R. Lalrawna leh Rozama Chawngthu ten Bhasha Samman dawng

Aizawl : R. Lalrawna, Electric Veng, Aizawl leh Rozama Chawngthu, Mission Vengthlang te chuan vawiin August ni 29 (Ningani) khan Rabindra Bhavan Delhi-ah Bhasha Samman an dawng.

   He Award hi Sahitya Akademi (National Academy of Letters) te buatsaih a ni a, Bhasha Samman hi mahni tawng hmasawnna atana thawh hlawkte hnenah an hlan thin a, Bhasha Samman hian Cheng 1,00,000/- leh thil dangte a keng tel a ni.

Mizo hmeichhe Colonel kai hmasa ber leh awmchhun Dr. Mary Hranngul thi

Aizawl : Mizo hmeichhe zinga Colonel kai thei hmasa ber leh a awmchhun, Dr. Mary Hranngul chu Ningani zing khan Guwahati-ah cancer natna avangin a thi a, Inrinni khan an chenna, Shillong, Meghalaya-ah vui a ni.

   Dr Mary hi Assam Rifles-in anmahni puala medical officer (doctor)-a lak hmasak ber a ni.

   Dr Mary hi medical officer zinga police gallantry medal dawng thei hmasa ber a ni bawk a. Kum 2012 Republic Day khan Manipur-a hel beihnaa a thawh that avangin khatih laia president, Pratibha Patil-i'n a hlan a ni.

Chhangurkawn-ah ruang chhar

Aizawl : August 29, 2024 khan Chhangurkawn thlen hma, 28.8.2024-a leiminna chhak ah ruang chhar a ni a, hriat chian a nih hnuah Lalhmangaihi, Sihphir tih finfiah a ni.

   Lalhmangaihi hi Luangmual-ah hian a u te an chen avangin an hnenah hian a awm thin a, tuna a ruang an hmuhna vel hnuhma atang hi chuan chesual ni ngeia an ngaih thu Luangmual YMA hruaitute chuan ZALEN an hrilh.

Chief Minister lawmthu hrilh

Aizawl : August 27, 2024 khan Syria rama hnathawka awm harsatna tawk, Mizoram sawrkarin tun hnaia a hruai haw te chuan Chief Minister Lalduhoma chu a office-ah an hmu a, lawmthu an hrilh.

   Chief Minister hian dam taka an rawn haw theih avangin a lawmpui thu a lo hrilh a. Mizoram sawrkar chuan khawvel hmun hrang hranga Zofate hui khawma a tul ang zela tanpuitu tur Mizo Diaspora Cell an din a, data an la khawm mek a, anmahni rawn be pawptu pawh an awm nual tawh a ni, tiin sawrkar ruahmanna tlangpui a lo hrilh a ni.

   Syria atanga chhanchhuah te rual hian India ram chhunga harsatna tawk nula pakhat, tun hnaia chhanchhuah pawh a tel ve bawk.

National Sports Day 2024 hmang

Aizawl : India ram Hockey khel thiam lar tak Major Dhyan Chand-a piancham den chhenin India ram pumpuiah National Sports day chu August 29, 2024 (Thu) hi hman a ni.

   Mizoramah a lawmna pui ber chu Sports Authority of India (SAI) State Training Centre, Mission Vengthlang-ah hun hman a ni. National Sports Day-ah hian thupui atan “Sports for the promotion of Peaceful and inclusive societies “ tih a ni.

   He hunah hian sports leh community service activities te School Education Department hnuaia School hrang hrangah te, College hrang hrangah te, NCC te, NSS te, District hrang hranga Sports & Youth office-ah te, Khelo India Centre (KIC) District hrang hrangah te hman a ni bawk.

MIS Officer te tana In-House training buatsaih

Aizawl : Mizoram Information Service (MIS) Officer-te tana buatsaih ni 2 awh, In-House Training programme chu August 29, 2024 khan I&PR Minister Dr. Vanlalthlana'n I&PR Conference Hall, Lianchhiari Rûn, Aizawl-ah a hawng.

   Ni hnih chhung awh 'In-House Training for MIS Officers' ah hian sawm bik mithiamte'n MIS Officer-te tana hriattur pawimawh hrang hrangte bakah Office hna kentel tul hrang hrangte an zirtir a ni.

Codeine Syrup bur 53100 zet hren a ni

Aizawl: Codeine Syrup bur 53100 vel zet chu CYMA Kumpuan Committee leh Mizoram FDA duty-ten 28.8.24 zing dar 2:00 khan state pawn atanga rawn phurh luh chu Aizawl Transport Courier Godown pakhat rawn thlenpui a nih laiin an nangching a, dan bawhchhiatna a awm leh awm loh ngun taka endik atan Drugs Rules, 1945 angin hren zui a ni.

Apex Bank Board of Directors thukhawm

Aizawl : August 28, 2024 (Nilaini) hian Mizoram Cooperative Apex Bank, Board of Directors Meeting chu Board Meeting Room, Head Office, Tuikual South-ah neih a ni.

