CYMA CCC meeting vawi 100 na nei

Aizawl : September 11, 2024 khan Central YMA Hall, Tuikhuahtlang ah YMA rorelna sang, Central Co-ordination Committee (CCC) meeting vawi 100-na neih a ni a. Meeting hi Lalhmachhuana, President Central YMA in a kaihhruai.

   CCC meeting ah hian October 24, 2024 ( Ningani) a R. Dengthuama Hall-a YMA Rorel Inkhawm vawi 4-na a ngaihtuah tura thu (Agenda) lut te thlitfim a ni a. Agenda zingah YMA khawih 8 leh Sawrkar khawih 5 te Rorel Inkhawmah chhawp chhuah tura pawm a ni. Chhiatni thatni kaihhruaina ennawn tura rawtna pawh Rorel inkhawm ah chhawp chhuah tura pawm a ni bawk.

H. Mankimi kutah Florence Nightingale Award

Aizawl : President of India, Smt Droupadi Murmu chuan kumin atan September 11, 2024 khan India ram chhunga Nurse thawk laite tana chawimawina sang National Florence Nightingale Awards chu Rashtrapati Bhavan-ah a hlan a, an zingah hian H. Mankimi, Serchhip a tel.

   He chawimawina hi kum 35 nurse hna thawk tling tawh staff nurse an nihna anga hnathawk tha, hmeichhia te hriselna kawnga thawhhlawk te hnena hlan thin a ni a, President of India chuan National Florence Nightingale Awards 2024 hi H. Mankimi hi a hlan ta a ni. Ani hian Ward Superintendent (Senior Nursing Officer) hna District Hospital, Serchhip, Mizoram-ah a chelh mek a ni.

CYMA-in ruihlo man halral

Aizawl : Vawiin khan Central YMA chuan an ruihhlo man Cheng Vaibelchhe nga chuang man halralna hun September 10, 2024 khan an hmang. Ruihhlo man te hi Central YMA Hall kawtah tlema zawng tihral a ni a, a dang chu a hal ralna hmun bik (Incinerator) -ah halral tura tih a ni.

   Central YMA hian 12.12.2023 - 9.09.2024 chhunga ruihhlo man hlut zawng halral tura an tih hi Rs. 5,58,45,780.00 (Vaibelchhe nga, maktaduai nga, nuai riat, singli, sangnga, zasarih leh chéng sawm riat) a ni. Synod Moderator Rev. R. Vanlalnghaka chuan a halral.

Dan lova tawlhruk Vaibelchhe 1.64 hu man

Aizawl : Operations an kalpuinaah Custom Preventive Force, Champhai leh Assam Rifles te chuan Heroin No. 4, foreign cigarettes, beer leh Kuhva ro Cheng Vaibelchhe 1.64 man hu Champhai district, Mizoram-ah an man, September 9 &10, 2024 hian tum li operation hi an nei a ni.

   Heng an thil man te leh a kaihhnawiha man te hi Police Station Zokhawthar leh Custom Preventive Force, Champhai, Mizoram hnenah September 9 leh 10, 2024 khan hmalak zel a nih theih nan an hlan.

Aizawla motor luh hmasak ber champha

Aizawl : September 10, 2024 kha Aizawla motor a luh hmasak ber champha vawi 82-na a ni. Mizo pa C. Rochhinga'n Sairang atangin he motor hi Aizawl a thlenpui.

   He motor an chhui chin atangin Chevrolet company siam ni ngeiin hriat a ni a. A rawn khalh thlengtu hian a chungchang a ziahnaah he motor hi a ta a nih thu tar lanna a nei lo a, sipai a nih avangin sipai motor-a ngaih a ni. Remkhawm zawh a nih hnuah, September 10, 1942 khan Aizawl rawn thlenpui a ni.

   C. Rochhinga hi kum 1919 January thla khan Sialhauah a piang a. Kum 1942, September ni 10 ah Sairang atangin Aizawlah truck (chevrolet 15 CWT) a khalh lut a. Chu chu Aizawla motor khalh luh hmasak ber a ni.

