Medal late lawmpuina hmanpui

Aizawl: Sports and Youth Services Minister Lalnghinglova Hmar chuan May 14, 2026 khan Directorate of Sports and Youth Services Conference Hall, MINECO-ah kumin chhunga national level-a sports competition hrang hranga medal hlawh chhuakte lawmpuina hun a hmang.

  Lalnghinglova Hmar chuan infiammite chu Olympic Games khel pha thei tura tan la turin a fuih a, ‘Empowering Mizoram Sports’ programme chu Mizoten Olympic Games a kan tel ve thuai theih nan sport thlan bik pariatah kalpui mek a nih thu a sawi. Hockey chu Mizoten Olympic medal lak theihna hmasa ber tur niin a ngaih thu a sawi a, hmeichhe hockey zirna atan Thenzawlah seat 40 a awm mai bakah, mipa tan hockey zirna tur ngaihtuah mek anih thu a sawi bawk. Infiammite chu an sport discipline theuhah thangchhuah thei tur khawpa tan la turin a chah a ni.

Police training na tihchangtlunna hawng

Aizawl: Home Minister K. Sapdanga chuan May 14, 2026 khan Police Training School, Thenzawl-ah hmasawnna ruhrel thar - PTS gate pui siam thar te, digital lab, indoor gymnasium leh Indoor Firearms Training Simulator te a hawng. Hawnna inkhawmah hian Mizoram DGP Sharad Agarwal, IPS leh Mizoram Police-a senior officer thenkhat leh department dang atangin officer eng emaw zat an tel a ni.

  He hmalakna hi Mizoram Home Minister leh DGP te hmalaknain, Assistance to States & UTs for Modernisation of Police (ASUMP) Scheme hmanga siam a ni a. Police Training School-in police training tih changtlun leh tih hmasawnna atana hmalakna a ni.

Mi 381 hnenah Artificial Limbs sem

Aizawl: Vawiin khan AH &Vety Dept Minister leh MLA South - I bialtu ni bawk C. Lalsawivunga chuan May 14, 2026 khan Republic Veng Community Hall No. 2-a Artificial Limb Manufacturing Corporation of India (ALIMCO), Pradhan Mantri Divyasha Kendra Aizawl buatsaih, Rualbanlo leh kum upate tana Artificial Limb (kut/ke lem) leh Aids/Appliances (Wheelchair, hearing aids) sem na hun a hmanpui.

  He hunah hian rualbanlo leh kum upa puihna (assistance) dawng thei thlan chhuah mi 381 te pek an ni.

  ALIMCO hi kum 1972 khan din niin, India ramah centre panga din tawh a ni a. Artificial aids leh appliances te, piangphunga rualban lo leh kum upate mamawh siam chhuak in kum thum dan ah puitling tan dil theih a ni a, kum khat danah naupang tan dil leh theih a ni bawk. 

DONER-in sawhthing sawngbawlna dinna tur suction nghal

Aizawl : Chief Minister Lalduhoma leh DoNER Minister Jyotiraditya Scindia te chuan May 13, 2026 khan online-in Mizoram Ginger Unique Selling Proposition Project, Rs. 189.78 Crore senna tur - Sustainable Ginger Cultivation & Value Chain Development Project an hawng a.

  He project-a Sustainable Cultivation, Farm Mechanization leh a dangte hi Ministry dangte nena thawkho (Convergence) a kalpui tur a ni a, Post-Harvest Management & Processing erawh hi chu NEC (Focussed Development Component) Fund atanga thawh tur a tih a ni a. A thawh nan Rs. 30.13 Crore chheh hran a ni. Project hawnna inkhawm neih zawh veleh Ministry of DoNER chuan Rs. 30.13 Crore hi NEC ah hian a sanction fel nghal a ni.

QAMS leh Mizoram House book-na hawng

Aizawl: Chief Minister Lalduhoma chuan May 14, 2026 khan CM Conference Hall-ah General Administration Department enkawl Mizoram sorkar quarters luah dilna leh pekna online hmanga kalpuina Quarters Allotment Management System (QAMS) leh state pawna Mizoram House-te online hmanga book-na Mizoram House Online Reservation System a hawng.

