Rajya Sabha MP leh BRO hotulu inkawm

Aizawl : Mizoram MP (RS) K.Vanlalvena chuan May 22 khan BRO Director General, Lt General Rajeev Chaudhry VSM chu a office hmu in Mizorama BRO hnathawh chungchang a sawipui.
    An inkawmnaah hian DONER Ministry in kum thum kaltaa NEC kaltlanga cheng vaibelchhe 66 senna tur Sangau to Saisihchhuah kawngpui laihna tur BRO thawh tura a lo dah tawh, sanction tawh hnuhkir leh mai tur dinhmuna ding mek te an sawi dun a. He hna hi chaktak leh rang zawka thawh thuai a nih theihna tura hmalak a nih tur thu BRO Director General chuan Vena hi a lo hrilh a, duhsakna thilpek a lo hlan bawk a ni.

NEGIS-a tel ve dan tur chungchang sawiho

Aizawl : Chief Minister Zoramthanga hovin 22.05.2023 khan cabinet meeting room-ah Empowered Committee for Investment in Mizoram chu an thukhawm a. Ministry of DONER in a buatsaih North East Global Investors Summit (NEGIS) a Mizoram tel ve na tur chungchang an sawiho a ni.
    NEGIS 2023 ah hian India ram chhung leh pawnah India hmarchhaka investment nasa zawk a luh theih nan roadshow neih a ni dawn a. Chumi atan chuan Mizorama investment tih theihna project hrang hrang chhawpchhuah theih tur vawiin hian sawiho a ni a. Chung zingah chuan tourism, skill (nursing, hospitality, garment making, entertainment etc.), sports, tourism, food processing, education, etc. lama potential chungchang te sawiho a ni.

International Day for Biodiversity 2023 hmanpui

Aizawl : May 22 khan Environment, Forest and Climate Change Minister TJ Lalnuntluanga chuan International Day for Biodiversity 2023, IASE Auditorium Republic Veng a neih chu a hmanpui.
    International day for Biological Diversity lawmnaah hian EF&CC Minister TJ Lalnuntluanga chuan, International Biodiversity Day chu kan khawvel sik leh sa inthlak danglam chho zel leh nungchate dinhmun en hian Khawvel a hun pawimawh ber pawl a ni, a ti a. Khawvel ah thiamna a sang chho zel a, amaherawhchu environment nasa takin a inthlak danglam a, hei vang hian, hmasawnna leh environment humhalh hna chu in su buailo a, a kalkawp theih nan thiamna sang tak bakah moral dik kan neih a pawimawh a ni, a ti.

Badminton Coach Pullela Gopichand & CM inkawm

Aizawl : National Badminton Team Chief Coach Pullela Gopichand chuan 22.05.2023 khan Chief Minister Zoramthanga chu a pisa ah a hmu a. Mizoram Badminton Association, Tata Trusts leh Northeast Initiative Development Agency (NEIDA) aiawhte tel bawin Mizorama badminton tihhmasawn na tur kawng hrang an sawiho a ni.
    Chief Minister chuan badminton ah Mizo te potential an neih thu te, training tha tak nen chuan khawvel pum huap pawh a la inhlangchho thei tam tak an awm ngei a rin thu a sawi.
     Gopichand chuan Mizoram badminton player te chu talent nei tha a tih thu sawiin Tata Trusts, NEIDA leh Mizoram Badminton Association hmalakna chu fakawm a tih bawk a. Mizorama badminton tihhmasawn tura thawhhona neih mek, Pullela Gopichand Badminton Academy (PGBA) technical partner a nihna - Mizoram Badminton Initiative hmalakna hnuaiah First Phase ah Junior National Champion an awm der tawh thu a sawi.

Union Minister in CM leh Governor kawm

Aizawl : Chief Minister Zoramthanga chu Union Minister of State for External Affairs leh Culture Meenakshi Lekhi nen May 22 khan a pisa-ah an inkawm.
    Chief Minister chuan Union Minister chu Mizoram a lo tlawh avangin lawmthu a hrilh a,tluang taka hun a hman theih nan duhsakna a hlan nghal bawk. Mizoram chu International Border-in a hual vel ram anih angin rambung pawimawh tak a nih thu te leh hmasawnna hnathawh kawngah remna leh muanna awm a tul thu te an sawi dun a ni.
    Union Minister Meenakshi Lekhi hian vawiin khan Governor Dr Hari Babu Kambhampati chu Raj Bhavan-ah a hmu a, Mizoram State Museum a tlawh bawk. Art & Culture Minister R. Lalzirliana chuan zanah Chaltlang Tourist Lodge-ah a pualin zanriah leh Cultural program a buatsaih sak bawk a ni.

Dy. CM-in project pahnih lung phum

Aizawl : May 23 khan Deputy Chief Minister Tawnluia chuan Aizawl Smart City Project hnuaia sak tur pahnih Chaltlang Sports Multipurpose Hall, DIET Complex leh Upgradation of Aizawl Tourism Centre, Tourist Lodge Chaltlang sakna tur lungphum a phum.
    Deputy Chief Minister chuan lungphum pahnih puala inkhawm naah thu sawiin Aizawl Smart City Project kaltlanga Chaltlang veng, hmun pahnih-a project lian tak lungphum phum a hna bul tan a ni chu lawmawm a tih thu a sawi.

