Puak thei thil thahnem tak Lawipu-ah man

Aizawl : Mizoram Police leh Assam Rifles tangkawp chuan thudawn danglam tak an dawn bawhzuiin November 13, 2024 khan Lawipu-a Mobile Vehicle Check Point an siam a, Maruti Taxi 800 atangin puakthei thil thahnem tak an man.

   Hma lakna kal zelah hian, Maruti 800 Taxi hi an lo ti ding a, an dap fe hnuah, puakthei thil engmeaw zat an man a, heng an thil man te hi Gelatin tlawn 1,000, detonator 1,000 leh a dehkaina fuse meter 20 an man.

   He thil kaihhnawihah hian lirtheia chuang mi pahnih chu an man nghal a, heng an thil man te hi Mizoram Police kutah hlan nghal a ni.

Lirthei chesual-ah mi pahnih boral

Aizawl : 12.11.24 zan dar 9 vel khan Sateek bulah Ingnis car a chesual a, mi pahnih an boral.

   ZALEN thudawn danin, car chesual hi rental motor niin, a khalhtu T Lalthazawnga (52), Zemabawk North, Aizawl leh Mumbai lam mi, hnamdang (vai) pakhat a hmunah an boral a ni.

   Motor hi Lunglei atanga Aizawl pan niin, an chetsual hun hi nizan dar 9 bawr vel a nih rin a ni a, mi panga an chuang a, a hma a thu pahnih, lirthei neitu T. Lalthazawnga leh medical representative (MR) pakhat, hnamdang an boral a ni. An chetsual chhan hi chiang taka hriat theih a ni lo a, passenger dangte chuan hliam na lutuk an tuar lo nia thudawn a ni.

Tiau luia tla ruang hmu

Aizawl : November 9, 2024-a Tiau lui a tla kum 21 mi, fa kum 2 mi pawm mek, Mary Vanlalnunpuii ruang chu Thawhtanni chawhnu dar 2:45 vel khan hmuh a ni.

   ZALEN thudawn danin, Mary ruang hi a tlakna thlang lawk, libial-ah hmuh a ni a, he libial hi hlam 6/7 vela thuk a ni.

   Tarlan tawh angin, Inrinni chawhma dar 11 bawr vel khan Mary Vanlalnunpuii (21) w/o Ramnghaka hi a pasal nau chu an khua atanga km 10 vel, Tiau kamah Tumbu leh chawhmeh awm ang ang la turin an kal a, Tiau an thlenin inchiah daih an tum a, hetah hian Mary hi chesual palhin vanduaina hi a thleng ta a ni.

Leitlangpui Music Festival hawng

Aizawl : November ni 16, 2024 zan thleng awh Leitlangpui Music Festival chu Ningni khan Kawmzawl, Pukpui, Lungleiah an niin, Mizoram Sawrkara Tourism Minister Lalrinpuii'n a hawng.

   Leitlangpui Music Festival hawnnaah hian BCM General Secretary Rev. Dr R. Lalbiakliana'n hunserh hmangin, Tourism Director R. Lalrodingi'n lawm thu a sawi a. Hnam lam chi hrang hrang, zaipawl, malzai leh special item ?hahnem tak entir a ni bawk a. Chawhnu lamah concert-in chhunzawm a ni.

   He Festival-ah hian chhimtute tan ei leh in leh souvenir zawrhna stall hrang hrang buatsaih a ni a. November ni 15 khan Band Contest awmin, tlai dar 3 a?angin concert buatsaih a ni a. November 16 tlai dar 2 atangin concert buatsaih a ni bawk.

Mizoram pum huapin Mock drill exercise nei

Aizawl : November 14, 2024 khan Aizawl leh District Khawpui zawng zawng bakah hmun thenkhatah NDMA leh DMA hmalaknain Tuilian, Leimin leh Kangmei chhuak lo thlen thulha chet lak dan tur (Mock drill) a taka chang chawpin inzirtirna neih a ni.

   State Level Mock Exercise atan hian hmun 47 tun tumah hian thlan chhuah a ni a. Heng hmunah te hian Tuilian, Kang mei chhuak leh Leimin avanga kawngpui chhia, hospital-a kangmei chhuak, Lei dawh chim, ram kang leh chenna in te a chim a. Mi tam takin nunna an chan a, hliam tuar an awm bakah harsatna thleng thei dang te pawh entir niin zawnchhuah, chhanchhuah leh siamthat hna kalpui dan tur te entir a ni.

