Mahindra Finance inbumna avangin Dealer pathum man

Aizawl : Mahindra & Mahindra Financial Service Ltd (MMFSL) Circle Head Ankit Bagree-a'n Aizawl Police Station FIR a thehluh bawhzuia Mizoram Police Special Investigation Team (SIT) ten hma an lakna kal zelah cheng vaibelchhe 150 chuang inbumna chhuina kal zelah May 15, 2024 khan Aizawl-a Lirthei dealer pathum man an ni.

   MMFSL Area Manager Jakir Hussain leh a thawhpui mi 10 te chu April 25, 2023 khan man an ni tawh a, nimin piah khan mi pakhat man niin nimin khan mi pathum dang an man belh leh tih DIG (CID) Lalhuliana Fanai hnen atanga ZALEN thu dawn danin, An man belh te hi Rafael Nissan dealer George S. Thoite, Salem Veng ; Aidu Motors (Renault) dealer Madhurjya Sharmah, Salem Veng leh National Business Enterprise (TATA) dealer Paul Zothanpuia John, Khatla te chu an man a ni.

Kum 18 mi tui ah tlahlum

Aizawl : Jimmy Laltanpuia (18) s/o Lalfakzuala (L), Saikhamakawn chu May 14, 2024 tlai khan Tuirial lui-ah a tlahlum.

   Jimmy Laltanpuia hi a chhungte nen May 14, 2024 khan Tuirial Lui, Khumtung kai thlangah inchiah dai turin an kal a, chesual palhin tuiah hian a tla a, chhan hman loh in a boral a ni. Jimmy-a ruang hi a tlak atanga darkar 1 hnu velah a tlakna atanga hla lutuk lo ah hmuh a ni a, lumen niin a tuka vui a ni.

Bungraw chuh hman lohin kang

Aizawl : May 12, 2024 Pathianni zan khan Chanmari veng Aizawl a Assam Type In, dawr 3 a kang.

   Thudawn danin In kang hi Chanmari atanga Chaltlang pan chhohna Agape Hospital bula Zohmingthangi In, Asam Type, kaw thum dawr atana luah chu zan dar 6:30 vel khan a kang a, a kan chhan tak hi hriat a ni lo mahse electric kal sual vang nia rin a nih thu Aizawl PS atanga thudawnna chuan a sawi a.

   Fire Department thleng vat mah se, kangmei a nasat tawh avangin a kang chhe hman tawh hle a, bungrua chuh hman lohin a kang chhe vek hman a, a bula In dingte erawhchu an kang kai hman lo. He In hi Mobile Repairning dawr, eichawp dawr leh Lumehna dawr atan luah a ni.

Kum upa te tan OPD card thar hmang tan

Aizawl : Medical Superintendent, Civil Hospital, Aizawl in office order a tihchhuah a tarlan a nih danin, kum lam a upa zawk te tan OPD card thar hman tan a ni.

   Kum lam a upa zawk te tan OPD card rawng eng (yellow) hman a ni a, OPD ticket counter No 6 ah staff, Persons with Disabilities (PwD's), Geriatrics (kum lama upa) ten OPD card an la chhuak ang.

   He ruahmanna thar hi May ni 14, 2024, Thawhlehni atang khan hman tan a ni.

Geriatric Caregiving Training kharna hun hmang

Aizawl : May 16, 2024 khan kum upate enkawl inzirtirna thla 3 awh Short term course of Geriatric Caregiving Training chu Ripans Conference Hall-ah kharna hun hman a ni.

   Geriatric caregivers (kum upa enkawltute) training hi Ministry of Social Justice & Empowerment hnuaia Scheme Atal Vayo Abhyuday Yojana (AVYAY) Scheme atanga hman a ni. Department of Social welfare and Tribal Affairs hi Nodal agency niin, Ripans hi training centre an ni.

   He short term course hi thla 3 chhung neih a ni a. Thla 2 chhung Theory class neihpuiin, thla 1 chhung on the job training an nei a, hospital leh Geriatric home-ah te an duty kual thin a ni. He course atan hian National Institute of Social Defence (NISD), Ministry of Social Justice and Empowerment, Government of India siam standard guidelines anga kalpui ani.

SLSC On Green Mizoram thukhawm

Aizawl : State Level Sub Committee on Green Mizoram, 2024 chuan Conference Hall of Forensic Science Laboratory, MINECO -ah thutkhawmna hun May 16 khan an hmang a nikum 2023 a hmalak tawhnate thlirhona hun a neih mai bakah Green Mizoram Day 2024 agenda hrang hrang sawi hona hun an nei bawk.

   He thutkhawmna hi H.Lalengmawia, Co-Chairman, SLSC On Green Mizoram, Commisioner& Secretary, EF& CC chuan a kaihruai a, report ngaihthlak a ni bawk. Nikum lama hmalakna te thlir ho a ni a. Chhinchhiah dan chuan nikum khan thing tiak 29,839 chu phun niin, 1,26,722 thing tiak chu department hrang hrang hnenah leh NGO etc hnenah sem a ni.

India ram Paraglider naupang ber lawmpuina hun hmang

Aizawl : May 16, 2024 khan India rama Paraglider naupangber record siamtu Samuel Lalbiakhlua s/o MS Dawngzuala, Saitual Venglai chu Saitual Bawrhsap Dr Lalngura Tlau kaihhruaina hnuaiah Saitual District Sports Committee chuan lawmpuina hun hmanpuiin lawmpuina pawisa fai Rs 10,000 an hlan.

   Bawrhsap chuan Samuela chu hetiang dinhmun thleng thei a tumruhna leh huaisenna a nei chu fakawm a tih thu leh Saitual district chhungah khawvel huap pawha lang thei chawimawi tur an awm chu lawmawm a tih thu sawiin, India rama paraglider naupang ber record a siam thei chu a chhuang takzet a ni a ti a, Association leh afiliated chauh pek tura sport committee ten an lo rel tawh mah ni se Samuela Lalbiakhlua hlawhtlinna chu District sport commitee ten hmaih chi ah an ngaihloh avanga hetianga ti hi an ni, a ti.

   Programme-ah hian Saitual Bawrhsap bakah District Sports Committee member te leh Samuela leh a nu leh pa leh a chhungkua te an tel a ni.

Voter Turnout Competition result puang

Aizawl : Office of the Chief Electoral Officer, Mizoram buatsaih District-Level SVEEP and Media Competition leh Voter Turnout Competition result te chu May 15, 2024 khan R.B. McCabe Hall, Aijal Club-ah puan a ni.

   District–Level SVEEP Competition-ah hian District tinah District Election Officer ten mipuite hnena vote thlak pawimawhzia inzirtirna kawnga an hmalakna theuh te chu tehfung hmanga teh a ni a. Voter Turnout Competition-ah hian vote tlak that zualna Polling Station 10 thlan chhuah niin heng Polling Station bialtu Booth Level Officer-te hnenah lawmman pek an ni.

   District-Level SVEEP and Media Competition a lawmman la tute chu Pakhatna – Khawzawl District ; Pahnihna – Lawngtlai District leh Pathumna – Kolasib District te an ni

   Voter Turnout Competition-a lawmman dawngtu mi pakua hnenah lawmman hlan an ni bawk.

Power Minister hovin Kawlphetha mumal zawka pek chhuah dan tur sawiho

Aizawl : May 15, 2024 khan P&E Minister F Rodingliana, leh P&E Dept a senior officer ten tun hnaia Mizoram hmun hrang hrang a power supply khaihlak fo chungchang leh power supply mumal leh tha zawka mipuite hnena pek theih dan tur sawihona an nei.

   P&E Minister chuan Mizoram Sorkar in kawlphetha leina man ba cheng vaibelchhe 81 lai mai a pek avangin Mizoram Sorkar chungah lawmthu a sawi a, RDSS leh Smart City Project thawh mek chu hmun thuma then hmunkhat thawh zawh tawh tih a sawi a. Power shutdown lak zauh zauh a la ngai rih dawn a ti, mipuite lo hrethiam turin a ngen nghal bawk a ni.

   Mizoram hmun hrang hranga power supply chungchanga harsatna awmte report zung zungna tur Customer Care Centre tuai thar leh nghal ni se an ti a. Hydel project hrang hrangte tuaithar dan tur leh power tam zawk siam chhuak thei turin ruahmanna hrang hrang siam a ni bawk.

MPSC chairman thar ruat a ni

Aizawl : Vawiin khan Mizoram Governor Hari Babu Kambhampati chuan Mizoram Public Service Commission (MPSC) chairman atan May 14, 2024 khan R Lalramnghaka, IAS a ruat.

   R Lalramnghaka hi MCS niin, IAS-ah a kaisang a, Mizoram Sawrkar hnuaiah post hrang hrang chelhin, Aizawl DC leh Secretary hna pawh a lo chelh tawh a ni.