  Quarters Allotment Management System hi nikum August thla atanga buaipui tan kha a ni a. Hman theih nghal a ni a, site address chu: qams.mizoram.gov.in a ni.

  Mizoram House Online Reservation System hi kumin March ni 2 atang khan enchhin tan niim official-a hawn a nih hma hauhin dilna 2796 a lut hman a, mi 1640 te chu allotment pek an ni. A address chu: mizoramhouse.mizoram.gov.in a ni.

SDGI Global University Convocation hmanpui

Aizawl: Mizoram Larsap, General (Dr) Vijay Kumar Singh chuan May 13, 2026 khan SDGI Global University, Ghaziabad, Uttar Pradesh, Convocation hmasa ber chu Khuallian niin a hmanpui. Prof. K.K. Aggarwal, President of South Asian University chu Khualzahawm a ni.

  SDGI Global University, Ghaziabad hi Uttar Pradesh Private University Act, 2019 hnuaiah July ni 14, 2023 khan din niin, Sundar Deep Educational Society-in a enkawl a. Engineering, Pharmacy, Architecture, Hotel Management, Law, Education, Commerce, Management, Polytechnic leh adangahte zirna kalpuiin zirlai 5,500 dawn SDGI University hian a nei mek a ni.

‘Mission Urban Drain' tlangzarh

Aizawl: UD&PA Minister K. Sapdanga chuan May 13, 2026 khan UD&PA hmalakna thar ‘Mission Urban Drain' a tlangzarh. He mission thil tum ber chu Aizawl khawpui hriselna, thianghlimna leh himna tura tui luankawr ( Drain) mumal zawk siam a ni.

  Mission Urban Drain hi kum 2033 a zawhfel tura inruahman phawt a ni a, khawpui chhunga tui luan kawr zawng zawngte mumal taka kawrpuia luan luh tuir vek tum niin, SASCI hnuaiah cheng vaibelchhe 61.76 hmangin hmun 26 ah tui luan kawr siam hna thawh mek a ni a, cheng vaibelchhe 35 dang dilna tur DPR buatsaih mek a ni bawk.

Mizoram Science Award hmasaber Dr L.N. Tluanga hlan

Aizawl: Mizorama Science NGO upa ber Mizoram Science Society (MSS) chuan May 13, 2026 khan Aizawl Hospital-ah Mizorama-a hmasa ber atan Mizoram Science Award chu Dr. L.N. Tluanga, Mission veng hnenah a hlan a ni.

  Mizoram Science Award hi Mizote zinga science leh a kaihhnawih lama khawtlang leh ram tana hnuhma nei tha te, scientific research lama mi hming tha leh thawhhlawk te hnena hlan thin tura Mizoram Science Society (MSS)-in a duan niin a dawng hmasa ber tur atan Dr. LN Tluanga hi thlan a ni a. He Award hian tangkafai Rs 50,000/- keng telin, Dr. LN Tluanga hi a taksa a chak loh ve deuh tawh avangin Aizawl Hospitalah enkawl mek niin chawimawina Award pawh hi damdawi inah hian MSS hruaitu ten an hlan a ni.

‘Mizoram Labour Link’ App tlangzarh

Aizawl: May 13, 2026 khan "Mizoram Labour Link" Mobile App chu Labour, Employment, Skill Development and Entrepreneurship (LESDE) Department changtu Minister Lalnghinglova Hmar chuan LESDE Auditorium, Directorate Office, MINECO- ah a tlangzarh.

  Mizoram Labour Link Mobile Application hi ni tin inhlawhfa thinte (Daily Labourer/Workers) leh a chhawrtu tur (Employer) indawr tawnna tur (Digital Platform) atana duan a ni a. He application in a tum ber chu:

1. Pawnlam mi (middle men) inrawlhna tih tlem.

2. Hnathawh tur zawnga hmun him lo laia Workers/Labours-te fuankhawmna tih bo.

3. Ni tin inhlawh thinten an thawh hlawh dik tak (fair wages) langtlang taka an hmuh theihna tura duan a ni.

Fisheries leh CYMA-in thawhhona thuthlung ziak

Aizawl: Fisheries Minister Lalthansanga Pisa-ah May 12, 2026 khan Fisheries Department leh Central YMA ten Luidung Humhalh tura thawhhona thuthlung an ziak. Fisheries Department aiawhin Director Zonuntluangi’n hming a ziak a, Central YMA aiawhin President R. Lalngheta’n hming a ziak a ni.

