Larsap-in SIC atan Dr. Lalzirmawia Chhangte rinawmna thu tiam tirin a lalut

Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan March 3, 2026 khan Dr. Lalzirmawia Chhangte, IAS (Retd.) chu Durbar Hall, Lok Bhavan-ah rinawmna thu tiam tirin Mizoram State Information Commission (MSIC) hnuaia State Information Commissioner atan a lalut.

  Lakluhna inkhawmah hian Chief Secretary Pu Khilli Ram Meena chuan Larsap-in State Information Commissioner atana Dr. Lalzirmawia Chhangte, IAS (Retd) a ruatna notification a chhiar chhuak hmasa a. Hemi hnu hian Larsap General (Dr) Vijay Kumar Singh chuan Dr. Lalzirmawia Chhangte, IAS (Retd.) chu rinawmna thutiam chham tirin Mizoram State Information Commissioner atan a lalut a ni.

  He hunah hian Chief Minister Lalduhoma, Speaker Lalbiakzama, EF&CC Minister Lalthansanga, Agriculture Minister PC Vanlalruata, IPRP&S Minister B. Lalchhanzova leh mi pawimawh dangte an tel a ni.

  Mizoram State Information Commissioner atana lakluh tak Dr. Lalzirmawia Chhangte, IAS (Retd) hi Tarpho, Hnathial District khaw chhuak niin, thiamna lamah B.A. (Hons. in Education) (NEHU 1986), LL.B (NEHU, 1993), M.A. (Public Administration) (HPU Shimla 2001), B.C.S (Serampore College, 2007), D.Min (Serampore College, 2018) leh Ph.D (Public Administration) (MZU, 2023) degree nei a ni.

World Hearing Day (Ri Hriatna Ni) hman a ni

Aizawl: Ri Hriatna Ni (World Hearing Day) chu Mizoram-ah a vawi 11-na atan Directorate of Hospital & Medical Education Auditorium, MINECO-ah March 3, 2026 khan hman a ni a. He hunah hian Pi Vanlaldiki, Commissioner, Persons with Disabilities (PWD), Govt. of Mizoram chu khuallian niin, Dr. R. Lalchhuanawma, Mission Director, National Health Mission chuan hun a kaihhruai a ni.

  Dr. Rita Zoramthari, MS ENT, Civil Hospital, Aizawl chuan kumin World Hearing Day thupui ‘From communities to classrooms: hearing care for all children’ (Khawtlang atanga naupangte thlengin: ri hriatna tha nei tura naupangte enkawl) tih hmangin thu sawina hun a nei.

  Kumin FY 2025-2026 (April 2025 – January 2026) thlenga chhinchhiah danin Mizoram chhungah beng lama insawiselna nei mi 31,735 lai en niin beng natna emaw beng ri hriatna thalo nei mi 4,750 hmuhchhuah tawh an ni a, mi 222 chu beng thalo vanga zai an ni tawhbawk. Hei bakah hian mi 1,541 chu bengdar dawng tur leh Speech Therapy tul ang te ti tura refer an ni a.

Sairang Rel Station-ah buhfai phur rel lo hmuak thleng

Aizawl: FCS&CA Minister B.Lalchhanzova chuan March 3, 2026 zing khan Sairang Rel Station-ah buhfai quintal 25,901, Rel wagon 42-a lo kal Rel (Train) a lo hmuak thleng. He buhfai phur Rel (Train) lo hmuahna programme tawi, Food Corporation of India (FCI), Divisional Office in a buatsaih-ah hian K. Vanlalvena, MP(RS) pawhin Chairman,State Consultative Committee of FCI a nihna angin a tel pui.

  Sairang Rel station programme–ah hian Supply Minister B.Lalchhanzova chuan Rel hmanga Sairang Rel Station a buhfai phurh thlena a lo awm ta hi Mizoram mipui tan thil chhinchhiah tlak tak nia a hriatthu sawiin, furpui lo thleng turah pawh a thlamuan sawt thu a tarlang. Minister chuan Mizoramin thla khata Buhfai kan mamawh zat hi 97,000 quintals a ni a, 55,000 quintals hi FCI atanga dawn niin, 41,000 Qntls hi a thlawn a dawn a ni. A bak zawng hi Open Market Sale Scheme (OMSS)( Domestic) atanga 830/quintal a lei thin a ni. Aizawl, Lunglei leh Lawngtlai FCI Godown-a dah tur chu Sairang Rel Station-ah hian a lo thleng tawh dawn a. Bairabi Rel station-ah chuan Mizoram hmar lam Godown-a dah tur a thleng ve tawh thung dawn a ni, a ti.

Larsap-in National Level Camp-a tel NCC Cadet-te lawmpuina buatsaih

Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan March 3, 2026 khan Mizoram atanga National Level Camp-a tel National Cadet Corps (NCC) cadet 19 te lawmpuina hun Durbar Hall, Lok Bhavan-ah a buatsaih. He hun hi Chief Minister Lalduhoma, Sports & Youth Services Minister Lalnghinglova Hmar leh Lt Col Clement Lalhmingthanga, MLA te'n an telpui a ni.

