Myanmar mi 2 kut atangin Meth man

Aizawl : Assam Rifles leh Excise and Narcotics dept., Siaha tangkawp chuan October 3, 2024 khan New Siaha, Siaha District, Mizoram-ah Methamphetamine tablet (gram 1980) Rs. Vbc. 6.65 hu an man.

   AR leh Excise tangkawpte hian nimin (3.10.24) khan Methamphetamine hi an man a, an thil man hlut zawng hi international market rate ah Rs. 6,65,01,007/- hu a tling. A neitu/kawltu Myanmar lam mi nia insawi pahnih an man tel bawk.

   Heng an thil man te leh a neitu an man te hi dan anga hmalak zui turin Excise and Narcotics Department, Siaha kutah hlan an ni.

YMA in hmeithai chenna tur In sa

Aizawl : Hlimen branch YMA-in anmahni senso in hmeithai chenna in an sak sak a, October 2 tlai khan hawn a ni.

   Hlimen branch YMA hruaitute hnen atanga ZALEN thudawn danin, an venga hmeithai Zodinpuii chenna in chu tun hnai khan a tlu sawp a, hei hi YMA in an mawhah la in, a chenna in tur hi an sak sak a ni.

   In sakna atan hian YMA-in sum an neih sa an hman bakah, mi inphal thenkhatte hnen atangin thilpek an dawng a, heng bakah hian an bialtu, Aizawl South III MLA, Baryl Vanneihsangin in chung tur rangva a tum a, an bialtu corporator Dr. C Malsawmtluangin a bang tur tile a tum bawk. He in sak hna hi September ni 13, 2024 khan tan a ni.

Kum 102 miin beihrual inkhawm kai kim

Aizawl : Nuchhuni,102 East Lungdar Venghlun Presbyterian Kohhran chuan kumin 2024 beihrual inkhawm a la kai kim.

   ZALEN thudawn danin Nuchhuni hi inkhawm ngai pawimawh tak niin, sunday school pawh vawi tam tak a lo kai kim tawh a, nikum leh kum hmasa pawh khan sunday school kai kim lawmman a dawng a, kumin 2024 kal mekah pawh a la kai kim chhunzawm bawk.

   Nuchhuni hian kum thum (2022 ,2023 leh 2024) a zawnin beihrual a kai kim a, kai kim lawmman an kohhranin an siam pawh a dawng a ni.

Vawi 84 nan thisen pe

Aizawl : Zaithiam chuai thei lo, Rebecca Saimawii chuan September 30 khan a vawi 84 nan Bangalore ah thisen a pe.

   A thisen pek chungchang hi a social media page ah tarlangin, "Mite tana ka luanchhuah ve theihna awm chhun, vawi 84 lai mai a thlawna thisen pek min phalsaktu Pathian ropui ber rawh se," tiin a tarlang.

   Rebecca Saimawii hi Mizo hmeichhia ah chuan thisen pe hnem ber a ni mek nia hriat a ni.

Mahni farnu pawngsualtu kum 20 tang turin hrem

Aizawl : Special Court, POCSO in mahni farnu pawngsualtu Malsawmtluanga chu kum 20 tang tur leh pawisa chawi turin September 30, 2024 khan a hrem.

   Court thuchhuaka tarlan a nih danin, ni 29.7.2023 zinglam dar 2:30 vel khan Malsawmtluanga, Mizoram chhim lam khaw pakhata cheng chuan a farnu kum 14 mi, khuma a muhil lai chu a pawngsual a, pawikhawihtu hian zu, alprazolam leh heroin te a tih pawlh thin niin thuhretu ten court an hrilh.

   Engemaw chen thubuai ngaihtuah a nih hnu in 30.9.24 khan Vanlalenmawia, Judge, Special Court, POCSO chuan judgement a puang a, Malsawmtluanga hi section 6 POCSO Act hnuaiah convict niin, kum 20 chhung tang tur leh Rs. 3,000 chawi tura hrem a ni. Rs. 3,000 chawi tur a neih loh chuan ni 10 dang tang tura tih a ni bawk.

Hnahsin Kut 2024 hawng

Aizawl : October 3, 2024 khan Aui Garden, Champhai Phai pheiah Hnahsin Kut chu Adviser to Chief Minister (Planning & Finance) TBC Lalvenchhunga chuan a hawng a. Adviser to CM (Technical), Champhai North bialtu MLA Er H. Ginzalala leh Champhai South MLA Lt. Col. Clement Lalhmingthanga te pawhin khualzahawm niin he hun hi an telpui a ni.

   Khuallian TBC Lalvenchhunga chuan Hnahsin Kut hlawhtling taka neih a nih theihna tura hma la tu - Organising Committee, Champhai Nature Conservancy leh sawrkar hotute zahna chibai a buk a. Champhai khawtlang hruaitu hmasa, Phai phei leh hmun pawimawh dang lo humhalh thintute chungah lawmthu a sawi bawk.

