhuah ngei pawh ka ring a ni," a ti. CM hian Mizoram sawrkarin Handholding Scheme a kalpui dan leh healthcare lama a hmachhawp te a tarlang bawk.

NITI Aayog ten ZMC&H tlawh

Aizawl : February ni 26, 2025 (Nilaini) chawhnu khan Zoram Medical College & Hospital (ZMCH), Falkawn chu NITI Aayog member Dr. Vinod K Paul leh a thawhpui ten an tlawh.

   He NITI Aayog team-te hi Health Minister Pi Lalrinpuii hova lo hmuah an ni a. He hun ah hian Smt. Sherry Lalthangzo, Economic Adviser (E&M), NEC; Secretary, Health & Family Welfare Dept bakah Health department leh Planning department hotute an tel bawk a ni.

   Inkawm ho na neih niin Mizoram Infant Mortality Rate (3 per 1000 Livebirths) chu India rama hniam ber anih thu Dr. Vinod K Paul’an a sawi a. Hemi chungchanga H&FW Dept. hmalakna tha a tih thu a sawi. Natna chi hrang hrang TB, Malaria, Measles, Rubella leh Leprosy-te Mizoram atanga umbo turin Health Dept. hotute a fuih a.

Sipai Lammual-ah Aizawl Day 2025 hmang

Aizawl : February 25, 2025 khan Sipai Lammualah nithum chhung awh Aizawl Day 2025 lawmna hun chu hman tan a ni a. He hunah hian Aizawl Mayor Lalrinenga Sailo chu khuallian a ni.

   Aizawl Day lawmna hun nikhatnaah hian Faina Kawnga thawk thate, Hotel & Restaurant fai, AMC Short Documentary, College Quiz Competition leh Aizawl Mayor’s Cup a tithate hnenah lawmman sem a ni.

   Program bul tan nan Deputy Mayor R.Thanglura’n Exhibition–cum-Stall a hawng a. Hemi hnu hian Khuallianin thuchah sawiin lawmman semna in a zui nghal a ni.

Chief Minister hmuhpuiin IMD leh DS&T ten MoU ziak

Aizawl : February 24 khan CM Office-ah Chief Minister Lalduhoma hriatpuina-in India Meteorological Department, Ministry of Earth Science leh Directorate of Science & Technology, Government of Mizoram te chuan Directorate of Science & Technology hmunhmaa IMD centre dinna tur inremna (Memorundum of Understanding) khan an ziak.

   MoU hi Directorate of Science & Technology aiawhin Chief Scientific Officer H. Lalsawmliana'n a ziak a, IMD aiawhin IMD Director Sudheer Kumar Dwivedi an a ziak a ni.

Mizoram sawrkar hotute leh 16th Finance Commission member te inkawm

Aizawl : February 24, 2025 khan Secretariat Conference Hall, MINECO-ah Mizoram sawkar hotute leh 16th Finance Commission member leh official lo kalte chuan inkawmna hun an hmang a. Chief Minister Lalduhoma chuan kalkhawmte lawmna thu sawiin Commissioner & Secretary Vanlaldina Fanai chuan hun a kaihruai a. Minister-te, Chief Secretary, Mizoram sawrkar hnuai a department hrang hrang Secretary leh Director-te an tel a ni.

   16th Finance Commission atanga lo kalte hi Chairman Dr. Arvind Panagariya bak ah member dang Ajay Narayan Jha, Annie George Matthew leh Dr. Manoj Panda-te niin, official pawimawh dangte'n an rawn tawiawm bawk a ni.

   Sawrkar laipui leh State sawrkar inkara April ni 1, 2026 atanga chhiar a kum 5 chhung chhiah lak luh insem dan tur zirchiangtu 16th Finance Commission hi India Danpui Article 280 hnuai ah December 31, 2023 khan din a ni a, Chairman bak ah hian full time member mi 4 an awm a ni.