   Meeting hi Chairman Lalnunsanga'n a kaihruai a, bank hmalakna hrang hrang te thlir ho a ni. Board Meeting-ah hian thawktu 23 te service confirmed niin mimal loan Nuai 1250 leh Biakin sakna loan Nuai 967 pek remtih a ni a. Loan sanction zawng zawng hi Nuai 2217 a ni.

   Apex Bank hian Deposit Vaibelchhia 1522.10 Cr. atangin Loan hi Vaibelchhia 1199.45 Cr. (Vaibelchhia) a pe chhuak a. Deposit dawn atanga Loan pekchhuah tehfung (CD Ratio) hi 78.8% niin Mizoram Bank ah pawisa dawn atanga teha loan pechhuak tha ber an ni.

Chief Minister-in HIV leh STI zirtirna beihpui thlak hawng

Aizawl : August 28, 2024 khan Vaivakawn YMA Hall-ah HIV leh Sex atanga inkaichhawn natna, STI (Sexually Transmitted Infection) chungchang mipui hnena zirtirna beihpui thlak (Intensified IEC Campaign- India Fight Against HIV & STI) Mizorama thla hnih chhung kalpui tur chu Chief Minister Pu Lalduhoma'n a hawng.

   Chief Minister chuan, heng natna pahnih hi nunphung vanga natna ve ve an ni a. HIV bik hi vanduai vanga kai theih a ni nain chutianga kai chu an tam lo. Mizorama kai zaa 60 te hi mipat hmeichhiatna condom tel lova hman vanga kai an ni a, a dang zaa 30 hi ruihhlo ti thin te an ni a ti.

   He campaign hi September leh October thla chhung kalpui a ni ang.

Leimin tuarte hnenah CMRF tanpuina pe

Aizawl : Private Secretary to Chief Minister Lalrinawma Khiangte chuan Chief Minister aiawhin August 27, 2024 khan tun hnaia Chief Minister Staff Quarters thlang leimin vanga chhiatna tawk Dawrpui Vengthara chhungkuate hnenah tanpuina a hlan.

   Tanpuina hi chhungkaw 9 hnenah Rs.10000 theuh leh Vawk thi pakhat zelah Rs. 5000 hlan an ni a, Vawk thi hi pali an ni. Chhiatna tuarte aiawhin Robert Zosangliana, Local Council Chairman chuan a dawng a ni.

Meghalaya Dy. CM leh Tetea Hmar inkawm

Aizawl : Lalnghinglova Hmar, Minister of State, Labour Employment, Skill Development and Entrepreneurship (LESDE), Sports & Youth Services (SYS) leh Excise & Narcotics Department chuan August 26, 2024 khan Meghalaya Deputy Chief Minister, Home Department changtu ni bawk Prestone Tynsong chu Shillong-a a chenna in ah a kawm a, Mizoram leh Meghalaya thawhdun theihnate an sawidun.

   Meeting-ah hian Hamletson Dohling, Adviser to CM, Meghalaya pawh a tel a. Lalchhanhima, DRC, Mizoram House, Shillong chuan Lalnghinglova Hmar hi a tawiawm a ni.

   Sports Minister Lalnghinglova Hmar hian North Eastern Council Planning Adviser Som Kamei, Financial Adviser Thanglemlian leh Economic Adviser Sherry Lalthangzo te chu an office-ah a kawm bawk.

AMC Ward VI By-Election Corporator atan H. Lalremtluanga thlang

Aizawl : AMC Ward VI Corporator seat ruak hnawhkhahna tur atana State Election Commission in by-election a buatsaih chu , 26.08.2024 khan vote chhiar a ni a, ZPM candidate H. Lalremtluanga chu tlinga puan a ni.

   DC Office ah vote chhiar niin, round khat ah vote hi chhiar zawh nghal a ni a. Vote tla zawng zawng 4691 atangin 2354 hmu in ZPM Candidate H. Lalremtluanga chu tling a puan a ni. Returning Officer Pu Mark Lalthanliana chuan winning candidate hnenah hian Certificate of Election a hlan a ni.

   ZPM candidate hnaih ber tu chu Independent Candidate Lalrinfeli niin vote 2273 a hmu a (vote 81 in an inthlau a ni); BJP Candidate Chawnghmingthanga chuan vote 33 a hmu a. NOTA vote 31 a awm bawk. Vote hi 47.38% a tla a ni.

Mamit khawpui chhungah leimin/leikhi avangin chenna In chhuahsan

Aizawl : August 27, Thawhleh zana ruah nasa tak sur avangin Mamit Bazar venga chenna In pahnih leikhi in a tihchet a vangin luahzui ngam a ni lova, Lalrinchhana Hrahsel leh H. Lalchhuanawma te bungrua chu August 29, 2024 khan thiarchhuah a ni.

   Kum 2009-a Mamit Bazar veng leitlakhniamna leh leichetna ah leikhi hi a awm leh a ni.

   Mamit Field venga Lalliankimi te chenna In pawh leikhi nasa tak avangin August 29 vek khan an bungrua thiarchhuah a ni bawk. Mamit Field veng leikhikna hmun hi tunhma pawha lei tlak hniamna lo awm tawhna a ni.