END leh AR ten Lawngtlai-ah Kg 9 chuang Meth man

Aizawl: Excise & Narcotics Department, 23rd Assam Rifles leh an thawhpuite chuan May ni 26, 2026 zan dar khan AOC veng, Lawngtlai-ah Methamphetamine Kg 9 & gram 807 kgs (Tablet 1,00,000) leh a neitu nia puh mi pahnih - Lalrammuana (47) s/o S. H. Lianhmingthanga leh Lalrinpuia (44) S/o Pazawna, Armed veng South, Aizawl-a khawsa ve ve nia inchhalte an man. 

  Methamphetamine phurhna atana an hman, lirthei, Mahindra Bolero (Regn. No. MZ-06-4625) pawh hrensak nghal an ni. Methamphetamine te hi Lalrammuana leh Lianhmingthanga te hian Aizawl lam atanga lain, Lawngtlaia hralhna tur an zawn mek lai a ni. 

Tourism Director R. Lalrodingi inhnuhdawhna CM-in pawm

Aizawl : OSD to Chief Minister R. Lalrodingi chuan May 28, 2026 khan Chief Minister hnenah lehkha a thawn a, hetah hian Tourism Director atana ruatna chu la sawn turin a ngen a, an dahna hi department officer post a nihna erawh humhim hram dan awm sela a duh thu a tarlang bawk. He a ngenna hi CM pawhin a pawm sak a ni.

MzSU atana post 59 lak tumna sawrkarin cancel

Aizawl : Mizoram sawrkar chuan Higher & Techical Education hnuaia Mizoram State University (MzSU) atana post hrang hranga atana mi 59 a lak tura tih chu a cancelled/withdraw tih May 25, 2026 khan thuchhuah an siam.

  Higher & Technical Education Department hian 04.05.2026 khan thuchhuah siamin Mizoram State University a thawk tura post hrang hrang 59 lak turin a tichhuak a, he order hi R. Zarzosanga, Commissioner & Secretary to thei Govt. of Mizoram, Higher & Technical Education chuan May 25, 2026 khan cancelled a nih thu hi a tichhuak a ni.

Inkhawih rawnte inngaidam mah se police-in thubuai ziak lut tho

Aizawl: Tun hnaia Aizawl khawpui lailia rawlthar intihbuaina thlengah a inhnamhnawihte chu an inngaidam nia hriat a ni a, police erawh chuan hetiang thil a thlen zui tawh lohna turin thubuai an ziak lut tho.

  Thawhlehni zing khaw var hmaa Chanmari huam chhung, Grand Hotel bula mi sawisak rawntu pangate hi hemi zan hian police-in an man nghal a. An zinga pathum chu Central Jail-ah dah luh niin mi dang pahnih erawh kum an la tlin loh avangin Remand Home-ah dah an ni.

  ZALEN-in Aizawl SP atanga thu a dawn dan chuan buaina chhuaka inhnamhnawihte inbe remin an inngaidam tawn a; mahse, police hian tun hnua hetiang a thlen tawh lohna turin suo motto thubuai an ziak lut ta tho a ni.

Hmarchhaka cricketer tha pathumah Mizo

Aizawl : Mizoram cricketer pali - Jehu Anderson, Jacinta Laltanpuii, Vanlalruatpuii leh Dorothy Ngurnunmawii te chu anmahni huang theuhvah India hmarchhakah a tha berah thlan an ni.

  North East Cricket Development Council (NECDC)-in kum tina an tih thin anga a season liam ta, 2025-26 -a BCCI tournament-a chetha te lawmman a hlan thinah Mizoram cricketer pali te hi lawmman hlan an ni.

  24.05.2026 zana Imphal, Manipur-a NECDC 5th Achievers’ Nite-ah hian Jehu Anderson chu Best Wicket Keeper in Senior Men’s chawimawina hlan a ni a. CAM Women’s Cricketer of the Year atan Jacinta-i chu Best Batter-in Women’s Under-23 atan thlan a ni bawk. CAM Awards 2026-a Junior Cricketer of the Year (Women) latu, Ruatpuii chu Best Batter in Women’s Under 19 lawmman hlan a ni bawk a ni. 