Union Minister-in Champhai tlawh

Aizawl : Mizoram tlawha cham mek Union Minister of State for External Affairs and Culture of India Meenakshi Lekhi chuan May 23 khan Champhai District a thleng a; Champhai, Vangchhia, Zokhawthar, Dilkawn leh Khuangleng khuate tlawhin Sawrkar hmalaknate a enfiah a ni.
    Meenakshi Lekhi hian chawhma dar 10:30 khan NH 06 kawng thar zawhin Champhai a thleng a, Hemi hnu hian Kawtchhuah Ropui Vangchhia tlawhin hmalaknate a enfiah. Zokhawthar khua tlawhin hmalak dante a enfiah a, Govt. Vengthlang Middle School Champhai, Anganwadi Centre Dilkawn leh Health & Wellness Centre. Khuangleng te tlawhin thawktute a kawm.

Union Minister-in Mamit fak

Mamit : Smt Meenakashi Lekhi, Hon'ble Union Minister of State for External Affairs & Culture, Govt. of India chuan vawiin khan Mamit tlawhin DC Conference Hall-ah Mamit khawpui chhunga Sorkar hotute meeting a neihpui.
    Minister chuan Sawrkar hnathawk, Aspirational District, Mamit-a awmte rilru puthmang chu mipui hmasawnna a ni tur a ni tiin mipui ta kan nih angin ram leh mipuite tana theihtawpchhuaha hna thawk thin tur leh mipuite mamawh hriat tuma rang taka chet la thin turin a chah.
    Mamit chu Plastic bawlhhlawh sawngbawl chungchangah fakawm a tih thu sawiin an rawn kalna kawngah Plastic waste paih mai mai hmuh tur a tlem chu thil lawmawm tak a ni a ti. 

Governor-in Pawl 10 leh Pawl 12 topper te lawmpui

Aizawl : Governor Dr. Hari Babu Kambhampati chuan May 25 khan Raj Bhavan-ah High School Leaving Certificate leh Higher Secondary School Leaving Certificate Examination 2023 result chhuak taa pakhatna dinhmun hauh tu zirlai te lawmpuina thilpek a hlan.
    Governor Dr. Hari Babu Kambhampati chuan Zirlai titha zual te chu an hlawhtlinnaah lawmpui tih sawiin an kal zel a turah duhsakna a hlan hmasa a. A mal te tein Zirlai te hi an thil tum te a zawt a, an nih tum te an nih theih nan theihtawp chhuah chhunzawm turin a fuih a ni.

11th CADC CEMatan Rasik Mohan Chakma lalut

Aizawl : May 25 khan 11th Chakma Autonomous District Council (CADC) Inthlanpui, 2023 neih zawh taka 1-Borapansury MDC Constituency atanga thlan tlin, Rasik Mohan Chakma chu Chawngtea CADC Art & Culture Hall-ah Mizoram Governor ai awhin Lawngtlai Additional Deputy Commissioner Abraham Beirazi Khithie chuan CADC Chief Executive Member (CEM) atan rinawmna thu tiamtirin a la lut.

Agriculture Minister hovin review meeting nei

Aizawl : May 25 khan Agriculture Minister Office chamber ah Directorate a Officers te, District Agriculture Officers te leh Senior Scientists & Head, KVKs ten Agriculture Department hnuaia hma lakna leh hma lak leh na tur te sawi hona hun neih a ni.
    Review Meeting hi C Lalrinsanga, Minister, Agriculture Department chuan a kaihruai a, District hrang hrang atanga kal khawm te chu lawmna thu sawiin meeting koh a nih chhan te a sawi fiah a. Minister, Agriculture Department sawmna angin J Rothanga, Joint Director of Agriculture (R&E) in meeting Agenda te sawihawnna hun a nei.

ECI official-ten state official te meeting neihpui

Aizawl :  Election Commission of India atanga lo kal Dharmendra Sharma, Senior Election Commissioner leh a team-te chuan Mizoram inthlanpui lo awm tur chungchangah Chief Secretary, Director General of police leh Department hrang hranga Secretary-te chu Secretariat Conference Hall, MINECO-ah May 25 khan meeting neihpuiin inthlan felfai tak neih a nih theihna tura thil tulte an sawipui.
    Chief Secretary Renu Sharma chuan ECI official-te chu Mizoramah a lo lawm tih a sawi a. Inthlanpui felfai tak neih a nih theih nan sawrkarin hma a la mek tih tarlangin ECI duhdan ang ngeia inthlan kalpui a nih tur thu a sawi. Mizoram chu india rama state ralmuang ber a ni tih sawiin, inthlan felfai takin neih a lo ni fo tawh thin a, kumina inthlanpui lo awm tur pawh felfai leh ralmuang takin neih a nih leh ngei a beisei thu a sawi a ni.
     Dharmendra Dharma chuan Election Commission of India-in a duh ber chu inthlanna felfai leh thianghlim tak neih a ni a, Polling station ralmuang taka siam leh tui thianghlim in tur leh inthiarna tha tak neih bakah rualbanlote tan pawha wheelchair hmanga awlsam taka vote an thlak theih nana 'ramp' dah te, Covid Vaccine vawihnih la chauh duty tir, inthlanpui laia zu leh ruihhlo hluar thin tihbo bakah pawisa tam tak sem thin chu tihrem a ngaih thu a sawi.