   Mipuite an lo him zawk na leh inpuahchahna a that tawk na tura he hmalakna mithiam bik ten nilengin an vil a ni.

CM leh DoNER Minister hovin hmalakna te thlirho

Aizawl : Chief Minister Lalduhoma leh DoNER Minister Jyotiraditya M Scindia te kaihhruai November 14, 2024 khan Review Meeting, Planning & Programme Implementation Conference Hall-ah neih a ni a. Ministry of Development of North Eastern Region kaltlanga Mizorama hnathawh hrang hrangte an thlirho.

   Chief Minister chuan Review Meeting hun tha tak an nei thei chu lawmawm a tih thu a sawi a, Mizoram tan rah tha tak a chhuah a beisei. DoNER kaltlanga project kalpui meka harsatna awm leh rawtna a neih te, Mizoramin project thar a mamawhna lai te a tarlang bawk.

   Jyotiraditya M Scindia pawhin project endik ringawt turin a lo kal lo va, an focus area-a an zirchianna leh hmasawn zel tura in mamawh rawtna tha tak tak a rawn keng tih a sawi a. Mizoram hi khawchhak lama India chhuahka, hmun pawimawh taka awm a ni a, tihmasawn zel turin kan inpeih thu a sawi bawk. Project kal meka harsatna neihte a theih ang angin an lo bawhzui zel ang, a ti.

Union Minister of State leh UD&PA hotute inkawm

Aizawl : Minister of State, Housing & Urban Affairs (MoHUA) Tokhan Sahu leh UD&PA Minister K. Sapdanga hovin November 13, 2024 khan Planning & Programme Implementation (P&PI) Conference Hall-ah Urban Development & Poverty Alleviation (UD&PA) Department hotute kawmin Aizawl Smart City Ltd. hnuaia Project, Swachh Bharat Mission (Urban) (SBM-U), Atal Mission for Rejuvenation & Urban Transformation (AMRUT), Pradhan Mantri Awas Yojana - Urban (PMAY-U) leh Deendayal Antyodaya Yojana - National Urban Livelihood Mission (DAY-NULM) chungchanga an hmalakna leh an harsatna te sawiho a thutkhawm a ni.

   CC Lalchhuangkima, CEO, Aizawl Smart City Ltd. chuan Smart City hnuaia an hmalakna hrang hrang a lem nen entirin a tarlang a. Aizawl Smart City Ltd. hnuaiah hian project 49 awmin project 28 chu thawh zawh tawh a ni a, project 16 chu nakum March Ni 31 chhunga zawh fel tura ruahhman a nih thu a sawi. UD&PA Director Dr. Andrew Vanlaldika chuan Ministry of Housing and Urban Affairs (MoHUA) kaltlanga Centrally Sponsored Scheme pali hnuaia an hmalakna te powerpoint presentation hmangin a tarlang bawk a ni.

Conference of Power Ministers-ah F. Rodingliana

Aizawl : New Delhi a Yashobhoomi, Dwarka ah Union Power Minister Manohar Lal Khattar kaihhruaina hnuaiah November ni 12, 2024 khan Conference of Power Ministers of States & UTs neih a ni a. He conference ah hian Mizoram Power Minister F. Rodingliana pawh a tel a. Mizoram mamawh leh harsatna te a thlen a ni.

   Mizoram Power Minister hian North East Power Ministers Meeting a a lo thlen tawh MNRE scheme ‘Development of Small Hydel Project’, kum 2014 a tihtawp tak chu NE State ten an lo hlawkpui tawh thu sawiin, North East Power Minister zawng zawng ten he Policy hi tihnun leh an duh thu leh an nghakhlelh thu sawiin, Power Minister hmasa zawk RK Singh an a hnena Cabinet approval chauh nghah anih tawh thu a sawi chu chak zawka bawhzui sak turin a ngen nghal bawk a ni.

Bio-fuel chungchangah inrawn khawm naah Prof. Nitea

Aizawl : November 13, 2024 khan Prof. Lalnilawma, Minister chuan Bio-fuel chungchanga Pollution Control Board, Assam (PCBA) leh PHD Chamber of Commerce and Industry-in Assam Administrative Staff College, Guwahati-a Seminar an buatsaih chu sawm a nih angin a telpui.

   He hunah hian "Bio-fuel for Driving the Future Economy: Challenges and Opportunities" tih thupui hmanga Seminar hi neih niin Dr. Andrew Fleming, British Deputy High Commissioner to East and North East India pawh telin, Minister Prof. Lalnilawma nen hian inkawmna hun tha tak an nei bawk a ni.

