Election Department-in vanduai te ui

Aizawl : Mizoram Election Department chuan November 6, 2023 khan thuchhuah siamin Election duty laia vanduaina tawk a boral Z. Lalmuanzuala leh Lalfakawma te an ui thu leh ram tana an inpekna te chhuanawm an tih thu an tarlang.

   Election department in thuchhuah an siama an tarlan danin, P-2 polling station 149 a duty tur polling party te chuan 5.11.23 khan an duty na tur polling station an pan a, DEO Lawngtlai district hnen atanga thudawnin a tarlan danin, Jarulsury polling station, 36 Tuichawng AC, Lawngtlai district a duty tura chhuakte chuanna lirthei chu Udalthana - I bulah vanduaina tawkin a chesual a, C/278 Z. Lalmuanzuala, 4th IR Bn. chuan vanduaithlak takin nunna a chan a ni.

   November 6, 2023 khan C/580 Lalfakawma, 2nd IR, Bn. Election duty a Champhai a awm chu District Hospital Champhaiah vanduaithlak takin Pancreatitis vangin a boral bawk.

Election duty police chin hriat lohin awm

Aizawl : Election duty a Assam atanga lokal, Ngopa Middle School II camp a awm, Sabin Nath chu November 6, 2023 atang khan chin hriat lohin a awm mek a, Ngopa khawtlang leh police ten an zawng mek.

   Ngopa khawtlang hruaitute hnen atanga ZALEN thudawn danin, 9th Bn. Assam Police, Sabin Nath (constable No. 10) chu chin hriat lohin a awm a, zu vanga buai thin nia sawi a ni.

   VC leh Joint NGO angin a zawn hna thawh mek a ni a, a duty puite pawhin an theih ang angin an zawng mek bawk. Ngopa ah hian 9th Bn. Assam Police te hi mi 92 an thleng a, hmun hrang hrangah camp siam a ni.

Miss Northeast 2nd Runner Up Jennifer Lalrinzuali

Aizawl : Miss Northeast 2023 thlanna chu November 5, 2023 (Pathianni) zan khan Sikkim khawpui Gangtok-ah neih a ni a, Mizoram atanga tel Jennifer Lalrinzuali chu 2nd Runner Up Jennifer a ni. Miss Northeast 2023 atan hian Nagaland nula Kenei Ritse chu thlan a ni a, 1st Runner Up chu Assam nula Anamika Borah a ni.

   Miss Northeast hi hmarchhak huam chhungah chuan miss thlanna rintlak leh lian berah ngaih niin, hmarchhak state hrang hranga miss organisation te theuh intel khawmin an tlan a ni. Miss Northeast 2023 thlanna hun hi Sikkim Chief Minister Prem Singh Tamang pawhin a hmanpui a ni.

   Miss Northeast hi a vawi khat nan kum 2022 khan Nagaland khawpui Kohima-ah neih a lo ni tawh a, Meghalaya nula Irene Dkhar chu winner a ni. State hrang hrangah neih thin tura ruahman niin, Nagaland leh Sikkim ten an thleng tawh a ni.

Mi 5 chuanna Bolero chesual

Aizawl : November 6, 2023 tlai dar 6 rik hma deuh khan Buarpui dai ah mi 5 chuanna Bolero a chesual a, vanneihthlak takin boral an awm lo.

   ZALEN thudawn danin, Lunglei atanga West Bungtlang pan Bolero hi Thenzawl piah, Buarpui khua thlen hma km 3 bawr vel ah zanin tlai dar 6 rik hma deuh khan chesualin, kawng thlang metre 100 vel a thui a lum a, Bolero a chuang hliam tuar mi 5 te chu Buarpui PHC panpui an nih hnuah hliam na zual deuh pakhat BT-a tia koh, Lunglei Zotlang chu Lunglei damdawiin lam panpui nia hriat a ni.

Vote thlak ni a vote tla zat - 80.43%

Aizawl : MLA inthlanpui, 2023 vote thlak chu harsatna lian tham awm lovin November 7 zan dar 11:50 khan zawhfel a ni a, poll day a vote tla zat chhinchhiah chu 80.43% a ni.

   Mizoram Election department thuchhuah tarlan danin, vote tla te hi November 7 khanendikna neih leh a, hemi hnu ah vote tlak dan dik tak hriat theih a ni ang. Hei bakah hian November ni 6, 2023 thlenga chhinchhiah danin home voting leh postal ballot hmanga vote tla 15,061 a awm.

   South Tuipui huamchhunga polling station pahnih, Aithur PS, voters 116 awmna leh Lungpuitlang PS, voters 106 awmna ah vote nei zawng zawngin vote an thlak kim vek.

   Assembly Constituency zinga vote tlak thatna ber chu Tuikum bial, Serchhip district niin, 87.32% a tla a, District zingah Serchhip district ah vote tla tha berin 84.75% vote a tla. Vote tlak chhiatna ber chu Siaha district niin, 75.79% vote a tla.

Punjab a boral Mizo nula ruang Aizawl thlenpui

Aizawl : November ni 2, 2023 a Patiala, Punjab a boral, tuitla Nl. Lalnunthiangi (33) ruang chu November 8, 2023-ah Aizawl thlenpui a ni.

