Nupa thi a rualin vui

Aizawl : May 16, 2025 chhun khan College Veng, Aizawl a cheng Paul Lalthantluang leh a nupui Engzami te chu CRC Hall, College Veng-ah a ruala vui an ni. Paul Lalthantluanga hi Mizo Defence League-a Vice President ni lai a ni.

   Paul Lalthantluanga, 68 hi 15.5.2025 zing dar 9:20 khan nat lawkna em em pawh nei lovin Pneumonia avangin a thi a, May 16-ah vui tura tih a ni a, hemi zing hian a nupui Lalengzami, 67 hi a thi ve leh a ni.

   Engzami erawh hi chu hun rei tak natna khuma mu tawh niin a pasal vui dawn zing hian a thi ve zui an nupa hi a ruala vui turin rel a ni a, College Veng thlanmual thar, Mualpui-ah phum an ni.

Heroin No. 4 Kg 2 chuang man leh tawh

Aizawl : Assam Rifles leh Custom Preventive Force Department, Champhai te chuan May 15, 2025 khan Kelkang-ah Heroin No. 4 cheng vaibelchhe 17 chuang man a chhut an man.

   Ruihhlo tawlhtu te chetna an thu dawn bawhzuiin Assam Rifles leh Custom Preventive Force Dept, Champhai te hian Kelkang, Champhai district-ah hian beihpui an thlak a, Kelkang leh a chhevel chu thununin May 15, 2025 hian Heroin No. 4 hawng 219, Kg 2.5 a rit chu an man a, heng an thil man te hi Custom Preventive Force Dept, Champhai chuan a tul anga hmalak chhunzawm a nih theih nan an kawl zui nghal a ni.

100.7 MHz FM Zoawi thar thawh leh a ni

Aizawl : All India Radio, Aizawl FM Zoawi 100.7 MHz chu hun rei tak chawlhsan a nih hnuah May 15, 2025 atang khan thar thawh leh a ni.

   All India Radio FM Zoawi hi 100.7 MHz ah kum 2008 August ni 15 atanga bultan niin programme hrang hrang tihchhuah thin a ni a, hun rei tak a kal hnuah kum 2024 January ni 20 khan tih tawp lai lawk a ni a, May 15, 2025atangin rampuma Radio station ah FM channel thar thawh leh a ni.

   All India Radio FM Zoawi hi AIR Studio, Tuikhuahtlanga atanga tihchhuah thin a ni a, kum 2022 August ni 15 khan a kum 15-na champha phak an lo lawm tawh a ni.

Khelo India Youth Games-a Gold Medal la

Aizawl : Mizo boxer Samuel Zadeng s/o ZD Lalremsanga chuan May 14 khan Bihar-a Khelo India Youth Games (KIYG) neih mekah boys’ 70kg category boxing-ah Gold Medal hnek chhuakin Mizo boxer zingah Khelo India Youth Games-a Gold Medal la thei hmasa ber a ni.

   Bawngkawn rawlthar Kum 17 mi, Samuel Zadeng hian final-ah Uttar Pradesh mi Peaveen Yadav chu 5-0 (Unanimous Decision)-in a hneh a ni.

PWD leh Zuangtui khawtlang ten remthu an sawi

Aizawl : May 14, 2025 khan PWD Engineer-in-Chief Mini Conference Room-a PWD official-te leh Zuangtui Local Council & All NGO aiawhte thu khawm chuan Joint Press Statement an siam a, PWD lamin FIR an thehluh hnuh let an remti a, Zuangtui khawtlang ngaihdam dilna chu pawm a ni bawk.

   PWD official te leh Zuangtui Local Council & All NGO aiawhte chuan uluk taka kan ngaihtuah hnuin Mizoram leh mipuite that tlanna turin inhrethiam leh inrem tlang taka awm hi tha kan ti a. PWD lamin FIR an theh luh tawh chu hnuh let leh nise kan ti a, tun hnuah hetiang hi thleng tawh lo se kan ti.

   He inremnaah hian PWD lam aiawh leh Zuangtui lam aiawh ten hming an ziah hnan a ni.

Mau sawngbawlna hawng

Aizawl : Chief Minister Lalduhoma chuan May 14, 2025 khan Sairang Horticulture Centre-ah National Bamboo Missions Fund Nuai 252.826 senga din Bamboo Treatment & Seasoning Plant, Bamboo Depot & Godown leh Activated Charcoal Unit (Meihawl siamna) te a hawng. C. Lalsawivunga, Horticulture Minister chu khualzahawm a ni a, Prof Lalnilawma, Minister, RD leh H. Ginzalal, Technical Adviser to CM ten an telpui.

   Depot leh Godown hi a dah khawmna a ni a. Activated Charcoal Unit atang hian ni khatah meihawl ton 3 a siam theih a, kum khatah tonnes 900 siam chhuak thei tura beisei a ni. Nitin mau pum 670 vel a mamawh a, meihawl a siam rualin nitin vinegar litre 100 vel a siam chhuak ve nghal zel ang. Hman tlaka distilled hnuah phei chuan nitin vinegar fir tha Litre 54 vel a chhuak thei dawn a ni.

   Mau chingtu tur hi Zau (cluster) pathum; Chhingchhip, Baktawng leh Saiphal khuaah te din an ni tawh bawk.

YMA member Fee leh Chhiatni Fund an pe let

Aizawl : Champhai Tlangsam Branch YMA chuan ruihhlo an tawlh ruk avanga man tawk mi 4 te chu May 14, 2025 khan an YMA member fee leh chhiatni fund an pe let.

   Champhai Tlangsam Branch YMA executive thukhawm chuan tun hnaia an mi leh sa ruihhlo tawlh ruk avanga man tawkte mi 4-te chungchang an rel a, YMA member fee pek let leh chhiatni fund pek let an rel a, kum 2025 chhungin chhiat thatah YMA bungrua an hman theih dawn loh bakah YMA-in lehkha pawimawh a pek chhuah thinte an pek chhuahsak dawn lo bawk a ni.

Sawhthing sawngbawl dan tur sawiho

Aizawl : May 13, 2025 khan Chief Minister Lalduhoma hovin Sawhthing Slice Dry kalpui mek chungchang sawihona neih a ni.

   Tunah hian MAMB hian Local entreprenuer sawm leh pathum te chu Sawhthing Slice Dry kalpui turin a thawhpui a. Anni ho nena chak zawka kal dan tur leh an inbunna tur zar pharh dan te an sawi.

   Sawhthing lei tawh chin report ngaihthlak a ni bawk a. Notified crops palite lei nan sawrkarin MAMB ah Rs. 62.599 Crore dah tawh a. MAMB hian sawrkarah Rs. 20 crore an dil belh leh mek. DAMC lama third release thlenga pawisa pek tawh chu Rs. 58,08,00,100 a ni. Sawhthing lei tawh zat hi 1,13,627 quintals a ni a, a then hi direct purchase, a then support price hmanga lei an ni. An hralh lehna atangin MAMB hian Rs. 6,34,63,875 a hmu let ve tawh thung.

Solo Art Exhibition nei

Aizawl : Information & Public Relations Department leh Mizoram Art Development Society tangkawpin a bultum Solo Art Exhibition chu May 13, 2025 khan I&PR Secretary Betsy Zothanpari Sailo chuan Vanapa Hall-ah a hawng a. He Solo Art Exhibition ah hian Artist Vanlalzarzova, Upper Republic kutchhuak pholan a ni.

   I&PR Secretary Betsy Zothanpari Sailo chuanArtificial Intelligence hmanga lemziak hrang hrang awlsam taka siamchhuah a nih tak chungchangah I&PR Secretary chuan heng AI hmanga siam tam tak karah hian mi zawng zawngin an siamchhuah ve theihloh mihring kutchhuak nge nge chu a hlut zawk thu a sawi.

