Meth siamna cheng nuai 19.88 man chuang man

Aizawl : Mizoram Police leh Assam Rifles te chuan drugs tawlhruk tumna thleng khat tak nangchingin Kg 1075 (barrell 43) a tam Caffeine Andhydrous IP chu October 23, 2024 khan Cheng nuai 19.88 man chu Zokhawthar, Champhai District, Mizoram-ah an man a, he damdawi hi Methamphetamine tablets an siamna hmanrua ber a ni.

   He smuggling kaihhnawihah hian mi pahnih an man a, an mi rinhlelh Lallawmkima, 34 leh Haudeihkhuala, 32 Zokhawthar mi ve ve chu an mobile phone nen an man a, heng an thil man te hi dan anga bawhzui a nih theih nan Police Department, Zokhawthar hnenah hlan nghal a ni.

Sazaw leh Vahrit kaptu hrem turin ngen

Aizawl : ASEP General Headquarters, Aizawl chuan October 21, 2024 khan thchhuah siamin nungcha humhalhna dan bawhchhia, Sazaw leh Vahrit kaptu mi pahnih te laka dan anga hmala turin thuneitute an phut.

   ASEP thuchhuah a tarlan a nih danin, Vanlalhriata leh H.P. Rodingliana, Aibawk te chu Sazaw leh Vahrit an kah avangin man an ni a, an laka dan ang taka hmalak nise an duh a, chumi tur chuan thuneitute an phut.

Heroin leh a neitu a puh mi pathum man

Aizawl : Excise & Narcotics Department leh YMA thawk dunin Heroin leh a neitu a puh mi 3 an man.

   Excise & Narcotics Department leh Rangvamual Branch YMA thawk dun chuan October ni 22, 2024 khan Rangvamual-ah Heroin gram 59 (Hawng 5) leh a neitu nia puh mi pahnih Vaivakawn (Section-I)-a khawsa nia inchhalte chu an man. October 22, 2024 khan Chanmari West-ah Heroin gram 172 (Hawng 15) leh a neitu nia puh Chanmari West-a khawsa mek nia inchhal an man bawk.

Aizawl-ah MST bus service

Aizawl : MCVU ten nawrh an huaihawt avangin, Aizawl-ah chuan October 23, 2024 khan MST bus an service.

   Oil man tihhniam phut a Mizoram Commercial Vehicle Union (MCVU) huaihawta nawrh kalpui a nih avangin, Aizawlah chuan City bus te an ding a, hemi avang hian sawrkarin MST bus 14 tlan turin a ruahman. MCVU nawrh huaihawt avang hian MST Bus te hi zing dar 6 atanga tlai dar 5 thleng an sertvice a ni.

Mizo boxer pahnihin gold medal hnek chhuak

Aizawl : Rohtak, Haryana-a ram pum huapa boxing inelnaah October 22, 2024 khan Mizo pahnihin gold medal an hnek chhuak.

   Thawhlehni kalta atanga Boxing Federeation of India (BFI) buatsaih, REC Combined National Talent Hunt Boxing Programme 2024-25-ah hian TC Malsawmkimi leh J.Joseph Bulhringpachha te chuan an inlanna huangah an chak ber ve ve a ni. Serchhip boxer Sawmkimi hi 48-50kg (junior)-ah inlanin final-ah hian inelna thlengtu, Haryana boxer Kashish Malik hnehin a gold medal a la a. Siaha Boxer Joseph hian 52-54kg-ah Uttar Pradesh boxer Aryan hnehin gold a hnek chhuak bawk.

   Tun tum inelnaah hian Mizo boxer pali an tel a. Julie Ngurthansangi, East Lungdar leh Esther Lallawmsangi, Reiex te erawh a vanduaiah tangin medal an la phak lo.

Nuai 19 chuang man Heroin man

Aizawl : Special Narcotic CID Crime, Aizawl leh Assam Rifles tangkawp te chuan October 21, 2024 khan Chhinga Veng-ah heroin gram 28.55 cheng 19,98,500 man hua chhut chu an man.

   He an thil man kaihhnawih-ah hian mi pakhat an man tel a, Special Narcotics COID Crime, Aizawl leh Assam Rifles te hian an thudawn bawhzuiin hma an la ho a ni.

DAY-NULM Exhibition cum Food Festival hawng

Aizawl : Urban Development & Poverty Alleviation (UD&PA) Department changtu Minister K. Sapdanga chuan October 24 khan Aijal Club Park-a DAY-NULM Exhibition cum Food Festival an buatsaih chu khuallian niin a hawng.

   UD&PA Department hnuaia programme kalpui mek Deendayal Antyodaya Yojana National Urban Livelihoods Mission (DAY- NULM) hnuaia Aizawl City Mission Management Unit (CMMU) in festival a buatsaih hian nimin thlang khan a awh.

   DAY-NULM Exhibition Cum Street Food Festival hi DAY NULM beneficiaries te tana buatsaih niin, District hrang hrangah neih thin a ni a, tun tum hi a vawi 3 na niin, district dangah chuan kumtir lamah khan an lo nei tawh a ni.

Karnataka Sawrkar Revenue Department zirchianna nei

Aizawl: Land Revenue and Settlement Minister B.Lalchhanzova chuan Karnataka sawrkar hnuaia Revenue Department kalphung zirchiang turin October 22, 2024 khan Bengaluru a thleng.