MBSE-in 2024 matric result tichhuak

Aizawl : May 14, 2024 khan Mizoram Board of School Education (MBSE) chuan kumina neih, High School Leaving Certificate Examination (HSLC) 2024 result a tichhuak a. Exam beitu zirlai zawng zawng zinga 73.37 % te chuan he exam hi an pass a ni.

   HSLC Examination 2024 hi zirlai 18,561 in an hmachhawn a, heng zinga mi 13,618 ten hlawhtlinna changin mi 4837 ten hlawhtlinna an chang zo ve lo a ni. Mi 106-te chu Compartmental Chance pek niin an failed na subject-ah te an exam tha leh thei dawn a ni.

   Zirlai exam zawng zawng zingah hmeichhia tam zawkin 9907 in exam hi an pe a, mipa 8654 in a pe bawk a ni. Zirlai hlawltlinna chang zingah 7181 te chu hmeichhia niin a bak 6437 te chu mipa an ni.

   HSLC Exam Result in a tarlan dan chuan zirlai hlawhtling zingah hian Distinction 1332 awmin, 1st Division a pass 3801, 2nd Division a pass 5564 leh 3rd Division a pass 2921 an awm a ni.

11th LADC CEM atan C. Lalmuanthanga la lut

Aizawl : 11th Lai Autonomous District Council (LADC)-a Chief Executive Member (CEM) atana ruat thar C. Lalmuanthanga chu May 14, 2024 khan LADC Hall, Lawngtlaiah Lawngtlai District Bawrhsap Cheemala Siva Gopal Reddy chuan rinawmna thu tiamtirin a la lut.

   CEM thar lak luh inkhawm hi LADC-a Executive Secretary K. Lalthanzara'n a kaihruai a. LIKBK General Secretary Rev. B. Zazawna Lai chuan hunserh hmangin, hun kaihruaitu ES-in LADC (Constitution, Conduct of Business, etc.) Rules, 2010 rule 21 sub-rule (4) tlawh chhana LADC CEM atana C. Lalmuanthanga ruatna sawrkar notification No. A. 43016/1/2020-DC&MA(L)/Pt Dt. 9th May, 2024 a chhiar chhuak a. Lawngtlai Bawrhsap chuan CEM hi a la lut nghal a. CEM thar C. Lalmuanthanga chuan thu a sawi bawk.

Pushpak CE thar-in Governor hmu

Aizawl : May 14 khan Pushpak Chief Engineer thar, Brig. Girish Prasad Singh chuan Governor Dr Hari Babu Kambhampati chu Raj Bhavan-ah a hmu.

   He inkawmnaah hian Brig Girish Prasad Singh chuan a hnathawh tawhte chu Governor hrilhin inhmelhriatna hun tawi a hmang bawk a ni. Governor leh Chief Engineer hian ramri hrul a kawng siam hna thawh mekte chu sawidunin, BRO in hmachhawp a neih te pawh an sawi dun a.

   Hemi kaihhnawihah hian Governor chuan project kalpui hmaa uluk taka ruahmanna siam lawk leh a hun taka hna zawhfel a pawimawh thu a sawi bawk a ni.

Mizoram team for India Skills 2024-a tel tur vailiam

Aizawl : Labour, Employment, Skill Development and Entrepreneurship Department hmalaknain Mizoram Team member 16-te chu trade sawmparuk a India Skills National Competition, New Delhi leh Karnataka State-a neih tura intihsiakna hmachhawn turin Lalmalsawma Pachuau, Secretary, LESDE Dept. chuan May 13, 2024 khan a vailiam.

   Indiaskills 2024, National Competition-ah hian State hrang hrang atangin mi 500 chuang an tling a, trade hrang hrang 63 hmangin an intihsiak dawn a ni. Mizo thalai tel turte hi Bakery, Beauty Therapy, Cooking, Drone Film Making, Electronics, Electrical Installation, Fashion Technology, Floristry, Hair Dressing, Health & Social Care, IT Software Solution for Business, Pattisserie & Confectionery, Painting & Decoration, Plumbing & Heating, Shoe Making, leh Visual Merchandising trade hmanga intihsiaknaah an tel dawn a. He intihsiakna paltlangte hian WorldSkills 2024, Lyon, France-a kumin September thla a neih turah India aiawhin intihsiakna an hmachhawn leh dawn a ni.