Nungcha humhalh dan bawhchhia Mi 3 Jail-ah khung

Aizawl : March 21, 2024 khan Wildlife (Protection) Act 1972, Nungcha humhalhna dan bawhchhiat vanga man mi 3 te chu district jail, Kolasib ah dahluh an ni.

   Divisional Forest Officer, Kolasib Forest Division in thuchhuah a siam a tarlan a nih danin, March ni 4, 2024 zing dar 4:40 vel khan Vairengte Forest Range Staff leh Excise & Narcotics tangkawp chuan Saphu kawr kg 98 vel an man a, Saphu kawr hi sumo a phurh niin, driver Laldaniela S/o Ranjit, R/o Happy Valley, Shillong chauh a chuang a, a hmunah man nghal a ni.

   Hemi case hi chhuizui niin Lalzuithangi (41) W/o Ramchhanthanga, Champhai leh Vanlalzawni (42) W/o Lalbeiseia, Zemabawk, Aizawl te chu man an ni a, Aizawl lam atangin mi pakhat Laltanpuia S/o Tlangthanluaia, Bethlehem Vengthlang, Aizawl a khawsa mek man tel a ni a ni bawk.

Lo halna ah kum 25 mi kanghlum

Aizawl : March 18, 2024 khan a Lo halnna-a kanghlum khan Vanlalhriatpuia (25) s/o Chawngliankhuma (L), Darlawn Venghlun chu vui liam a ni.

   ZALEN thudawn danin March ni 15 khan Vanlalhriatpuia leh a thiante pahnih chu lo hal turin an kal a, lo a hal zawh hnua a thiante nen Sangha man nghal tura inthurual an ni.

   Inngahna hmun tur an sawiah a thawmhnaw leh a phone te pawh a dah a, a hmunhma luidung te hre sa a nih avangin ngaihthat lohna an nei lo a, a rei deuh avangin lui lam an pan san a, lui lamah pawh an hmu lo a, in lamah a haw a ni ang tih rin dan an nei zui a ni.

   Ram an riahna atanga an haw hnu Pathianni dar 3 bawr vel a a thawmhnaw leh a phone te in a an va pekna-ah in a la thleng lo tih an hria a, hemi hnu hian chhung khat laina ten a chanchin an ngaihven nghal a ni.

   Lam kal hmasa ten tlai dar 5 bawr velah lo an neihna hmun an thleng a, a lo halna atanga a thlang deuh lawk luikawrah bawkkhup zawngin an hmu a, a hmai leh a dar leh a ban te a kang a, a taksa pawh a lo chhe deuh hman tawh a ni.

PUC Infotech Centre hawng

Aizawl : Pachhunga University College-a computer hmunpui tur PUC Infotech Centre chu March 19, 2024 khan Prof. Vanlalchhawna, Finance Officer chuan a hawng.

   Prof H Lalthanzara, Principal chuan PUC Infotech Centre atana hmalak dan hrang hrangte leh a dinhmun tlangpui a sawi a, hetiang centre din a nih theih nana MZU lamin sum leh paia tanpuina an pek avanga an lawmthu a sawi.

   PUC Infotech Centre-ah hian thil chi thum a awm ang a, GIS Lab, Language Lab leh Internet Resource Centre te a awm a, a vaiin computer 140 a awm dawn a ni.

   Infotech Centre hi Computer Base Test (CBT) centre atana hman theih a ni nghal dawn a, online exam chi hrang hrang he centre atang hian a tih theih ang a, IT leh computer software lam training chi hrang hrangte pawh neih theih tura ruahman a ni. He centre hi commerce zirlaiten an hman tangkai tura ruahman a ni bawk.

   He centre atan hian Rs 71,15,164 sen ral a ni a, PUC Academic Block V chungah awmin 3600 sq ft a awh a ni.

HBC-in MLA pariat, an principal leh lecturer hlui chawimawina nei

Aizawl : Govt. Hrangbana College chuan March 19, 2024 khan 22nd MZU Annual Sport 2024-a an champion lawmna leh an college chhuak mi hlawhtlingte chawimawina hun an hmang a. Hrangbana College Alumni Association President JK Dawngzuala, ZIDCO Chairman-in khuallian niin a hmanpui. He College atanga zirchhuak MLA 8 bakah an college principal hmasaber leh an lecturer ni thin hnenah chawimawina an hlan.

   Hrangbana College zirtirtu leh zirlai hlui Mizoram pum huapa mi hmingthate chawimawina hunah hian an College Founder Principal Dr. Kenneth Chawngliana, State Planning Board Vice Chairman ; Cabinet Minister Vanlalhlana (ex-Lecturer) ; Mizoram Legislative Assembly Speaker Lalbiakzama (ex-student) ; Cabinet Minister P.C. Vanlalruata (ex-student); Cabinet Minister Dr. Vanlalthlana (ex-student); Cabinet Minister Lalrinpuii (ex-student); Leader of Opposition Lalchhandama Ralte (ex-student) ; Minister of State B. Lalchhanzova (ex-student) ; Adviser to CM Lalmuanpuia Punte (ex-student) ; Lt. Col. Lalhmingthanga. MLA (ex-student) leh J.K. Dawngzuala, ZIDCO Chairman (ex-student) te chawimawina pek an ni.

   Championship lawmna kal zêlah hian Hrangbana College zirlai leh zirtirtuten March ni 11 leh ni 13 khan a mamawh apiangte hman atan Civil Hospital Blood Bank ah thisen unit 224 chuang an pe tawh bawk a ni.

