Chhungkaw 9 luahlai chenna in kang

Aizawl : March 26, 2025 zanlai dar 12:35 am vel khan Lawngtlai District a South Diltlang khua-ah In pasarih, chhungkaw pakua in chenna atan leh dawr atana an luahte bungrua engmah chuh hman lovin a kangral vek.

   Kangmei a chhuak tih Ditlang khawtlang in an hriat veleh theihtawp chhuahin mi tlawmngai ten an thleh a. He kangmei chhuak avang hian nunna chan leh hliam an awm hriat a ni lo a. Central YLA chuan kangmei tuartu chhungkua te an tawrhpui thu leh a tul anga hmalak zel an tum thu an sawi.

Aizawl bawlhhlawh paihna hmun kang

Aizawl : Aizawl khawpui bawlhhlawh paihna hmun, Solid Waste Management Center (SWMC), Tuiriala bawlhhlawh tawih thei lo (dry waste) paihna chu March 26, 2025 khan a kang.

   Bawlhhlawh tawih thei lo paihna hmun Solid Waste Management Centre (SWMC), Tuirial kang chu hi March 27 khan thunun a nih tak avangin, March ni 28, 2025 atangin hawn leh a ni a. Chhiatna thleng leh palh thei laka invenna turin, AMC thawktute leh bawlhhlawh phur motor driver leh helper te chauh, SWMC, Tuirial-ah hian luh phalsak an ni a, rag picker leh pawn lam mi tumah luh phal a ni lo.

   Bawlhhlawh tawihtheilo kara bawlhhlawh tawih thei awmin bio gas siamin, kangmei nasa tak a siam chhuak thei a, hemi vang hian bawlhhlawh tha taka thliar hrang theuh turin mimal tin te AMC chuan an ngen.

Baryl-i’n chawimawina dawng

Aizawl : Mizo hmeichhe politician, Baryl Vanneihsangi chu Federation of Indian Chamber of Commerce and Industries (FICCI) hnuaia Women’s Wing, FLO-in Annual FLO Women Achiever’s Award, 2025 a hlan zingah a tel.

   Aizawl South III bialtu MLA hnenah hian chawimawina hi March 24, 2025 zan khan Taj, Vivanta Hotel, Guwahati, Assam-ah Assam Governor Lakshman Prasad Acharya-a’n a hlan.

   FLO Women Achiever’s Award hi kum 10 chuang sem tawh a ni a, professional line hrang hrang huamin Mizoram atangin zaiah Mami Varte-in a lo dawng tawh a. Baryl-i hi politics dawngtu hmasa ber a ni thung.

Ralthuam leh puak thei thil tam tham tak man

ZALEN March 24, 2025 : 22.3.2025 khan Lunglei PS team chuan Lunglei District Special Branch leh 92 Bn. BSF (Advance Party) hnen atanga an thu dawn bawhzuiin, Silai mu (7.62mm) - 7200, Detonator - Bawm 6, Primary Cord/Cordex - Tel 12 leh Fuse Wire - Tel 2 chu F. Laltlanmawii w/o HC Zorampianga, Chanmari, Lunglei chenna in atangin an man.

   Hemi kaihhnawihah hian mi pali, - F. Laltlanmawii (40) w/o HC Zorampianga, Sairep, P/A Electric Veng, Lunglei ; Zonunpari (42) w/o Chanchinmawia, Sairep, P/A Electric Veng, Lunglei, ; Zakaria Lalramdinpuia (38) s/o Rohmuna, New Siaha, Siaha Disttrict leh Lalremtluanga (47) te chu an man a, u/s 25(1AA) Arms Act r/w 5 (a) Explosive Substances Act ziah luh a ni.

Cycle chesualah tlangval boral

Aizawl : Cyclist Lalthazuala (26), Mission Veng chu March 24, 2024 zing khan chesualin a boral.

   Mizoram Cycling Association (MiCA) member, Lalthazuala (Tza), Mission Veng hi Eco Fest Rally an neihna-ah Rangvamual kawng chhukah BRTF Truck, Ashock Leyland nen in su palhin, Ebenezer Hospital-ah zing 8:30 khan a boral a ni.

MYC-in Mizo thalai 45 te thlahna hun hmang

Aizawl : March 27, 2025 khan Mizoram Youth Commission Auditorium, MINECO-ah MYC-in Honda India Foundation nena tangkawpa an buatsaih, Project Bhuniyaad hnuaia Hotel Management (F&B) thla 2 training chhuak Mizo thalai 45 te thlahna hun hman a ni.