In-service Training on New Criminal Laws-BNS, BNSS & BSA khar

Aizawl : Anti Corruption Bureau (ACB) buatsaih 'In-service Training on New Criminal Laws-BNS, BNSS & BSA' chu September 12, 2024 khan Vigilance Department Secretary Betsy Zothanpari Sailo chuan kharna hun a hmanpui.

   Training hi ACB Conference Hall, MINECO-ah ni hnih chhung neih niin Vigilance Department officer & staff te leh ACB Director Rodingliana Chawngthu hovin ACB officer & staff te an vaiin mi 45 vel an tel a ni.

Commonwealth Parliamentary Association conference thlen dan tur rel

Aizawl : September ni 27 & 28, 2024 chhungin '21st Annual Conference of Commonwealth Parliamentary Association, India Region Zone-III' Aizawl, Mizorama neih tur chungchangah 12.9.2024 khan Mizoram Legislative Assembly Speaker Lalbiakzama hovin Assembly House Committee Room-ah neih a ni.

   Ni hnih awh tur '21st Annual Conference of Commonwealth Parliamentary Association, India Region Zone-III' ah hian Lok Sabha Speaker, Rajya Sabha Deputy Chairman, Union Parliament General Secretary, OSD leh anmahni zuitu official engemawzat lo kal tura beisei an ni a. North East State 7 theuh atangin an Speaker, Deputy Speaker, Commissioners/Secretaries leh officials te lo tel thei tura beisei an ni.

Saitual Town Planning and Development Committee vawikhatna thu khawm

Aizawl : Rural Development Minister Prof. Lalnilawma kaihhruainain Saitual Town Planning & Development Committee chu a vawikhatna atan September 12, 2024 khan an thu khawm.

   Saitual Planning Boundary Description chungchang ngaihtuahho niin, Google Earth Map hmanga Boundary Pillar(BP) hrang hrang thlirho nghal a ni a, committee chuan he boundary pillar ruahmanna a pawm a ni.

CM hovin thlai thar lei chungchang meeting nei

Aizawl : September 12, 2024 khan Chief Minister Lalduhoma hovin a office-ah sawrkarin support price a pek tur thlai thar palite lei dan tur ruahmanna te thlirin mi pawimawhte an thu khawm.

   Sawhthing hi kum danga a kal thin dan angin open market a kalpui tur a ni a. Chutihlaiin open market ah hian harsatna awm palh thei ve tho a nih avangin chutiang hun a lo thlen palha chet lak dan tur chu an sawi a ni. Hmunphiah chungchanga hmalak tawh chin te pawh an sawi a. Mauchar khawtlangin an hmunphiah hralhna man an la dawn kim loh vanga harsatna an tawh mek pawh chin felsak tha an ti.

Ni hnih awh School Connect 2004 hmang

Aizawl : Mizoram Youth Commission, Lynchpin India leh Zalen Events te tangkawpin Class 12 zirlaite tana an buatsaih Career guidance and Counselling - School Connect 2024 chu September 12, 2024 khan Chanmari YMA Hall-ah Mizoram Youth Commission Chairman Malsawmzuala Ralte chuan a hawng.

   MYC Chairman chuan Mi hlawhtling ni turin T5 - taimak, tumruh, tei rei peih, thawhrimna leh time table neih te a pawimawh tih a sawi.

   School Connect 2024 hi ni 2 awh tura ruahman a ni a. A hawnna hunah hian Aizawl khawpui chhunga Higher Secondary School class 8 atangin Class 12 zirlai 2200 chuang an kalkhawm a ni. Hemi bakah hian Women Polytechnic Aizawl leh Govt. ITI, Aizawl bakah phai lam atangin Institution 15 an tel bawk.

Health Minister-in LMC hmunpui tlawh

Aizawl : Health & Family Welfare Minister Lalrinpuii chuan September 11, 2024 khan Lunglei Municipal Council (LMC) hmunpui a tlawh a, Board of Council Hall, Convention Centre-ah councillor-te nen an inkawm.

