CYMA-in Assam atanga ruihhlo lo lut thin enfiah

Aizawl : Central YMA chuan Assam atanga ruihhlo lo lut thin ni a sawi te enfiahin ni 30.4.2024 (Thawhlehni) khan Kumpuan Sub- Committee te leh Cachar Young Muslim Association hruaitute an inkawm.

   Assam aanga ruihhlo lo luh dan leh lo lut hin ni a hriatte sawiho a ni a, a tihtawp dan tirah ruahmanna siamho a ni a, Central YMA Kumpuan Committee te hian Vairengte-a Police Check Gate a duty te kawmin Temporary ILP pek chhuah dan te, hnamdang ILP neilo lut ru an awm thin dan te sawiho a ni bawk.

   Vairengte SDO (Civil) hnen atanga thu dawn danin April, 2023 atanga March, 2024 -a Temporary ILP pekchhuah zat chu 53,231 a ni.

Republic Veng-in an veng mi hmingtha te chawimawi

Aizawl : Republic Veng Branch YMA chuan April 30, 2024 zan khan YMA Kumpuan "Ram leh hnam humhalh" hawnna hun an hmang a, Central YMA Vice President Prof. Lalnuntluanga chuan a hawng a ni. Kumpuan hawnna hunah hian Republic Veng chhunga chawimawi phu chawimawina hun an hmang nghal a ni.

   Republic Veng Branch YMA te hian an veng chhunga chawimawi phu chawimawina an nei nghal a, chungte chu:

1. MPSC Combined Competitive Exam 2023-a MCS topper - Lalnunpuia Renthlei

2. Book of the year 2023 ziaktu - K. Vanlalhmangaihi

3. Miss Mizoram 2024 - Jennifer Lalrinzuali Renthlei

4. Dr. Lalhriatpuii, Ph.d

5. 29 MIMSA Racing champion - Lalramdina

Save the Riparian te thawhnihna atan che chhuak

Aizawl : Tlawng lui fintu thianfaia chechhuak thin Safe the Riparian te chuan a thawhhnihna atan May 1, 2024 khan Royal Lalawi Hotel thlang, Lalmalsawma Memorial School bul, Khatla atangin bul an tan leh.

   Save the Riparian te chuan tuna an project phase-II hi ni 30 chhung vela zawh hman an inbeisei tih an sawi a, an hmalakna chuan rah tha a chhuah zel nia an hriat thu an sawi a, khaw hrang hrang atangin an hmalakna zawma mahni khaw lui thenfai tih thu an dawn thin avangin lawmawm an tih thu an sawi a, bul tan chauh an la nih thu leh hmabak a la tam thu an sawi bawk.

   Save the Riparian project Phase-II kick-off hi Lalduhkima, Director, Project Management Unit, PHED, Govt of Mizoram chuan a flag-off a, he hunah hian Khatla Local Council leh YMA te bakah PHE department staff te leh Tourism department staff te leh mi thahnemngai te an tel.

Khawlum vangin sikul kai hun ti danglam

Aizawl : Lunglei district a Tlabung khua chu boruak lum leh uap in a tuam reng avang leh power supply a awm dawn loh avangin May 1&2, 2024 atan bik zirna in kai hun an ti danglam.

   Tunlaiin Tlabung leh a chhehvel a khaw lum lam chu a tehna ah degree celcius 40 a kai chho deuh reng avangin, chhun lam ah phei chuan khawlaia chhuah ngam a ni meuh lova, hetihlai hian P&E dept, chuan May 1&2, 2024-ah shutdown tuma ruahmanna an siam avangin MZP sub, Hqrs Tlabung chuan zirna in khar rih mai turin thuneitute an ngen a ni.

   Thuneituten an ngenna an ngaihtuah hnuah, zirna in khar chu remchang dawn chiah lo mah se, school kal hun tihdanglam a ni a, elementary bik chu zing dar 7 atanga chawhma dar 10 thleng leh secondary school bik chu zing dar 6:30 atanga chawhma dar 10:30 thleng kal turin ruahmanna siam a ni.