   He Painting Solo Exhibition hi nimin May ni 17, 2025 thleng Vanapa Hall ah hian neih a ni.

International Nurses Day hmang

Aizawl : May 12, 2025 kha Khawvel Puma Nurse-te ni (International Nurses Day) a ni a, Mizorama District hrang hrangah pawh hman a ni a. Aizawlah chuan he ni hi Civil Hospital-a hman niin, Mary Ramte Pachuau, Deputy Director, Directorate of Nursing chuan khuallian niin a hmanpui.

   International Nurses Day puala kalkhawmte hian he ni pual hian thutiama inhlantharna hun an hmang nghal bawk a ni.

Home Minister kaihhruaina hnuaiah sawiho

Aizawl : Home Minister K Sapdanga Pisaah tunlaia Aizawl khawpui himna chungchang sawiho turin May 15, 2025 khan inhmuhkhawm a ni a. He hunah hian Excise Minister Lalnghinglova Hmar pawh a tel a.

   Sawihonaah hian Police Department, Excise and Narcotics Department, Social Welfare Department hotute leh Central YMA hruaitute ten an hmalak mek theih sawiin chak zawka hmalak chhunzawm dan an rel a ni.

   Meeting kaihruaiin Home Minister K Sapdanga chuan Aizawl khawpui himna turin Police, Excise leh Central YMA thawhona a pawimawh thu leh, an thawhho that avanga lawmawm a tih thu a sawi a. Aizawl khawpui boruak thlirin inlungrual taka thawhho chhunzawm leh hmalak a tul thu a sawi.

   He hunah hian Lalzirmawia Chhangte, Commissioner & Secretary Excise and Narcotics, Lalthiamsanga Sailo DIG (Northern Range) leh sorkar mi pawimawh dangte bakah CYMA hruaitute an tel.

College leh hostel hawng

Aizawl : Union Minister for Agriculture & Farmers' Welfare Shivraj Singh Chauhan chuan May 15, 2025 khan video conference hmangin Thenzawl Horticulture College Academic cum Administrative Building leh College of Veterinary Sciences & Animal Husbandry, Selesih a PG Girls Hostel thar a hawng a. Mizoram Governor General (Dr) Vijay Kumar Singh, PVSM, AVSM, YSM (Retd) chuan a office atangin online in a zawm a, Chief Minister Lalduhoma chuan Thenzawlah a telpui.

   Shivraj Singh Chauhan hian Thenzawlah ngei lo kala Horticulture College hmunhma thar te hi hawn tumin ruahmanna a siam a. May 15 zing hian Guwahati leh a chhehvelah khua a nawm loh avangin chawpchilh takin a hmuna rawn kal hi a thulh a. Online Video Conference hmangin chawhnu lam khan a rawn hawng ta zawk a ni.

Indian Football Champion te lawmpui

Aizawl : Sports & Youth Services Minister Lalnghinglova Hmar, Aizawl West-II MLA ni bawk chuan a bial chhung atanga Indian Super League 2024-25 champion Lalengmawia Ralte, Vaivakawn (Mohun Bagan SG) leh Super Cup 2025 champion Ayush Dev Chhetri, Dinthar (Goa FC) te chu May 15, 2025 khan MINECO-a a office chamber-ah lawmpuina hun a hmanpui.

   Minister hian footballer-te hi lawmpuina thuziak leh pawisa fai cheng sing khat ve ve a hlan a. An vengchhungah anmahni kaltlangin grassroots football in hma sawn se an duh thu a sawi a, Dinthar leh Vaivakawn mai bakah hmundanga thalaite tan entawn tur leh a kawng hawngtu nise an duh tih a sawi.

   Lawmpuina hunah hian footballer-te leh an chhungte bakah Mizoram Football Association hruaitute, sawm bikte leh chanchinbu mite an tel a ni.