Health Minister-in Nurse khawmpui hmanpui

Aizawl: Health Minister Lalrinpuiii chuan May 28, 2026 khan Mizoram Government Nursing Service Association (MGNSA) Conference vawi-23na chu Aizawl Civil Hospital Conference Hall-ah a hmanpui. MGNSA Conference thupui atan Soft Skill for Nurses tih chu hman a ni.

  Conference hmang tur hian Directorate of Nursing hotute leh Mizoram hmun hrang hrang atangin MGNSA member te an kal khawm a. National Florence Nightingale Award dawng mi pahnih - V.Lalhmangaihi, Nursing Officer leh H.Mankimi, Senior Nursing Officer te bakah hruaitu chawimawina Lalhmingmawia Thangluah, Nursing Officer hnenah hlan a ni.

ECI-in SIR a kalpui thei tih a nemnghet

Aizawl: India rama Court sang ber, Supreme Court chuan May 27, 2026 khan Election Commission of India (ECI) in a bik taka electoral roll ennawnna, “Special Intensive Revision” (SIR) an kalpui thei tih a nemnghet a, Article 324 hnuaiah ECI hian inthlanna felfai leh dik taka an kalpui theihna turin thuneihna zau tak an nei tih a sawi.

  Court chuan ECI-in tawp chin neilo thuneihna an nei bik lo tih a sawi chian rualin, India Danpui leh Parliament rorelna kalhin hma an la thei bik chuang lo a ti a. Amaherawhchu, thubuai thehluttu ten SIR-in dan a kalhna lai Court hmaah chiang takin an lantir thei lo, tiin an thubuai thehluh chu a hnawl a ni.

AMC Councillor hlui te conference hmanpui

Aizawl: May 27, 2026 khan AMC-a Councillor leh Corporator lo ni tawh te inhlawmkhawmna Former Councillors’ Association of Mizoram Municipalities (FOCAM) inkhawmpui vawi 6-na chu Aijal Club-ah neih niin, Art & Culture Minister C.Lalsawivunga chu khuallian a ni.

  FOCAM Meeting-ah hian Dan siamthat chu an agenda pui ber a ni a. P.C Lalhmingthanga, FOCAM Secretary chuan FOCAM-in Pawl thiltum leh dinchhan 7-a neih thu sawiin member 38 -an awm mek a ni. He pawlah hian Aizawl Municipal Corporation-a Councillor/Corporator-te chauh a huam tawh dawn a, Pawl hming pawh FORMER CORPORATORS' ASSOCIATION OF AIZAWL MUNICIPAL CORPORATION (FOCAM) ti a thlak a ni.

Health Minister hovin ZMC&H Graduation Day hmang

Aizawl : Health and Family Welfare Minister Lalrinpuii chuan May 26, 2026 khan Zoram Medical College and Hospital (ZMC&H) a zirlai kumina MBBS zirchhuakte puala buatsaih “Graduation Day” a hmanpui a, Mizorama a hmasa ber ni turin Interventional CT Scan a hawng bawk. 

  Graduate tharte hi batch thumna niin kum 2021 February atangin zirna bul an tan a, final exam pe zirlai 98 zinga 96 te chu graduate theiin pass percentage chu 97.95% a ni. Zirlai titha bikte hnenah lawmman sem a ni a, Alex Vanlalruatkima, C. Lalhmachhuani, leh Zosangpuii te chu pakhatna, pahnihna leh pathumna (an hming indawtin) an ni. Zirna piah lama activities hrang hranga titha hnena pek thin Col VL Ruata Award chu Paul Ngurthantluanga Vanchhawng hlan a ni.

Union Minister-in Sangha chi leh a chaw a sem

Aizawl: Union Minister of Fisheries, Animal Husbandry and Dairying, Rajiv Ranjan Singh (alias Lalan Singh) chuan May 26, 2026 khan State Government Fisheries Farm-ah sangha khawitute hnenah sangha chi leh sangha chaw a sem.

