Sesawng-ah nupa a rualin vui

Aizawl : Upa T. Vanlalzara (72) leh a nupui Zopari (75), Sesawng te chu October 31, 2024 kha ni khat thil thu-ah an boral a, November 1, 2024 khan rual a vui an ni.

   Sesawng atanga ZALEN thudawn danin, Upa T Vanlalzara 31.10.24 zing dar 2:10 khan ZMC-ah a boral a, presbyterian kohhran niin, 31.10.2024 chawhnu dar 1:00-ah biak in a vuina hman a nih mek laiin a nupui a boral ve leh a, hemi avang hian a vui inkhawm pawh hi hmang zo lo in, a nupui nen November 1, 2024-a vui turin ruahman a ni leh ta zawk a ni.

   Upa T Vanlalzara nupui Zopari (75) hi 31.10.2024 chawhnu dar 1:31 khan ZMC ah vek a boral ve leh a ni.

PWD Class-I Contractor ten CM Relief Fund Pe

Aizawl : October 31, 2024 khan Mizoram PWD Class-I Contractor Association te chuan Chief Minister Relief Fund (CMRF) atan Cheng 15,00,000 (Nuai Sawmpanga) Chief Minister Lalduhoma an hlan.

   Chief Minister hian lawmthu lo hrilhin, CM RF hi Pathian zarah an dawng tha thawkhat a. Tanpui ngaite hnenah an sem chhuak nasa a. Nitina pe chhuak ang an ni a, a tangkai em em a ni, a ti.

Bana Kaih Scheme kalpui mekah MSPCC thukhawm

Aizawl : Mizoram State Policy Coordination Committee (MSPCC) chu Bana Kaih Scheme kel mekah department thenkhat hnuaia dilna lutte ngaihtuahin 30.10.2024 khan an thukhawm.

   Meeting hi Adviser to Chief Minister for Implementation of Handholding Scheme Dr. KC Lalmalsawmzauva chuan a kaihruai a, lirthei lei chungchanga dilna lut chungchang sawiho in, Taxi (2-wheeler, 4-wheeler leh autorickshaw) atana dilna chu Handholding Scheme hian a huam telloh thu sawi a ni a. Commercial Passenger Vehicle dangah chuan a diltu ngei hminga State Transport Authority (STA) permit/licence nei tawh tan scheme hian a huam thei a ni.

ZMC-a post graduate zirna leh Hmeichhe Hostel thar hawng

Aizawl : Chief Minister Lalduhoma chuan October 30, 2024 khan Zoram Medical College (ZMC) a Girls' Hostel thar leh 'Post Graduate Degree in Public Health' zirna thar a hawng.

   Girls' Hostel building thar, Curie's Ladies Hostel tia a hming vuah hi Ministry of DoNER, NESIDS OTRI sum Rs. 10 crore hmanga sak niin a tirah khum 80 awm theihna tura duan a ni a. Amaherawh chu khum 84 dah theih tura sak zawh a ni thung. Mess, Kitchen leh common room te a nei a. Mizo chhiar dana chhawng ruk a sang niin, floor area belhkhawm hi 2519 sqm (27115 sqf) a ni.    

   ZMC a Master degree zirna hmasa ber tur Master of Public Health hi vantlang hriselna lama mithiam bik chher chhuahna tur a ni a. Mizoram University hnuaia kalpui tur niin kum tin zirlai paruk (6) zel zir theihna tur leh kum hnih chhung zir a ni. A zir man hi kum khatah cheng nuaih hnih (Rs. 2 lakh) vel a ni a. A batch hmasa ber tur zirlai paruk te admit fel tawh an ni.

Consultative Meeting on Draft Mizoram State University Bill thukhawm

Aizawl : 30.10.2024 khan Mizoram Secretariat Conference Hall, MINECO-ah Higher & Technical Education Minister Dr Vanlalthlana kaihhruaina hnuaiah ‘Consultative Meeting on Draft Mizoram State University Bill’ chu stakeholder-te nen neih a ni.

   He hunah hian Higher & Technical Education department official-te, Mizoram College Teachers’ Association (MCTA) aiawh leh state sawrkar hnuaia college thlan bikte a?angin Principal leh faculty member-te an tel a ni.

