MPF leh Rahul Gandhi inkawm

Aizawl : Ni 16.10.2023 zan khan Mizoram People Forum ( MPF) Gen. Hqrs hruaitute leh INC hruaitu Rahul Gandhi te chuan Central YMA Committee Room ah an inkawm a, Mizoram inthlan hrang hranga MPF hmalak dan leh kalphung te an sawiho.

   MPF hruaitute hian Mizorama inthlanna thianghlim leh zalen a awm theihna tura an hmalak tawh dan leh MPF dinchhante an lo hrilh a. Political Party te nena thawhhona thuthlung an siam thin thu leh chu chuan inthlannaah awmzia a neih thin thu an sawi. Tun tum inthlan turah pawh Party ten zawm theih vek se an duh thu an sawi bawk. Rahul Gandhi hian MPF leh a hnathawh dan chu a lo hriat tawh thu leh MPF kalphung tha a tih thu te a sawi bawk.

Dan bawhchhe lo turin hriattir

Aizawl : Centre for Environment and Social Justice hruaitute chuan Executive Director, National Highway and Infrastructure Development Corporation Limited chu hmasawnna hnathawh environment laws bawhchhe lo turin an ti.

   CESJ hruaitute chuan nimin khan NHIDCL office, Tuikhuahtlangah kalin Executive Director an hmu a, an hnuaia hmasawnna hnathawhah leivung thehthang dana an ngaihmawh te an thlen.

   Centre for Environment and Social Justice chuan NHIDCL project hnathawhte uluk takin a vil dawn tih sawiin, environmental laws bawhchhiatna a awm chuan National Green Tribunal (NGT) Court ah an thlen hreh dawn lo tih an sawi.

Ni 7 bo Ruang hmu

Aizawl : October ni 12, 2023-a an khua atanga a chhuah hnu a chin hriat loh a awm zui ta, Lalrintluanga S/o Vanlaltluanga Ngente, Zawlpui, Lunglei district ruang chu October 19, 2023 zing dar 10 vel khan thi a hmuh a ni.

   A ruang hi Lunglei bazar veng, Mizoram Dresses opposite, YMA T Section B. Zaawia te inhnuaiah hmuh a ni a. B. Zaawia te huan samtu chuan ruang hi bungbua awmin a hmu a ni.

   Lalrintluanga( Bawiha) Zawlpui Lunglei Dstrict hi 12.10.2023 khan Lunglei panin an khua a chhuahsan a, a chin hriat zui a nih loh avangin a chhungten Lunglei lam a YMA te punin a zawn hna hi an thawk a ni.

MPCC-in CYMA Vice president ngaihdam dil

Aizawl ; Mizoram Pradesh Congress Committee (MPCC) chuan Central YMA vice president hnena ngaihdam dilna leh mipui hnena thudik hriattirna leh ngenna an ti chhuak.

   MPCC in October 19, 2023-a thuchhuah an siam a tarlan a nih danin, Tunhnaiah social media hrang hrang ah Central YMA vice president chanchin diklo takin a lang a, Assamese thlah ni ang a ziakin a pa pawh Dulal Sharma tiin an ziak a ni.

   He thu diklo irhchhuah dan chhui a nih hnuah, Congress party a hruaitu pakhat, a thudawnna diklo atanga lo darh a ni tih finfiah a ni a, he thu diklo darh avanga Lalhmachhuana leh an chhungkua zawng zawngte mai bakah, a awmna Chaltlang Lily Veng Branch YMA, NGO hrang hrang leh ama pian leh murna hrechiangtute rilru nasa taka hliamte chungah MPCC chuan thupha chawiin ngaihdam an dil a ni.

Election duty nei te tan Postal Ballot a vote thlak phalsak

Aizawl : Aizawl District Election Officer Nazuk Kumar, DC Aizawl chuan 18.10.2023 khan thuchhuah siamin Election duty nei te Postal Ballot a vote thlak a phalsak.

   General Election to the Mizoram State Legislative Assembly, 2023 chu ni 7.11.2023 (Thawhlehni) ah neih tur a ni a. He inthlanah hian election duty neite chu Election Commission of India (ECI) in postal ballot hmanga vote an thlak a phalsak a.

   ECI Notification angin chuan a hnathawktu thlan bike, inthlan ni a anmahni hna ah duty a ngaih avanga mahni polling station-a vote thlak theilo te tan postal ballot hmanga vote thlak a phalsak bawk.

   Heng department staff, postal ballot hmanga vote thlak ngai tur te chuan postal ballot dilna “Form 12D: Letter of Intimation to Assistant Returning Officer (for absentee voters)" hi Facilitation Centre (Nazarat Branch), DC Office, Aizawl ah ngaihven tur a ni a, form hi dt. 25.10.2023 ral hma ngeiin thehluh leh tur a ni.

Aizawl District Court-ah Children’s Room hawng

Aizawl : October 18 khan Joel Joseph Denga, District & Sessions Judge, Aizawl Judicial District chuan Aizawl District Court-ah naupang, hursualna tuartute leh naupang an nu ten Lung-in an tanpuite leh naupang, chhan hrang hrang avanga Court-a inlan leh kal ngai te tan Child Welfare Officer’s Office leh Children’s Room te a hawng.

   He hawnna programme hi Dr. HTC. Lalrinchhanga, Special Judge, PC Act chuan a kaihruai a. Pu Joel Joseph Denga chu khuallian niin, heng Room-te hi hawngin Mizoram State Commission for Protection of Child Rights (MSCPCR)-in naupangte dikna chanvo humhalh a nih theihnana tangkai taka hmang turin duhsakna a hlan.

   MSCPCR chuan Aizawl District Court-a Probation Officer’s Office leh Children’s Room te siam an nih theihna’na hma latu District & Sessions Judge lo ni tawh leh ni lai mek te, Aizawl District Court-a thuneitute leh Directorate of Women & Child Development te chungah lawmthu a sawi a ni.

RIPANS Nursing College Lamp Lighting leh Graduation

Aizawl : Governor Dr. Hari Babu Kambhampati chuan October 19 khan Woodland Hills, Zonuamah Nursing College, RIPANS in BSc zirlaite puala Graduation leh Lamp Lighting vawi 23-na a buatsaih chu a hmanpui.

   Governor Dr Hari Babu Kambhampati chuan eizawnna satliah mai ni lo, rawngbawlna leh hna zahawm nikawp, Nurse zirna bultanna atana khawnvar chhi a, thutiam la thar te chu a lawmpui tih a sawi hmasa a. BSc Nursing zirchhuak thar te pawh an hna thawhna turah leh an kal zel na turah duhsakna a hlan nghal bawk a ni.

Silai tung turin thupek chhuah

Aizawl : Aizawl District Magistrate Nazuk Kumar, DC Aizawl District chuan inthlan hunchhunga boruak ralmuang a awm theih nan silai neitute'n Police Station hnai berah an silai tung turin October 16, 2023 khan thupek a chhuah.

   Aizawl DC hian Mizoram Legislative Assembly (MLA) General Election 2023 chu Dt. 7.11.2023 hian neih a lo ni dawn a. Hemi hun chhunga boruak muanawm tak hnuaia Vote thlak leh tluang taka vote chhiar a nih theih nan khapna thupek chhuah a nih thu a tarlang.

   He thupek hian chhuah a nih atanga thla hnih (2 months) chhung a huam anga, thupek bawhchhia an awm a nih chuan Section 188 IPC hmangin an chungah na taka hremna lek a ni.

SSCAE thukhawm

Aizawl : October 16, 2023 khan Madhup Vyas, IAS, Chief Electoral Officer, Mizoram & Chairman, SSCAE hovin a Office Chamber-ah State Steering Committee for Accessible Election (SSCAE) an thukhawm.

   Madhup Vyas chuan mitin banphak leh kalpawh theih inthlanna nei tura District hrang hranga thahnemngai taka hmalak a ni chu lawmawm a tih thu a sawi a. Polling Station tina vohbik PwD voter awmte chhinchhiah leh a tul anga ngaihven zel te, harsatna an tawh loh nana hmalakte leh anmahni buaipui kawnga tulte inzirtirna training buatsaihte chu ngaihpawimawh tur a nih thu a sawi.