DOWNLOAD OUR APP

Read latest news on your phone
app-store
The Week that Was on November 26, 2023
Nov 26, 2023

Rabung tomato ching ten qlts. 500 thar tawh


Aizawl : Rabung khua Tomato leh Zikhlum ching Association hruaitute sawi danin, Rabung khuaa Tomato chingtu te'n tomato thar chho mekin a thar vang lai a ni mek a, November 21, 2023 thleng khan quintal 500 vel zet an thar tawh.

   Hemi atanga an sum lak luh hi cheng nuai 15 vel chu a tling tawh a, an tomato thar chhuahte hi Aizawl lamah an hralh deuh ber a, Khawzawl leh Hliappui lamah tlem a zawng an hralh bawk a ni.

   Nikum lam khan tomato hi quintal 900 vel zet an thar bawk a, hemi atanga an sum hmuh belhkhawm hi cheng nuai 25 leh sing 5 vel zet a tling.

   Tomato chingtute hian an tomato karah Zikhlum an ching nghal a, Zikhlum hi nikum lamah quintal 60 vel zet an thar thei a, kumin lamah erawh an thar tha lutuk lo niin an sawi.


December 15 hma in sawrkar thar lakluh hman tum


Aizawl : Chief Secretary Dr Renu Sharma hovin November 21, 2023 khan CS Conference Hall MINECO ah 2023 Inthlanpui neih zawh tak behchhana Sawrkar thar lo awm tur lakluhna programme ‘Swearing-in-Ceremony of Chief Minister and Council of Ministers’ neih dan tur chu a kaihhnawih Department-te, tih tur leh mawhpurhna nei te hotulute nen sawiho a ni.

   2018 Inthlanpui ah khan December ni 11 a vote chhiar hnuin sawrkar thar chu December ni 15 ah lakluh niin Assembly thar thutkhawm hmasa ber chu December ni 19 a neih a ni. Kumin Inthlanpuia mipui thlan tlin sawrkar thar tur chu December 6 leh December 15 inkarah lakluh a rinawm a. Sawrkar thar lakluh hnu, Krismas hma ngeiin Mizoram Legislative Assembly 9-na chu a hmasa ber atan an thutkhawm a beiseiawm bawk a ni.


Tiny Tots HSS in thilpek hlan


Aizawl ; Aizawl khawpui chhung lirthei che vel tam tham tak viltu Aizawl Traffic Police te'n November 21 & 22, 2023 khan duhsaktu an tawng.

   21.11.23 khan an duty dante lo hriat sak fo tawh thin tu Tiny Tots Higher Secondary School, Tuikhuahtlang te'n Christmas card leh refreshment tui tak Traffic Police te an pe leh a, 'an school, naupang leh zirturte'n malsawmna tam tak lo dawng zel rawh se' tiin Traffic Police lamin duhsakna an hlanlet.

   Hetihlai hian October, 2023 thleng khan lirthei 2,98,532 ziahluh (register) a ni tawh a, chung zinga a tam zawk te chu Aizawl khawpui chhung a awm an ni.


Pawngsualtu a puh thiamloh chantir


Aizawl ; Kolasib Fast Track Court chuan mahni School naupang pawngsualtu a puh Vanlalrawngbawla Kawnpui Vengthar-a cheng chu thiamloh a chantir a, a hremna hi karleh nilaini ah a puang ang.

   Court thu tlukna hi November 22, 2023 khan khan Judge R. Vanlalena chuan a puang a, Vanlalrawngbawla hi hemi ni vek hian District Jail, Kolasib ah dah luh nghal a ni.

   Pawngsualtu hi POCSO dan ang chuan a rei lo berah pawh kum 20 chhung lung Ina tang thei dinhmunah a ding mek a. Tunkar Nilaini khian Fast Track Court chuan hearing nei leh in, pawngsualtu hrem anih dan tur kim chang a puang ang.


International Film Festival 2023-ah Cheraw documentary film lang phak


Aizawl : International Film Festival, Inox Panaji, Goa-a neih mekah Mizo pa kutchhuak Cheraw documentary film chu Documentary Film (Non-Feature) huangah film sangkhat chuang zet atanga telh tur bik a tha zual 20 thlanchhuah zingah a tel. Festival hi November 20 atanga neih tan khan niin November 28 thleng neih tur a ni.