   Draft Mizoram State University Bill hi House-a a put luh theih turin Cabinet meeting-a thlir ho tura chhawp chhuah a ni ang.

   Mizoram State University din tura ruahmanna atan hian Bill Drafting Committee leh Study Team din tawh niin Study Team hian Cluster University of Srinagar leh Cluster University of Jammu kal dan zir chiangin Bill Drafting Committee thlir ho turin an theh lut tawh a ni.

Health Care Scheme inziahluh hun thla 6 atan hawng thar

Aizawl : Mizoram State Health Care Society thuchhuak hmasa in a lo tarlan, Mizoram State Health Care Scheme policy kal lai mek pawhsei chhunzawm tura thuchhuah a lo siam tawh chu mipui te harsatna sutkianna turin hun hawn belh a nih thu October 30 khan thuchhuah siam a ni.

   Sawrkar chuan Health Care Scheme thla 6 chhung (1st October, 2024 - 31st March, 2025) dam turin a duh apiang tan a thara inziahluhna hun a hawng dawn a. He thuchhuah thar hian thuchhuah hmasa (No.F.13013/l/2018-HFW/MSHCS dt. 30th September, 2024) chu a lan (Supersede]. Mizoram State Health Care Scheme hi (1st October,2024 - 31st March, 2025) chu kalpui leh tur a ni ang.

The Industrial Policy of Mizoram-2024 draft thlirho

Aizawl : Commerce & Industries Minister F.Rodingliana kaihruaina hnuaiah, Commerce & Industries Department hotute nen “The Industrial Policy of Mizoram-2024” DRAFT copy chu October 29, 2024 khan thlirho a ni.

   Zirchianna atang hian siam that ngai te siam that a ni ang a, Cabinet meeting-a pharh turin Cabinet Memorandum buatsaih thuai turin ruahmanna ni.

Supply Minister leh IOC hotute inkawm

Aizawl : Food, Civil Supplies & Consumer Affairs Minister B Lalchhanzova chuan October 29, 2024 khan Indian Oil Coorporation hotute kawmin Mizoramah kum dang zawng aia ruahsur a tam thu sawiin hei hian ei leh bar chawk luhna kawng ah harsatna hrang hrang siam mahse Mizoram a LPG Supply-ah harsatna lian a thleng lo chu lawmawm a tih thu a sawi.

    Hetiang dinhmun thleng tura Indian Oil Corporation Limited, LPG Distributor leh thawktute inpekna ah lawmthu sawiin mipui tan a thahnemngai lehzual a thawhho pui ah a sawm bawk a ni.

   Rajjyoti Das, Deputy General Manager and Head, Silchar Indane Divisional office chuan Mizoram sawrkarin theih tawp a chhuahpuinaah lawmthu a sawi a, Mizo mipuiten hnianghnar taka LPG Supply an hmuh theih nan theihtawp an chhuah thin thu a sawi bawk.

Chief Minister-in CS pension tur thlah

Aizawl : Chief Minister Lalduhoma chuan October 29 khan a office-ah Ningani-a Superannuation pension-a chawl ta Chief Secretary Dr. Renu Sharma, IAS a kawm a. Mizoram tana a hnathawh tha tak tak teah lawmthu hrilhin a hun hman zel turah duhsakna a hlan a. Lawmthu sawina lehkha leh thilpek a hlan.

   Dr. Renu Sharma hian November ni 2, 2021 khan Mizoram Chief Secretary hna a rawn zawm a. Chumi hma pawhin Mizoramah hian a rawn awm tawh thin a. Kum sarih vel zet Mizoramah hian hna a rawn thawk a ni. Tun thla tawp hian Superannuation pension in a service a chawlhsan ve tawh dawn a ni.

CS leh leh PHE Secretary thlah

Aizawl : Chief Secretary Dr. Renu Sharma, IAS leh PHE Secretary Er. F. Liantluanga, MES te chu Superannuation Pension-a service an chhuahsan te chu Mizoram Sawrkar hnuaia Secretary te’n 29.10.2024 khan Secretariat Conference Hall-ah an pualin thlahna hun an hmang.