   Thalai nula leh tlangval 45 tirh chhuahte hi 4th & 5th batch niin, Heng a hnuaia 4&5 star hotel a hnathawk turin an kal dawn a ni.

1. Turban Roopgarh - Udaipur(14)

2. Radisson Blu -Dharamshala(11)

3. Taj Dal View- Srinagar(6)

4. Taj Wellington Mews - Chennai(3)

5. Peerless Hotel - Hyderabad (2)

6. Club house Hotel - Morbi (2)

7. Sunday Hotel - Vadodara (5)

8. The Gold Beach Resort - Daman & Diu(2)

Co-Operative Union kum 50 tlin lawm

Aizawl : Cooperation Minister PC Vanlalruata chuan March 27, 2025 khan Mizoram State Cooperative Union Golden Jubilee lawmna, MSCU Training Hall, Dawrpui-a buatsaih chu khuallian niin a telpui.

   MSCU hi kum 1975 March thla khan din a ni a. MSCU Founder Padma Shree Lalbiakthanga Pachuau hnen atangin kum 50 kal taa cooperative union din tura hmalak a nih dan ngaihthlak a ni. MSCU Golden Jubilee lawmna inkhawmah hi an president K. Lalchamreia chuan a kaihruai a, CEO K. Lalduhawma chuan report a pe a. Vice president F. Lalchungnunga chuan lawmthu sawiin hun a hmang.

CM-in FLAM General Body Meeting hmanpui

Aizawl : Chief Minister Lalduhoma chuan March 27, 2025 khan Mizoram Legislative Assembly Annexe Conference Hall-ah Former Legislators Association of Mizoram (FLAM) General Body Meeting a hmanpui.

   FLAM hi kum 1994 a din a ni a, tunah hian member 117 leh associate member (ex MLA/MP te an thih hnua an aiawh an nupuite) 59 an awm mek. An zinga pahnih -Rothangi w/o Ch. Chhunga leh Nghakliani w/o Lalrinliana Dawrpui te chuan kumin hian kum za an tling a, chawimawina an hlan a ni.

   Mizoram UT inthlan hmasa ber 1972 -a tling mi 30 leh nominated member 3 te zing atangin mi pasarih (7) an la dam a, an zinga pathum ten vawiina an meeting hi an la telpui thei a ni. Kum 2024-25 chhungin an member pathumte an boral a, chungte chu Lalzarliani Hmar w/o Biakchhunga, Pangkungi w/o H. Lalsangzuala leh Kapoor Chand Thakuri (1972 MLA nominated) te an ni.

Inthen leh Rokhawmna dan ennawntu Committee thukhawm

Aizawl : Mizo Inneih, Inthen leh Rokhawmna Dan ennawntu Committee chu an Chairman Zahmingthanga Ralte, Addl. Secretary, Law & Judicial Department hovin Secretariat Conference Hall-ah an thukhawm.

   He hunah hian MKHC, CYMA, MHIP, MUP, Women Commission leh Mizoram BAR Association aiawhte bakah helam a tui mi leh mithiam bikte chu committee-ah hian an tel a ni.

   Thutkhawmah hian Member-ten siamthat ngai tia an lungrual theihna eng emawzat a awm a. he ennawn hna hi zawh fel thuai tum niin, Zawh fel a nih hunah Sawrkar-in tul a tih angin Legislative Assembly-ah Dan siamthat turin a la pu lut dawn a ni.

Lok Sabha MP leh Air Chief Marshall inkawm

Aizawl : March 26, 2025 tlai khan Lok Sabha MP Richard Vanlalhmangaiha chuan Chief of Air staff, Air Chief Marshal AP Singh chu Air Headquarters Office ah kawmin Mizo thalai te tana hamthatna awm thei te a sawipui.

   Richard Vanlalhmangaiha chuan Air Force a Mizo thalai te tan hna awlsam zawka an dil ve theihna turin Mizoramah recruitment nei ve turin Air Chief Marshal hi a sawipui a. Air Chief Marshal hian Air Force Recruitment hi India ram hmun hrang hrangah an nei thin a, Mizoram ah pawh neih ve ngei a nih theihna turin hma a lak tur thu a lo hrilh a ni.