   He documentary film tawi hi Cheraw lam lo chhuah dan chungchang leh he lam lo chhuahna bul - nu raicheha thiin a thlarau zinkawng harsa tak a zawh dan tarlanna chungchang a ni. Mizo te nuna Mau pawimawh zia leh a tel lova hnam ziarang (culture) a bo theih thu tarlanna a ni tel bawk.

   He documentary film hi PC. Lalrindika, M. Phil dissertation (Dept.of History & Ethnography, MZU) research behchhana Brahmaputra Cultural Foundation-a Director Shilpika Bordoloi te buatsaih a ni. A film-ah hian YMA Saitual Bazar Branch Cultural Troupe ten mawi takin cheraw lam an entir a ni.


Zangnadawmna la tawh, in thiat duh lo te nawrchhiat sak dawn


Aizawl: NH54 kawngpui laih mekah Serchhip District huam chhunga sawrkarin ram a lak fel tawh, dan anga zangnadawmna - compensation leh Rehabilitation and Resettlement sum leh pai dawng tawh te zingah in leh lo thiat duh lo lui an la awm avangin Serchhip District Administration chuan Competent Authority for Land Acquisition (CALA) an nih angin dan tlawh chhanin hma an la dawn.

   Kar thar lo awm turah hian mahni in thiat duh lo te chu IPC Section 188 hmangin thubuai siamsak an ni dawn a, jail tan thlengin hrem theih an ni ang. Magistrate kaihhruaiin an in leh lo te chu nawrchhiat sak an ni ang a. Hetianga dan anga action lak kher a ngaih lohna turin District Administration chuan Serchhip District chhunga khaw hrang hranga in thiat duh lo la awm te chu thiat vek turin a hriattir nawn leh a ni.


MSSA ten General Conference hmang


Aizawl : Mizoram Secretariat Service Association (MSSA) te chuan November 32 khan an General Conference vawi 18-na chu Tourist Lodge, Chaltlang-ah an hmang. Dr. Renu Sharma, Chief Secretary chu khuallian niin K. Vanlalrawni, MSS (Rtd) & Ex- President, MSSA chu khualzahawm a ni.

   K. Lalkroschhuanga, Gen. Secretary, MSSA & DD (Admn.) Dte. of DM&R chuan report pein tun dinhmunah MSSA hnuaiah Sanctioned Post 259 atangin Officer 258 an awm mek a. Kumin chhungin Member thar 13 awmin 18th General Conference-ah hian member 200 vel an tel thei a ni. TC Lalkhuma, Vice President, MSSA & Deputy Secretary, Finance (E) chuan Member thar leh kaisang tharte hmelhriatna a nei bawk a ni.


DONER Secretary hnenah Mizoram mamawh thlen


Aizawl : Mizoram Rajya Sabha MP K. Vanlalvena leh Human Resources Development Board Vice Chairman Dr. L. Thangmawia MLA te chuan November 21 tlai khan Union Secretary of DONER Chanchal Kumar chu a office chamber New Delhi ah kawmin Mizoram mamawh thenkhat an thlen.

   Mizoram MP leh MLA te chuan Central sawrkarin sum sanction order a tihchhuah tawh si,a taka pawisa pek kan la nih si loh Aizawl by pass road PM Devine scheme harsatna tawh te leh Tuichangral kawngpui thenkhat laihna tur NESID Scheme harsatna thenkhat te bakah Lengteng bial chhung thil pawimawh thenkhat te an thlen a ni.


Aizawl DC hovin Nasha Mukt Bharat Abhiyaan meeting


Aizawl : Aizawl DC Nazuk Kumar hovin November 22, 2023 khan DC Conference Hall, Aizawl ah ruihhlo chungchanga hmalakna chikhat Nasha Mukt Bharat Abhiyaan, Aizawl District hnuaia Sub-Committee on Drug Prevention in Schools and Colleges te chu an thukhawm.

   He meeting ah hian Higher & Technical Department aiawhte, leh college hrang hrang Principal te leh an aiawh te an tel a. Kum kal ta lamah pawh khan Nasha Mukt Bharat Abhiyaan hmalakna in Master Volunteer te kaltlangin zirlaite zingah ruihhlo chungchang zirtirna an lo pe tawh thin a, a mamawhte hnenah counseling te pein mi engemaw zat inenkawlna hmunah te an lo thawn tawh bawk a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh