Mipat hmeichhiat kaihhnawih ah mi 5 man

Aizawl : October 3, 2023 khan Mizoram police te chuan kum tlinglo, mipat hmeichhiat kaihhnawiha chhawr leh tihkhawhloh chungchangah mi 5 an man.

   Cyber Crime Police te hmalakna in Aizawl atangin mi 3, Saitual PS leh Lunglei PS hmalakna in mi 1 ve ve, an vaiin mi 5 tih tisualtu ngeia hriatte chhuichhuah an ni a, an mobile phone te pawh hnuchhui zelna atan hrensak an ni bawk. Heng mi 5 te hi criminal case siam sak niin, uluk taka chhui zui an ni.

KT Rokhaw MLA atangin a bang

Aizawl ; Congress MLA, Palak Constituency bialtu, KT Rokhaw chuan October 3, 2023 khan MLA a nihna atanga banna Speaker Lalrinliana Sailo hnenah a thehlut a, MLA inthlanpui lo awm turah MNF ticket in a ding ang.

   KT Rokhaw banna hi Assembly Speaker Lalrinliana Sailo chuan a pawm sak a, banna a thehluh zawha thuthar thehdarhtute zawhna chhangin KT Rokhaw chuan, a bial mipuite nen inrawn chunga thutlukna siam ani tih a sawi a, a bial chu Ruling MLA biala a awm ve a duh avanga Congress MLA a nihna atanga bang leh MNF ticket a din tum a nih thu a sawi.

Sakhaw bing pual a candidate siam lo turin ngen

Aizawl ; Central YMA chuan October 4, 2023 khan inthlan lo awm tur chungchangah thuchhuah siamin, Mizo hnahthlak zingah sakhaw bil inthliar hrang zawnga chetna tha an ti lo tih an tarlang a, sakhaw bing puala candidate siam lo turin political party leh mipuite an ngen.

   Central YMA chuan India ram puma entawn tlak Inthlanna felfai leh muanawm tak an neih leh ngei theihna turin thawktute leh mipuite an ngen tih an tarlang a, ram rorelna chu mipui siam a ni a, a mawhphurtu anni tih hriaa khua leh tui dik takte chu vote thlak theuh turin an ngen tih an an tarlang.

Lengpui Airport ah cheng vbc. 31 chuang hu Meth man

Aizawl ; Mizoram Police chuan inthlanpui lo awm tur thlir chunga venhimna leh ruihhlo dona kawnga ngawrh lehzuala tan a lak mek laiin October 3, 2023 khan Lengpui Airport-ah Methamphetamine (Crystal Meth) tam tham tak man a ni. Meth hi Kg 10.4 niin, a hlut zawng hi international market rate-ah cheng vaibelchhe 31 chuang hu nia chhut a ni.

   He ruihhlo (Meth) hi Myanmar atanga Delhi pana tawlh thlak mek niin, Lalremthangi (kum 38) mi thawmhnaw bawm (suitcase) atanga man a ni. ND&PS Act leh Foreigners Act hnuaiah Special Narcotics Police Station Case No.48/23 dt.03.10.2023 ziah luh a, thubuai siamsak nghal a ni.

Lianchhiari Run hman theih tawh

Aizawl : Information & Public Relations Minister Lalruatkima chuan 04.10.2023 khan NEC atanga sum hmuh hmanga sak Lianchhiari Run (A Multi Facility Centre), DIPR Directorate bula mi chu vawiin khan khuallian niin hlanna hun buatsaih chu a hmanpui. Prof. F. Lalnunmawia, Mizoram Journalist Welfare Board member ni bawk chuan a tawiawm.

   Lianchhiari Run (A Multi Facility Centre) hi NEC sum nuai 900 leh State Sawrkar sum State Matching Share cheng nuai 100, a vaiin cheng nuai 1000 senga sak a ni a. A satu te hi Lushai Engineers an ni. December ni 14, 2017 khan sak tan niin, kum thum chhunga sak zawh tur ni mah se, rokhawlhna hrang hrang avangin a hun takah zawhfel thei a ni lo a. A building ah hian chawng (storey) pasarih awmin, elevator (kg 560 dawl thei tur) 2 dah a ni bawk.

Incentive Cash Awards sem

Aizawl : Sports & Youth Services Department buatsaihin October 2 zan khan Mizorama Sports Awards 2023 & Incentive Cash Awards 2021-2022 & 2022-2023 semna hun Dawrpui Multipurpose Hall-ah hman a ni.

   Heng bakah hian Mizoram Sports Awards 2023, May 2022 atanga May 2023 inkara infiammi leh infiamna kaihhnawiha chethate Sports Awards hlan an ni a. Category 10 awmin category tinah hian nominee 5 zel awmin award dawngtute chu:

Gandhi Jayanti-ah Governor leh CM ten zahna lantir

Aizawl : India Hnam Pa Mahatma Gandhi a pianchamphaphak vawi 154-na a ni a. Heni pual hian October 2, 2023 zing khan Governor Dr. Haribabu Kambhampati leh Chief Minister Zoramthanga ten PUC Campus ah Gandhi a lim a pangpar dahin zahna an lantir a ni.

   Home Minister Lalchamliana; Minister dang – R. Lalzirliana, Lalruatkima leh Robert Romawia Royte te pawh zahna lantir nan pangar an dah bawk a. Chief Secretary Dr. Renu Sharma leh Sawrkar hotulu dangte pawhin he hunah hian zahna an lantir bawk a ni.

   Gandhi a piancham October ni 2 hi United Nations in kum 2005 khan International Day of Non-Violence ah a lo puang tawh nghe nghe a ni.