ICFAI-in Social Work Day pual free clinic nei

Aizawl : Thawhlehnia ‘World Social Work Day’ puala Department of Social Work, ICFAI University Mizoramin Bukpui khuaa free clinic an buatsaih rualin inchhungkhur mamawh an sem.

   A thlawna inentirna buatsaihah hian doctor pangain mi 250 vel an en hman a, a thlawn vekin damdawi an sem nghal.

   Social Work Day pual vek hian luanchhuahna hun an hmang nghal a, chhungkaw eng emaw zat hnenah inchhungkhur mamawh sem a ni.

AMC-in Treasury Bazar kalhna siam

Aizawl : March 17 zinga Treasury Bazar kang senghawi hna chu vawiin khan Bazar-a thu ten a thenfai hnatlang an nei a, naktuk atang hian thut nghal an tum niin sawi a ni a, hetihlai hian AMC chuan bazar luhna chhak leh thlangah gate an siam.

   Treasury Bazar kanng hi Thawhtanni chawhma khan AMC Mayor Lalrinenga Sailo chuan a tlawh a, hemi tum hian helai hmun hi bazar atana hman leh tura siam that tum a nih tawh loh thu a sawi.

   Chhinchhiah danin Venghlui area lamah dawr 53 a awm a, heng zinga 35 chu a kang chhia a, Tuikual South lamah hian dawr 41-ah dawr 29 a kang chhe bawk a ni.

CM leh DM&R Minister in PAMRA te tanpui

Aizawl : March ni 17, 2025 khawvar hma a Mizoram Legislative Assembly bul Treasury Bazara kangmei chhuakah PAMRA Office chu a kangral vek a. March 20, 2025 khan Assembly Session chawlh lailawk laiin Recess Room ah Chief Minister Lalduhoma leh Home Minister K Sapdanga, Disaster Management & Rehabilitation changtu ni bawk ten PAMRA hruaitute hnenah tanpuina sum an hlan.

   Chief Minister hian CM Relief Fund atangin cheng nuai khat (1) leh DM & R Minister in Disaster Fund atangin cheng nuai nga(5) an hlan a. He hi Adviser to Chief Minister (Political) Lalmuanpuia Punte leh MNF Returnees MLA ni lai MLA 2 – V.L. Zaithanzama leh Lalrintluanga Sailo ten he hun hi an hmanpui bawk a ni.

BDO-te tan Refresher Training Course neih a ni

Aizawl : March 19, 2025 khan State Institute of Rural Development &Panchayati Raj (SIRD&PR) Mizoram buatsaih ni 3 (19-21.3.2025) awh, “Refresher Training Course for Block Development Officers (BDOs)” chu, SIRD&PR, Mizoram Conference Hall, Durtlang Leitanah V. Lalsangliana, Secretary to Governor, Mizoram chuan Khuallian niin a hawng.

   Training hawnna hi Dr. M.S. Dawngliani, Associate Professor, SIRD&PR, Mizoram chuan kaihruaiin, Dr. Khuangthansanga Pakhuangte, Associate Professor, SIRD&PR, Mizoram, Course Director ni bawk chuan Training neih dan tur tlangpui leh hriattur pawimawhte a sawi a. Training-a kal BDO 18-te hi Line Department hrang hrang ten an Department hnathawhte zirtirna an neih bakah SIRD&PR Faculty-te chuan zirtirna an pe a ni.

Chief Minister-in MUHCS tlangzarh

Aizawl : March 19, 2025 khan Assembly Annexe Conference Hall ah Chief Minister Lalduhoma chuan kumin April thla atanga hman tan tur Mizoram Universal Healthcare Scheme a tlangzarh.

   He schme-ah hian Sawrkar hnathawk, a nghet leh nghet lo te, civil pensioner te, mipui nawlpui leh AB PM JAY hnuaia Golden Card nei zawng zawng te huang khatah kan awmza ang a, inziahluh dan a zirin hamthatna kan hmuh theih erawh chu an danglam ve thung dawn a ni.

   Inziahluh theih hun ruatah mipuite inziak lut vek thei ila, tangkai takin i hmang ang u. Chhawngkaw tana kum khat Registration fee hi Rs. 2,500 a ni a. Hamthatna hmuh let theih hi Rs. 5,00,000 a ni thung.

Sports Minister hovin Hockey hmasawnna tur sawiho

Aizawl : Lalnghinglova Hmar, Minister of State, Sports & Youth Services Department hovin March 19 khan Assembly House-a Deputy Speaker room-ah Mizoram hockey hmasawnna’na hmalak dan tur hrang hrang sawiho a ni.

   He hunah hian Deputy Speaker & Kolasib bialtu MLA ni bawk Lalfamkima, Lunglei West bialtu MLA T. Lalhlimpuia leh South Tuipui bialtu MLA Jeje Lalpekhlua te bakah Olympian Lalremsiami leh Hockey Mizoram hruaitute an tel a ni. 

   Indian Hockey Women player, Olympian ni bawk Lalremsiami chuan Hockey hmasawnna tura sawrkar hmalakna leh hmachhawp hrang hrangte chu lawmawm a tih thu a sawi a, “Sawrkarin min ngaihsakna a lawmawm a, player leh association te tan pawh chona a ni. Sawrkarin min phurpui phawt chuan hmasawnna kan hmu ngei ang.” a ti.

International Women’s Day 2025 pual buatsaih

Aizawl : Aizawl District Hub for Empowerment of Women, Women & Child Development leh Department of Social Work, Mizoram University tangkawp chuan March 19 khan International Women’s Day, 2025 denchhenin District Level Seminar Dean’s Multipurpose Hall, MZU-ah an buatsaih.

   Kohhran leh khawtlang hruaitu, NGO hrang hrang te atang leh thawktu leh zirlai te'n he hun hi an chhim a ni.

   He hunah hian Prof. Lalnundanga, Registrar chu Chief Guest niin, Zoramthangi Chhangte, Director, Women & Child Development chu Guest of Honour a ni a. Dr. Henry Zodinliana Pachuau in Seminar hi kaihruaiin, Department of Social Work Head of Department Prof. C Devediran in kalkhawmte chibai bukin, alo lawm a. Prof. Lalneihzovi, Dean, School of Social Sciences chu Keynote Speaker ah tangin, hmeichhia te tana hmalakna hrang hrang te leh tan ngaihna lai te a tarlang a ni.

Mipat hmeichhiatna leh HIV/AIDS chungchang inhrilhhriatna nei

Aizawl : School Education Department buatsaihin March 18 khan Lammual-ah ruihhlo hman sual, mipat hmeichhiatna leh HIV/AIDS chungchang inhrilhhriatna neih a ni a, School Education Minister Dr Vanlalthlana chuan khuallian niin he hun hi a hmanpui

   He awareness campaign hi Pi Angela Zothanpuii Director, School Education Department-in a kaihruai a, AR lammual ni thin chu mipuite kuta hlan a nih hnua punkhawm hmasak ber neih a ni chu hriatreng a ni dawn a ti a. Kalkhawmte chu hlawk taka he hun hi hmang turin a sawm a ni. Kalkhawmte chuan Asian Arm Wrestling Cup 2024 Gold Medalist Denic Lalruattluanga Gold Medalist, kaihhruaiin taksa uluk leh thianghlim taka vawng tur te, ruihhlo hi ram leh hnam hmelma lian ber a nih avanga ti lo turin an intiam a ni.

Damdawiin endiktu turte tan training nei

Aizawl: DHME Auditorium, MINECO-ah Ni 3 chhunga neih Mizoram chhunga Sawrkar damdawiin endiktu turte tan March 18, 2025 khan training neih a ni a. He hun hi Dr. Lily Chhakchhuak, Mission Director, NHM chuan a hmanpui.

   Training hi Dr. R. Lalchhuanawma, State Nodal Officer, Quality Assurance, NHM chuan kaihruaiin, inhmelhriattirna leh Training neih chhante a sawifiah a. Dr. Ajay Arya, Consultant leh Dr. Ravikar Singh, Consultant, Quality & Patient Safety te bakah Aizawl East, Aizawl West, Kolasib, Saitual leh Serchhip District chhunga District Hospital, SRHF, Community Health Centre, Primary Health Sentre, Urban Primary Health Centre leh MHSSP Doctor-te koh an ni a. Training ni hnuhnung berah hian trainees-te chuan Exam an nei nghal a ni.

Central Jail tan Television hlan

Aizawl : March 18, 2025 khan Budget Session chawlh lailawk laiin Mizoram Legislative Assembly Subject Committee-IV chuan Central Jail, C-I Ward tan Television a hlan.

   Television hlanna programme tawi hi Committee Room, Mizoram Legislative Assembly, Annexe Building-ah neih niin, H.Ginzalala, Chairman, Subject Committee -IV chuan thu tawi sawiin, tun tum session-a member tin ten Jail an vei tlang chu lawmawm a tih thu sawiin, official te thawhrimna leh inpekna-ah pawh an lawm tak zet a ni, a ti.

NIELIT-in AI leh Cyber Security-ah Workshop leh Job Fair buatsaih

Aizawl : March 18-19, 2025 chhung khan NIELIT Aizawl chuan Dawrpui Multipurpose Hall-ah Artificial Intelligence (AI) leh Cyber Security chungchangah State Level Workshop cum Exhibition an buatsaih bakah March 20, 2025 khan Job Fair an buatsaih.

   He hunah hian AI leh Cyber Security lam a mithiam ten zirtirna pein thu an sawi dawn a, Job Fair ah hian company hrang hrang ten stall siamin hna lak runpui an nei dawn a, hriatna ti zau duh te tan leh hna chi hrang hrang zawng mek te tan an buatsaih dawn a ni.

Supplies Minister-in World Consumer Rights Day 2025 a hmanpui

Aizawl : World Consumer Rights Day, 2025 chu Food, Civil Supplies &Consumer Affairs Department bul tumin thupui, “A Just Transition to Sustainable Lifestyles” hmangin March 17 khan Vanapa Hall-ah hman a ni a.

   He hun hi B. Lalchhanzova, Food, Civil supplies & Consumer Affairs Minister chuan khuallian niin a hmanpui a, Aizawl Municipal Area chhunga 100% LPG Home Delivery kalpui thei hmasa ber leh awm chhun M/S Zothan Indane, Luangmual,, Aizawl te hnenah excellent performance in LPG Home Delivery Award a hlan nghal a ni.