  Tunhnai NCC national level camp neih zawh takah khan Mizoram atangin NCC cadet 19 an tel a. 20 Mizo Bn. NCC atangin cadet 2, 1 Mizo Bn. NCC atangin cadet 1, 1 Mizo Air Sqn NCC atangin cadet 8 leh 2 Mizo Bn. NCC atangin cadet 8 te an tel a. Heng zinga cadet 4 te hi Republic Day Camp (RDC) ah telin, cadet 1 All India Thal Sainik Camp (AITSC) ah a tel a, cadet 5 te All India Vayu Sainik Camp (AIVSC), Air Force NCC central Camp-ah telin, cadet 9 te Special National Integration Camp (SNIC) ah an tel a ni.

  He hunah hian Brig GS Arora, Group Commander, NCC Mizoram, sawm bik official dangte, NCC Officer-te leh Cadet tawiawmtu an chhungte an tel a ni.

District Catalytic Intervention Plan Fund sem

Aizawl : Chief Minister Lalduhoma chuan Planning & Programme Implementation Committee room-ah March 2, 2026 khan District Catalytic Intervention Plan Fund semna a nei. Mizorama district tinte chu an District Plan a taka an kalpuina tur cheng vaibelchhe khat theuh pek an ni.

  Chief Minister chuan, "Tun hmain District Planning Committee hi din a lo ni tawh a, meeting te pawh an nei ve thin a. Nimahsela, an district plan te a taka an kalpuina tur fund pek an ni ngai lova. An ruahmannate a takin an kalpui thei thin lo. Kan sawrkar hian district-ten hma an sawnna tura anmahni ngeiin plan an nei leh chumi ti hlawhtling tura sum leh pai pek ngei theih hi kan duh a. Vawiinah a bul kan tan ta a. Kan flagship scheme Bana Kaih tihhlawhtlinna pakhat a ni," a ti.

  Chief Minister hian Bank Cheque -in fund te hi a hlan a ni. He Fund hi Handholding Scheme Component 5 na, Decentralised Plan hnuaia pek an ni a, an pawisa dawn zaa sawm hi Admin Fund atana hman theih a ni ang. An thawh that dan a zir zela la pek belh zel tur a ni.

Lunglei Ni a tum khat nan hmang

Aizawl: Kum 1889 March ni 4-a Colonel Tregear-a'n "Fort Lungleh" a sak tan ni hriat reng nan leh Lunglei khawpuia cheng, thang leh thar zelte'n Lunglei khawpui hmangaihna thinlung an put thar zel theih nana Lunglei puala ni bik ruahman, "Lunglei Ni" chu March 4, 2026 khan Lunglei Municipal Council (LMC) huaihawtin Lunglei-a C. Thuamluaia Mual-ah a tum khat nan hman a ni. LMC Chairman Lalzuithanga chu Khuallian a ni.

  Lunglei Ni pual hian intihsiakna hrang hrang lawmman siam a ni a. A lawm naah hian LMC huam chhunga Young Mizo Association (YMA) branch telna Zaipawlpui chuan H. Lalringa (L) hla phuah, "Leitlangpui a chul dawn lo" tih chu an rem a. Mizo Cultural Artistes' Association (MCAA) Lunglei Sub-Headquarters, Higher and Technical Institute Mizoram (HATIM), Government J. Buana College, YMA Rahsiveng Branch leh YMA Chanmari Branch te'n hnam lam chi hrang hrang entirin, Lunglei Government College chuan Mizo hnam thuam chi hrang hrang an entir.

  Lawmna hun khatnaah hian Esther Hnamte leh Lalenkawli Pautu te'n zaia kal khawmte awiin, Organising Secretary, Sub-Headquarters YMA Secretary Zothanzuala Hnamte chuan lawm thu sawiin hun khatna a khar.

Central hotu lianin PM SHRI School tlawh

Aizawl : Central Sorkar-in State leh UT-a Prime Minister School for Rising India (PM SHRI) School te tlawh chhuak tura ruahmanna a siam angin Central Nodal Officer (CNO-PM SHRI) Lalchhandama, Joint Secretary, Ministry of Rural Development, Govt.of India chuan Serchhip District hnuaia a PM SHRI School te March 5, 2026 khan a tlawh.

  Lal Chhandama chuan PM SHRI Govt Buangpui Primary School, PM SHRI Govt Khawlailung Primary School-II, PM SHRI Jawahar Navodaya Vidyalaya, Thenzawl, Serchhip District chu an School hmunah theuh a tlawh a. PM SHRI School atana hmalakna awm zawng zawng te chip chiar takin a enfiah a, Zirtirtute kawm nghal bawk.

Excise minister hovin Passing Out Parade hmang

Aizawl: Central Training Institute, Sesawng-ah 11th Batch, Excise & Narcotics, Basic Training zote pualin March 4, 2026 khan 'Passing Out Parade' hun hman a ni a, Excise & Narcotics Minister Lalnghinglova Hmar chuan khuallian niin hun a hmanpui a, Adviser to Chief Minister Lalmuanpuia Punte-in khualzahawm niin a telpui bawk. 

  Training hi September ni 1, 2025 atang khan neih tan a ni a; training chhuakte hi an vaiin mi 22 niin Sub-Inspector 12 leh Constable 10 an ni. vawiin hun hmannaah END Commissioner Z. Lalhmangaiha bakah Department-a mi pawimawh eng emaw zat an tel a. CTI Commandant Lalrengpuia'n training chhuakte rinawmna thu tiamtirin, training neih chhunga ti tha zual mi 5 te hnenah END Minister-in lawmman a hlan bawk. END Joint Commissioner Peter Zohmingthanga'n lawmthu sawiin hun hi a khar a ni.