   Anuni ruang hi vawiin khan thlawhna in Mizoram rawn panpui a ni a, Mission Veng a TT. Zothansanga In ah vui a ni .

   A bo atanga ni 5-na, November ni 2, 2023, zar dar 11:00 bawr vel khan Canal thlang lam, a bungrua an hmuhna atanga km 98 velah ruang hmuh a nih thu dawn a ni a. Ruang hi Anuni ngei a ni tih finfiah a ni ta a ni.

Pakistan sipai in Mizo kaphlum

Aizawl : November 8 Nizan zanlai dar 12 bawr vel khan Jammu & Kashmir a duty BSF, Head Constable Lalfamkima (50) h/o F. Lalzarliani, Durtlang North chu Pakistan Sniper in a kaphlum.

   ZALEN thudawn danin, Lalfamkima te hi Jammu & Kashmir a India leh Pakistan inrina lai bawr vel a duty an ni a, November 8 zan dar 12 khan a duty hun a zo a, midang nen duty inthlak an inthlak fel hnu, a duty post a chhuahsan fel deuh chiah tih ah Pakistan Sniper in a rawn kap a, damdawiin panpui nghal nimahse, a hliam tuar loin, November 8 zing khan a boral a ni.

   Lalfamkima hi Durtlang North ah a nupui fanau te nen a khawsa niin, fa pathum, mipa pakhat leh hmeichhia 2 a nei.

Zirlai ten Sit-in demonstration nei

Aizawl : November 9 khan North East Students’ Organisation (NESO) Executive Council Meeting in a rel angin, “Demonstration for Peace and Permanent Solution in Manipur” tih thupui hmangin Vanapa Hall kawtah Sit-in demonstration neih a ni. He hun hi MZP Vice President C. Lalremruata in a kaihruai.

   NESO chuan Manipur buaina chinfel thuai phutin vawiin ni 9 November, 2023 hian North East state capital tinah “Demonstration for Peace and Permanent Solution in Manipur” tih thupui hmangin hun a hmang a a ni.

Vote chhiar hun sawn tura ngenna thlen leh

Aizawl : Mizoram Kohhran Hruaitute Committee (MKHC) leh pawl hrang hrang aiawh ten November 9, 2023 khan Mizoram CEO-ah vote chhiar hun sawn turin ngen nawn.

   MKHC, party hrang hrang aiawh, MPF leh Central YMA aiawhte chuan vawiin chawhma dar 11 khan Mizoram Chief Electoral Officer (CEO) Madhup Vias (IAS) hnenah vote chhiar hun sawn turin an ngen nawn.

   MLA inthlan 2023 vote chhiar hi December ni 3, 2023 Pathianni a chhiar tura ruahman a ni a, hei hi Pathianni a nih avangin a tuk Thawhtanni emaw Thawhlehniah emaw sawn turin an ngen a ni.

   MKHC Joint Secretary chuan, hmalak zel dan turah chuan party leh NGO kutah an innghat tawh niin a sawi.

   CEO chuan, party aiawh kalkhawmte chu ECI ah vote chhiar hun sawn tura ngenna thehlut nawn turin a lo ngen a ni.

Zo United hruaitute leh Mizoram NGO Coordination Committee hruaitute inkawm

ZALEN November 9, 2023 : ZO UNITED hruaitute chuan vawiin chawhnu lam dar 1:00 khan Central YMA Committee room-ah Mizoram NGO Coordination Committee te an kawm.

   ZO UNITED hruaitu (executive committee) te hi an Convener Albert Renthlei in rawn hovin, Co-Convener, Ch Ajang Khongsai leh Zo United Secretary, Rev. Dr. Vanlalnghakthang bakah hruaitu mi 23 an tel a ni.

   NGO CC Chairman Lalhmachhuana chuan Zohnahthlak unau te tawrhna hi a tawp mai dawn lova a lan avangin kawng engkimah fei a ngai a, tei rei peiha pawl kaihruai turin Zo United hruaitute a lo fuih a, Mizoram mipuiten theih tawpin kawng engkimah an tanpui tawn zel ang tiin a lo thlamuan bawk a ni.

   Zo United hruaitute hian Ni 8.11.2023 (Nilaini) khan SoO group leh Zohnahthlak MLA awm zawng zawng te nen inhmuhkhawm (Meeting) an lo nei tawh a ni.

Inpumkhatna atana zinkual NCC te Governor in lo hmuak

Aizawl : November 6, 2023-a Shillong atanga tan tawh NCC North Eastern Region (NER) Rally for Cadets a tel te chuan November 9, 2023 khan Aizawl an rawn lut a, Gajraj Hall kawtah Governor Dr. Hari Babu Kambhampati flag kengin a lo vai lut a.

   November 6 atanga November 26, 2023 thleng Rally hi neih tur a ni a, he mi chhung hian Km 3500 a thui vel an zin kual hman tura chhut a ni a. Hmarchhaka Seven Sister State zawng zawng a paltlang vek dawn a, culture interchange leh inpumkhatna chungchang chu thupuiah hmangin program hrang hrang duan a ni a. G20 – ‘ One Earth, One Family, One Future’ tih chungchangah pawh inzirtirna kalpui tum a ni.