ENDIK
Ningani khan Dr.H.Lalthlangliana, District Election Officer, Kolasib leh General Observer Mohammed Ali Shihab, IAS-te chuan Serkhan, Nisapui, Lungmuat, N.Chaltlang leh Bukpuia 4-Tuirial (ST) Assembly Constituency bye-election, ni 30 October 2021-a neih tur atana Polling Station buatsaihte an endik.

ELECTORAL ROLL
ECI-in thupek a chhuah angin, Bye-Election to MLA, 4-Tuirial (ST) A/C, 2021 kan neih tur atan a inbuatsaih na Photo Electoral Rolls, 2021 Kolasib District huam chhunga 4-Tuirial (ST) A/C chu  October 14, 2021 khan mipui a duh apiang te tana en theih turin tarchhuah a ni.

SCHEME HAWNG
October 14, 2021 khan Commerce & Industry Minister Dr. R.Lalthangliana chuan Pradhan Mantri Formalisation of Micro Food Processing Enterprises (PMFME) Scheme chu Assembly Annex II-ah Mizoram-a kalpui tan turin a hawng.

Office tihchangtlun
Land Revenue and Settlement (LR&S) Minister Lalruatkima chuan District thar pathum - Khawzawl, Hnahthial leh Saitual DC te leh Settlement Officer te ko khawmin LR&S Directorate, Aizawlah October 14, 2021 khan an District theuha Revenue Office tihchangtlun dan tur a sawipui.

MPSA khawmpui
October 14, 2021 khan 3rd Bn. MAP Ground, Mualpuiah Home Minister  Lalchamliana chuan Mizoram Police Service Association (MPSA) khawmpui lian vawi 12-na chu khuallian niin a hmanpui a. Home Minister hi Chief Secretary Lalnunmawia Chuaungo leh John Neihlaia, IGQ(HQ) & Acting DGP ten an tawiawm a ni.

Jan Suwayi
Rural Development Minister Lalruatkima chuan October 14, 2021 khan DRDA Conference Hall, Aizawlah kar khat awh tur "State Level Mahatma Gandhi NREGA Social Audit 'Jan Suwayi' and Awareness Week" a hawng. He hun hi India ram in Zalenna a hmuh kum 75-na lawmna Aazadi Ka Amrit Mahotsav' kal zelah Social Audit Unit, Mizoram buatsaih a ni.

Khap
Krismas leh Kumthar bakah Hindu kutpui, Dussehra leh a dangte lo awm tur thlirin Aizawl District mipuiten him dam leh tluang taka kan hman theuh theih nan Aizawl District Magistrate Dr.Lalhriatzuali Ralte chuan October 14, 2021 khan thupek a chhuah.

Chawimawi
Mizoram Boxing Association (MIZBA) buatsaihin October 13, 2021 khan Asian Elite Men & Women Boxing Championship 2021-a Silver Medal dawngtu Lalbuatsaihi chawimawina hun Aijal Club-ah neih a ni a. Khuallian Sports Minister Robert Romawia Royte chuan Mizoram Sawrkar-in lawmpuina cheng nuai nga (5) pek a tum thu a sawi.

CEO & DoP
Chief Electoral Officer, Mizoram leh Department of Posts (DoP), Mizoram ten Elector Photo Identity Cards (EPICs) leh Election Notice-te Speed Post hmanga rang taka thawnchhuah a nih theih nan October 12, 2021 khan thawhhona thuthlung (MoU) an ziak. He thawhhona turah hian Election Commission of India-in a rawn angin, Department of Posts pawmpuina ngeia duan Standard Operating Procedures (SoP) te chu Post Master General (PMG), Mizoram leh Chief Electoral Officer, Mizoram ten EPIC leh Notice-te Speed Post hmanga an thawnchhuahnaah an zawm ve ve tur a ni ang.

HMANRUA HLAN
United Way of Bengaluru(UWBe) ten CSR kaltlanga Covid 19 dona hmanrua, BiPAP ventilator 88 leh consumables 176 Mizoram tana an rawn pek chu State leh District hospital hrang hrangah te an mamawh mila sem turin October 12 khan State Planning Board Vice Chairman H.Rammawi chuan Health & FamilyWelfare Department kutah a hlan. 

 iRAD Project
October 12, 2021 khan Home minister Lalchamliana chuan DGP Conference Hall, Police Headquarters-ah Integrated Road Accident Database(iRAD) Project chu Mizorama hman atan a hawng a. iRAD Project hian Mizoram Police, Health & Family Welfare, PWD, Transport Department leh NIC te a thlun zawm a. Lirthei chesual an awmin iRAD hmang hian chetsualna a lo thlen dan leh a thlen chhan te kimchang takin hriat theih a ni dawn a.

'All Mask Campaign' 
Ni 10 chhung awh tur (October ni 11 - 20, 2021) Mizoram puma hmai tuamna vuah tura beihpuithlakna  'All Mask Campaign' chu Health Minister Dr R. Lalthangliana chuan October 11, 2021 khan a hawng.