Khualzin phur lirthei tihhmasawn dan tur sawiho

Aizawl : October 8 khan Chief Minister chuan a office-ah Mizoram State Transport Authority chu a kawm a. Mizorama khualzin phur lirthei tihhmasawn dan tur an sawiho.

   State Transport Authority hian hma thar lak dan tur an ruahmanna - Online Cab Booking System chungchang te, Aizawl khawpui chhunga Maxi Cab lut thin te rel fel chungchang te, Maxi Cab service tam ber Sumo production a tawp tak avanga Bazar Bus uar thar a ni leh dawna an hriat thu leh chutiang hun a lo thlen huna inbuatsaih dan tur te, an thlen a. Online Cab Booking system hi buaipui hmasak ni se tha an ti.

   Passenger phur lirtheite tihhmasawnna tur thil dang te pawh an sawi bawk. Meeting-ah hian Home Minister K. Sapdanga, Transports Minister Vanlalhlana leh Supply Minister B. Lalchhanzova te pawh an tel.

CM hovin Seminar on Cyber Crime hmang

Aizawl : MJA General Headquarters leh Mizoram Police buatsaihin October 7, 2024 khan Serchhip Press Club-ah Seminar on Cyber Crime buatsaih a ni a. Bialtu MLA Lalduhoma, Chief Minister ni bawk chuan a telpui.

   MJA hian Seminar on Cyber Crime hi district tina kalpui tum a ni a, an nghahna hmun bialtu MLA apiangte chu telpui turin an sawm a ni.

   Seminar hi MJA Gen Hqrs. President C. Lalrambuatsaiha chuan a kaihruai a. Serchhip distrit MJA President C. Lalhminghlua chuan inlawmna thu sawiin MJA Gen Hqrs. Gen. Secy K. Zothanpara leh T. Biakchamliana, Secrtary, MJA Serchhip ten report an pe a, Addl. SP Zonunsanga, CID Crime chuan zirtirna a pe a ni.

Governor-in ran talhna hmun tlawh

Aizawl : Mizoram Governor lailawk Indra Sena Reddy Nallu chuan October 9, 2024 zing dar 4:30 khan Aizawl khawpuia ran talhna hmun AH & Vety. Department enkawl 'Modern Slauhter House, Mualpui' chu tlawhin hmalak dante a enfiah.

   Governor hi Dr. Vanlalhruaia, JD (LD&B); Dr. Neihthangpuii, DD (VPH) leh Dr. Michael V. Lalrinzuala, VO (VPH) te chuan lo dawngsawngin Modern Slauhter House kalphung leh hmalak dante an lo hrilhfiah a ni.

   Modern Slauhter House hi kum 2013 ah hawn niin Pathianni tih loh kar tluanin helai hmunah hian ran talh thin a ni a; a hrisel tha em tih Vety. Doctor-in a enfiah thin a ni. Thla khatah chawhrualin ran 500-600 vel an talh tlangpui a ni.

TB Free Workplace Initiative hawng

Aizawl : Health Minister Lalrinpuii chuan National Health Mission hnuaia hmalakna pakhat, National TB Elimination Programme leh Piramal Swasthya tangkawp buatsaih ‘TB Free Workplace Initiative’ chu October 8 khan Mizoram Sawrkar office– MINECO ah a hawng a.

   He hmalakna hnuai ah hian ‘Portable digital X-ray machine’ leh AI assisted diagnostic software hmangin TB vei leh vei loh hi Doctor ten rang takin an endik nghal thei a. Vawiin ah pawh hian nilengin MINECO ah chuan a duh apiang tan a free in test hi an kalpui a, hnathawhna hmun hrang hrangah pawh la kalpui zel tur a duan a ni.

Infiamna lama hmingthate chawimawina tangka fai hlan

Aizawl : Khawvel leh India ram pum huapa Infiamna lama hmingthate chawimawina Tangka fai hlanna (Incentive Cash Awards to Meritorious Sportsperson) chu October 9, 2024 khan Dawrpui Multipurpose Centre, Aizawlah neih a ni a;

   He hun hi Sports and Youth Services Minister Lalnghinglova Hmar chuan khuallian niin, Infiammite hi chawimawina Tangka fai a hlan nghal a ni.

