The Week that Was on November 10, 2024

DIET campus-ah sava bu dah

Aizawl : DIET Serchhip chuan an campus chu 'Bird Friendly Campus' atan an buatsaih a, chumi atan chuan November 5, 2024 khan an campus a thingkung-ah sava bu pathum an dah.

DIET campus ah hian sava tlan chi thing chi hrang hrang phunin hengte hi sava ten an tlan thin avangin sava te hi an khawsak zui theihna turin heng sava bu te hi an dah a, Serchhip Chanmari veng huamchhungah sava veh lo turin mipuite an ngen bawk.

Kum 19 mi mibo dam taka hmuh a ni

Aizawl : James Lalnuntluanga (19) S/o Ruthi Lalnunmawii Vairengte IOC veng chu ni thum leh zan thum a bo hnu-ah dam tak a hmuh leh a ni.

James Lalnuntluanga IOC veng hi 2.11.2024 chawhnu dar 1 vel a an in atanga a chhuak chu ni thum leh zan thum a bo hnuah November 4, 2024 zan dar 11 rik hma deuh khan IOC veng chhakah hmuh a ni a, eiturte pek a nih hnu him takin an chenna in thlengpui leh a ni. James Lalnuntluanga hi rilru lama harsatna nei a ni a, hmuh a nih hian a taksa lamah hliam emaw dam lohna emaw a nei lo.

Kohhran hnatlanna-ah vanduaina tawkin boral

Aizawl : Jonathan Laldingliana (35) H/o Jessica C Malsawmzuali chu biak ina an hnatlanna-ah chesualin a boral.

ZALEN thudawn danin 4.11.24 khan biak in chhuat phah tur marble phek unload-in an hnatlang a, dar 7 leh dar 8 inkar vel khan marble phek unload tura motor-a a lawn chu marble phek tluin a awmah a delh a, rang takin Ebenezer Hospital, Chawnpui panpui ni mah se chawhma dar 10:15 khan a hliam tuar loin a boral a ni. Jonathana hi Chawlh Branch KTP leh Chawlhmun Pastor Bial KTP-ah finance secretary ni lai a ni.

Hnuchham raltlan enkawltu hnenah CM relief fund hlan

Aizawl : November 4, 2024 khan Chief Minister Lalduhoma chuan a hnena CM RF tanpuina diltu hnuchham raltlan naupang enkawltu Roslyn Kimbuang hnenah CM RF Rs. 100000 (nuaih khat) a hlan.

Roslyn Kimbuang hian Manipur atangin hnuchham naupang a enkawl lai mi 24 te chu sahimna zawngin Mizoramah a rawn tlanpui a. Mizoram sawrkar chuan Berawtlang Tourism Convention Centre-ah a awmtir a. Naupangte hian an hnaivai sikulah zirna an chhunzawm mek a ni.

Hreipui-a a unaupa chek hlumtu hrem

Aizawl : Kolasib Fast Track Court chuan hreipui a a unaupa chek hlumtu, Lalthakima (34) Lungmuat, Kolasib District chu dam chhung lung-ina tang turin November 5, 2024 khan a hrem.

November ni 10, 2020 khan Lalrammawia, kum 53 mi chu a chhun mu lai a nau Lalthakima chuan hreipui in a chek a, ka pawh chhawn lovin Lalrammawia hi ama khumah a thi nghal a ni.

Tualthattu hi tunah Kolasib District Jail-ah a tang mek a. Judge R.Vanlalena chuan he thubuai hi 5.11.24 khan rel zovin tualthattu Lalthakima chu Lung-ina dam chhung tang turin a hrem ta a ni.

USA-a Mizo chhungkaw pem hmasabera mi thi

Aizawl : USA a Mizo chhungkua pem hmasa ber Ngurkungi (96) w/o Darrikhuma (L) chu 4.11.24 khan Maryland (USA)-ah a boral.

Ngurkungi hi November 4, 2024 zing dar 3:00 vel khan a boral a, an chhungkua hi USA a Mizo chhungkua pem hmasa ber an ni. Kum 1965, June ah Maryland an thleng a, kum 2016 khan a pasalin a lo boral san tawh.

Ngurkungi hi Hmuntha (Serchhip dist.) lal fanu a ni. A ruang hi November 6, 2024 khan vui a ni a, First Mizo SDA Church a lawi a ni.

PUC-in khawchuam pangana atan Sailam an thlang

Aizawl : Pachhunga University College (PUC) chuan thingtlang khawchuam (adopt) an neih thin atan Sailam an thlang a, November 7, 2024 (Ningani) khan a hawnna hun an hmang a, Dr Vanlalthlana, Higher & Technical Education minister-in khuallian niin a hmanpui.

PUC chuan 2024-2026 chhungin Sailam khua hi college department hrang hrang ten an zir chiang ang a, kawng hrang hrangin an pui dawn bawk a ni.

Sailam khua hi Aibawk RD Block, Aizawl District-a awm niin PUC adopted village pangana a ni a, a hmain Phulpui, Lungleng I, Dulte leh Khawrihnim te PUC hian a lo adopt tawh a ni.

CM hovin AIS Cadre hran neih dan tur sawiho

Aizawl : Chief Minister Lalduhoma chuan November 4, 2024 khan a office-ah Mizoramin All India Services (AIS) Cadre hran a neih ve theih dan tur chungchang Mizoram IAS Association hruaitute, AIS Services member dangte bakah Zoram Research Foundation hotute a sawipui.

Hemi chungchanga hmalakna lo awm tawhte sawi lan a ni a. Cadre hran neih that zia leh lukhawng a neih ziate pawh sawi niin, sawrkar tharah beiseina sang tak nen tha thar a hmalakna awmze nei lehzual kalpui an duh thu an sawi.

He hunah hian Mizoram IAS Association atangin Vanhela Pachuau, C. Ropianga, Lungmuana, Lalzirmawia Chhangte te an tel a. Indian Police Service (IPS) atangin Lalrokhuma Pachuau, C. Dothanga, P. C. Lallawmsanga, Zorammawia leh C. Laldina te telin; Zoram Research Foundation atangin Prof. Thangchungnunga leh Rochamliana te an tel a ni.

Japan-a hna hmu Mizo thalai te hnenah Visa hlan

Aizawl : Mizoram Youth Commission Chairman Malsawmzuala Ralte chuan November 6, 2024 khan Japan a hnathawk tura Job Offer hmu mi 34 zinga Mipa pathum leh hmeichhe pali te hnenah Japan-a an kalna tur Visa a hlan.

Visa dawng zinga mipa pathum te hi Fukuoka ah Semi Automatic Welding hna thawkin overtime tel lova India pawisa 90000 vel hlawhin an awm ang a. Hmeichhia pali te hi Machine Inspection hna thawkin Kuwana, Mie Province ah awm thungin, anni hian Japan Yen-a 160870 vel an hlawh bawk dawn a ni.

MPCB-in LZ-a lawmpuina hun hmang

Aizawl : Mizoram Pollution Control Board (MPCB) buatsaihin Thirsakawr hmanga India ram pum fang chhuaktu Vanlallawmzuala Varte (LZa) châwimâwina leh lawmpuina hun chu EF&CC Deptt. Minister Lalthansanga uapna hnuaiah Aizawl Zonuam vênga Woodland Hills-ah November 6, 2024 khan hman a ni.

He Tour, ‘Ride To Clean Air’ in thupui a ken chu ‘Clean & Green Sustainable Lifestyle Under Mission Life’ a ni a. MPCB hi main Sponsor niin January ni 25 (Ningani) khân MINECO atangin MPCB Chairman Pu Liankima Lailung chuan vai liamin nimin November ni 5 (Thawhlehni) khan LZa hian Aizawl a lo thleng leh a ni.

Consultation Meeting on Thlai Thar Market

Aizawl : Mizoram Agricultural Marketing Board buatsaihin November 6, 2024 khan Bana Kaih Sensitization cum Consultation Meeting on Thlai Thar Market, I&PR Auditorium-ah buatsaih a ni a. Chief Minister Lalduhoma chuan he hun hi a telpui.

Chief Minister chuan MAMB-in thlai thar thlan chhuah palite lei dan tur ruahmanna kimchang tak an siam avangin lawmthu a hrilh a. A hlawhtlin theih nana thil tul te chu chak takin kan umzui zel dawn a ni, a ti. Handholding hmalak chhoh dan thil dangte pawh a tarlang bawk.

Commonwealth Parliamentary Khawmpuiah Speaker tel

Aizawl : Sydney, Australia-ah ni thum awh 67th Commonwealth Parliamentary Conference chu November 6, 2024 khan neih tan a ni a. He conference-ah hian Mizoram Legislative Assembly Speaker Lalbiakzama chu palai a nih angin a tel.