   B.Lalchhanzova chuan October ni 23 khan Karnataka Revenue Minister Krishna Byre Gowda chu a pisa, Vikasa Soudha-ah hmu in State pahnih te in laichinna ti chak tura thawhpuiah sawmin, Karnataka ah a bikin Bengaluru khawpui ah Mizo thahnem tak an awm ve thu leh a tul anga an thlavang lo hauh thin turin a chah a ni.

   Revenue Minister hian an sawrkar tirh atanga an lo ruahman tawh tih hlawhtlin ani chu a lawmthu sawiin, Karnataka state chu India ram state zinga land revenue administration nei tha leh technology thar hmang tangkai ber te zing ami anih anga tlawh an nih thu a sawi.

MSPMC ten High Field-a hnawthawh tlawh

Aizawl : Vawiin khan Mizoram State Project Monitoring Committee chuan ‘Construction of Multipurpose Ground at High Field, McDonald Hill, Aizawl’ chu October 23, 2024 khan an tlawh.

   He hna hi Aizawl Smart City Ltd. hnuaiah Lushai Engineers, Ramhlun South, Aizawl te thawh mek a ni a. February 4, 2023 ah thawh tan niin thla sawmpariat (18) chhunga zawh tura tih a ni a. Harsatna hrang hrang avangin hna thawh zawh hun tur hi a tira tuk aiin a tlai hret dawn a, December, 2024 ah chuan zawh tum a ni.

Mizoram leh Nagaland Governor ten 'Bharat Ko Jano' programme hmanpui

Aizawl : October 22, 2024 khan North East Zone Cultural Cenltre (NEZCC), Dimapur ; Ministry of Culture, Govt. of India leh Art & Culture Department, Mizoram tangkawp buatsaihin India rama hnam hrang hrangte inpumkhatna leh hnam ziarang inhriatpawhtawnna leh chawilarna 'Bharat Ko Jano' programme chu Vairengte Jt. YMA Playground-ah hman a ni a. He hunah hian Mizoram Governoar Dr. Hari Babu Kambhampati chu khuallian niin, Nagaland Governor La. Ganesan, Chairman, NEZCC chu khualzahawm a ni.

   Bharat Ko Jano Programme-ah hian Dr. Prashanna Gogoi, Director, NEZCC chuan inlawmna thu sawiin Mizoram, Assam, Tripura leh Bihar atangin lamthiamte'n hnam lam chi hrang hrang an entir a ni. DC Kolasib Robert C. Lalhmangaiha leh Sr. SP Kolasib David H. Lalthangliana te pawh an tel a ni.

Agriculture Minister hovin Promotion of Millets in India programme hmang

Aizawl : North-Eastern Regional Agriculture Marketing Corporation (NERAMAC) leh Ministry of Agriculture & Farmers Welfare, Govt. of India buatsaih India rama Buhtun chawikanna (Promotion of Millets in India) Programme, ni hnih awh chu October 22, 2024 khan Aijal Club-a neih chu P.C Vanlalruata, Agriculture Minister chuan khuallian niin a hmanpui.

   He Programme-in a tum ber chu Buhtun (Millets) chu chaw hrisel leh tha anih avanga mipuite'n kan ei tam a pawimawh thu inzirtir a, inhrilhhriatna niin Programme a tel kuthnathawktute nen sawihona hun tha tak hman ho a ni bawk.

Police Commemoration Day urhsun takin hmang

Aizawl : October 21, 2024 khan India ram puma hman thin Police Commemoration Day chu Mizoram-ah pawh Police hmun hrangah hman a ni.

   Mizoram-ah pawh ni October 21, 2024 zing dar 7-ah hian District Headquarters leh Battalion Headquarters-ah te Commemoration Parade hi neih a ni a. A hmanna pui ber Aizawl-ah chuan Martar Thlan,1st Bn. MAP Headquarters, Armed Veng-ah Mizoram DGP Anil Shukla, IPS bakh senior police officer, CRPF, BSF, SIB leh Assam Rifles officer ten hun hmangin urhsun taka sunna neiin, martar thlanah zahna pangpar dah a ni.

   September 1, 2023 leh August 31, 2024 inkar khan police mi 216 zetin an mawhphurhna an hlenna kawngah nunna an hlan a, tin, August 15, 1947 atanga August 31, 2024 thleng khan police 36449 zet martar an awm. Kumin chhung hian Mizoram Police zingah duty laia hmelma kut a thi an awm lo a, 1966 atanga vawiin thlengin Mizoram Police zingah, duty laia nunna chan mi 54 (sawmnga leh pali) an awm tawh a ni.

Mizoram MLA te Kerala sawrkar zirchiang turin fehchhuak

Aizawl : October 21, 2024 Monday khan Committee on Public Undertakings, Mizoram Legislative Assembly chuan an Chairman Er. Ginzalala MLA, Technical Advisor to CM kaihhruainain Committee on Public Undertakings Kerala Legislative Assembly, enkawlna hnuaia awm Corporations hrang hrang Agro-Industries, Handicraft Development Corporations bakah Tourism Development Corporation an kalpui dan a hmuna tlawha zirchianna nei turin an fehchhuak.

   He study tour hian ni October 21-24, 2024 thleng kha a awh a, Committee Members V Malsawmtluanga, Vice Chairman, Lunglei High Powered Committee ; K Laldawngliana, MLA ; Lt. Col. Lalhmingthanga, MLA leh Lalramliana Papuia, MLA te an tel a ni. Committee hi Mizoram Legislative Assembly Secretariat Officials K. Lalmuanthangi, Joint Secretary leh Rosangliana Chhakchhuak, Committee Officer ten an tawiawm a ni.