National Seminar on National Integration

Aizawl : May 15 atang khan Department of Mass Communication, Mizoram University chuan ni 2 chhung awh National Seminar on ‘National Integration through Cultural Exchange’ Conference Hall, Guests’ House, Mizoram University-ah a buatsaih a. 
    He seminar hi khuallian Governor Dr Hari Babu Kambhampati, Chief Rector, MZU ni bawk chuan MZU in ram mipuite inpumkhatna kawngah Seminar a buatsaih chu tha a tih bakah tunlai boruak kan thlir phei chuan a tul tak zet tih Governor chuan a sawi a. Unity in Diversity kan tih fo, ram pakhata chengho, hnam ziarang leh khawsak phung inanglo tak takte in dawh tawna, tha taka aawm tlan hi India ram angah phei chuan a pawimawh a ti.

Rajya Sabha MP-in DGCA hotute kawm

Aizawl : Rajya Sabha MP K. Vanlalvena leh Principal Consultant, GAD, Aviation, Wg. Cdr. J.Lalhmingliana te chu May 15 khan Director General Civil Aviation-ah lengin Lengpui Airport Airlines Service leh Airport hman tangkai dan chungchangah DGCA hotute an kawm
    Lengpui Airport-a thlawhna a tum hian Hmar lam atanga runway-a tum a, Hmar lam hawi zawng bawk a thlawh chhuah chauh phalsak an nih avangin Hmar lampang khua a chhiat changin Flight a tum theih loh phah thin a. Hei hi a rem lam lam atanga tum theih turin meeting-ah hian ngenna an thlen a. Hei hi a hlawhtlin  theih nan DGCA Official te chuan a rang thei ang bera Lengpui Airport tlawh turin Aizawl rawn kal an tum a ni.

Aizawl Smart Street lungphum a phum

Aizawl : May 16 khan Deputy Chief Minister Tawnluia chuan Khatla-ah Commerce & Industry Directorate ep-a ram awla Aizawl Smart Street sakna tur lungphum a phum.
    Aizawl Smart street lungphum phumna-ah hian Deputy Chief Minister Tawnluia chuan Aizawl hmun laili tak a mipui te intih thawvenna tur hmun Smart Street sak a ni tur chu Aizawl in a mamawh tak a ni, a ti. Deputy Chief Minister chuan Aizawl Smart City atangin cheng vaibelchhe tamtak hmuh a ni a, chumi hmanna tur chu project hrang hrang kalpui mek a ni,a ti a. Smart City hnuaia project te Department pakhat chiah hnathawh chi a nih loh avangin Department hrang hrang nen a inbiakna leh guidelines mumal taka thawh thin a ni, a ti.

CM hovin HSLC top 10 te chawimawhna hun hmang

Aizawl : Mizo Zirlai Pawl (MZP)-te buatsaihin May 17 khan Mizoram Board of School Education (MBSE)-in High School Leaving Certificate (HSLC) result a tihchhuah top 10-a Mizo tlingte chawimawina chu Vanapa Hall-ah neih a ni a, Chief Minister Zoramthanga chuan khuallian niin a hmanpui.
    Chief Minister chuan HSLC topper-te chu a lawmpui thu a hrilh a; tun tuma hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel turin a fuih a ni. Chawimawina dawngtute leh zirlai dangte pawh theihtawp an chhuah chuan Mizoram mai nilo India ram pumah pawh a ber thleng phak an nih theih thu a sawi. Eizawnna kawng zawhnaah tuina, thiamna leh theihna a inan vek theihloh thu sawiin, eng kawng pawh zawh ila, mi tangkai ber ni thei tura inzir leh thawhrimna a pawimawh hle a ni, a ti.

NEP 2020 chungchangah inrawnkhawm

Aizawl : May 17 khan School Education Department buatsaih Consultative meeting on implementation of NEP 2020 chu neih a ni a, School Education Minister Lalchhandama Ralte-in he meeting hi a kaihruai. 
    School Minister Lalchhandama Ralte chuan NEP 2020 chu launch a nih hlimah Covid-in min tihbuai lai a ni naa, a theih ang angin bawhzui nghal a ni a ti a, zirna lama mithiamte awmna Group of expert te, task force te leh study group te din a ni a, NEP 2020 rawtna bawhzui dan turte an duang a ni a ti. NEP 2020-in rawtna a rawn siamah hian sorkar hi thui tak kalpui tawh a ni a, zaa 25 bawr vel hi chu tihhlawhtlin a ni hial tawh mai awm mang e tih tur a ni a ti. NEP 2020-ah hian mahni hnamzia Nationalism inzirtir theihna tur kawng a hawng zau viauin a lang a, he policy tihhlawhtlinnaah hian Mizo hnam nihna hi a laimuah dah a, a ngai pawimawh a ni a ti bawk.

