City Bus chuan man thar hmang tan

Aizawl : State Transport Authority (STA) chuan, man chawia mipui phur lirthei chuan man a siam thar angin March 26 atang khan Aizawl City Bus te an tlan tan.

   STA rate thar Aizawl City Bus tana a bithliah hi stand khatah Rs. 8 a ni a, stand hnih ah Rs. 10 niin stand thum ah Rs. 12 a ni a, stand li ah Rs. 15 niin stand nga leh stand ruk ah Rs. 18 a ni a, stand 10 thleng an kal chuan Rs. 20 a ni.

   City Bus bakah hian STA chuan tunhnai khan thuchhuah siamin, kumin February thla ni 19-a STA thukhawmin a rel angin, man chawi a mipui phur lirthei service, taxi, Autorickshaw leh Maxicab te chuan man a bithliah thar a, 2-Wheeler taxi chu kilometre khat ah Rs. 30 niin, kilometre khat hnuah erawh Km tinah Rs. 20 zel a ni ang.

   Taxi pangngai ah km 1 ah Rs. 55 niin, hemi hnuah km tinah Rs. 45 zel a ni ang a, Autorickshaw chuan man chu km khat ah Rs. 35 niin, a hnu km tinah Rs. 25 zel a ni ang a, Maxicab chu metal road a a tlanin, km 1 ah Rs. 3.50 leh metal road lo ah Rs. 4 a ni dawn a ni.

MJA General Conference vawi 50na nei

Aizawl : March, 2024 khan Mizoram Journalist Association (MJA) chuan General Conference vawi 50-na chu DIPR Lianchhiari Run Conference Hall Aizawl-ah an nei a. Betsy Zothanpari Sailo, Addl Secretary Govt. Mizoram chuan a hman pui a.

   Conference-ah hian hruaitu thar thlanna neih niin President ni lai C. Lalrambuatsaiha chu thlan nawn niin, Vice President atan C. Lalhmachhuana thlan a ni a, Treasurer atan Lalrinmawia Sailo thlan niin, Ececutive member mi 11 thlanchhuah an ni bawk.

Seminar on Media, Law and Ethics nei

Aizawl : Mizoram State Legal Services Authority, Govt. Mizoram Law College leh Govt. Aizawl North College-te tangkawp chuan March 26 khan Seminar on Media, Law and Ethics chu Conference Hall, Gauhati High Court, Aizawl Bench-ah neih a ni.

   He hun hi Justice Michael Zothankhuma, Judge, Gauhati High Court leh MSLSA Executive Chairman ni lai chuan a hmanpui. He hunah hian Press mite, Law Professionals, Youtubers leh Special invitees te an tel bawk a ni.

   Justice Michael Zothankhuma chuan he seminar a topic hrang hrangte chu an inkawihhnawih dan sawiin, Ethics chu mahni chhungril lam nun vawngtu tur atana dan siam, mihring kan nun ho nan leh nitin mimal nun a kan tihtur mawi leh tha zawk kan induan hi niin, Law kan tih ve thung erawh chu pawn lama min vawngtu, kan khawtlang inrelbawlna kawnga kan tih tur leh tih lo tur mumal tak kan siam hi a nih thu a sawi.

CEO hovin Lok Sabha inthlanpui tur chungchang sawiho

Aizawl : Madhup Vyas, Chief Electoral Officer, Mizoram hovin a pisa ah Lok Sabha MP thlan huna vote tla a that theihna tur ngaihtuahin March 28 khan sawrkar hotu pawimawh an thukhawm.

   Chief Electoral Officer chuan inthlanpui awm apiangin MLA inthlan aiin Lok Sabha MP thlanna ah vote tla a chhe ziah tih sawiin, MLA inthlanpuiah India ramah pawh vote tlak thatna ber an nih thin laiin a hnu lawk thla 4 awrh ah Lok sabha MP thlan lehnghal a ni a, MLA inthlanpuia vote tla a phak loh bakah Lok Sabha MP thlan hnuhnung ber kum 2019 ah phei chuan national average vote tla pawh kan pha lo a, tan kan lak a tul hle a ni a ti.

   Meeting-ah hian Dr H. Lianzela, Addl. Chief Electoral Officer ; James Lalnunmawia, Joint Chief Electoral Officer ; Lalnunhlua, Sports & Youth Services Director ; Aizawl bawrhsap Nazuk Kumar ; R. Lalnunthari, Joint Director, School Education ; Dr Lalthansangi Fanai, Jt. Director, Higher & Technical Education ; Henry C. Lalrawnkima, Deputy Chief Electoral Officer ; R. Lalfamkima, Scientific Officer, MIRSAC leh Election Deparment official te an tel a ni.

Adolescence Education kalpui chungchang training

Aizawl : March ni 26, 2024 atang khan ni thum awh SCERT Auditorium-ah Training Teachers on School Health Program for implementation of Adolescents education Program at Private School in Mizoram chu Aizawl District tan hawnna leh training thawhkhatna neih a ni.

   He Training hi SCERT, MSACS, School Education Department leh DAPCC, Aizawl District te thawh honaa buatsaih a ni. Training ah hian Aizawl District huam chhunga Private School 25 atangin ziritrtu pahnih theuh an tel a ni.