  Fisheries Department leh Central YMA hian kum 2021 atang khan Thawhhona Thuthlung hi kum 2 atan zel an lo ziak tawh thin a, tunah hian a tum 3 na atan thawhhona thuthlung hi an ziak leh a ni. He thawhhona hian Mizoram luidung nungcha venhim leh humhalh kawngah nasa takin rah tha a chhuah zel a, tunah hian YMA Branch 93 zetin luidung humhalh bik an nei.

Union Minister hovin Mamit-ah hmalakna thir ho

Aizawl: Union Minister of State for Law & Justice Shri Arjun Ram Meghwal chuan May 11, 2026 khan Mamit tlawhin Sawrkar department hotute nen department hmalakna an thlir ho.

  Union Minister hnenah hian Sawrkar department hotute chuan an hmalakna te hrilhin hmasawn theih dan sawi ho a ni bawk. Thutkhawm zawhah hian Union Minister chuan District Court leh District Jail a tlawh a, thawktute inkawm hona hun a neihpui.

Chief Minister hovin SLDC thukhawm

Aizawl: State Level DISHA Committee (SLDC) Meeting chu May 11, 2026 khan Planning & Programme Implementation Conference Hall-ah an Chairman, Chief Minister Lalduhoma kaihhruainain an thukhawm.

  Meeting-ah hian central scheme kalpui department zawng zawngte kum khat chhung hmalakna chipchiar taka endik leh sawiho an ni.

  State Level DISHA Committee-ah hian Rural Development Minister Prof. Lalnilawma chu Co-Chairman niin, RD Department Secretary chu Member Secretary a ni a. Member ah Lok Sabha MP Richard Vanlalhmangaiha, Rajya Sabha MP K. Vanlalvena te bakah, T. Lalhlimpuia, MLA, Lt. Col. Clement Lalhmingthanga, Baryl Vanneihsangi, MLA, K. Laldawngliana, MLA leh K. Hrahmo, MLA te, Central Scheme kalpuitu department 30 bawr hotute leh mimal leh tlawmngai pawl aiawh ruat bikte an tel a ni.

Mizoram Police ten Year of Discipline hmang tan

Aizawl: Mizoram Police chuan kum 2026–2027 chu “Year of Discipline” atan May 6, 2026 khan Home Minister K Sapdanga ho a programme buatsaihah an puang a. May 11, 2026 khan Mizoram chhunga an unit hrang hrang ten anmahni hmun theuhah programme urhsun tak buatsaihin a takin an hmang tan ta a ni.

  Year of Discipline” hi Mizoram Police Fitness Improvement Programme hnuaia kalpui mek, “Train to Excel” tihchangtlunna leh chhunzawmna a ni a. Mizoram Police Fitness Improvement Programme hi kum khat aia rei kalpui a lo ni tawh a ni. Mizoram Police mi leh sa ten taksa, rilru leh thlarau lam thlenga hriselna tha an neih theihna tur leh tha leh zuala hna an hlen chhuah theihna tur a nih beiseiin he ruahmanna hi Home Minister kaihhruainaa duan chhuah a ni.

Territorial Army batch hmasaber vailiam

Aizawl: Chief Minister Lalduhoma chuan May 11, 2026 khan Assembly Annexe Building Conference Hall-ah 166 Infantry Battalion Territorial Army (Home & Hearth) a thawk tur, Mizo thalai thlan chhuah hmasa ber mi 144, mipa 135 leh hmeichhia 9-te chu a vailiam a. May 15 khan training turin Shillong an pan.

  He hunah hian Home Minister K. Sapdanga; Champhai South MLA leh Territorial Army (TA) Establishment & Coordination Committee Chairman ni bawk Lt. Col. (Retd) Clement Lalhmingthanga; Home Secretary Vanlalmawia; TA Group Eastern Command Commander- Shaurya Chakra, Brig.Manoj Kumar Patel te bakah Armed Forces leh Assam Rifles officer dangte leh state official pawimawh dangte an tel a ni.

  Mipa 135 te hian Shillong-ah training an nei zui ang a, hmeichhia 9 te hian Bangalore-ah training an kal thung ang.