DOWNLOAD OUR APP

Read latest news on your phone
app-store
The Week that Was on November 19, 2023
Nov 19, 2023

Sipai bo zawn titawp


Aizawl : Election duty a Ngopa-a kal, Sabin Nath Constable no-10, Assam 68Bn 9 Company Assam Police chu ni 5.11.2023 (Pathianni) zing dar 6:45 Am vel khan an awmna MS-II atanga a kal chhuak chu a haw tawh lo zawn chu 12.11.2023 khan tihtawp a ni.

   Ngopa khawtlang in Joint YMA Ngopa kaihhruaina in a zawn hna thawh a ni a, Mizoram Police ten an Ui fing mi bo zawng tur hian Ngopaah an kalpui bawk. Mi bo hi khawtlang mipuiin a nawlpuiin ni 7 chhung theihtawp chhuahin zawn a ni a, Police te leh khawtlang hruaitu ten mipui nawlpui zawn hmain ni 1 an zawng bawk. Mi bo hi Mizo danin ni 7 zawn a nih hnuah hmuh a ni lova, 12.11.2023 (Pathianni) ah a zawn hun hi tihtawp a ni.


Missionary ropui Mrs. Violet thi


Aizawl : Lakher Pioneer Missions (missionary hnuhnung ber) Mrs.Violet (85) chu November 13, 2023 zing dar 8:30 khan a chenna Saikao (Serkawr) ah a boral.

   Rev. Violet Louise Annie Mark hi Mara rama chanchintha hril hmasa bertu, Rev. RA Lorrain-a tunu a ni.

   Mara ramah hian Lakher Pioneer Mission Missionary hmasa ber Rev. Reginald Arthur Lorrain chuan a nupui, Moud Louise Ullander Lorrain nen kum 1907 khan Pathian thu hril turin Mara ram an thleng a, Serkawrah awmhmun khuarin Pathian thu an hril a, fanu pakhat, Marquirite Lorrain, a Mara hminga Tlosa tia vuah an nei.

   Tlosa hian Sap ram atanga anmahni pui tura lo kal Albert Bruce Foxell chu pasalah a nei a, fa pakhat an neih chu Rev. Violet Louise Annie Mark hi a ni a, Violet hian pasal atan kum 1968-ah Rev. L. Mark a nei a, an chhungkua hian Mara ram chhuahsan lovin Pathian rawngbawl hna an thawk zui zel a ni.


Myanmar Sipai man thawnkir


Aizawl : India ramri-a Myanmar mipui sipai tangrual pawl leh Myanmar Sipai inkahna thlengah, Myamnar Sipai 43-te chu Mizoram Police kutah an inpe a, November 14, 2023 khan Hnahlan Helipad atangin Helicopter hmangin India-in Sipaite hi Myanmar-ah a thawnkir.

   Myanmar Sipai 39 te chu 13.11.2023 tlai thim hlim khan ramri kana India ram rawn lutin Mizoram Police kutah an inpe a, nimin zing khan midang 4 in pek belh lehin Myanmar sipai 43-te chu Mizoram Police kutah an inpe a ni.

   Heng Sipaite hi Mizoram Police chuan Ministry of Home Affairs thu angin Assam Rifles kutah an hlan a, sipaite 38 te chu Hnahlan panpui nghal niin an zinga pakhat hliam tuar chu Champhai District Hospital-ah dah luh a ni a, 14.11.2023 zinga inpe te pawh Hnahlan-ah hruai nghal an ni a; India chuan Helicopter hmangin Myanmar sipaite hi Myanmar sawrkar kutah a hlan kir a, Helicopter hian tum 4 hruaiin Myanmar Sipai 42-te hi Myanmar lamah phurh luh an ni.


Minister hlui boral


Aizawl : November 14, 2023 zing dar 4:25 khan minister hlui Lalbiakzuala (67) Chaltlang chu cancer vangin a boral.

   Ex Minister Lalbiakzuala h/o Lalhmingduhawmi, Chaltlang hi kum 1993 inthlanah Khawhai bial atanga thlantlin niin, congress sawrkarah minister niin, forest department etc. lo enkawl tawh a ni. A ruang hi a chenna, Chaltlang Ruamveng (M-II section) ah hemi ni vek hian vui a ni.


Ramsa emaw tiin kap


Aizawl : November 15, 2023 zan khan R. Vanlalkhuma kum 35 Electric Veng, Hnahthial Tuichang-a lui kal chu ram vak Remruatliana kum 31 s/o David Chawiliana, Electric veng vek chuan sa emaw tiin a kap a, a kah hnu reilote-ah Vanlalkhuma hi a boral. Vanlalkhuma hi vawiin khan posmortem a nih hnuah vui liam nghal a ni.

   Vanlalkhuma leh Remruatliana te hi ram kal tlang ni lovin, Vanlalkhuma leh a thianpa hi lui kal an ni a, Remruatliana te hi sa chang niin sa emaw tiin a kap ta mai niin thu dawn a ni.


Nula kum 22 mi chin hriatlohin a bo


Aizawl : Nancy Lalneihpuii, 22 D/o Nuhliri (Kanghmun South) chu chin hriat lohin a bo mek a, a chin hria chuan Kanghmun South khawtlang hruaitute hriattir turin an ngen.

   Kanghmun South atanga ZALEN thudawn danin, Nancy Lalneihpuii hi ni 13.11.2023 khan an khawdai maiah Thingsemin zawngin a chhuak a, tlai lamah a haw tak mai loh avangin, a chhungte'n an zawng zui nghal a ni.

   16.11.2023 chhun khan Siaha atangin Kanghmun South YMA hruaitute'n information an dawng a, tunkar Thawhlehni khan Siaha ah hmuh a nih thu leh a chanchin te an zawhfiah laiin a lo bibo leh hman a, he thu ziahlai thleng hi chuan a chin hriat a ni leh ta rih lo.


Vote chhiar hun sawn dawn lo - CEO


Aizawl : Election Commission of India chuan December ni 3 (Pathianni)-a inthlanna a vote tla chhiar hun chu a sawn dawn lo niin Chief Electoral Officer Mahdup Vyas chuan November 16, 2023 khan a sawi.

   Chief Electoral Officer Madhup Vyas hi Thawhlehni khan Delhi-ah chhukin Election Commission of India a zu dawr a. November 15, 2023 khan Aizawl lo thleng leh tawhin, vote chhiar ni hi sawn a nih dawn loh thu Akashvani Aizawl a hrilh a. “ECI-in inthlana vote tla chhiar hun a lo ruat tawh anga kalpui a ni dawn,” tiin Madhup Vyas chuan a sawi.


Zirlaite Scholarship an account-ah a lut tan


Aizawl : Zirlaite Scholarship 2nd installment chu, vawiin 17/11/2023 chawhnu lamah a dawngtu tur zirlaite account-ah a lut tan.

   Tribal Scholarship First installment hi kumin February thlaah zirlaiten an dawng a. Second instalment pawisa hi Central atangin September ni 25, 2023 khan sawrkar-in a dawng a. Election a nih avangin leh thawktute chet muan avangin sem mai theih a ni ta lova, MZP-in ni 3 chhung nasa taka a nawr hnuah 16.11.2023 chawhnu lamah zirlaite account-ah a lut tan a ni.


National Press Day hmang


Aizawl : November 16, 2023 khan I&PR Auditorium, Treasury Square-ah I&PR Department leh MJA, General Headquarters tangkawpin an huaihawt National Press Day, 2023 hman a ni.

   National Press Day hi Kum 1966 Press Council of India din cham atanga hman tan niin Press mite zalenna, hamthatna, mawhphurhna leh hmasawna atana hman thin a ni.

   Esther Lalremruati, Scientist, MIRSAC chuan kumin National Press Day thupui 'Media in an Era of Artificial Intelligence' tih hmangin zirtirna a pe.


Lok Sabha MP-in TNT tlawh


Aizawl : Lok Sabha MP C. Lalrosanga chuan November 14, 2023 khan Aizawl Muanna Venga Thutak Nunpuitu Team (TNT) hmun tlawhin a fang kual.

   C. Lalrosanga chuan TNT hmunpuia nausen atanga puitling, pitar/putar thleng enkawl ngaite enkawl an nih dan leh an mamawhte a hmunah ngei hmuh puiin, TNT a rawngbawltute inpekna leh an hnathawhte ropui a tihzia thawktute chu a hrilh a. Pathian rinchhan a, rinna tak tak nena mi 1800 lai harsatna leh mamawh chi hrang hrang nei an enkawl dan chu fakawm a tihzia a sawi bawk.


Governor-in hmanpui


Aizawl : November 14, 2023 khan MZU Auditorium-ah Governor Dr Hari Babu Kambhampati chuan nithum chhung awh tur, International International Conference on “Emerging Trends in Psychological Interventions (Health and Allied Sciences): Future Prospects and Challenges”, School of Medical and Paramedical Sciences, Mizoram University in a buatsaih chu khuallian niin a hawng a. Justice Nelson Sailo, Judge Gauhati High Court chu khualzahawm a ni thung.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh