DM&R-in zangnadawmna Rs.4,00,000/- ve ve hlan

AIZAWL : Deputy Commissioner & Chairman District Disaster Management Authority, Aizawl District chuan October 16, 2024 khan thuchhuahin siamin, 15/6/2024 a thingtlu a nunna chan ta Lalnuntluangi, Samlukhai, pasal Chhanliana hnenah leh 3/8/2024 a In kang a nunna chan ta T. Lalromana, Turial, farnu Eipuii hnenah zangadawmna tangkafai Rs.4,00,000 ve ve hlan an ni.

RIPANS Graduation & Lamp Light Ceremony hmanpui

Aizawl : October 16, 2024 khan Regional Institute of Paramedical & Nursing Sciences (RIPANS) chuan Baptist Centre, Falkland ah 24th Graduation & Lamp Light Ceremony an buatsaih a. Chief Minister Lalduhoma chuan khuallian niin a hmanpui.

   Khuallian hian Class tina top 3 te hnenah Chief Minister hian Proficiency Award a hlan bawk.

   24th Graduation & Lamp Lighting Ceremony ah hian B.Sc Nursing degree hi mi 39 ten an graduate-a, 1st Semester zirlai thar tur mi 53, India hmarchhak state pariat leh Jammu & Kasmis atanga kal khawm te lakluh an ni bawk. RIPANS atang hian batch hmasa ber; kum 1996 atanga vawiin thlengin mi 788 te an graduate tawh a. Graduate tawh zawng zawng te hian thawhna tur hmun (placement) an hmu vek a ni.

PACS te tan training buatsaih

Aizawl : Vawiin khan Mizoram Cooperative Apex Bank Ltd. (MCAB) bultumin Mizorama Primary Agricultural Credit Societies (PACS) hrang hrang Computerised tawh 25 te tan ni thum awh training chu October 16 atang khan Emerald Hotel Conference Hall, Treasury Square, Aizawl-ah tan a ni.

   He training-ah hian PACS Manager-te, PACS Computerised Software khawihtute chu koh khawm niin Master Trainers, System Integrator, Satra Services & Solutions Pvt. Ltd atanga lokalte chuan PACS Computerised tawh te’n software chungchanga harsatna an tawhte enpuiin hmalak dan tur an zirtir a ni.

Commission for Women Chairperson atan C. Zodinpuii ruat

Aizawl : Mizoram Sawrkar chuan October 16, 2024 khan C. Zodinpuii D/o Lalrinliana(L), Durtlang, Aizawl chu Chairperson, Mizoram State Commission for Women atan a ruat.

   C. Zodinpuii hi thiamna lamah MSW, (Family & Child Welfare Specialization), TATA Institute of Social Sciences, Mumbai atanga zir zo a ni a. Sawrkar hna a thawh laiin Social Welfare Department hnuaiah hna hrang hrang thawkin, 31.12.2023 ah pension in a chhuak. C. Zodinpuii hi Protection of Women from Domestic Violence Act, 2005 ah Master Trainer a nih bakah Protection Officer in a lo awm tawh bawk.

India Mobile Congress-ah ICT Minister Dr. Vanlalthlana tel

Aizawl : Ni li chhung awh India Mobile Congress (IMC) 2024 chu October ni 15, 2024 khan Bharat Mandapam, New Delhi-ah Prime Minister Narendra Modi chuan a hawng a. He hunah hian State IT Minister-te tel tura sawm an nih angin Information & Communication Technology (ICT) Minister Dr. Vanlalthlana chu a tel.

   India Mobile Congress hi tum riat (8) hmanna niin, he intawhkhawmah hian telecom company lian te, smartphone siamtu company lian te, chip siamtu company-te bakah Artificial Intelligence startup-te chuan an thil siam chhuah tharte entirin an pho chhuak a. IMC 2024 bakah hian Prime Minister chuan International Telecommunication Union buatsaih World Telecommunication Standardisation Assembly (WTSA) 2024 chu a hawng nghal bawk a ni.

State Level School Band inelna nei

Aizawl : October 15, 2024 khan State Level School Band Competition chu 1st Battalion MAP Ground Armed vengah neih a ni a, Pipe Band Girls-ah Govt Saitual High School Girls Band chu pakhatna an ni a, Pipe Band Boys-ah Govt Southern High School Hnahthial Boys Band chu pakhatna an ni bawk.

   Band competition-ah hian mipa leh hmeichhia a hrang ve ve-in an intihsiak a ni.

   Zonal level-ah hian India ram state leh UT te hi zone li-ah an then a, Eastern zone, Western zone, Southern zone leh Northern zone tiin then a ni. Mizoram hi Eastern zone-ah a awm a, Eastern zone-a awm te chu- Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura leh Sikkim te an ni. Zonal level competition-a tithate chu National level N. Delhi-ah an intihsiak leh thin a ni.

SYS-in Coach te intuaitharna hun buatsaih

Aizawl : Sports & Youth Services Department chuan ni hnih (2) awh tur Seminar on Sports Medicine and First Aid (Oct ni 15-16, 2024) leh Seminar on Sports Psychology and Method of Training (Oct ni 17-18, 2024) a buatsaih.

   A hawnna hi October 15 khan Sports Conference Hall ah neih a ni. Department Coach te bakah Khelo India State Centre of Excellence (KISCE), district Khelo India Centre(KIC) Coach te leh Scouts & Guides, Adventure Wing Staff te an tel a. Mi 55 chuang an training.

Sialsuk VC te lawmpuina hun hmang

Aizawl : October 14, 2024 khan Tourism minister Lalrinpuiichuan a office chamber-ah Sialsuk khawtlang hruaitute chu ‘Best Tourism Village - Community based category’-a India ram pumpuia lawmman an lak lawmpuiin thingpui inhona a neihpui.

   Sialsuk khua hian Community-based category-a Best Tourism Village Awards 2024 chu 27-Sep-2024 khan India ram Vice President leh Union Minister for Tourism and Culture-te hnen atangin an lo dawng tawh a. Hemi puala hun hman ah hian, Sialsuk khua a tourism tihchangtlun zel dan turte sawiho nghal a ni.

Bana Kaih Scheme thlirhona nei

Aizawl : Planning & Program Implementation Department Conference Hall, Aizawl-ah October 15, 2024 khan Mizoram State Policy Coordination Committee Review Meeting tum khatna neih a ni a. KC Lalmalsawmzauva, Adviser to Chief Minister, Vice Chairman, MSPCC ni bawk chuan hun kaihruaiin 'Bana Kaih Scheme' kalpuitu tur department 16 atangin Nodal Officer leh Assistant nodal officer-te an tel a.

   Thutkhawm ah hian Bana Kaih scheme portal kaltlangin vawiin thleng khan dilna 1314 lut a awm tawh thu tarlan a ni a. Commerce & Industries Department hnuai ah dilna lut tam berin, 540-a lut tawh a, Animal Husbandry & Veterinary Department hnuai ah 409-a lut tawh bawk a ni. Dilna lut zing a 1292 chu mimal ang a dilna a ni a, 22-te chu pawl ang a dilna a ni.

CM Relief Fund chhunglut

Aizawl : October 16, 2024 khan Tuichang South Group ZPM te chuan Chief Minister Lalduhoma hnenah CM Relief Fund-a hman turin Rs. 20000 an hlan.

   Chief Minister hian lawmthu a lo hrilh a. CM RF hi a chhuak reng a, a tangkai thin em em a ni, a ti.

END leh Assam Rifles ten Heroin man

Aizawl : Excise & Narcotics Department leh 42nd Bn. Assam Rifles thawk dun chuan October 16, 2024 (Nilaini) zan khan Tlangsam khaw dai, Leilet zawl, Champhai District-ah Heroin gram 323.170 (Hawng 25) leh a neitu nia puh – Zamdolian (65) s/o Awnkhankhup, Bulfek, Myanmar-a khawsa nia inchhal an man.

   Heroin vanga man Zamdolian hi the Narcotics Drugs & Psychotropic Substances Act, 1985 tlawhchhanin thubuai siamsak a ni a, October 17, 2024 khan District & Sessions Court, Champhai District, Champhai-ah thawn nghal a ni.

Mizo tlangval Ruatfela’n ritchawiah India record thar siam

Aizawl : Mizo tlangval, Lalruatfela chuan Indian Weightlifting Federation (IWLF) buatsaih, Pathianni kalta-a zawh National Weightlifting Championships-ah India ram record thar a siam a, Mizoram tan silver medal a la bawk.

   Bungzung tlangval, Ruatfela hian Nagrota Bagwan, Himachal Pradesh-a Youth, Junior leh Senior National Weightlifting Championships-ah Mizoram tan junior kg 89 huangah silver medal a la a ni.

   Ruatfela hian snatch-ah kg 132 leh clean & jerk-ah kg 174, a vaiin kg 306-a rit chawiin silver hi a hlawh chhuak a. Clean & jerk bika a chawi hi India (national) record thar a ni.

   Tun championship-ah hian Mizo ritchawi chak langsar pahnih chuan Mizoram tan inlan lo mah se an thawhna tan medal an hlawh chhuak bawk.

   Senior-ah Mizo ritchawi chak hriat hlawh ber, Jeremy Lalrinnunga chuan kg 67-ah bronze lain Lalhunthara chuan kg 73-ah Services tan silver medal a la bawk.

Sakhaw zalen nana thawktu pawl leh Mizoram Synod-in thawh hona ziak

Aizawl : India rama sakhaw zalénna a awm theih nána thawk pawl, Alliance Defending Freedom India (ADF-India) leh Mizoram Presbyterian Church Synod chuan kum thum chhung atan thawh hona thutlung an ziak.

   Delhi-a hmunpui nei, ADF-India leh Synod inremna hi October 14, 2024 khan khan ziah a ni a. Synod aiawhin Rev. R. Vanlalnghaka, Moderator leh Rev. R. Lalhmingsanga, Secretary, Synod Mission Board-in hming an ziak a, ADF India aiawhin Loreign Ovung, Trustee for ADF India Trust leh Utkarsy Singh Payal-ten an ziak.

   ADF-India hi India rama sakhaw zalénna a awm theih nána thawk pawl, Kristian dan hre mi inzawmkhawm pawl a ni a, kum 2012 khan mihring dikna humhalh tum pawl hrang hrangte nen sakhaw zalènna leh mihring nun zahawmna humhalh tura an din a ni.