Beijing-a Taekwondo zir turte thlahna hun hman

Aizawl : Sports & Youth Services Minister Lalnghinglova Hmar hovin November 12, 2024 khan a office chamber-ah Beijing, China-a taekwondo leh Bachelor of Arts (BA) zir tura thlan mi pahnih - Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South te fuihna leh thlahna hun chu hman a ni.

   Vanlalhmangaihzuali leh Joseph Vanlalpeka te zirna tur hi Capital University of Physical Education & Sports, Beijing, China-ah niin, foreign sponsorship quota a luttur an ni a. Kumin June ni 13-14 chhunga Aizawl-a Mizoram Sports Conclave buatsaih a nih tum a lo kal, Grand Master Kim Hee do leh Grand Master Lee Jeong Hee te’n Mizoram Olympic 2036 Vision a hlawhtlinna turin he sponsorship hi an lo buaipui a ni.

Serchhip Excise ten heroin an man

Aizawl : Serchhip Excise and Narcotics Department chuan November 12 khan Serchhip Chanmari Vengthar-ah Heroin gram 56.59 an man.

   November ni 12, zing dar 1:40 khan Chanmari Vengthar, Serchhip-ah sahbawn bawm 5 a dah Heroin gram 56.59 chu H. Lalhmangaiha (27) s/o Zohmingthanga, Serchhip Chanmari Vengthar hnen atangin man a ni a, a neitua puh hi Narcotics Drugs and Psychotropic Substances Act, 1985 tlawhchhana thubuai siam sak nghal a ni.

CM hovin PWD hmalak tawhna te thlirlet

Aizawl : Novem,ber 11, 2024 khan Secretariat Conference Hall-ah Chief Minister Lalduhoma hovin PWD hmalak tawhna te thlirletna review meeting neih a ni.

   Chief Minister chuan, thil dik lo zawng ngawr ngawra department te hmalakna enpui che u kan ni lo va. Kan hnathawh hrang hrang leh kan harsatna tawhte inhriatsak nan te, chak zawka kan thawhho theih nan he hun hi buatsaih kan ni, a ti.

   He hunah hian PWD Minister Vanlalhlana leh PWD officials te bakah an hnathawh nena inkaihhnawihna nei department Environment, Forest & Climate Change Minister Lalthansanga leh official te, Land Revenue & Settlement Minister B. Lalchhanzova leh officials te leh Law department aiawhten an telpui

Working Committee on Ruihhlo Do ten sumfai pe

Aizawl : Working Committee on Ruihhlo Do kaltlangin Agency hrang hrangte hnena Ruihhlo Dona tur sumfai sem chhuahna hun chu Excise & Narcotics Conference Hall, Khatla-ah November 11, 2024 khan hman a ni.

   Excise & Narcotics Department changtu Minister Lalnghinglova Hmar chuan he hun hi khuallian niin a hmanpui a. Agency-te hnenah sumfai a hlan nghal bawk a ni.

   Vawiina pawl hrang hrangte hnena sumfai sem chhuah hi avaiin cheng vaibelchhe hnih (Rs. 2 Crore) a ni a. Hei hi Agency hrang hrangte hnenah pek chhuah a ni. Supply Reduction atan pawl paruk hnenah Nuai 112.00 pek a ni a,  Demand Reduction atan SW&TA-ah Nuai 40.00 leh MSACS-ah nuai 5.00 lakhs pek an ni. District 11-ah nuai 15 pekchhuah a ni a, A changtam berin nuai 2 an dawng a, nuai 1.50 leh nual 1.00 dawng an awm a, State Level Committee on Ruihhlo Do te kutah Training, workshop, meeting, etc. atan nuai 20.00 leh Mass media campaign atan nuai 8.00 pek a ni bawk.

Criminal Law thar inhrilhhriatna nei

Aizawl : November 14, 2024 khan, Home Department, Law and Judicial Dept, Govt of Mizoram leh Judicial Accademy, Assam-te tangho buatsaih, 'Two-days Orientation Programme on New Criminal Laws for the executive magistrate' kharna hun chu Aijal Club-ah hman a ni a.

   T.L. Guite, Secretary, Law & Judicial Department, Govt of Mizoram chuan khuallian niin a hmanpui a. Orientation a tel zawng zawngte hnenah certificate a hlan nghal bawk a ni.