   Hnahsin Kut 2024 hi Champhai Nature Conservancy kaihhruaina hnuaia pawl hrang hrang thawkho ten an huaihawt a ni a. Kutah hian Adventure Sports, Concert, Fashion Show leh Stall hrang hrang chhim tur a awm dawn a. Hei bakah hian MzSRLM hnuaia Self Help Group ten an thil siam an phochhuahna SARAS Fair chu Hnahsin Kut rual hian neih a ni dawn bawk a ni.

Council of Minister thukhawm

Aizawl : Chief Minister Lalduhoma kaihhruaiin October 3, 2024 khan Council of Minister meeting, Cabinet Room-ah neih a ni a. An thu pass zingah hengte hi a tel.

   Proposal for Amendment of The Mizoram Right to Information Rules, 2010 - GAD BPL te tan RTI zawhna zawh man zawng zawng a thlawn a ni tawh ang.

   Mizoram State Human Rights Commission din tura Home department ngenna chu pawm a ni a, post 16 siam tur a ni.

   Finance lam ngenna angin Sawrkar hnathawk te hnenah Dearness Allowances pek remtih a ni a, hei hi cabinet thutlukna anga kalpui tur a ni.

   Finance rawtna ang tho hian Dearness Allowance hi 4% a pek tur a pawm a ni a, sawrkar hnathawkte hnena Christmas thilpek atan November, 2024 atanga hman tan tur a ni.

Aizawl-Thenzawl-Lunglei Road tlawh

Aizawl : Ningani khan Committee on Estimates, Mizoram Legislative Assembly chuanin Acting Chairman Lalmuanpuia Punte kaihhruainain Public Works Department hnathawhte spot visit neiin Department hnathawhte an endik a, he hunah hian Lalrintluanga Sailo, MLA leh T. Lalhlimpuia, MLA te an tel bawk a ni.

   Spot visit-ah hian Committee on Estimates-in Aizawl-Thenzawl-Lunglei Road a maintenance works leh restrenthening works kal lai te a endik a. Chainage of Roads then hrang hrang te tlawhin hnathawh mekte an en a. Committee chuan PWD te theihtawpa hma lakpui an tum thu an sawi a ni.

Governor-in Sairang Rel station tlawh

Aizawl : October 3, 2024 khan Mizoram Larsap Indra Sena Reddy Nallu chuan Sairang Rel station sak mek leh Lei (Mualkhang-Sairang, Bridge No.196) dawh mek a tlawh.

   Larsap hi Er. Harjimal Meena, Deputy Chief Engineer, NF Railway leh a team ten lo dawng sawngin, an hna kalpui dan leh an hmabak te lo hrilh a, 2025 July thla ral hmaa Sairang Rel lei leh Sairang Rel station chu zawh hman an in beisei thu an lo hrilh. Sairang Rel station-ah hian rel kawng (track) 13 a awm ang a, Passenger track 3 leh non- passenger track 10 a awm dawn a ni.

Sinlung Hills Council inthlan hun tur puang

Aizawl : Mizoram State Election Commissioner Dr. H. Lalthlangliana chuan October 3 khan a Pisa-ah Sinlung Hills Council inthlan November ni 5, 2024 a neih tur leh hemi ruala Model Code of Conduct hman tan nghal a nih thu a puang

   Laldingliana, Secretary to the State Election Commission, Mizoram chuan inthlan kaihhnawiha hriattur pawimawhte a sawifiah a ni.

   State Election Commision chuan inthlanna felfai leh muanawm tak kan neih theih nan inthlanna buaipuitu Official-te, Political Party-te, Media, NGO-te leh Sinlung Hills Council chhunga mipuite tawiawmna a ngen a. Mipui duhthlanna kal tlanga Sinlung Hills Council inrelbawlna tha tak kan neih theih nana theih tawp chhuah theuh turin mitinte a sawm.

FCS&CA, FCI leh IOC te meeting neihpui

Aizawl : Mizoram Larsap Indra Sena Reddy Nallu chuan October 3, 2024 khan Raj Bhavan Mini Conference Hall-ah Food Civil Supplies & Consumers Affairs, Food Corporation of India (FCI) leh Indian Oil Corporation (IOC) official te meeting a neihpui.

   Meeting-ah hian Larsap chuan official te atangin Oil, LPG leh buhfai-a Mizoram dinhmun te, Mualkhang Bottling Plant leh Mizorama godown awm zat leh buhfai chhekkhawl theih zat te, thla khata LPG mamawh zat leh dawn dan te a zawt a. FCS&CA, FCI leh IOC Official te chu mipuiin Buhfai, Oil leh LPG a harsatna an tawh loh nan tang mar pat reng turin a chah.

   Harsatna an neih chuan a hnena thlen hreh loh tura official te hrilhin, sawrkar laipui lama an hotute hnenah pawh an harsatna te thlensak a, an harsatna te sukiang tura theitawp chhuaha hmalakpui a inpeih reng thu a hrilh bawk.

