Anchiri nuai 51 man AR ten man

Aizawl: Assam Rifles chuan May 19, 2026 khan dan phal loh a tawlhruk, ramhnuai hnim chikhat, mang mai a hlauhawm avanga India sawrkarin a humhalh Anchiri (Paris polyphylla) chu India leh Myanmar inrina Zorinpui, Lawngtlai district-ah an man.

  Assam Rifles Check post te thil man Anchiri (Paris polyphylla) hi bag 150 bags niin cheng nuai 51 man vel nia chhut a ni a, a kaihhnawihah hian mi pathum an man a, dan lova tawhruk tum Anchiri leh an an load tumna lirthei te hi Bungtlang PS leh Lawngtlai Forest Department hnenah an hlan a ni.

Dan phalloha lak luh cigarette man

Aizawl : May ni 20, 2026 khan Legal Metrology Enforcement te chuan Aizawl New Market Bazar-ah dan phalloha lak luh cigarettes packets 2750 an man. Heng cigarette te hian India cigarette te anga chhiah an chawi ve loh avangin sorkarin a ngai pawimawh hle a. Sec 6 of the Legal Metrology (Packaged Commodities) Rules angin man a ni.

Tourism Minister hovin Workshop nei

Aizawl: Tourism Department huaihawtin May 21, 2026 khan State Level Consultative Workshop on 'Developing Global Standard Tourist Destinations' neih a ni a, workshop hi Tourism Minister Lalnghinglova Hmar chuan a hmanpui a ni.

  India ram chhunga State leh Union Territory tina khawvel hmun dangte el phak khualzinte tlawh duhna hmun (tourist destination) pakhat tal neih tura Sorkar laipuiin a rel angin, Mizoram tana hmalak dan tur sawiho turin he workshop hi buatsaih a ni.

Village Council Hmeichhe Inkhawmpui hmasa ber hmang

Aizawl: May 21, 2026 khan Rural Development & Administration Department (RD&AD) buatsaihin Mizorama a vawi khatna atan Vanapa Hall-ah VC Hmeichhe Inkhawmpui "State Level Convention for Women Elected Representative of Village Councils" hman a ni a. 

  He hunah hian Health & Family Welfare Department Minister Lalrinpuii chu khuallian niin hun a hmanpui a, RD&AD Minister Prof. Lalnilawma chu khualzahawm a ni. He hun hi Sawrkar laipui leh Mizoram Sawrkar-in tualchhung inrelbawlnaa hmeichhiate hmun pawimawh tak luah tura a ngaihtuahna a sen kalpui mek denchhena buatsaih a ni.

Heroin Vbch 4 chuang man Saitual Police-in man

Aizawl : Saitual DEF Special Team chuan Keifang-ah heroin 2.493 kg, Rs. 4,98,60,000 man vel Assam registralion lirthei atangin an man a, lirthei khalhtu hi kum tlinglo a ni.

  Special Team hian May 20, 2026 zan 1:30 vel khan Keifang Kualmawi, Aizawl kawngah motor hi tihdin a ni a, uluk taka check niin, Bolero chhung a hnung seat siam danglam bikah thuhruk taka dah sahbawn bawm 210 (zahnih leh sawm)-ah heroin kg 2.493, ?4,98,60,000 man hu vel man chhuah a ni. He motor khalhtu hi kum tling lo, kum 15 mi a ni. 

  He case-ah hian midang inhnamhnawih te hriat chhuah a nih theih nan investigation chu kalpui zui zel a ni.

Online Medical Referral System tlangzarh

Aizawl: Health & Family Welfare Department Minister Lalrinpuii chuan, mipuite tana healthcare service leh sawrkar hnathawh tihchak zualna tura siam Online Medical Referral chu May 20, 2026 khan SAD Conference Hall, MINECO-ah a tlangzarh.

  Online Medical Referral System hi Damlo na tak, phaia refer ngai, a bik takin Aizawl District pawna awm te tan, hun khawh ral lo leh an refer-na hmun rang taka an thlen theih nanDHME leh MSeGS te tangkawp duan a ni a. Phone emaw personal computer emaw atangin link - medicalreferralmizoram.in ah lutin online hmanga permission hi cheng 20 chawiin dil tur a ni.

Mizoram Road Fund Board thukhawm

Aizawl : Mizoram Road Fund Board chu May 20, 2026 khan Secretariat Conference Hall-I, MINECO-ah board chairman PWD Minister Vanlalhlana hovin an thukhawm.

  Meeting-ah hian kum 2025-26 chhunga Mizoram Road Fund Board in kawng leh lei siam hnathawhna tur a lo pawm tawh atanga hna thawh te thlirletna neiin, kum 2026-27 chhunga sum hmanna tur chu chhawpchhuah leh sawiho a ni bawk. Kawng siamna tur; bituminous pavement leh cement/concrete construction, side drain, retaining wall, cross drainage leh thil tul dangte siamna tur leh Road Safety Measures atana a chhawpchhuah cheng nuai 8325 chu pawm a ni.

HPC-D (LF) Charter of Demands ngaihtuah

Aizawl: May ni 19, 2026 khan Home Minister K Sapdanga hovin Mizoram Sawrkar leh HPC-D(LF) te Inremna thuthlung (Memorandum of Settlement) in a ken tel, Charter of Demands-a tarlan point hrang hrangte tihhlawhtlin dan tur leh a bawhzui dan tur relin Home Department Official te an thukhawm.

