Tawnluia'n Official candidate-a telh a ni lo a duhdan a nih thu a sawi

Aizawl : February 26, 2024 Khan Mizo Hnam Run inkhawm neih a ni a. Thusawitu MNF Sr. Vice President Tawnluia chuan MNF headquarters hruaitu inthlan tur chungchangah "Party constitution ang chiahin kan kal," a ti. Official candidate a telh a nih loh chu a duhdan a nih thu a sawi bawk.

   Tawnluia chuan "MNF party chuan hruaitu term a tawp apiangin official nomination kan siam thin a. A duh tan floor atanga chuh theih a ni. (Chuhtu an awm avangin hmanah kan inthlang tawh). Floor atanga chuhtu an awm loh chuan official candidate-te tlingah puan thin an ni. Tun tumah pawh hian a duh apiangin floor atangin chuh theih a ni. Chuhtu an awm loh chuan RO-in candidate chhawp chhuahsate chu tlingah a puang mai dawn a ni," a ti.

Mizoram MLA ten House-a thut an ngaipawimawh fak

Aizawl : Vice President Jagdeep Dhankhar chuan February 26, 2024 khan Mizoram a rawn tlawh. MZU ah Convocation programme a hmanpui zawhin 9th Mizoram Legislative Assembly thutkhawm tum hnihna – Budget Session neih mek chu telpuiin member-te hmaah thu a sawi.

   Vice President chuan MLA zawng zawng deuh thaw House-ah an thu chu fakawm a tih thu sawiin, state dang legislature leh parliament ah pawh Mizoram in attendance tha tak an nei chu a sawi zui zel tur a nih thu a sawi a. Mizoram-a Assembly Session lo kalpui tawh dan te a lo en thu leh felfai leh zahawm taka an thu rel dan chu lawmawm a tih thu sawiin, MLA te chu midang tana entawntlaka an awm zui zel a beisei thu a sawi bawk.

   MLA zingah hmeichhia pathum lai mai Mizoramin a nei chu sawrkarna leh ram hmasawnna in a ken tel nia a hriat thu sawiin Vice President chuan lawmawm a ti a. India sawrkar in inrelbawlnaah hmeichhiate tan zau zawka kawng hawng tura hma hrang hrang a lak dante leh chu chuan rah tha zawk a chhuah ngei a rin thu a sawi bawk.

2024-25 Mizoram budget Rs. vbc. 14,412.12

Aizawl : Finance changtu Chief Minister Lalduhoma chuan February 27, 2024 khan Assembly budget session-ah kum 2024-25 Mizoram budget Rs. vbc. 14,412.12 (2023-24 budget 14,209.95) a pharh.

   Budget pumpui Rs. vbc. 14,412.12 zinga Rs. vbc. 11,957.04 chu sawrkar hnathawk hlawh, sawrkar inrelbawlna, pension hlawh (revenue expenditure) a ni a, Rs. vbc. 2,455.08 (17.03%) chu hmasawnna hna thawhna tur (capital expenditure) a ni.

   Sawrkar kum kal mek 2023-24 atana Mizoram budget chu Rs. Vbc. 14,209.95 niin, 2024-25 atana a punna Rs. Vbc. 202 vel a tling.

Application tlangzarh

Aizawl : 26.2.24 khan V. Malsawmtluanga, Lunglei North bialtu MLA, Vice Chairman HPC chuan a bial chhunga MLA fund leh hnathawh te langtlang taka, bial leh Mizoram mipuiin an en zung zung theihna tur MSTA application tlangzarhna hun an hmang.

   He application hi Vanlalsailova'n a tlangzarh a, MSTA Application hi Lailen Consulting siam niin Lunglei North bial chhunga hnathawh hrang hrang en duh tan he application hi google play store lamah download theih a ni. Hetiang app hi Mizoram-a a hmasa ni a hriat a ni.

KTP Conference Pandal hawnna nei

Aizawl : February ni 29 atanga March ni 3 chhunga KTP General Conference vawi 60-na neihna tur Ngopa Public Playground-a sak Pandal hlanna inkhawm chu February 27 khan neih a ni.

   Pandal hlanna inkhawm hi Organising Committee senior vice chairman Upa F. Thanglura'n a khaihruai a, Organising Committee Chairman Rev. E. Ramchullova'n pandal hlanna hun hi a hmang a, Central KTP Finance Secretary Upa F. Zoherliana'n thu a sawi a; General Conference puala buatsaih Souvenir tlangzarh a ni bawk.

Gujarat-a phurhthlak tur Hmarcha leh Sawhthing vailiam

Aizawl : Rural Development Minister Prof. Lalnilawma chuan February 29, 2024 khan Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited te tharchhuah Mizo Hmarcha Metric Ton 10 leh Sawhthing Metric Ton 18 chu Ch. Saprawnga Truck Terminal, Rangvamual, Aizawl atangin a vailiam.

   He programme ah hian Producer Company leh Buyer aiawh ten inremsiamna thuthlung ziahna hun leh sum inhlanna an nei bawk a. Heng thlaithar leitur hi Sus Agri Development Private Limited, Bengaluru, Karnataka lam niin Sawhthing leh Mizo Hmarcha an lei hi Gujarat-ah phurhthlak tur a ni. Heng Mizo tharchhuah thlaitharte hi India ram pawna thawnchhuah tura ruahmanna siam a ni.

The Mizoram GST (Amendment) Bill, 2024 pass a ni

Aizawl : The Mizoram GST (Amendment) Bill, 2024 chu February ni 26 khan Taxation Minister aiawhin K. Sapdanga, Home Minister in Assembly House ah introduce in, ngaihtuah ho turin a chhawpchhuak. He Bill hi casino, horse racing leh online money gaming atanga GST lak anih theih nana GST Dan amend na a ni.

   Heng activity pathum atang hian 28% GST lak a ni. He amendment hi India ram pum puiah October ni 1, 2023 atanga hman tura GST Council in thutlukna a siam tawh avangin, Mizoramah chuan Ordinance hmanga hman a ni a. Tun Session ah hian Act a siam turin Bill hi put luh a ni.

Bengdar endikna leh Hearing Aid semchhuak

Aizawl : Ephatha Society of Mizoram for the Deaf and Hard of Hearing leh Ali Yavar Jung National Institute of Speech & Hearing Disabilities (Divyangjan) te tangkawp buatsaih, Diagnostic & Fitment Camp for Hearing Impaired chu Ephatha Special School, Kulikawn West-ah February 27 khan neih a ni a. He hun hi Governor Dr Hari Babu Kambhampati chuan khuallian niin a hmanpui.

   Diagnostic & Fitment Camp for Hearing Impaired buatsaihna senso atan hian Governor chuan a thlawpzia lantirin pawisa fai Rs 50,000/- a thawh a. He camp buatsaihtu zinga mi, Ali Yavar Jung National Institute of Speech and Hearing Disabilities te chu an hmalakna tha a tih thu hrilhin hetianga camp buatsaih ngawt lo deuh a hmalakna huang zauh turin a chah.

CHA-ah inentirna khawl pahnih hawng

Aizawl : Health & Family Welfare Minister Lalrinpuii chuan 28.02.2024 chawhma khan Civil Hospital, Aizawl ah Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te chu a tlangzarh.

   Health Minister chuan natna enkawlna kawnga hmasawnna pawimawh tak tur vawiinah tlangzarh a ni thei chu lawmawm tiin tangkai taka hman a nih hlawm a beisei thu a sawi a. Thawktute chu mipui rawngbawltu an nih hre reng chunga theihtawp chhuah a hna thawk zui zel turin a chah.

Khelo India football champion University of Calicut

Aizawl : Ministry of Youth Affairs and Sports, Sports Authority of India (SAI), Association of Indian Universities, Indian Olympic Association leh National Sports Federation-te tangkawp buatsaih Khelo India University Games (KIUG) 2023 Men's football inelna chu February 27 khan Rajiv Gandhi Stadium, Mualpui-ah khar a ni a, final-ah hian Kerela Derby khelh niin University of Calicut chuan 2-1 in University of Kerela hnehin an champion.

