The Week that Was on May 26, 2024
![](https://zalen.s3.ap-south-1.amazonaws.com/images/news/1716630570_The%20Week%20that%20vwas%20logo%20tur.jpg)
International Day for Biological Diversity pualin hun hmang
Aizawl, 22.5.2024: International Day for Biological Diversity chu May 22 khan kum dang ang bawkin hman a ni a. Mizoramah chuan a lawmna pui ber hi Forest Training School, Bethlehem Vengthlang-ah State Biodiversity Board buatsaih a hman a ni a. He ni puala Mizoram University PG student te tana Essay Writing Competition lawmman sem a ni bawk.
Essay Writing Competition Lawmman dangtute chu hengte hi an ni:
1st Prize: Remale Ruth Blessy, Dept of Biotechnology, Mizoram University
2nd Prize: Dodie Zoliansanga, Dept of Biotechnology, Mizoram University
3rd Prize: Kuku Chaitom, Dept of Forestry, Mizoram University
GOC-in-C, Eastern Command-in Governor hmu
Aizawl : May 21, 2024 khan Lt. Gen. R.C Tiwari, UYSM, AVSM, SM, General Officer Commanding-in-Chief (GOC-in-C) Eastern Command chuan Governor Hari Babu Kambhampati chu Raj Bhavan-ah a hmu.
He inkawmnaah hian Lt. Gen. R.C Tiwari chuan Governor chu ramri hrula venhimna kawnga an hmalak tawhnate hrilhin, harsatna hmachhawn tura Assam Rifles te inbuatsaihna a hrilh. Governor chuan Mizorama Assam Rifles ten mipuite tana hna tha taka an thawh avangin lawmthu a sawi bawk a ni. Lt. Gen. R.C. Tiwari hi Major General S K Bhambhu, SM IG AR( EAST) in a tawiawm bawk a ni.
CADC Executive Member la lut
Aizawl : 11th Chakma Autonomous District Council (CADC)-a Executive Member (EM) atana ruat thar, 3-Chhotapansury Constituency bialtu Member of District Council (MDC) Supreme Raj Chakma chu May 21, 2024 khan Arts & Culture Hall, Kamalanagar-ah Lawngtlai Additional Deputy Commissioner B. Malsawmtluangi chuan rinawmna thu tiamtirin a la lut.
Lak luh inkhawm hi CADC-a Executive Secretary Pronit Bikash Chakma chuan kaihruaiin, EM atana Supreme Raj Chakma ruat a nihna Mizoram sawrkar notification a chhiar chhuak a. Hemi hnu hian Additional DC B. Malsawmtluangi chuan Pu Supreme Raj Chakma chu thu tiamtirin, 11th CADC-a EM ni turin a la lut nghal a ni.
Darshan Lal Gola, I.G., CRPF, Tripura Sector in Governor kawm
Aizawl : Darshan Lal Gola, I.G., CRPF, Tripura Sector chuan May 21, 2024 khan Governor Dr Hari Babu Kambhampati chu Raj Bhavan-ah a hmu.
Governor leh Pu Darshan Lal Gola chuan inkawmna neiin Governor leh CRPF te inlaichinna tih that zel dan tur leh a pawimawhnate an sawi dun a ni. Inkawmnaah hian Darshan Lal Gola chu MS Habib Azgar, Commandant, 225, CRPF leh Raja Ram Tokas, 2nd in Command, 225, CRPF ten an tawiawm a ni.
Indiaskills:2024-ah Mizoram-in medal 8 la
Aizawl : Ministry of Skill Development (MSDE) hnuaiah NSDC leh Skill India tangkawpin National Skill Competition - Indiaskills:2024, May ni 15 - 20, 2024 chhunga Yashobhoomi Covention Centre, Dwarka, New Delhi hmuna neihah Mizoramin Medal 8 a la a ni.
1. Maximus Lalruatkima - Gold (Floristry)
2. Vanlalbiakdiki - Gold (Shoe Making)
3. Emily VL Thakimi - Gold (Fashion Technology)
4. Anthony Lalchhanhima - Silver (Drone Film Making)
5. Laltlanzovi - Medallion of Excellence (MoE), (Hair Dressing)
6. Vanlalhriatchhungi - Medallion of Excellence (MoE), (Beauty Therapy)
7. Liansangrem - Medallion of Excellence (MoE), (Plumbing & Heating)
8. Lallawmkima - Medallion of Excellence (MoE), (Electrical Installation)
He intihsiakna Gold leh Silver dawngte hian Worldskills : 2024, Lyon, France-a kumin September thla a neih turah India aiawhin intihsiakna an hmachhawn leh dawn a ni.
RIDF chungchangah High Powered Committee an thukhawm
Aizawl : May 20, 2024khan Rural Infrastructure Development Fund (RIDF) NABARD, Mizoram Regional Office hnuaia loan lak tawh leh hna zawh tawh chungchangah 1st High Powered Committee 2024-25 chuan Secretariat Conference Hall, MINECO-ah an Chairman Chief Secretary Dr. Renu Sharma kaihhruaiin an thukhawm.
RIDF atanga loan la department hrang hrang ten an project thil tum te, district tel zat te, RIDF hnuaia sum duan zat leh pekchhuah tawh zat te leh hna zawh hun tur tlangpui te an sawi ho a ni. Meeting-ah hian member te bakah a kaihhnawih department hotute - Engineer-in-Chief leh Director te an tel a ni.