  Charter of Demands-ah hian Lalhmingthanga Sanate hova HPC-D Cadre inpe tate intundinna tur mai ni lo, Hmar tlang dung huap hmasawnna tur rawtna tha tak tak a tel a. Inkalpawhna tha siamte, mipui mamawh tak tak - Zirna in tha leh Sawrkar Office din belh te leh lo neia eizawngte tana chhenfakawm, Agro-based industries din leh a dangte a tel a ni.

Ruihhlo do beihpui thlak dan review meeting

Aizawl: Home Minister K. Sapdanga leh Excise & Narcotics Minister Lalnghinglova Hmar te kaihhruaiin May 19, 2026 khan ruihhlo do beihpui thlak dan review meeting Home Minister pisaah neih a ni.

  Meeting-ah hian Home Department, Excise and Narcotics Department, Food and Drugs Administration leh Central YMA hruaitute bakah Aizawl DC leh SP te kokim takin an tel a. Mizoram chhunga ruihhlo do kawnga hma latu hrang hrang kalkhawm hian ruihhlo zuartute, ngawlveite leh ruihhlo zawrhleh inhlanchhawn dan kawng hrang hrang te an sawiho a. Ruihhlo do leh a hmang sualtute leh a zuartute laka beihpuithlak chhunzawm zel dan tur ruahmanna hrang hrang an ngaihtuah a ni.

Council of Minister meeting nei

Aizawl : Chief Minister Lalduhoma kaihhruaiin May 18, 2026 khan Council of Ministers Meeting chu Cabinet Room-ah neih a ni a. Rawtna 18 pawm a ni.

  Pawm zingah hian Department hrang hrang ten an thlen zinga department 13 te thlen 18 chu pawm a ni a, heng zingah hian Mizoram Chief Secretary hlui Renu Sharma, IAS (Rtd) Advisor to the Government of Mizoram atana rawih nawnna tur pawmna chu a langsar.

MYC-in Certificate hlanna nei

Aizawl : Ministry of tribal affairs atanga fund an hmuh hmanga MYC-in mipa lu meh thla khat leh a chanve chhung training leh hmeichhe sam tan, thla thum chhung training zo mi 27-te hnenah May 18, 2026 khan certificate hlanna hun MYC conference hall-ah an hmang a, MYC Chairman Malsawmzuala ralte chuan he hun hi a hmanpui.

  Mipa luh meh zir te hian MT Cutz ah training neiin hmeichhe sam tan zir te hia Nuseni Parlor-ah training an nei thung a. Training chhuakte hian anmahnia hna an thawh tan nghal theihna turin an hmanraw mamawh an pe/hand hold vek a ni.

Tuikhuahtlang-ah ralthuam leh a kawltu man

Aizawl : Mizoram Police leh Assam Rifles tangkawp te chuan an thudawn bawhzuiin dan lova kawl Silai leh a kaihhnawih hmanraw kawltu chu May 21, 206 khan Tuikhuahtlang, Aizawl-ah an man.

  Police te hian 0.32 mma pistol leh a mu bakah fired catridge casa 16 chu helai hmun atang hian an man a. Heng ralthuam leh a mu an man te hi Aizawl Police Station-ah chhuizui leh hmalak zui atan an hlan nghal a ni.

NESO meeting-ah Kuki leh Naga inkar buaina khel

Aizawl : North East Students’ Organization (NESO) chuan May 20, 2026 (Nilaini) khan Guwahati, Assam-ah meeting a ko a, All Assam Students’ Union (AASU) chuan he meeting hi thlengin, Manipur-a Kuki leh Naga-te inkara buaina kal mek chungchang ngaihtuah a ni. 

  Meeting chuan remna a awm theih nan te, nunphung pangngai siamthar anih leh theihna turte leh buaina chhuak avanga harsatna tawk pawi sawilo civil mite zahawmna leh dikna chanvo an hmuh let ngei theih nan, a tul anga hmalak chhunzawm zel nise tih a ni. He meeting-ah hian All Manipur Students’ Union (AMSU), All Assam Students’ Union (AASU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU), leh Naga Students’ Federation (NSF) te an tel a ni.

Rotary Club digital learning kit sawm hlan

Aizawl: Rotary Club of Aizawl chuan CSR hnuaia zirna tihhmasawnna hmanrua "Saksham eLearning Project" hmangin Mizorama sikul 10 hnenah Smart TV hmanga zirtirna e-Learning Kit chu 20.05.2026 khan McCabe Hall, Aijal Club, Aizawl-ah an sem a. Education Minister Dr. Vanlalthlana chuan sikul 10 hnenah a hlan. 

  Sikul dawngtute chu:

1. Govt Nepali Primary School, Khatla

 2. Govt Gairigaon Primary School, Dinthar

 3. Residential School for Privileged Children Luangmual (Mizoram Hmeithai Association enkawl)

 4. Govt Chaltlang Middle School, Chaltlang

 5. Govt Nepali Primary School,Rangvamual

 6. Govt Middle School, Chawlhhmun

 7. Govt Gorkha Primary School, Zotlang

 8. Helen Lowry School, 7th Day Tlang

 9. Govt Nepali Middle School, Khatla

 10. Govt Primary School, Chawnpui