Lalrinpuii leh Karnataka Deputy CM inkawm

Aizawl : October 1, 2024 khan Social Welfare Minister Lalrinpuii leh Karnataka Dy Chief Minister DK ShivaKumar chu Bengaluru-ah an inkawm.

Rinpuii hian Karnataka Dy. CM hi Bengaluru-a Mizoram House sakna tur atana Mizoram in ram a neih dan te hrilhin, a sakna kawnga thawhho theih dan tur kawng hrang hrangte a sawipui a ni. Dy CM hian an Chief Minister pawh lo sawipui a, theihtawpa thawhhopui an inhuam thu a lo hrilh a ni.

Governor leh mi pawimawh dangten zahna lantir

Aizawl : October 2 kha India Hnam Pa Mahatma Gandhi a pianchamphaphak vawi 155-na a ni a. Hemi ni pualin hian zingkarah Governor Shri Indra Sena Reddy Nallu bakah Mizoram Sawrkar mi pawimawh engemaw zat in PUC Campus, College Veng a, Gandhi a lim ah pangpar dahin zahna an lantir.

   Zahna lantir zingah Mizoram Legislative Assembly Speaker Lalbiakzama; Minister panga – Vanlalhlana, C Lalsawivunga, Dr. Vanlalthlana, Lalthansanga, Prof. Lalnilawma leh Assembly Deputy Speaker Lalfamkima te an tel a. Anni bakah Chief Secretary Dr. Renu Sharma leh Sawrkar hotulu dangte pawhin he hunah hian zahna an lantir bawk a ni.

   Programme zawh hian Governor chuan Cleanliness Drive – Swachhata hi Seva pualin Shramdaan (tual tihfai) a ti nghal bawk a ni.

Mizoram-a 3D Dental Laboratory hmasaber hawng

Aizawl : October 1, 2024 khan khan Chief Minister Lalduhoma chuan Govt. Serchhip College ah Mizorama hmasaber ni turin PM DevINE sum atanga siam 3D Dental Laboratory thar a hawng.

   He Laboratory hi Serchhip District Hospital-a dah tur a ni a. District Hospital hi sak thar mek a nih avangin 5G Internet Service awmna Serchhip College-ah hian bun rih a ni.

   He Laboratory hi NE state tinah dah thar vek a ni a, AMTRON ten Guwahati atangin an thlung khawm ang a. Training pawh anni hian an buatsaih thuai ang. He hmasawnna thar hi Industrial Revolution 4.0 an tih huanga mi, 5G connectivity service leh 3D printing technology huanga mi a ni.

Magisterial Inquiry din

Aizawl : Aizawl DC Er. Lalhriatpuia, District Magistrate ni bawk chuan September ni 21, 2024 (Inrinni) zana Durtlang, Aizawl a thilthleng chhuichiang tur "Magisterial Inquiry" chu September 30, 2024 khan a din.

   Mark Lalthanliana, Additional District Magistrate (ADM), Aizawl District chu inquiry la turin ruat a ni a. Ani hian 30.9.2024 a order chhuah a nih atanga ni sarih (7) ral hma in a chhuichianna report hi a thehlut tur a ni.

Mim Kut urhsun takin hmang

Aizawl : September 30, 2024 khan Social Welfare and Tribal Affairs Minister Lalrinpuii hovin Mizo Kûtte zinga mitthite puala hman thin Mim Kût chu Vanapa Hall, Aizawlah urhsun taka hman a ni.

   Mim Kût hi hmanlai Mizo pipute chuan an chhungte thi tawh puala hun an hman thin a ni a. He hunah hian mitthi chhungte chuan mitthite lo ei ve tur ni a ngaiin eiturte an dahsak thin a; hei hi 'Thlaichhiah' tih a ni. Mim Kût hi Mizo thawnthu pakhat 'Tlingi leh Ngama' thawnthu behchhana lo intan nia hriat a ni.

Mizoram Governor hna chelh lailawk turin lalut

Aizawl : September 30, 2024 khan khan Indra Sena Reddy Nallu, Tripura Governor chu Durbar Hall, Raj Bhavan-ah rinawmna thu tiam tirin Mizoram Governor Dr Hari Babu Kambhampati chawlh lak chhunga Governor hna thawk turin lakluh a ni.

   Chief Secretary Dr Renu Sharma in President thupek chhiar hmasain Governor lakluh inkhawm hi tan a ni a. He hunah hian Justice Nelson Sailo, Judge, Gauhati High Court chuan Indra Sena Reddy Nallu chu rinawmna thu tiam tirin Mizoram Governor hna thawk turin a lalut a ni.

   Swearing-in Ceremony-ah hian Chief Minister Lalduhoma, Speaker Lalbiakzama, Home Minister K.Sapdanga, Cabinet Minister dangte, Minister of State te, Lok Sabha MP, Chief Secretary, DGP leh special invitee dangte an tel a ni.