LRM-a thihna thlenga Ruallung khua-in lungawilohna lantir

Aizawl : March 18, 2024 khan Lalfakzuala (Faktea) Kum 12 s/o T. Lalchhuanmawia, Ruallung boral danah thil fel lo leh dik lo awm nia hriat a nih avangin Ruallung VC leh All NGO chuan thuchhuah an siam a, an beisei ang hmalakna an hmu lo a nih chuan a tul angin hma lak zel an tum.

   Faktea thih chhanah hian LRM Hospital chuan Malignant Hyperthermia niin an sawi a; mahse, Ruallung VC leh All NGO – te chuan a thih chhan nia an sawi hi pawm har an tiin hriatthiam a har an ti a, chuvangin en liam an tum lo a, an beisei ang hmalakna an hmu lo a nih chuan a tul angin hma lak zel an tum.

   Hetiang vanduaina hi tu chungah mah thleng tawh lo se ; Faktea thihna hian rah tha zawk a chhuah ngei theih nan theihtawpa hma lak zel an tum thu an sawi bawk.

Heroin, geletin stick leh detonator man

Aizawl : March ni 18, 2024 khan Govit Gogna, IPS, Champhai SDPO chuan Zokhawthar a tlawh a. Champhai Police leh Assam Rifles tangkawpin ruihhlo leh sualna do beihpui an thlak lai chu a hmunah telpuiin, a ho hian Heroin, Geletin sticks leh detonator thahnem tak an man.

   B. Liansanga (45 yrs) (Driver) s/o Lalkamlova, Lunglei Chanmari nia inchhal leh R. Malsawmthara (35 yrs) s/o R Malsawma (L), Tuipui, Champhai District nia inchhal te hnen atangin Heroin hawng 198, kg 2.393 man a ni a. Biakrema (29 yrs.) s/o Lalbiakzawna (L) leh Ramthazuali (28 yrs.) w/o Biakrema, Tiau Khawmawi, Chin state, Myanmar-a mi ve ve nia inchhalte hnen atangin Gelatin (neogel) stick 110 (14.084 kgs) leh detonator 110 man a ni.

Mizoram Governor leh DG Border Roads leh inkawm

Aizawl : March 20 khan Lt Gen Raghu Srinivasan, Director General (DG) Border Roads chuan Mizoram Governor Dr Hari Babu Kambhampati chu Raj Bhavan-ah a hmu. Lt Gen Raghu Srinivasan chuan Governor hnenah Mizorama ramri hrula kawngpui siam kawnga Border Roads Organisation (BRO) hmalak tawhte a sawipui a, kawngpui siam hna thawh meka hmasawnna leh hmachhawp awm mekte an sawi dun a ni.

   Governor chuan DG Border Roads kaihhruaina hnuaia BRO-in ramri hrul leh hmun kilkhawra kawngpui pawimawh tak tak siamna kawnga an hmalaknaah lawmthu a sawi a. Ramri hung leh enkawlna kawnga thil pawimawhte a sawipui bawk a ni. He hunah hian DG BRO chuan BRO-te chu tlangram chhengchhe tak taka hnathawka kawng siam thin an ni a, hengahte hian lei te dawhin, lei verh hautak tak takte pawh an thawk tawh thin tih a sawi.

DEO hovin inthlanpui atana ANO leh NO ten meeting nei

Aizawl : DC Nazuk Kumar, Aizawl District Election Officer (DEO) hovin March 19, 2024 khan DC Conference Hall-ah kumin inthlanpui General Elections to the Lok Sabha, 2024 atana Nodal Officer leh Assistant Nodal Officer-te chu an thukhawm.

   DEO Nazuk Kumar chuan officer-te kawmin an chanvo sawifiahin, inpuahchahna kal report an pe hlawm a. An mawhphurhna te leh inthlan muanawm leh felfai tak neih tura an hmabak te sawiho a ni bawk.

Lokayukta Chairperson thar atan Lalmalsawma ruat

Aizawl : March 18, 2024 khan Larsap Dr. Haribabu Kambhampati chuan Raj Bhawan Durbar Hall-ah Lokayukta Chairperson thar atan Lalmalsawma, IAS (Rtd.) a la lut.

   Mizoram Sawrkarin Chairperson Lokayukta atana a ruatna lehkha chu Chief Secretary Dr. Renu Sharma in a chhiar chhuah hnuin, Larsap chuan rinawmna thu tiamtirin Lalmalsawma chu a la lut a ni.

   Lakluhna inkhawmah hian Chief Minister Lalduhoma, Speaker Lalbiakzama bakah Minister leh sawrkar hotulu pawi mawh an tel bawk a ni.

   Lalmalsawma hian Mizoram Chief Secretary hna November 1, 2014 atanga February 28, 2018 thleng a thawk. MZP te’n kum 2015 khan sawrkar hna thawk ei ru loah an thlang. Sawrkar hna kum 35 a thawh hnuin, February 28, 2018 khan IAS atangin a chawl ta a ni.

Lok Sabha inthlan atan State Media Centre din

Aizawl, 18th March, 2024 : Election Commission of India thupek angin General Elections to the Lok Sabha, 2024 atan Addl. CEO kaihhruaina hnuaiah March 18, 2024 khan “State Media Centre” din a ni.

   Information & Communication Technology department Video Conference Room, 4th Floor, Old Secretariat Building-I, Treasury Square (Raj Bhavan bulah) ah Media Centre hi bun a ni.

   General Elections to the Lok Sabha, 2024 chungchanga media leh publicity lam hawi indawrna, lehkhathawn etc. chu State Media Centre phone number/e-mail ah hian thawn/hrilh thin tur a ni e.

Phone:    1. 0389-2954392

                2. 8731806897 (Whatsapp)

                3. 8787622508