   Lawmpuina Tangka fai hi 1st April 2023 atanga 31st March 2024 chhunga National leh International-a infiammi lawmman (medal) dawngte hnenah sem a ni a. Incentive Cash Award hi Incentive Cash Award Scheme 2022 tlawh chhana siam niin, hemi hnuaiah hian medal latu player te enkawltu official te hnenah player te pawisa dawn zat atanga chhuta 25% Cash Award pek an ni bawk.

   Incentive Cash Award hi a vaiin Rs 1,10,92,000 (cheng Vaibelchhe khat nuaih sawm singkua leh sanghnih) niin, Infiammi 416-te hnena sem a ni a, heng Infiammite zinga 276 te chu mipa niin, hmeichhia 131 an awm a, Contingent Official 9 an awm bawk a ni.

Siaha-ah MTP Platinum Jubilee lawmna nei

Aizawl : Mara Thyutlia Py (MTP) Kum 70 tlin lawmna, Platinum Jubilee Main Celebration chu October 9, 2024 khan MADC Golden Jubilee Hall, Council Vaih, Siaha-ah neih a ni a, Bialtu MLA Dr K Beichhua, Ex-MTP President chuan Khuallian niin a hmanpui.

   He hunah hian MTP tana thahnemngai taka lo thawk tawhte chawimawina hun hman ni bawkin Platinum Jubilee puala Poem writing competition a tithate lawmman semna hun chu N Solomon Beihlotha, Secy Platinum Organising Board kaihruaina hnuaia neih nghal a ni.

   MTP Platinum Jubilee Celebration puala Poem Competition buatsaiha titha pathum te hnenah leh consolation prize dawng mi 5 te hnenah lawmman sem a ni a, MTP Platinum Jubilee puala buatsaih ruai kil ho nghal bawk.

State Drug Testing Laboratory tlawh

Aizawl : Health & Family Welfare Department Minister Lalrinpuii chuan October 9, 2024 khanm State Drug Testing Laboratory, MINECO-a tlawh.

   Drugs Testing Laboratory Building hi Central project - Strengthening of State Drug Regulatory System’ (SSDRS) atang a sum cheng vaibelchhia 9 hmangin kum 2021 khan sak niin damdawi endikna khawl chi hrang hrang 36 a keng tel a. Hman mai theihin High Performance Liquid Chromatography leh Gas Chromatography chu rem khawm fel tawh a ni.

   Drugs Testing Laboratory hi a tak a hna thawk tur chuan thawktu lak belh a ngai a, tun dinhmun ah thawktu Junior Analyst – 3 posts, Laboratory Attendant – 2 posts, LDC – 1 post leh IV Grade – 2 posts te chu sawrkarah dil mek a ni.

CM hovin World Mental Health Day hmang

Aizawl : October 10, 2024 khan Chief Minister Lalduhoma chuan Vanapa Hall-a Volunteers for Community Mental Health (VOLCOMH) bultuma World Mental Health Day, 2024 lawmna chu a hmanpui. Health Minister Lalrinpuii leh Forest Minister Lalthansanga te pawhin an telpui bawk.

   He hunah hian Dr. Lalropuii chuan VOLCOMH hmalak dan leh World Mental Health Day chanchin te, kumina World Mental Health Day thupuite a sawi a. Thupui hi "It is time to prioritized Mental Health in the Workplace" a ni.

   VOLCOMH hi kum 1992 khan rilru hriselna zirtirna leh rilru lama natna laka mite venhim hna thawk tura mi tlawmngaite din a ni a. Din a nih atang hian kumtin World Mental Health Day hi an lawm thin.

PWD Minister hovin NHIDCL leh MPWD ten meeting nei

Aizawl : October 10, 2024 khan PWD Minister Vanlalhlana chuan a office chamber-ah Mizoram PWD leh NHIDCL hotute meeting a neih pui a, Aizawl-Silchar inkar kawng te, Aizawl-Tuipang (Tipa kawng leh Lunglei-Tlabung kawng chuangchang te an sawi.