Commonwealth Parliamentary Conference vawi 67-naah hian thupui atan, “Engage, empower, sustain - charting the course for resilent democracy” tih hman a ni a. Speaker Pu Lalbiakzama hian workshop hrang hrang awm zinga "Building bridges: Parliamentary frameworks for meaningfully engaging with indigenous peoples” tih leh “Human trafficking, refugees and immigration across the Commonwealth: Open doors or building walls”-ah te chanvo pawimawh tak a nei a ni.

Governor hovin ruihhlo do hmlakna tur hawng

Aizawl : Mizoram Governor Dr. Hari Babu Kambhampati chuan November 7 khan Brahma Kumaris Mizoram kaltlanga ruihhlo do hmalakna kalpui tur 'Nasha Mukh Bharat Abhiyaan (NMBA)' chu Durbar Hall, Raj Bhavan-ah a hawng.

Nasha Mukt Bharat Abhiyaan hi August ni 15, 2020 khan Sawrkar laipui Ministry of Social Justice and Empowerment chuan a tlangzarh a. Ruihhloin nghawng tha lo a neihte zau zawka inzirtirna kalpui chu a tum bulpui ber a ni. March ni 4, 2023 khan hemi chungchangah hian Ministry of Social Justice and Empowerment leh Brahma Kumaris-te chuan zirlai, hmeichhia leh thalaite zinga ruihhlo do hmalakna nei turin thawhdunna thuthlung an ziak a ni.

Governor-in India fangchhuak lawmpuina hlan

Aizawl : Mizoram Governor Dr. Hari Babu Kambhampati chuan November 5, 2024 zan khan khawvel sik leh sa inthlak danglam mek zel kara boruak thianghlim leh hrisel neih pawimawhna auchhuahpuia India ram State 28 leh Union Territory 5 te Thirsakawr hmanga tlawh chhuaktu Vanlallawmzuala Varte (Lz Varte), Mission Veng, Aizawl hmuahna leh lawmpuina hun Banquet Hall, Raj Bhavan-ah a buatsaih a, Governor hian a lawmpui zia lantir nan memento leh sumfai Rs 10,000/- a hlan.

Online hmanga Revenue dawr theihna tur portal hawng

Aizawl : Chief Minister Lalduhoma chuan mipuiten Land Revenue & Settlement department te awlsam taka an dawr theihna tur online service portal, e-ram ti a vuah (Development of Comprehensive & Integrated GIS based System for Maintenance and Management of Land Records in Mizoram portal) chu November 5, 2024 khan a hawng.

e-ram portal hi Ministry of DoNER, Science & Technology Section fund Rs. 6.4 Crore atanga thawh niin, a bul tan nan hian pilot project angin Aizawl district hnuaia land records leh process te kalpui phawt a ni ang. In hmun dilna, periodical patta, land lease, house site leh hming thlaktea bul tan a ni ang. A portal address chu eram.mizoram.gov.in a ni a, a hmang thiam lo te tan Common Service Centre (CSC) kal tlanga hman theih a ni.

SHC inthlana tling te puang

Aizawl : State Election Commission, Mizoram chuan a hnuai candidate te hi November 7, 2024 khan Sinlung Hills Council General Election 2024-a tling atan a puang.

State Election Commission chuan October 3, 2024-a sawrkar Notification No.B.12015/1/2024-EC/SHC/21 in thuneihna a pek angin thuchhuah hi a siam a. November 5, 2024-a Sinlung Hills Council inthlanna neihah hian heng a hnuaia mi te hi tlingah a puang ta a ni.

Sl. No. & Constituency Elected Party Affiliation

1. Khawlian Lalrawngbawla INC

2. Phuaibuang Vanlalsiamsanga ZPM

3. Suangpuilawn Lalvenhima Hmar ZPM

4. Vanbawng Ricky Lalremsanga MNF

5. Ratu Lalhmingthanga MNF

6. New Vervek Lalhlunchhunga ZPM

7. Sakawrdai South Lalhriatchhunga Hmar IND

8. Sakawrdai North Melody Lalchhuangzeli IND

9. Zohmun Benjamin Lalrawnliana MNF

10. Tinghmun R. Lalfakzuala MNF

11. Saipum Lalrawngbawla ZPM