   Secretary ten an hun hman hi Commissioner & Secretary H. Lalengmawia, IAS chuan kaihruaiin, Secretary tin ten thusawina hun an hmang bawk a ni.

Mizoram Economic Summit 2024 hmang

Aizawl : October 29, 2024 khan Mizoram Economic Association buatsaihin Mizoram Economic Summit 2024 Aijal Club-ah buatsaih a ni a. Chief Minister Lalduhoma chuan a telpui.

   Chief Minister chuan, mithiamten hetiang hun tha an buatsaih chu lawmawm a ti a. Sawrkarna an chan khan leiba tam tham tak an chhawm avangin an kawng a chho nghal a. Renchem takin sum an enkawl a. RBI balance chhe tak nei thin khan tun Financial Year tawpah kha chuan RBI Balance Rs 500 Cr. chuang an lo nei a ti.

   Healthcare sum ba leh Power Bill ba n pe thei ta tih sawiin Power Bill ah phei chuan rebate hmu hialin an titha a ti a, GP fund tam tham tak pek chhuah a ni a, Pension sum rei tak tak lo tang tawh te pawh chin fel a ni, a ti. Election duty bill tang tam tak pek a ni a, sawrkar hnathawkte hlawh leh hamthatna, hun rei tak lo batsak tawh te pawh engemawzat chin fel a ni, a ti bawk.

Governor hovin National Ayurveda Day, 2024 hmang

Aizawl : Directorate of AYUSH, Health & Family Welfare Department buatsaihin Assembly Annexe Conference Hall, Treasury Square, Aizawlah 'Ayurveda Innovations for Global Health' tih thupui hmangin '9th National Ayurveda Day, 2024' chu October 29, 2024 khan lawm a ni.

   He hun hi Mizoram Governor Dr. Hari Babu Kambhampati chuan khuallian niin a hmanpui a, Health & Family Welfare Minister Lalrinpuii chu khualzahawm a ni.

   Dr. Vanlalsawma, Director, AYUSH chuan inlawmna thu a sawi a. Dr. H. Malsawmtluangi, Consultant, NAM, Directorate of AYUSH hnen atangin Ayurveda chanchin leh Mizorama Ayurveda hmalaknate ngaihthlak a ni a. National Ayurveda Day puala Article inziahsiak lawmman sem a ni.

CM-in SDG Dashboard leh Project Monitoring Dashboard hawng

Aizawl : Planning & Programme Implementation Department Conference Hall -ah Chief Minister Lalduhoma chuan Sustainable Development Goals Dashboard thar leh Project Monitoring Committee Dashboard thar (MPLAN) chu October 28, 2024 khan a hawng.

   Chief Minister chuan Data lakkhawm hna kalpui zui nghal a ni dawn tih sawiin department te chu data dik tak zel thun tum turin a chah, hun reilote chhunga dashboard pahnih peih a ni hi a lawmawm a, a thawktute chungah lawmthu a sawi a ni. Heng dashboard pahnih te hi data dik tak thunluh hmanga kalpui tur a ni a. Data dik lo kan thun chuan kan dinhmun dik tawk lo min pho chhuahtir dawn a. Chuvangin Department tinten an data te chu dik tak chauh rawn thun turin a chah a. "Data dik a nih phawt chuan tlakhniam deuh pawh i hreh lo ang u. Kan dinhmun dik tak kan hriat kha a pawimawh hmasa a ni," a ti.

Eitur thianghlim leh hrisel neih theih nana hmalak dan tur sawi ho

Aizawl : October 28, 2024 khan Health & Family Welfare Minister Lalrinpuii chuan Health & Family Welfare Department hnuaia Food Safety lam hotute kovin mipuite a tana eitur hrisel leh thianghlim chhawpchhuah kawnga hmalak dan tur hrang hrangte a sawipui.

   He hunah hian Food Safety hotute chuan report pein, thawktu indaihlohna avang leh testing laboratory changtlung neih loh avangin nasa zawka hmalak a harsat thu Minister hnenah hian an thlen a. Tunhnaia FSSAI ranking-a Mizoram dinhmun hniam lutuk chhan pawh thawktu neih tlem avang leh chhan dang dang avangte a nih thu an sawi bawk.