   Meeting-ah hian Lalrinkima Hnamte, E-in-C ; Er. H.Zoramliana, Chief Engineer leh Virender Jakhar, National Highway & Infrastructural Development Corporation Limited (NHIDCL) Regional Office; Aizawl Executive Director te bakah Lok Sabha MP Richard Vanlalhmngaiha leh Lunglei West bialtu MLA T. Lalhlimpuia te pawh an tel a ni.

Traffic Police-te tan Uniform Baseball Cap hlan

Aizawl : Sarah Lalrinkimi, Addl. SP, Traffic kaihhruainain 10.10.24 khan Aizawl SP Conference Hall-ah Traffic Uniform Baseball Cap inhlanna hun hman a ni.

   Zonunpari Sailo, Jt. Director, Women and Child Development department chuan Aizawl Traffic Police mai bakah District hrang hranga Traffic Police-te khum turin Uniform Baseball Cap a hlan a, Traffic Police aiawhin Stephen Lalrinawma, Sr.SP, Traffic chuan a dawng.

   Traffic Uniform lukhumah hian naupang leh hmeichhiaten harsatna an tawh thulha tanpuitu biakpawh theihna tur 'Women Help Line Number - 181' chhut kai a ni a, hei hian hmeichhe chunga hleilenna thleng thin dona leh a tireh tura hmalaknaah pakhat a ni.

Mpox leh hrileng dang report na tur CBS tlangzarh

Aizawl : October 10, 2024 khan DHS Old building, Dinthar, Aizawl ah Mpox leh natna chhuak thar te mipui ten an report theihna tur, Community-Based Surveillance System (CBS) tlangzarhna hun hman a ni a, he hun hi Sangchhin Chinzah, Secretary, H&FW chuan khuallian niin a hmanpui.

   Community-Based Surveillance System (CBS) in a tum chu mipui vantlangin awlsam taka hrileng report leh natna hrileng rang taka zawnchhuah a ni. CBS hi mipui vantlang hriselna kawnga hmasawnna pe tura Central sawrkar-in kalphung thar a duan a ni a, rahbi thar anih angin hman a awlsam a, sum sen a ngai lova, a hmangtute tan a him bawk a, mi zawng zawng hman theih tura duan a ni bawk.

Lung lumin a den fuh kum 29 mi boral

Aizawl : Serchhip District chhunga Lungpho khaw mi Lalthanmawii (29) chu 9.10.24 khan an fehna ah lung lumin fuh palhin hmunpui lam panpui a nih laiin a boral.

   Lenkawlin a tarlan danin, Lalthanmawii w/o Lal-hunruata hi Lungpho leh Rullam inkar, khua atanga Km. 3 vela hla ah an feh a, Lungpho leh Rullam inkar kawng zauh tura kawngsir thianfaitu JCB chuan lung ti lum palhin Lalthanmawii nu leh an fehpui Rosangi chu a lu-ah a deng fuh a, hemi buaipui tura a kal chu a aia lian zawk lung lumin Lalthanmawii hi a deng fuh leh ta a ni.

   Lalthanmawii leh a nu bakah Rosangi te hi Ngentiang PHC panpui niin hmunpui lam pan tura tih an ni a, Chhawrtui khaw dai-ah Lalthanmawii hi a boral zui ta a ni.

N. Serzawl tlangval tuiah tlahlum

Aizawl : Lalrinpuia Sailo (41) S/o Ngurchhuana (L), N. Serzawl khua chu an khawkianga Phunglui tui khuahah October 8, 2024 khan a tla hlum.

   Lalrinpuia tlakna tuikhuah hi fur lai a nih avangin tui a tam hle a, a tlakna bawr vel hi ft. 20 vela thuk a ni bawk. Thawhlehni khan Darlawn CHC-ah a ruang posmortem niin vuiliam nghal a ni.

   Lalrinpuia hi a nu leh pa in an boral tawh a, hun engemaw chen amaha a khawsak hnuin tun hnai khan a u khawdanga awmin a fin a ni.

   N. Serzawl khua hi Darlawn khaw kianga awm niin Darlawn atanga km 7 velah a awm a ni.