AMBULANCE RUAHMAN
April 30, 2021 khan Supply Minister K.Lalrinliana, Kolasib Assembly Constituency bialtu MLA ni bawk chuan Covid-19 hrileng thawh hnihna dona kalpui mek a state pawn atanga lo lut te endikna hmun, Bairabi Covid-19 Screening point a tlawh a, Pangbalkawn, Meidum leh Bairabi VLTF te kawmin a bial chhunga hmalakna thenkhat a endik nghal bawk.

EDU. MINISTER- IN TLAWH
Lalchhandama Ralte, Minister School Education, LESDE etc. chuan April 30, 2021 khan MINECO, Aizawl-a MYC Office-cum- Coaching Centre leh Youth Centre sak mek chu tlawhin a hmunah hnathawh dan a enpui.

Governor & MKHC
Governor PS Sreedharan Pillai chuan April 30, 2021 khan Health Minister Dr R.Lalthangliana, MKHC hruaitute, Joint NGO hruaitute leh Ex-Services League aiawh te Durbar Hall, Raj Bhavan-ah Covid-19 hrileng thawhnihna dona kawnga Mizoram sawrkar hmalakna hrang hrang leh inpuahchahna te a sawi pui.

MFSA THUCHAH
Mizoram Forest Service Association chuan April 29, 2021 khan thuchhuah siamin Mizoram hmun hrang hrangah tunlaiin ramkang, tuihna tlem leh kangchat avangin harsatna kan tawk mekah, tuihna tlem hi kumina ruahtui kan dawn mumal loh vang chu ni bawk mah se, mipuiten hun rei tak chhung tuihna siamtu ramngaw humhalh kawngah hma kan lak that tawk loh vang a nih thu an tarlang. 

TUI HARSATNA
April 29, 2021 khan Deputy Chief Minister Tawnluia hovin PHE Department hotute chuan Video Conference kaltlangin tui harsatna chungchangah meeting an nei a. Meeting-ah hian district hrang hranga tui dinhmun leh harsatna an neih te ngaihthlak a ni bawk a ni. 

hmunhma ruahman
Mizoram sawrkar chuan April 29, 2021 khan thuchhuah siamin mimal, kohhran leh NGO hmunhmate Community Quarantine Facility atana a ruahman te a tichhuak a, Veng 14-a hmun 27-ah Covid-19 damlo te enkawlna tur hi ruahman a ni.

hriattirna tichhuak
Aizawl khawpui chhunga Local Council hrang hrang te Sawkar Department/ Office thenkhat ten an Department leh Office hmalakna bawhzui tura an lo hmang thin chungchangah Aizawl Municipal Coporation chuan April 29, 2021 khan thuchhuah a siam. Section 32 of The Mizoram Municipalities Ward and Local Council rules, 2010 (as amended in 2020) in a sawi angin hetianga Department/ Office ten Local Council te an hmang tangkai emaw thil ti tura an puihna an mamawh a nih chuan Local Council ten an lo buaipuina senso leh tul ang ang (stationery item etc.) chu a hmangtu Department/ Office-te tum tur a ni, an ti.

thil tawlh ruk man
Mizoram police chuan April 29, 2021 khan thuchhuah siamin April ni 27, 2021 zan khan Champhai Police te chuan 1109 Truck Registration number MZ-04-4023 leh dan kalha a thil phurh, kuhva bag 110 (80 kg/bag), Rs. 24,64,000 /- man hu, Lalhmingthani (40) d/o Fiahrula, Electric Veng, Champhai hnen atangin Zotlang, Champhaiah an man. Heng thil man te hi Customs Preventive Force, Champhai hnenah hlan a nih, thu an tarlang.

CM Relief Fund
April 29, 2021 khan Aizawl Municipal Corporation-a Councillor leh Officer & Staff-te chuan COVID-19 thawh hnihna avanga hri kai an lo pun chhoh tak zel avangin leh, nunna hial chan an awm avangin Chief Minister's Relief Fund for COVID-19 ah AMC Councillor zawng zawngte thla chanve hlawh Rs. 95,000 leh, Officers & Staff-te ni khat hlawh Rs. 2,06,920 chu an chhunglut.

DGP CONF. HALL
SBK Singh, IPS, DGP Mizoram chuan 27.04.2021 khan Mizoram Police DGP Conference Hall hmasa ber a hawng.

NGENNA LEH HRIATTIRNA
Aizawl Distrct Bawrhsap Dr Lalhriatzuali Ralte chuan April 27, 2021 khan thuchhuah siamin, tun hnaia kangmei chhuak fo avanga harsatna thleng thin te chu pawi a tih thu a sawi a. Tun atangin mitin te kan fimkhur zawkna tur leh mipui vantlang bakah kan ramngaw thalai te kangmei lakah a lo him zawkna turin a hnuaia tarlan ang hian ngenna leh hriattirna a siam.

HUN SAWN
COVID-19 hripui lek mek avangin State Election Commissioner, Mizoram chuan Mizoram Municipalities (Election to Local Councils) Rules, 2015 in thuneihna a pek angin XVII/2 – Republic Local Council, 2021 atana bye-election 4.5.2021 (Thawhlehni)-a neih tura lo ruat lawk tawh chu tiam chin awm lovin April 27, 2021 khan a sawn.