FCS&CA Minister B.Lalchhanzova leh FCI hotute inkawm
Aizawl : May 20 khan B.Lalchhanzova, Minister, FCS&CA chu a pisaah DP Shukla, Executive Director (North East) FCI leh a ho ten hmu in FCI lam hian Mizorama an hnathawh mek dan leh an mamawh tul te Minister hnenah hian an thlen.
Mamawh an thlen zingah hian Dinthar Veng, Sairang a kudam (Buhfai quintal nuaih khat leng) an sak mek chungchanga Forest clearance avanga an buaina chuan kudam sak hna a tih thuanawp dan te an sawi.
Sandeep Deora chuan Dinthar veng, Sairang leh Khawzawl a kudam te sak zawh an nih chuan Mizoram ah FCI in vawikhata thla riat ei khawp chhek khawlna hmun a nei thei dawn tih sawiin, hei hian fur pui leh khuarel chhiatna dang vanga rail leh kawngpuiah harsatna te thlen mah se, Mizoram chuan buhfai ah security a neih dawn thu a sawi bawk. B. Lalchhanzova chuan FCI hotute chu a tul anga kudam Mizoram hmun laili deuhah sak bellh dan tur ngauihtuah tura a tul thu sawiin, FCI hotutte chuan a nlo bawhzui tur thu an hrilh a ni.
MPSC Chairman thar atan R.Lalramnghaka, IAS (rtd) lalut
Aizawl : Governor Dr Hari Babu Kambhampati chuan R. Lalramnghaka, IAS (Rtd) chu May 20, 2024 khan Durbar Hall, Raj Bhavan, Aizawl-ah rinawmna thu tiam tirin Mizoram Public Service Commission (MPSC) Chairman thar atan a lalut.
Swearing in Ceremony program-ah hian Dr Renu Sharma, Chief Secretary chuan Warrant of Appointment a chhiar hmasa a. Hemi hnu hian Governor Dr Hari Babu Kambhampati chuan R. Lalramnghaka, IAS (Rtd) chu rinawmna thutiam (Oath of Office, Allegiance and Secrecy) chham tirin MPSC Chairman atan a lalut a ni.
MPSC Chairman lakluhna Inkhawmah hian Chief Minister Lalduhoma a tel a. He hunah hian Speaker Lalbiakzama, Home Minister K.Sapdanga, Cabinet Minister te, Minister te, MLA te leh mi pawimawh dangte an tel tha hle a, Chief Minister hlui Zoramthanga pawh a tel a ni.
AMC leh Safe The Riparians te Tuikual Lui-ah hnatlang
Aizawl : May 21 khan Aizawl Mayor Lalrinenga Sailo hovin AMC Corporator te leh Officer leh staff te chuan Save The Riparian chetlak mekna Tuikual Lui-ah hnatlangin Save The Riparians te nen an thian fai. He hnatlangah hian mi 150 chuang an thawk chhuak a ni.
Tuikual Lui hnar, Khatla Veng Field thlang kawr atangin bawlhhlawh chi hrang hrang - plastic bottle, sarang, burchhia, pawnchhia leh a dangte an thiar chhuak a, AMC motor hmangin bawlhhlawhte hi Solid Waste Management Center, Tuirial-ah an paih nghal a ni.
He hnatlang hawnna hun hi Romalsawma (Roma Hmar), Save The Riparian in a kaihruai a. Aizawl Mayor Lalrinenga Sailo chuan thu sawiin, Save The Riparian te hmalakna chhuanawm a tih thu a sawi a. AMC in Aizawl khawpui faina kawngah theihtawp a chhuah mek tih sawiin nasa leh zualin hma a lak chhunzawm zel tur thu a chah bawk.
Tuikhurhlu-ah chenna In kang
Aizawl : May 20, 2024 khan Upa Vanlalthlana, Tuikhurhlu in chu bungraw chuh hman lohin a kang.
Thlana te in hi tun hma lamin an inhmun ngaiah tum 2 (2002? leh 2020?) a lo kang tawh a ni. Tuna kang ta hi an theawma in sak sa an lei niin in kan lai hian a neitute awm loh lai niin an in hi tala in an kalh a, in kan chhan hi hriat mai theih a ni rih lo. Thi leh hliam an awm lo.
MBSE hnuaia HSSLC 2024 result tihchhuah a ni
Aizawl : May 21, 2024 Thawhlehni khan MBSE chuan HSSLC 2024 result a tichhuak a, kumin pass percentage 78.04 a ni a, nikum 2023-a pass percentage 78.66 aiin 0.62%-a a hniam.
Mizoram Board of School Education (MBSE)-in Higher Secondary School Leaving Certificate (HSSLC) 2024 -ah stream hrang hranga exam hmachhawn zirlai 11,824 atangin zirlai 9227-in hlawhtlinna an chang.
HSSLC Arts-ah Linden Lalremruatpuia s/o Lalrindika, Oikos Higher Secondary School chu pakhatna a ni a, Science Subject -ah Lalramdina Ralte s/o Lalthakima, St Paul's HSS chu pakhatna a ni. Commerce-ah David Lalhminghlua s/o Paul Zakhuma, St Paul's HSS chu pakhatna a ni bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024