   Patiala leh Mahatma Gandhi University, Kottayam te chuan pathumna dinhmun an hauh a, goal 6 khungtu Jijo Jaison University of Kerala chu top scorer a ni.

   Khelo India University Games hi India rama University level inelna sang ber niin, kumin hian North East India-a state 7 te'n an inthlen tawm a, Assam chu main host niin, sports discipline hrang hrang 15 a thleng a. Manipur tiam lovin State dang zawngin sports discipline 1 theuh an thleng thung a ni.

Rampum huapa lawmman la te lawmpui

Aizawl : February 27, 2024 khan School Education Minister Dr. Vanlalthlana’n rampum huapa lawmman late lawmpuina leh Smart City hmalaknaa Primary School 121 te hnena computer set semna Govt. Mizo High School tualzawla neih chu khuallian niin a hmanpui.

   Minister Dr. Vanlalthlana chuan he hunah hian thusawiin Red Ribbon National Quiz Competition-a lawmman latu PES Republic naupangte leh zirtirtute, National School Band Competition-a lawmman pathumna dawngtu Govt. Mizo High School te chu an thawhrimna chhuanawm a tih thu leh a lawmpui thu a sawi a. Smart City hmalaknaa Primary School 121 ten Computer set an dawng chu a lawm thu a sawi bawk.

Chapchar Kut Flowers Show hawng

Aizawl : Horticulture department leh Art & Culture Department tangkawp buatsaih ni thum chhung awh tur (28th February- 1st March) pangpar pho chhuah leh zawrhna hun, Chapchar Kut Flower Show 2024 chu February 28 khan Horticulture Minister Prof. Lalnilawma’n Aizawl Lungdawh, Khatla-ah a hawng.

   Pangpar chi hrang hrang zawrh leh pho chhuahna hun hman a ni a, Stall 63 awmin, Artistic- 21, Mass arrangement- 8, Ikebana-10, Perennial Potted-16, House plant-59, Bougainvillea-27, Potted flower-65, Bonsai- 32, Anthurium varietals-36 pho chhuah a ni a, pangpar thenkhat hi inbiakremnain a lei theih bawk a ni.

Art and Photo Ehxibition hawng

Aizawl : February 28, 2024 khan Information and Public Relations Minister Dr. Vanlalthlana chuan Vanapa Hall Lobby-ah March ni 1, 2024 (Zirtawpni) thleng awh tur Chapchar Kut 2024 Art and Photo Exhibition a hawng.

   He hunah hian I&PR Minister Dr. Vanlalthlana chuan Arts pawimawh zia sawiin, khawvel ram changkang tehna zinga Arts leh Sports te a tel thu a sawi a. Arts leh photography hmasawnna atan I&PR department hmalaknain ruahmanna tha tak tak a awm thin chu lawmawm a tih thu a sawi.

   Chapchar Kut Art & Photo Exhibition ah hian thlalak 120 phochhuah niin, lemziak 75, woodcarve 1 leh sculpture 1 dahchhuah a ni a. Artist te kutchhuak hi a duh tan lei nghal theih a ni.

MPSC member atan PB Lianthangpuii, MIS (retd) la lut

Aizawl : February 29, 2024 khan Durbar Hall, Raj Bhavan-ah Governor Hari Babu Kambhampati chuan PB Lianthangpuii MIS(rtd) chu Member, Mizoram Public Service Commission (MPSC) atan rinawmna thu tiam tirin a lalut. MPSC member atana hmeichhe ruat pahnihna a ni.

   MPSC member thar lakluhna hi H.Lalengmawia, Home Commissioner leh Chief Secretary charge la mek chuan kaihruaiin he hunah hian Member, MPSC atana Pi PB Lianthangpuii MIS(rtd) ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan PB Lianthangpuii MIS(rtd) chu rinawmna thu tiam tirin Member, MPSC atan a la lut a ni.

   MPSC member thar lakluhna hunah hian Chief Minister Lalduhoma a tel a. Speaker Lalbiakzama, Lok Ayukta Chairman C. Lalsawta, Sawrkar mi pawimawh te leh sawmbik mi thenkhat te an tel a ni.