SOP for Containment Zone/Area
May 6, 2021 khan Deputy Commissioner & Chairman, District Disaster Management Authority/ District Level task Force on Covid-19, Aizawl District chuan district huamchhunga COVID-19 hri darh avanga Containment Zone-a puan te inkaihhruaina hman tur a duang

Nuai 10 chhunglut
Covid-19 hripui leng avanga harsatna Mizoramin a tawhte a theih ang anga sutkian a nih nan Salvation Army, India Eastern Territory chuan 04.5.2021 khan Chief Minister's Relief Fund for COVID-19 ah Rs.10,00,000/- (cheng nuai sawm) an chhunglut. Addl. Chief Secretary JC Ramthanga chuan CM aiawhin a dawng a ni. 

HMUN THENKHAT CONTAINMENT AREA PUANG
Aizawl khawpui chhungah Covid-19 positive vei hmuhchhuah an pung zel a. Veng thenkhatah hri vei punna hi a tam zualna vengte dinhmun hi zirchian a nih hnuah COVID-19 hrileng darh zel tur venna atan Containment Zone/ Area-ah ah Regulation 1 1 (1) of the Mizoram Epidemic Diseases (COVID- 19) Regulations, 2020 behchhanin Tuivamit, Central Jail Veng, Kanan Veng, Chhinga Veng : Bethlehem Veng,Bethlehem Vengthlang veng hmun thenkhatah 7.5.2021 zing dar 4:00 atangin Aizawl DC chuan Containment Zone-ah a puang.
 
TRUENAT UNO HLAN
District Hospital, Kolasib-a Truenat khawl chu April ni 13, 2021 atang khan a chhiat avangin Minister K.Lalrinliana, Kolasib Assembly Constituency bialtu MLA ni bawk chuan Health & Family Welfare Department Minister-ah thlenin khawl lo thlen hma atana hman tur Truenat UNO chu May 5, 2021 khan a pe.

Nuai 8 chhunglut
United Pentecostal Church International (NEI) chuan Covid-19 hripui leng avanga harsatna Mizoramin a tawhte a theih ang anga sutkian a nih nan May 5, 2021 khan Chief Minister's Relief Fund for COVID-19 ah Rs.8,00,000/- (cheng nuai riat) an chhunglut a. Addl. Chief Secretary JC Ramthanga chuan an thilpek hi CM aiawhin a dawng a ni.

Hri kaite enkawl dan
May 5, 2021 khan Health Minister Dr. R. Lalthang-liana kaihhruaiin SAD Conference Hall-ah COVID-19 positive te enkawl dan leh thil pawimawh chi hrang hrang sawiho a ni a. He sawihona ah hian specialist daktawr hrang hrang, Sawrkar daktawr pension te leh thawklai mekte bakah private daktawr leh private hospital enkawltute an tel a ni. 

Hriattirna chhuah
Fisheries department chuan May 5, 2021 khan thuchhuah siamin, Tunhnaiah ruah a sur har avang leh ramngaw lo chereu zel avangin kan rama lui tui te a lo kam nasa a. Mi tam takin luia nungchate dan phal lohvin an suasam thin.Lui-dunga nungchate an inthlahpun zel theihna tur te leh dan bawhchhetute hrem an nih theihna turin thuchhuah leh hriattirna a siam.

COVID-19 a sum lut
Mizoram Rural Bank chuan hripui leng avanga harsatna Mizoramin a tawhte a theih ang anga sutkian a nih theih nan 04.5.2021 khan Chief Minister's Relief Fund for COVID-19 ah Rs.10,00,000/- (cheng nuai sawm) an chhunglut.

ZAN LEH ZINGKAR CHHUAH KHAP
Hripui leng mek, COVID-19 laka mipuite kan him zel theih nan Section 144 CrPC (Act No. 2 of 1974) in thuneihna a pek angin Aizawl DC  Dr Lalhriatzuali Ralte chuan May 4, 2021 khan pawn chhuah khapna thupek a siam a. He thupek angin Aizawl City area huamchhungah Ni 4 May, 2021 atanga thlahnih chhung atan, thu leh a awm anih loh chuan zan tin dar 7:00 PM atanga a tuk zing dar 4:00 AM thleng pawn chhuah khap tlat a ni.

RUAHMANNA SIAM
May 4, 2021 khan DM&R Department order thar ber dt 3.5.2021 a tih chhuah Lockdown Guidelines Clause A 5 (3) in a sawi angin, Aizawl District atanga District dang paltlanga State danga kal duh tanAizawl DC chuan ruahmanna a siam.

CM leh MKHC
Chief Minister Zoramthanga chu May 4, 2021 khan MKHC hruaitute chuan a pisa ah an hmu a, COVID-19 hri leng thawh hnihna laka mipui an him zawk nan leh, he hri leng darh zau zel chu chhut chah a nih theih nan sawrkarin inkaihhruaina khauh zawk kalpui se tiin an ngen.

CM Relief Fund
Mizoram Presbyterian Kohhran, Khatla chuan Mizoramin Covid19 hri leng avanga harsatna a tawrh mek laia tanpui ngai te tanpui nan leh a tul apianga hman turin May 3, 2021 khan Chief Minister's Relief Fund for COVID-19 ah vawiin khan Rs.2,00,000 (Cheng Nuai Hnih) an chhunglut a ni.