TNT dintu hnenah Padma Shri hlan

Aizawl : India rama civil mite chawimawina sang Padma Shri chu May 9, 2024 khan India President Droupadi Murmu in TNT dintu Sangthankima hnenah a hlan.

   Sorkar laipui chuan January ni 26 Republic Day khan kumin atana Civil mite chawimawina hrang hrang, Padma Shri, Padma Bhushan leh Padma Vibhushan dawng turte a puang a, Padma Shri dawng tur mi 34 zingah Mizoram atangin Sangthankima hi a tel a ni.

   Thutak Nunpuitu Team (TNT) dintu Sangthankima hian Mizoram hmun hrang hrangah centre a din a, chung hmunah te chuan fahrah, vohbik, ruihhlo ngaite thlengin a enkawl a, heng a enkawlna kawngah chuan Pathian rinchhanin ke a pen a ni.

Finance Commission a rawtna thlen tur rel

Aizawl : May 9, 2024 khan Chief Minister Lalduhoma, Finance Minister ni bawk hovin a office ah 16th Finance Commission hnena rawtna thlen tur relin mi pawimawh te an thukhawm.

   Meeting ah hian kum nga chhunga Mizoram sawrkar sum hmuhna leh hmanralna te, leiba neih dan leh rulh dan te, kum nga hma lama mi te pawh uluk taka zirho a ni a. Chumi hnuah kum 2026 April ni khat atanga hman tan tur Central leh State te sum insem dan duangtu tur 16th Finance Commission hnena thlen tur rawtna te an duang tan a ni.

   Hmasawnna inkhairual leh mitin huapzo a awm theih nan rawtna hi uluk taka duan ni se tiin an rel a. A tul ang zela la thutkhawm leh thin tur a ni.

Damlo harsa zual awm man pek sak

Aizawl : May 7, 2024 khan Synod Hospital-a damlo harsa mi 863 te awm man cheng vbch. 2 leh nuai 18 chuang pek sak an ni.

   Synod Moderator, Rev. R. Vanlalnghaka hoin Synod Hospital Board chu an thukhawm a. Hospital Board Secretary, Dr. Lalthakima'n report atanga a lan danin, sorkar kum liamta 2023-24 chhung khan damlo harsa, damdawi in awm man pe thei lo mi 863-te tan Synod Charity Fund atangin cheng vbch. 2, nuai 18, sang 4 leh 753 pek sak an ni.

AI Based Financial Empowerment for Mizoram hawng

Aizawl : May 9, 2024 khan Mizoram University (MZU) Auditorium-ah National Level Workshop, "Artificial Intelligence based Financial Empowerment for Mizoram" tih chu Governor Dr Hari Babu Kambhampati chuan khuallian niin a hmanpui.

   MZU Chief Rector Governor Dr Hari Babu Kambhampati chuan tunlai khawvelah Artificial Intelligence tangkaina mit in a hmu vek a. Nitin nuphungah awlsam nasa takin a thlen a, a tha zawng leh a tangkai zawnga Mizoram tan hman a nih theih nana MZU leh NIT Mizoram mithiam te hmalakna chu thil ropui tak a ni a ti. Mizoram tan bik AI based Financial Technology Projects 11 kalpui mek chu Mizoram mila mipuite tan chhawr tangkai theih chi niin a hriat thu a sawi.

   Project Investigator leh Co-Project Investigators te thawhrimna leh remhriatna te chu mipui tan vanneihna, hnathawh leh khawsak tiawlsamtu a la ni thuai dawn tih a sawi. MZU leh NIT Mizoram hotute chu hetiang hmalakna pawimawh bikah te hian nasa zawk a zirbingna kalpui tur leh Patent pawh neih belh zel tura tan la chhunzawm turin a fuih bawk.

Lok Sabha Inthlanpui 2024-a kum 100 chuanga upa vote thlak hnenah chawimawina hlan

Aizawl : Lok Sabha Inthlanpui 2024 neih zawh taka Lawngtlai District chhunga kum 100 chuanga upa vote thlakte hnena chawimawina pek tura ruahman chu Thanglianhluma, kum 104, Lawngtlai College Veng hnenah May 6 khan hlan a ni.