Sikul bungraw Inthleng runpui nei

Aizawl : UD&PA department buatsaih Sikul Bungraw Inthleng Runpui – Reduce, Reuse, Recycle Centre – RRR Centre hmuna neih chu kar kalta khan District khawpui zawng zawngah kalpui a ni.

   Aizawl-ah March ni 19, 2025 khan UD&PA Minister Pu K. Sapdanga’n khuhhawngin, Centre pasarih (7) ah RRR Centre hi March ni 19 atanga ni 21 chhunga kalpui a ni a. Ni 24 atang khan UD&PA Sanitation Site Office, Solomon’s Cave Opposite ah March ni 28 thlenga hawn leh a ni a, March ni 26 atanga ni 28 thleng District khawpui tinah kalpui a ni bawk.

Home Minister-in MJA General Conference hmanpui

Aizawl : Mizoram Journalists’ Association chuan March 26, 2025 khan I&PR Auditorium, CHANEM Building, Champhai-ah General Conference vawi-51-na an hmang a. Home Minister K. Sapdanga chuan he hun hi khuallian niin a hmanpui a ni.

   K. Sapdanga chuan he hunah hian thu sawiin Mizoram Journalists’ Association chu pawl hlun leh pawimawh tak - an eizawnna hmanga khawtlang rawngbawltu leh sawrkar khalh ngil thin tute awmna a ni, a ti a. MJA hruaitute kaihhruaina hnuaiah General Conference vawi 51-na hial thleng theia an awm chu ropui a tih thu sawiin, ze hloh miah lova hei chen an kal thei chu thil chhinchhiahtlak tak a ni, a ti bawk.

   MJA President C. Lalrambuatsaiha pawhin he hunah hian Mizo hnam inpumkhat a pawimawh thu a sawi a. MJA member-te chu teirei peihna leh insumtheihna nei turin a fuih bawk a ni.

Mizoram Badminton Centre hawng

Aizawl : Vawiin khan Chief Minister Lalduhoma chuan March 25, 2025 khan Zuangtui-a Mizoram Badminton Centre sak thar chu a hawng.

   He Centre hi Aizawl Smart City Limited kaltlanga sak a ni a. Project Cost hi Rs. 18.21 crore niin, June, 2022 ah an tan a, kumin March thla hian thawh zawh a ni.

   Ground Floor ah hian car 40, two wheeler 70 dah theihna hmun, reception counter, reception office, Manager quarters, Janitor rooms, store room leh a dangte a awm a. A chhawng khatna, Court awmna floor-ah hian Standard Size Badminton Court paruk awmin a sirah mipui thutna Gallery zau tak a awm. Chu mi bakah chuan Gymnasium, Instructor room, Dormitory (female & male), Match official area, Players changing & locker room, Toilet Blocks, Medical Room, Coach Room leh VIP Room a awm. Centre hian Tui dahkhawlna litre nuai 2 leng a nei bawk.

Larsap-in MZU Convocation hmanpui

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd), Chief Rector of Mizoram University chuan Mizoram University (MZU) Convocation vawi 19-na, Multipurpose Hall, MZU Campus, Tanhril-a neih chu March 25 khan Khuallian niin a hmanpui. He hunah hian Mizoram Chief Minister Lalduhoma chu Khualzahawm a ni.

   MZU Convocation-ah hian MZU hnuaia zirlai 7724 te hnenah degree hlan a ni a. Vawiina inlan Doctor of Philosophy 104, Master's Degree 567, Master's Professional 149, Bachelor's Degree 143, Bachelor's Professional 176, Gold Medalist 51 leh Book Prize winner 3 te kutah degree leh lawmman hlan a ni.

   Mizoram University hi kum 2001 khan din niin, tun dinhmunah Department 37 a awm a. Centre 2 te'n School of Study 10 ah UG, PG leh Ph.D programme an kalpui mek a. Affiliated College 40 leh Constituent College 1 a nei mek bawk.

Minister hovin World TB Day hmang

Aizawl : March 25, 2025 khan District hrang hrangah World TB Day hman a ni a. Aizawl district ah chuan Directorate of Health & Medical Education Auditorium ah Health & Family Welfare Minister Lalrinpuii hova hman a ni.

   Lalrinpuii chuan TB chu mahni ngawta do a, umbo theih anih loh thu sawiin tanrual chu chakna anih angin tha leh zung seng khawm ila kan umbo thei ngei ang a ti.

   World TB Day hun hmannaah hian Khualzahawm Aizawl DC Er. Lalhriatpuia chuan Aizawl district chhunga 2024 chhunga TB Free Village ni thei khua te chu chawimawina a hlan bawk.