  Union Minister hi Minister of State of Fisheries, Animal Husbandry and Dairying Prof SP Singh Bagel, Minister of State of Fisheries, Animal Husbandry and Dairying George Kurian, Mizoram Fisheries Minister Lalthansanga leh Sawrkar Official ten an tawiawm a ni.

Behliang chi quintal 245 a vailiam

Aizawl: Agriculture & Farmers Welfare hnuaia scheme pakhat Pulses Mission hnuaia District hrang hranga loneitu mi 3700 te chin tur Behliang chi quintal 245 chu May 26, 2026 khan Agriculture Department Minister PC Vanlalruata chuan Directorate of Agriculture & Farmers Welfare Office tual atangin a vailiam.

  Khuallian Agriculture Minister PC Vanlalruata chuan India ram chu be lam chi-ah a intodelh loh thu sawiin, he scheme hnuaiah hian Mizorama loneitu ten Behliang hi ram tin 6000 a zauah an ching dawn a ni, a ti a. Minister chuan behliang hi Mizoram sik leh sa mil em em, chin leh enkawl hautak lo tak a nih avangin tam tak kan thar chhuah theih ngei a beiseiawm a ni, a ti.

P&E Minister-in Celebration of Solar month a hmanpui

Aizawl: Power & Electricity (P&E) Department Minister F. Rodingliana hovin May 26,2026 khan Mizoram ah Nizung chakna hman tangkai zelna turin PM Surya Ghar: Muft Bijli Yojana (rooftop solar installation) inhriattirna leh Celebration of Solar Month chu Secretariat Conference Hall 1, MINECO-ah hman a ni.

  He programme hi Mizoram-ah solar energy hman chakzualna tur leh rooftop solar installation chungchang mipuite hriattirna a ni a; programme zawh hnuah Secretariat Main Gate hnaih-ah vendor-te awmin, rooftop installation chungchang hrechiang duhte an lo pui bawk a ni.

Union Minister-in MULCO Dairy tlawh

Aizawl, 25 May 2026 : Fisheries, Animal Husbandry & Dairying leh Panchayati Raj Union Minister Rajiv Ranjan Singh (alias Lalan Singh) chuan vawiin khan Thuampui-a MULCO Dairy a tlawh a, Mizorama cooperative dairy sector tihchakna tur hmalakna hrang hrang a tlangzarh.

  Union Minister of State for Fisheries, Animal Husbandry & Dairying leh Minority Affairs changtu George Kurian, Union Minister of State for Fisheries, Animal Husbandry & Dairying leh Panchayati Raj changtu Prof S.P Singh Baghel,Mizoram sawrkar hnuaia Animal Husbandry Veterinary Minister C.Lasawivunga, Cooperation Minister P.C. Vanlalruata, Fisheries Department changtu Minister Lalthansanga te bakah sorkar mi pawimawhte, National Dairy Development Board (NDDB) aiawh te, Mizoram Milk Producer’s Cooperative Union Limited (MULCO), State sawrkar AH&Vety, Fisheries leh Cooperation Department hotute, cooperative society member-te leh farmer-te an tel a ni.

Ginger USP Project chungchang sawiho

Aizawl: Chief Minister Lalduhoma hovin May 25, 2026 khan CM Conference Hall-ah Ginger USP Project kalpui dan tur sawihona neih a ni a. PC Vanlalruata, Agriculture Minister, F. Rodingliana, Industry Minister, Prof Lalnilawma, RD Minister, TBC Lalvenchhunga leh Dr. KC Lalmalsawmzauva, Adviser to CM te leh official pawimawhte an tel.

  Ginger USP Project hi department 5 velin thawkhoin (Convergence) an kalpui dawn a, Kumin chhungin a khawl bun fel hman tum a ni a. A khawlte hi sorkar enkawl lo va mimal investor/ entreprenuers / socuety te enkawltir tura duan a ni. Meeting-ah hian he project kalpui dan tur indawt leh huntiam neia thawh ngai chi zawng zawngte chu chipchiar taka sawi a ni.