Sextortion laka fimkhur turin ngen

Aizawl: Mizoram police chuan October 26, 2023 khan thuchhuah siamin, sextortion laka fimkhur turin mi tin an ngen.

   Police thuchhuah tarlan danin, sextortion hi misualin online messaging leh video/audio chat hmanga thiam taka mi an vehthlem leh an bum a, an saruak thlalak/video te an neih theih hnua chumi hmanga anmahni vau beh, sum phut, tihmualphona etc. atana an hman thin hi a ni.

   Hetianga tihmualphona leh vauna rawngkai i tawk a nih chuan mahnia ngawirenga tuar mai lovin, Police hnena report vat hreh suh ang che.

CYMA hruaitu tur thlang

Aizawl : Central YMA General Conference vawi 74 na Biate khua Zialung Run a neih mekah October 26, 2023 khan kum 2023-25 chhung a office bearers (OB) turte thlan an ni a, kum 2025 General Conference thleng turin Sakawrdai thlan a ni.

   Chawhma leh chawhnu-ah Central YMA OB turte hi thlan a ni a, OB nilai mi paruk (6) zing a 5 te an post chelh lai ni lo, post hranah theuh an tling nawn.

   Nimin khan rorel neih niin, sawrkar khawih leh YMA khawih agenda hrang hrang an pawm a, rorel palaite hian secret ballot hmangin kum 2025 YMA General Conference thleng tur atan Sakawrdai an thlang.

Kum 2023 - 2025 CYMA Office Bearers :

President : Lalhmachhuana, Chaltlang Lily Veng

Vice President : Prof. Lalnuntluanga, New Capital Complex

General Secretary : Prof. Malsawmliana, Vaivakawn

Asst. Secretary : Fabian Lalfakawma, Chawlhhmun

Treasurer : Roneihthanga, Nursery

Fin. Secretary : M.S. Ralte, Upper Republic

Kum 80 chin tan home voting nei tan

Aizawl : ECI in ruahmanna a siam angin October 26, 2023 khan Serchhip District chhung Assembly Constituency pathuma Kum 80 chunglam te leh rualbanlote chu an chenna Inah kalchilh a Vote thlak tir tan an ni.

   Thawhkhatna atan Serchhip District chhung Assembly Constituency pathum - 26th Serchhip (ST),27th Tuikum (ST) leh 28th Hrangturzo (ST) huamchhung khua leh Veng hrang hranga Kum Upa (Old Ages Voter) Kum 80 chunglam leh Rualbanlote (Person with Disability) te chu Election Poling Team ten an chenna Inah kalchilihin Vote an thlaktir tan.

CEO-in Ramhlun Edena ko

Aizawl : Chief Electoral Office chuan October 26, 2023 khan Serchhip biala candidate Ramhlun-Edena leh a election agent te chu an ko a, vote thlak tum lo candidate leh a agent hian ngenna angin hian vote thlak chungchanga thuchhuah/thusawi tawh loh an remti.

   General Election to Mizoram Legislative Assembly, 2023 atana Independent-a Serchhip Assembly Constituency-a ding Ramhlun-Edena leh a Election Agent Lalremmawia te chu October 26, 2023 tlai dar 4:00 khan Media Cell, CEO Office-ah koh niin Member te'n tunhnaia Social Media leh Chanchinbu kaltlanga thu thehdarh chungchangte bakah Election kaihhnawih Dan leh hrai chungchangte an sawipui.

Social media hmang te tan inkaihhruina siam

Aizawl : Inthlan hun chhunga Social Media platform hrang hrang hmangtute tana hriat leh zawm tur inkaihhruaina (Advisory) chu Coctober 26, 2023 khan Media Cell, CEO Office chuan mipuite hriat turin hetiang hian a chhuah:

   Inthlan puan ni atanga a zawh fel ni thlengin Internet leh Social Media kaltlanga thu thehdarhtuin Model Code of Conduct (MCC) a bawhchhia em tih chu Media Certification and Monitoring Committee (MCMC) leh Social Media Team ten uluk takin an a vil a. Social Media hi Electronic Media huang chhunga rin luh a nih avangin politics rawngkai advertisement reng rengte ngun taka vil a nih avangin a hmangtute pawh an fimkhur tlan a tul an ti.

Randomization of Polling Personnel neih a ni

Aizawl : 26.10.2023 khan Inthlanpui lo awm tura Aizawl District chhunga Polling Personnel te duty na tur khawl hmanga thliarna - Randomisation of Polling Personnel chu L&B Room, DC's Office ah General Observer te, Returning Officers/ Asst. Returning Officer te leh political party aiawhte telpuiin neih a ni.