   District hrang hrangah pawh World TB Day hi hman a ni a. Hetah hian TB Free Village a puan khua te chu chawimawina pek an ni vek bawk.

NHM, Mizoram in Central atangin lawmman dawng

Aizawl March 24, 2025-a World TB Day Commemoration, Vigyan Bhavan, New Delhi a neih-ah Mizoram chuan Exemplary Performance-in TB Mukt Gram Panchayat Initiative lawmman a dawng.

   Lawmman hi Mizoram aiawhin Dr. Lily Chhakchhuak, Mission Director, National Health Mission chuan J.P. Nadda, Union Health Minister hnen atangin a dawng a, Dr. Zochhuanawmi, State TB Officer, NHM a tel bawk.

   Health Minister Lalrinpuii chuan NHM in hetiang lawmman a dawng thei hi lawmawm a tiin, National TB Elimination Programme (NTEP) thawktute, doctor leh nurse te, Health & Wellness Officers, Health Workers leh thawktu dangte thawhrimnaah lawmthu a sawi.

Health Care Scheme atana inbuatsaihna atana CHA leh ZMC&H tlawh

Aizawl : Health Care hman tawh tur kaihhnawiha Sawrkar lam inbuatsaihna hrang hrangte March 24, 2025 khan a hmunah Health Minister Lalrinpuii chuan enpuiin CHA leh Zoram Medical College & Hospital, Falkawn a tlawh a.

   Health Minister hi ZMC&H Medical Superintendent leh Deputy. Medical Superintendent bakah thawktu dangten an lo dawngsawng a, ZMC&H ah hian General ward, ICU, NICU, PICU leh Cabin te nen avaiin khum 420 an nei mek a ni. Health Care Scheme thar hman turah hian sawrkarin thawktu pek belh tumin recruitment process a kalpui a, hemi avanga General Bed thar 52 leh Cabin thar dang - 30 bakah, ICU khum 13 leh Cardiology khum - 6, NICU khum - 4 thar, Dialysis khawl - 10 hmanga hospital tih changtlun anih mek dante a hmunah a enpui.

   Civil Hospital, Aizawl-a Cardiology Unit tihchangtlunna atana hmalakna leh Cardiology ward-a Khum 11 awm mek, khum 11 thar dang dah belh a, khum 22 awm thei tura buaipui mekte chu a a enpui a, Cardiology CICU thar - khum 8 awmna tur, PICU - khum 4 leh Pediatric HDU khum - 8 te bakah Cath lab table 2 leh Recovery unit - khum 4 awmna siam thar tura ruahmanna leh hmalaknate a enpui bawk a ni.

World Water Day 2025 hmang

Aizawl: Khawvel puma tui hlutna inzirtirna ni (World Water Day 2025) chu March 24, 2025 khan PHE Department leh Central Young Mizo Association (CYMA) tangkawp bultumin, Vanapa Hall, Aizawlah hman a ni.

   Kumin World Water Day thupui "Glacier Preservation" hmangin Vanapa Hall, Aizawlah hman a ni a. He hun hi Prof. Lalnilawma Hon'ble Minister, PHED chuan khuallian nia hmanpuiin, he ni puala intihsiakna lawmman a sem nghal bawk a ni.

   World Water Day hi kumtinin March ni 22-ah khawvel pum huapa urhsun taka hman thin a ni a, kumin hian remchan zawkna vangin March ni 24 a hman a ni a. He ni pual hian Mizoram hmun hrang hrangah talk show hmanga inzirtirna leh mahni khaw tui lakna hmun thenfai hnatlangte neia hun hman a ni.

Thingphuntute pual hun hmang

Aizawl : Mizorama a hmasa ber atan Tree Growers' Mela, Aijal Club Park a buatsaih chu Horticulture Minister Prof. Lalnilawma chuan 24.3.2025 a hawng.

   He Mela hi ICFRE -Bamboo & Rattan Centre (BRC), Aizawl buatsaih a ni a. Ni hnih chhung (March 24-25) awh niin "The Future is Green: Invest in Trees" tih chu thupuia thlan a ni.

   Tree Growers' Mela neih chhung hian mipui en tur leh lei theihin thing leh mau tiak te, pangpar leh adangte phochhuah a ni a. Exhibition ah hian Florists, Orchid leh Bonsai chingtute an tel a ni.