   Hawnna inkhawm hi Lalnunsiami, Dy.Director, SCERT in a kaihruaia, Dr. Lalduhawmi Thomte Jt.Director leh Dr.R.Lalnienga District AIDS Control Officerten thusawina hun an hmang. Laldampuii, Project Coordinator chuan training kalphung leh nihna sawifiahna hun a hmang bawk.

Scrutiny of Nominations neih zawh a ni

Aizawl : Member of Parliament (Lok Sabha) atana inthlanpui awm turah Mizoram a seat pakhat awm chu inchuh turin mi paruk (6) in nomination an thehlut a. March 28 khan heng mite leh an aiawhte chu Returning Officer Nazuk Kumar hovin a pisa, Aizawl DC Office ah General Observer Dr. Nipun Vinayak telpuina in nomination endikna (Scrutiny of Nominations) neih a ni.

   1-Mizoram (ST) Parliamentary Constituency a in candidate tura tlinga pawm te chu hengte hi an ni:

A. Recognised National & State Party Candidate te:

1) Lalbiakzama, Indian National Congress

2) Richard Vanlalhmangaiha, Zoram People's Movement

3) Vanlalhmuaka, Bharat Janata Party

4) K. Vanlalvena, Mizo National Front

B. Registered Political Party candidate (Recognised National & State Political Party ni lo):

5) Rita Malsawmi, Mizoram People's Conference

C. Independent Candidate

6) Lalhriatrenga Chhangte, Independent

Training on Tobacco Control for Law Enforcers nei

Aizawl : 28.03.2024 (Ningani) khan National Tobacco Control Programme, National Health Mission te leh Aizawl Traffic Police te buatsaihin "Training on Tobacco Control for Law Enforcers (Traffic Police)" tih chu SP Aizawl Conference Hall-ah neih a ni.

   He hun hi Dr. H. Lianthangpuia, State Nodal Officer, National Tobacco Control Programme chuan a kaihruai a, he hunah hian Stephen Lalrinawma, MPS, Sr. Superintendent of Police, Traffic chu Special Guest a ni.

   Vanlalzari, State Legal Consultant, National Tobacco Control Programme chuan "Vaihlo khuahkhirhna dan leh a kaihhnawih" dan hrang hrangah powerpoint presentation hmangin zirtirna hun a hmang a. Public transport-ah te meizuk ching an la awm thin a, Taxi, Maxi Cab, City Bus etc-ah temeizuk khap a ni a, meizu man an awm a nih chuan dan ang ?200/- thleng pawisa chawitir a hrem theih anih thu a sawi.

Vote tla a tam theihnan inrawnkhawm buatsaih

Aizawl : State Media Cell for Lok Sabha General Election, 2024 chuan March 27 khan DIPR Conference Hall, Lianchhiari Run-ah April ni 19, 2024 a Lok Sabha inthlanpui neih tura vote tla a tam theihna tura inrawnkhawmna hun a buatsaih a, Kohhran hrang hrang thalai hruaitute, Tlawmngai Pawl hrang hrang hruaitute, Mizo Zirlai Pawl hruaitute bakah hnam bil zirlai pawl hrang hrang aiawhte an tel.

   Inrawnkhawmna hun hi Dr H. Lianzela, Addl. Chief Electoral Officer, Mizoram in a kaihruai a, Mizoramah chuan Lok Sabha MP thlanna aiin MLA thlanna ah vote tla a tam sang fal hle thin thu sawiin, MLA thlanna ah India rama vote thlak tha ber te zinga mi kan nih laiin a hnu lawk thla 4 vel lekah Lok Sabha MP kan thlang leh thin a, hetah thung erawh national average pawh kan pha thei ngai meuh lo a, mipuite a bik takin thalaite zingah vote tla a that leh zual theihnan kan zavaia kan tan tlan a tul a, hemi tur hian engtiangin nge hma kan lak ho ang a, kan thawhho theih ang tih sawihona hun an ruahman tih a sawi a ni.

   Sawihona hunah hian Mizoram Upa Pawl, Central YMA, Central KTP, Mizoram Thalai Kristian Pawl, Salvation Army Youth, North-East PYD, Mizoram PYD, Adventist Youth Ministries (SDA), Diocese Catholic Thalai Pawl, Mizo Zirlai Pawl, Siamsinpawlpi (Paite Zirlai Pawl), Hmar Students Association, Mizoram Bawm Students Association, Lai Students Association, Mara Students Organisation, Pang Zirlai Pawl, Central Young Chakma Association leh Bru Students Association aiawhte an tel.

Governor-in Home te sum hmuh tur sanction na tichhuak

March 27, 2024 khan Finance Deptt. Government of Mizoram-in Delegation of Financial Power Rules hmanga thuneihna pek angin Mizoram Governor chuan Home hrang hrang 43 te tana sum pek tur Rs. 10,87,800/- (Cheng nuai sawm sing riat leh sangsarih zariat) chu semchhuah tur a sanction.

   TNT, Muanna veng tih loh Home dang zawng zawng chuan Rs. 25,250 vek an dawng a, TNT bik hian 27,300 an dawng thung a ni.