   Randomization hi neih tawh niin, polling personnel duty chhuak tur te thlan a ni tawh a, training pawh pek a ni. Tun tumah hian heng 1st randomization a thlanchhuah tawhte hi team-a thliar an ni leh a. An kalna tur Assembly Constituency pawh hriattir an ni ang. Duty tura an chhuah hma chuan an kalna tur polling station an la hre thei dawnlo thung a ni.

Candidate sum endikna nei

Aizawl : October 26, 2023 khan DC office ah Expenditure Observer Brahma Vidya leh Nayanjyothi Nath te ho in Aizawl district chhunga Assembly Constituency hrang hranga candidate expenditure agent te chuan an sum hman dan endik tumkhatna an nei.

   Candidate te sum hmanna endikna vawi khatnaah hian Accounting Team te lawh telin, candidate te account bu (Candidate Expenditure Register) leh Accounting Team-in an vawn ‘Shadow Observation Register’ te chu endik a ni.

Candidate te account vil uluk turin chah

Aizawl : October 26, 2023 khan DC Conference Hall ah Aizawl District Election Officer Nazuk Kumar, DC Aizawl chuan MLA inthlanpui lo awm tur chungchangah Aizawl district chhunga bank hrang hrang hotute a kawm. Expenditure Observer Nayanjyothi Nath pawh a tel a ni.

   Candidate te'n campaign nan sum hman theih chin an neih avangin leh felfai leh thianghlim taka inthlanna neih a nih nan candidate te hausakna leh an sum neih zat zawng zawng puan a ni thin a. Account an neihna bank te chuan candidate te sum che vel lo thlithlai tura phut an ni.

Maharashtra Public Service Commission Chairman leh Member ten MPSC rawn tlawh

Aizawl : Maharashtra Public Service Commission Chairman, Dr. Dilip Pandharpatte leh Member 3, Secretary leh Under Secretary te chuan October 25 - 27, 2023 chhungin Mizoram an rawh tlawh a. October 26 khan Maharashtra PSC Team hian Mizoram Public Service Commission Office tlawhin Joint meeting neih a ni. He Joint meeting hi J.C. Ramthanga, Chairman, MPSC chuan a kaihruai a, Dr. Dilip Pandharpatte chu Co-Chairman a ni. Meeting-ah hian Maharashtra Public Service Commission atanga lo kal bakah Mizoram Public Service Commission Member leh Senior Officer te an tel a ni.

One Day Sensitization Workshop

Aizawl : General Election to Mizoram Legislative Assembly, 2023 neih tura inpuahchahna kalzelah October 25 khan Chief Electoral Office, Mizoram buatsaihin media-te tan ICT Conference Hall, Top Floor-ah 'One Day Sensitization Workshop' buatsaih a ni.

   Addl. Chief Electoral Officer H.Lianzela chuan kalkhawmte lawmna thu sawiin, inthlan kaihhnawih hriat tur pawimawhte inzirtirna 'One Day Sensitization Workshop' buatsaihah media mi leh sa thahnem tak an tel thei chu lawmawm a tih thu a sawi a. Election Commission of India-in media a ngaihpawimawh thu leh ECI hnuaiah chak taka media lam kaihhnawih kalpui a nih thu a sawi a. Media platform hrang hrang kaltlanga voter awareness kalpui chu ECI duhdan a nih thu sawiin, hei hi chanchinbumite tel lo chuan a harsa hle a ni tiin, kalkhawmte chu vote thlak thatna State, inthlanna muanawm, felfai leh dik siam tura theihtawp chhuahpuiah a sawm a ni.

Cyber Security Awareness Month

Aizawl : ICT Department chuan Cyber Security Awareness Month’ kalpui mek denchhenin Cyber Security chungchangah Mipuite tana hriattur pawimawh leh zirtirna atan October 25 khan thuchhuah an siam.

   Cyber Security chungchang inzirtirna (Cyber Jagrookta Diwas) hi kum 2022 atang khan India ramah mumal taka neih tan a ni a, hemi pual hian October thla hi ‘Cyber Security Awareness Month’ a hman thin a ni.

SVEEP Cycle Rally

Aizawl : Inthlanpui lo awm turah voter tam thei ang berin vote an thlak theih nan a hmalakna hmanrua pakhat atan October 24 khan Mizoram Cycling Association (MiCA) te nen tangho in SVEEP (Systematic Voters Educatipn and Electoral Participation) Aizawl District buatsaihin Cycle Rally neih a ni a. Mi 85 bawr velin thirsakawrin Vanapa Hall kawt atangin AMC Office Thuampui thleng an tlan a ni.