   Lawngtlai District Election Officer Cheemala Siva Gopal Reddy ruahmannain Lawngtlai District chhunga kum 100 chuanga upa Lok Sabha Inthlanpui 2024-a vote thlakte chu chawimawina thuziak leh ngaihhlutna thilpek (rice cooker) hlan ni se, tih a ni a. Hemi bawhzui hian April ni 19, 2024-a 37/17-College Veng South, Lawngtlai polling station-a vote thlak Thanglianhluma chu Election Officer Denny Lalchhuanawma leh DIPRO & SVEEP Nodal Officer C. Lalhruaitluanga te'n an inah kal chilhin chawimawina thuziak leh ngaihhlutna thilpek hi an hlan a ni.

   Lawngtlai District chhungah hian kum 100 chuanga upa vote thlak pahnih an awm a. Pakhat zawk chu Famiangi, kum 116, Pangkhuaa mi niin, kum upate tana in lama vote thlak theihna (home voting) ruahmanah vote a thlak a ni. Ani pawh hi remchang hmasaah chawimawina thuziak leh ngaihhlutna thilpek hi hlan tura ruahman a ni.

MPSC Chairman supernuation pension in chhuak

Aizawl : May 6, 2024 khan Mizoram Public Service Commission (MPSC) Chairman J.C.Ramthanga IAS (Retd) chu MPSC a thawh hun bi a lo tawp tak avangin supernuation pension in a chhuak a. Amah thlahna pualin MPSC Examination ah hun hman a ni.

   J.C.Ramthanga hi kum 1989-ah IAS a lut a. Manipur cadre niin Manipur state sawrkar hnuaiah kum 25 leh Mizoram state sawrkar hnuaiah kum 8 office pawimawh tak tak chelha a thawh hnuin a service a bahlahna awm lovin May 31, 2022 khan Mizoram sawrkar atangin pension-in a chhuak a. June 21, 2022 ah Chairman MPSC hna zawmin kum 2 a thawh chhung hian MPSC tih changtlunna tur sulhnu duhawm tak tak hnutchhiahin May 6, 2024 hian a hna a lo chawlhsan ta a ni.

3rd Inter District Cricket Tournament champion lawm

Aizawl : Cricket Association of Mizoram hnuaia District te inelna 3rd Inter District Cricket Tournament a champion Serchhip District Cricket Association (DCA) team te lawmpuina leh chawimawina inkhawm May 8, 2024 khan Serchhip DC Conference Hall-a neih a ni a, Serchhip DC David Lalthantluanga chu khuallian a ni.

   Cricket Association of Mizoram hnuaia district te inelna 3rd Inter District Cricket Tournament chu April ni 23 – 27 inkar khan Champhai-ah neih a ni a. Serchhip DCA chuan final ah Champhai DCA chu wicket 8 a hnehin a vawi khat nan an champion a ni.

   Final match a half century siamtu Vanlalhruaia, Serchhip DCA chu ‘Man of the match’ atana thlan a ni a. Player of the tournament lawmman chu Suraj Singh, Serchhip DCA (132 runs & 9 wickets) chuan a dawng a, Hmingthanpuia, Serchhip DCA (9 wickets) chuan Best Bowler lawmman a dawng bawk a ni.

MIS thar ten Champhai tlawh

Aizawl : District Information & Public Relations Office leh District inrelbawlna kawnga pawimawhte zirchiang turin Mizoram Information Service (MIS) Officer thar 5 te chuan May 8, 2024 khan Champhai an thleng a, Project Director, DRDO Champhai Lalrinawma, SP charge la mektu Addl. SP Lalmalsawma Hnamte te hmuin kawmna hun an hmang.

   Thuthar thehdarhtute nen I&PR Conference Hall, CHANEM building-ah inhmelhriattirna leh inkawmhona hun an hmang zui a ni. Hemi hnu hian Champhai District chhunga thuthar thehdarhtute nen inhmelhriattirna leh inkawmhona hun I&PR Conference Hall-ah an nei bawk. Thuthar thehdarhtute nena inkawmhona hun kaihruaitu Dr. Lallawmkima, DIPRO Champhai chuan kaihruaiin I&PR Department leh MJA Champhai District te'n sawrkar thuchhuah, mipui hriattur puanzar kawngah thawhhona tha tak an neih dante a tarlang.

   Mizoram Information Service 2024 batch mi 5 te chuan District Office Orientation Programme chu May 8-10, 2024 chhung khan Champhai District-ah training an nei a. Kar hmasa lam khan Kolasib District-ah hun an hmang a, ruahman dan chuan tun thla tawp hian Lunglei District an tlawh dawn a ni.