The Week That Was

The Week That Was on March 28, 2021

Admin - Mar 28, 2021

The Week That Was on March 28, 2021

SOP NGAI PAWIMAWH TURIN NGEN
Covid-19 hrileng mek karah Sawrkar phalna in vengtinah Kohhran Inkhawm neih chhunzawm leh a lo nih takah sawrkarin mipui kan him tlan nana SOP a tihchhuahte uluk taka zawm a nih theih nan Aziawl DC chuan MKHC Chairman hnenah March 26, 2021 khan ngenna hrang hrang a siam a, Good Friday leh Easter Sunday lo awm tur chhunga Kohhranin Sacrament an buatsaih anih chuan fimkhur taka ruahmanna siamin kalpui turin a hriattir.

HMALAKNA ENFIAH
Chief Minister Zoramthanga chuan 26.3.2021 khan Champhai North bial huamchhunga hmalakna leh hmalakna tura ruahmanna chhawpchhuahte a hmunah tlawhin a enpui. Environment, Forest & Climate Change Minister TJ Lalnuntluanga, Champhai South bialtu ni bawk leh Health & Family Welfare Board Vice-Chairman,  Champhai North bialtu Dr. Z.R. Thiamsanga te’n an tawiawm a ni.

PUM 2021 KHAR
Labour, Employment, Skill Development & Entrepreneurship Department buatsaih, ni thum awh ‘PUM 2021: Mizoram Innovation Fair’ Govt. ITI Complex, ITI Veng-a neih chu, March 26, 2021 khan LESDE Department changtu Minister Lalchhandama Ralte-in a kharna hun a hmanpui a. LESDE Minister hi Dr.Vanlaltanpuia, Chairman, Mizoram Youth Commission chuan a tawiawm a ni.

CHAMPHAI 'S tlawh
March 25, 2021 khan Chief Minister Pu Zoramthanga chuan Champhai South bial chhunga sawrkar hmalakna hrang hrang leh hmachhawp te a hmunah tlawhin a enfiah. Chief Minister hi Zokhawthar, Melbuk, Zotlang, Ruantlang, Tlangsam leh a dangah kalin, Champhai South bialtu Law & Judicial Minister TJ Lalnuntluanga leh Champhai North bialtu Dr. ZR Thiamsanga, Health & Family Welfare Board Vice-Chairman ni bawk te’n an tawiawm.

HOSPITAL KUM 25
March 25, 2021 khan Aizawl Adventist Hospital chuan an din champhaphak vawi 25-na (silver jubilee) chu an hospital tual zawlah Health Minister Dr R.Lalthangliana hovin an lawm.

INNOVATION FAIR
Labour Employment, Skill Development & Entrepreneurship Department (LESDED) hmalaknain Govt. ITI Complex-ah March 24, 2021 khan ni thum awh, ‘PÛM 2021: Mizoram Innovation Fair’ chu hawn a ni a. PUM 2021 hi ITI zirlai mek te thil siamchhuahte chu he hunah hian phochhuah a ni a. He Exhibition-ah hian an thilsiam phochhuahte hmang hian intihsiakna kalpui nghal a nih bakah ITI hnuaia trade hrang hrangah te inelna kalpui a ni bawk.

ROAD FUND BOARD
Chief Minister Zoramthanga kaihhruaiin 23.3.2021 khan Mizoram Road Fund Board chuan an hmachhawp hrang hrangte sawihovin CM Office Conference Hall-ah an thukhawm.

MJA GENERAL CONFERENCE VAWI 47-NA Lunglei-ah hmang
March 23, 2021 khan Convention Centre, Lunglei-ah Mizoram Journalists Association (MJA) General Conference vawi 47-na chu hman a ni a. I&PR Department changtu Minister Lalruatkima chu khuallian niin Vice Chairman HPC Lunglei Lawmawma Tochhawng chu khualzahawm a ni. MJA General Conference vawi 47-na ah hian MJA member mi 100 an kalkhawm a. Hemi bakah hian Lunglei DC Kulothungan A leh District official-te, MJA Advisor-te leh sawm bik dangte an tel a ni.

STA THUKHAWM
Passenger phur motor chi hrang hrang chuan/hman man ennawnin March 23, 2021 khan Commissioner & Secretary, Transport Department hovin Transport Directorate conference hall-ah an thukhawm.

BANGLADESH LEH MYANMAR CONSULATE DAH TURIN  NGEN
Parliament budget session kal mekah March 23, 2021 khan Mizoram Rajya Sabha MP K.Vanlalvena chuan Zero Hour ah thu sawiin Mizoram-ah Myanmar leh Bangladesh Consulate office hawng turin sawrkar laipui a ngen .

JOINT SECRETARY, MINISTRY OF FOREIGN AFFAIRS AN KAWM
March 23, 2021 khan Chief Minister Zoramthanga aiawhin H.Rammawi, State Planning Board Vice Chairman, K.Vanlalvena MP(RS) leh Rosangzuala MNF President Adviser te chuan Joint Secretary, Ministry of Foreign Affairs, Myanmar and Bangladesh changtu B.M Smita chu a pisa ah an hmu a.Tunlai Myanmar ramchhung politics boruak inlumlet mek leh Mizorama Myanmar raltlan lo lutte chung-chang te, Mizoram chhim lam atanga Sittwe lawngchawlhna pawh tur kawngpui a tlang thuai theih dan  chungchang  te an sawi pui bawk a ni.

CHIEF MINISTER KAWM
Chief Minister  Zoramthanga chuan March 22, 2021 khan Myanmar raltlante chungchangah Voice of America News, Washington DC te chu inkawmna a neih pui a, USA Chin Churches Leaders-te nen inkawmhona an nei bawk. Chief Minister hi National League for Democracy sawrkarna hnuaia Union Minister of Foreign Affairs chelhtu, Zin Mar Aung nen an lo inkawm tawh bawk a ni.