SYS Minister-in Jeremy Lalrinnunga hnenah LSC hlan

Aizawl : Sports and Youth Services Minister Robert Romawia Royte Office Chamber ah May 17 khan Jeremy Lalrinnunga hnena LSC hlanna Programme buatsaih a ni a, a nu leh pa ten Jeremy Lalrinnunga aiawh hian LSC hi an dawng a ni.
    He LSC hlanna inkhawmtawi buatsaih ah hian Sports and Youth Services Minister Robert Romawia Royte chuan thu sawiin Jeremy Lalrinnunga hnena LSC hlan tur hi thutlukna awm tawh, bawhzui ngai awm nual a ni a, amaherawhchu Sports leh Revenue Department te leh sawrkar hotute hmalakna avanga hlan theih in a awm ta chu a lawmawm a ni, a ti. 

LMC Councillor ten CM an hmu

Aizawl : Chief Minister Zoramthanga chu 17.05.2023 khan a pisa ah Lunglei Municipal Council-a Councillor thlan thar te chuan hmu in an inkawm.
    Chief Minister chuan LMC Councillor te chu a lawmpuina thu sawiin, an hmabak ah duhsakna sang tak a hlan a. Sawrkar laipui in inrelbawlna semzai, decentralization a uar zel ang bawkin Mizoram-ah pawh Aizawl ah bultanin, tunah Lungleiah Municipal Council din a nih leh thu a sawi a. Councillor thlan thar te chu thil thar vek hmachhawn tur ni mah se, inzir chho zelin, mawhphurna tak tak lak hunah chuan hlimawm an tih ngei a rin thu a sawi a.

Mizo te Arsi hriat dan International Symposium hawng

Aizawl : May 18 khan MZU Auditorium-ah Governor Dr. Hari Babu Kambhampati, MZU Chief Rector ni bawk chuan Mizoram University (MZU)-a Dept. of Physics leh Mizoram Science Centre, Directorate Of Science & Technology, GoM te tangkawpin Two-day International Symposium on the History of Astronomy of the Mizo People' an buatsaih chu khuallian niin a hawng. 
    He International Symposium-ah hian Keynote Speaker atan Dr. Martin George, Principal Astronomer, Hive Planetarium, Tasmania, Australia and Chair of International Development, International Planetarium Society chuan sawm anih angin a hmanpui bawk.

AYUSH Mission hnuaia Medicinal Plants telh a ni ta lo pawi ti

Aizawl : Ni hnih (May ni 18 & 19) awh National AYUSH Mission Conclave, Vigyan Bhavan, New Delhi a neih ah Health Minister Dr R. Lalthangliana telin a ni khatnaah thu a sawi a, AYUSH Mission hnuaia Medicinal Plants telh a ni ta lo chu pawi a tih thu a sawi.
    Dr R. Lalthangliana chuan Mizoram State Medicinal Plants Board in National AYUSH Mission hnuaiah society 9 (chhungkaw 270) in hlawhtling taka hma an lak thu a sawi a. Chutihrualin kum 2020-2021atanga National AYUSH Mission hnuaia Medicinal Plants telh a ni ta lo chu pawi a tih thu sawiin, telh leh ngei turin sawrkar laipuia thuneitute a ngen a ni. Mizorama ramhmul damdawi te zirchian a tihchangtlun a nih theih nan North Lungleng-ah Herbal Garden din tum a nih thu a sawi bawk a ni.

Council of Ministers thukhawm

Aizawl : Ningani khan Chief Minister Zoramthanga hovin CM cabinet meeting room-ah Council of Minister chuan sawrkar department hrang hrang atanga thu pawimawh lutte ngaihtuahin an thukhawm.
    He meeting-ah hian Planning & Programme Implementation Secretary chuan Second National Conference of Chief Secretaries neih zawh taka Mizoram a hmalak leh bawhzui theih te report pe in, a kaihhnawih department te hriattir an ni bawk. Meeting-ah hian thil chi hrang hrang rel a ni a, heng zinga 19 te chu pawm an ni.