World Oral Health Day hmang
Aizawl : World Oral Health Day chu March 20 khan Mizoram hmun hrang hrangah hman a ni a. Mizoram-a World Oral Health Day hmanna lian ber DHME, Conference Hall, MINECO a hman a ni.
    Khuallian Vice Chairman Health and Family Welfare Board Dr. Z.R.Thiamsanga, MLA chuan Mizote chu Oral Health lama thanharh a tul thute, zuk leh hmuam tih nasat avanga natna, a bikin cancer vei an tam zia te leh Oral Health inzirtirna kawngah nasa taka tan lak thar a tul thu a sawi a. Khuallian Dr. ZR. Thiamsanga chuan zuk leh hmuam, ruihtheih thil reng reng, kan ka atanga lut lo tura mitinin ka chhung vawn thianghlim tul a tih a sawi bawk. Kum 2023 Theme atan hian"Be Proud of Your Mouth"(In other words,value and take care of it) tih hman a ni a.

Sikkim atangin ILP rawn zirchiang
Aizawl : Government of Sikkim atangin ILP Committee member mi pali (4) ten Mizoram Inner Line Permit kalphung leh dinhmun zirchiang turin March 20 khan Aizawl an rawn thleng.
     Commissioner & Secretary, Home Department in lo dawngsawng in, a office chamber ah meeting a neihpui a. Meeting ah hian Home Department officer te leh Aizawl DC aiawh te an tel a ni. Sikkim atanga rawn kalte hian Sikkim ah tualchhung mi nilo, eizawnna leh thil dang avanga lut an thathnem avanga tualchhung mipuiten harsatna an tawk mek tih an sawi. An harsatna tawhte meetingah hian an tarlang a, state hrang hrang zirchianna an nei a, Manipur Sawrkar hmalakna an zirchian hnuah Mizoram a ILP kalphung, hman a nih tan dan leh kalpui mek dan te an rawn zirchiang a ni.

Khamrang ram thleng NW 102-ah puang
Aizawl : Parliament Session neih mekah 21.3.2023 khan Union Minister of Ports, Shipping and Waterways Sarbananda Sonowal chuan Mizoram Rajya Sabha MP K.Vanlalvena zawhna chhangin Assam rama Gharmura lei( bridge) NH 154 atanga intanin Khamrang rama NH 54 bul thlengin KM 87.136 a thui Tlawng lui chu National Waterway No 102 atana puan a nih tawh thu a sawi.
    Khamrang leh Sairang inkar Tlawng lui erawh chu tui a thuk tawk loh avangin National Waterway no 102 hian a huam pha lo tih a tarlang.

AR chungchang sawi dun
Aizawl : New Delhi a cham mek Chief Minister Zoramthanga chuan 21.03.2023 chawhma khan Union Home Minister Amit Shah chu New Delhi a pisa ah hmu in an inkawm a, AR sawnchhuah chungchang an sawi dun.
    Union Home Minister Amit Shah chuan April ni 1, 2023 ah Assam Rifles Battalion Headquarters Complex, Zokhawsang chu rawn hawn ngei a tum thu leh Laldenga Cultural Centre din tur lungphum rawn phum a tum thu Chief Minister Zoramthanga chu a hrilh a. Mizo mipuite beisei leh nghahhlelh em em, sawrkar hmachhawp lian tak ni bawkin a tak ram a thleng tur chu lawmawm a tih thu Chief Minister chuan sawiin, Amit Shah chu Zoram mipui aiawhin lawmthu a hrilh a ni.

Governor-in ZMC tlawh
Aizawl: Governor Hari Babu Kambhampati chuan March 21, 2023 khan Zoram Medical College(ZMC), Falkawn a tlawh.
    ZMC hi Mizoram University leh NMC (MCI ni thin) ah affiliated college ni mekin Mizoram chhunga medical college awmchhun a ni a. Tunah hian National Medical Commission (NMC) pawmpuina nei turin theihtawp chhuah mek a ni.

High Field Multipurpose Playground lungphum phum
Aizawl :  March 21, 2023 khan Deputy Chief Minister Tawnluia, UD&PA changtu chuan High Field Multipurpose Playground lungphum a phum. He hunah hian Aizawl North III bialtu MLA  C. Lalmuanpuia, Aizawl Deputy Mayor R.Thanglura leh sawrkar hotulu dang te an tel a ni.