MUP Gen. Assembly vawi 49 na hmang

Aizawl : April 30, 2024 khan Mizoram Upa Pawl General Assembly Vawi 49-na chu Vanapa Hall-ah neih a ni a. District Headquarters hruaitute, Area leh Branch hrang hrang hruaituten nilengin ro an rel.

   Chawhma lam chu MUP General Headquarter President Nghaklianmawia'n kaihruaiin Mizoram Sawrkarin Old Age Pension atana State Sawrkarin thlatin Rs 100/- a lo tum ve thin chu kumin Financial Year atanga Rs 1000/- a tihpun mek anih chungchangah lawmthu an sawi a. Zemabawka MUP ramah Nuai 290 man MUP building sak anih dawn avangin lawmthu an sawi bawk.

   Chawhnu lam chu Vice President Pu Lalbiakmawia Khiangte-in rorel kaihruaiin, kum 2024-25 Budget cheng nuai 83 an pass a. Old Age Pension bik hmu tur leh thlakna tur buatsaih chungchangah hian MUP Branch te hi sawrkarin ngai pawimawh leh zual se tiin an rel.

National TB Elimination Programme Review Meeting

Aizawl : April 30, 2024 khan Conference Hall DHS Old building ah National TB Elimination Programme 1st Quarter 2024 Review Meeting neih a ni a. He hun hi Dr. Febiola Kharkongor State TB Officer in a kaihruai a ni.

   Report-a a lan danin kumin 2024 January leh March thla inkar chhungin TB rinhlelh mi 3761 test an ni a. TB vei mi 595 hmuh chhuah tawh an ni. Nikum January leh March thla inkar khan TB vei mi 420 hmuh chhuah an ni thung.

   Kumin 1st Quarter chhungin MDR-TB vei mi 38 hmuh chhuah an ni a. TB leh HIV vei kawp mi 57 hmuhchhuah an ni bawk. TB vanga thi hi 5% an ni a. TB tihdam zat hi 77% a ni. TB vei hmuhchhuah zingah hian 6% te chu zunthlum nei an ni a. 33% chu vaihlo kaihhnawih ti niin, 16% chu zu in mi an ni.

National Tobacco Control Programme Training leh Review meeting

Aizawl : Vaihlo do kawnga National Health Mission hnuaia hmalatu National Tobacco Control Programme (NTCP), Mizoram te chuan Refresher Training cum Review Meeting chu, 02.05.2024 khan ATI-ah neih a ni a. Mizoram district hrang hrang atangin NTCP thawktute an kalkhawm a ni.

   Inkaichhawntheihloh natna - Non Communicable Disease (NCD) hrang hrangte thlen theitu langsar bet chu vaihlo zuk leh hmuam hman a nih thu a sawi a; cancer natna zinga 30% leh NCD nei zinga 30% te chuan vaihlo zuk leh hmuam an hman thin thu a sawi bawk a ni.

   He hunah hian District hrang hrang report ngaihthlak niin Financial Year kal ta a hna an thawh that thu sawi a ni a, target an neih te an khum tha in hma an lakna kawng hrang hrangah an tih that thu ngaihthlak a ni bawk.

Hualngohmun-a Bawlhhlawh paihna tur atan hmalakna sawiho

Aizawl : May 2 khan Planning & Programme Implementation Department Committee Room-ah ‘Construction of Solid Waste Management Centre:Phase-I, Hualngohmun’ hmalakna chungchangah Mizoram State Project Monitoring Committee meeting neih a ni.

   Mizoram State Project Monitoring Committee hian ‘Construction of Solid Waste Management Centre, Hualngohmun : Phase-I’ hi ni April 26, 2024 (Zirtawpni) khan hna kal mek leh hmalaknate a hmunah an lo thlir tawh a, hmalak chhunzawm zel dan turte meeting-ah hian an sawi ho. ‘Construction of Solid Waste Management Centre, Hualngohmun hi Special Assistance to State Capital Expenditure (SASCE) fund cheng vaibelchhe 16.64 hmanga, total capacity 50 tons (25 tons dry waste + 25 tons wet waste) ni tura buatsaih a ni.

   PWD chu Implementing Department a ni a, Nodal Department chu UD&PA Department niin, AMC-in a enkawl zui dawn a ni.