CM leh DoNER minister
Aizawl : Chief Minister Zoramthanga chuan Minister of State for DoNER B.L Verma chu March ni 21, 2023 tlai khan a chenna inah hmu in an inkawm a. Mizoram tana hmalakna leh hmachhawp hrang hrangte an sawi dun.

Health Minister hovin World Water Day hmang
Aizawl : March 22, 2023 khan Mizoram hmun hrang hrangah World Water Day 2023 hman a ni a, a hmanna pui ber chu Vanapa Hall-ah hman niin Health Minister Dr. R. lalthanglian chuan a hmanpui. 
    Public Health Engineering Department (PHED) leh Central YMA tangkawpin he hun hi an buatsaih a, khuallian Health Minister Dr R.Lalthangliana chuan World Water Day denchhen hian tuihna te humhalh a nih theih nan ram thing leh mau te, ram ngaw te humhim a ngai tih hria a tan la turin mipuite a sawm a. Mizoram chu India ram state te zingah tui harsatna tawk mek leh tawk zel tur nia ngaih zingah telh a nih avangin World Water Day hman hi state tan a pawimawh lehzual a ni, a ti.

Working Committee on Ruihhlo Do thukhawm
Aizawl : Social Welfare & Tribal Affairs Minister Er. Lalrinawma hovin “Working Committee on Ruihhlo Do” chu March 22, 2023 khan SAD Conference Hall, MINECO ah an thukhawm.
    Mizorama ruihhlo lo hluar ta em em dona kawnga tha thawh nasa em em tlawmngai pawl te leh sorkar department te hman tur cheng Vaibelchhe 3 chu Mizoram sawrkarin Core Committee on Ruihhlo Do hnen ah a pek chu Working Committee hian a sem zai dan tur a rel a ni.

City Centre tur lungphum
Aizawl: March 23, 2023 khan City Centre, Bara Bazar, Dawrpui veng a sak tur lungphum phumna chu Dawrpui Multipurpose Hall-ah neih a ni a, Deputy Chief Minister Tawnluia chu khuallian niin lungpumna hi a nei a ni.
    Khuallian chuan City Centre lungphumna neih a ni ta chu hmasawnna leh changkanna rahbi thar; Aizawl khawpui cheitu tur ruhrel pawimawh tak a ni, a ti. City Centre chu Aizawl mi te tan mai ni lovin, Mi tan pawh chakawm tak anih dawn thu tarlangin, Mizoram tana hmun pawimawh leh tangkai tak a nih a beisei thu a sawi bawk.

State Finances Audit Report chungchang PAG sawipui
Aizawl : Governor Hari Babu Kambhampati china vawiin khan Raj Bhavan-ah L. Hangsing, Principal Accountant General leh a thawhpuite March 23, 2023 khan a kawm.
    He hunah hian State Finances Audit Report(SFAR) 2021-2022 chungchanga Governor in a hriat duh te inhrilhfiahna leh sawihona neih a ni. PAG hi Deputy AG Elvina Lalmuanpuii Leivon leh Senior Official dang ten an tawiawm a ni. Governor Hari Babu Kambhampati chuan PAG leh a thawhpui te chu SFAR 2021-22 an siam takah a hriatchian duh lai te uluk taka zawtin a sawipui. Public Account Committee (PAC) leh PAG office thawhhona chungchang pawh a zawt bawk a ni.

Nutrition beihpui thlak
Aizawl : March 20, 2023 khan Directorate of Women & Child Development buatsaihin, POSHAN Pakwada 2023, kar hnih chhung Nutrition beihpui thlakna hman mekah IEC DAY (Promotion of Saksham Anganwadi & POSHAN 2.0) chu Millenium Centre tual leh a chhung (Atrium)-ah te neih a ni a. Taksa hriselna leh chakna atana chaw tha pawimawhna inzirtirna leh Anganwadi Centre hlutna te ngaihthlak a ni a. S. Malsawmtluanga (Mama) Footballer leh Miss Mizoram Zirsangpuii ten thusawina hun an hmang a ni.