   Health Minister Lalrinpuii hi Lunglei South bialtu MLA Lalramliana Papuia leh Lunglei West bialtu MLA T. Lalhlimpuia te'n an tawiawm a. LMC Chairman Lalzuithanga hovin LMC councillor-te'n lo dawngsawngin, LMC hma lakna hrang hrang an lo sawipui bakah, harsatna leh mamawh an neihte a hnenah hian an lo thlen a ni.

Forest Training Institute-ah National Forest Martyrs Day hmang

Aizawl : Environment, Forests & Climate Change Department chuan ramngaw leh nungcha te humhalhna kawnga nunna chan ta te hriatrengna ni ‘National Forest Martyrs Day’ chu State Forest Training Institute, Bethlehem Vengthlang-ah September 11, 2024 khan EF&CC Department Minister Lalthansanga leh AK Biswal, Principal Chief Conservator of Forests hovin an hmang.

   National Forest Martyrs Day hi 2013 atang khan September ni 11-ah India ramah hman tan a ni a, September ni 11 hi kum 1730-a Bishnoi hnam mi 363 ten ramngaw an humhalh avanga an lal kuta an thih ni a ni a, hemi hriatreng nan hian September ni 11 hi National Forest Martyrs Day atan kum tin hman thin a ni.

State Election Commissioner tharin hna zawm

Aizawl : Vawiin khan Mizoram State Election Commissioner atana ruat Dr. H. Lalthlangliana chuan September 11, 2024 khan State Election Commissioner hna zawmin a pisa a luah thar a. Office staff te nen inkawmhona an nei.

   SEC thar Dr. H. Lalthlangliana hi MCS zinga senior ber, Land Revenue & Settlement Department Secretary ni lai a ni a, Secretary a nih hma hian Mizoram Sawrkar hnuaiah Aizawl Municipal Commmissioner ; Deputy Commissioner, Kolasib leh School Education Director hna te a lo chelh tawh a, December 31, 2024-a pension tur niin, State Election Comissioner atana ruat a nih tak avang hian September ni 10, 2024 khan Sawrkar atangin Voluntary pension in a chhuak a ni.

Praise Award UD&PA Minister-in sem

Aizawl : Performance Recognition for Access to Financial Inclusion and Street Vendors Empowerment (PRAISE) Award chu September 10, 2024 khan Vanapa Hall-ah K. Sapdanga, UD&PA Minister chuan a sem.

   Minister hian Best Performing ULB - Aizawl Municipal Corporation, Best Performing Lending Institutions - Mizoram Rural Bank leh State Bank of India, Best Performing Bank Branches Award-ah Mizoram Rural Branch atangin Champhai Branch, Durtlang, Khatla, Saitual leh Vaivakawn Branch, State Bank of India atangin Aizawl Branch, Dawrpui Branch leh In Touch te hnenah PRAISE Award hi a hlan nghal bawk a ni.

54th GST Council Meeting-ah Dr Vanlalthlana

Aizawl : September 9, 2024 khan 54th GST Council meeting chu Sushma Swaraj Bhawan, New Delhi-ah Union Finance Minister and Chairperson, GST Council Nirmala Sitharaman, kaihhruaina hnuaiah neih a ni a. Dr. Vanlalthlana, Taxation Minister member a nih angin a tel a ni.

   Council meeting-ah hian agenda tamtak zinga an sawi pawimawh zual zingah Mizoram pawh direct taka min khawih tel thei pawh a awm a; chumi zinga pakhat chu cancer damdawi tax rate 12% atanga 5% a tihhniam a ni a. Hei hian damdawi man a tihhniam phah dawn a, a bikin cancer vei tamna Mizoram mipui tan kan zangkhai phah tura ngaih a ni.

State Project Monitoring Committee thukhawm

Aizawl : September 13, 2024 khan Chief Minister Lalduhoma hovin CM Conference Hall-ah Mizoram State Project Monitoring Committee te chuan member pum huap thutkhawm tum thumna an nei a. An hmalak tawh chin te an thlirlet.

   Chairman Lalduhoma chuan, hun reilote chhunga hmalakna engemawzat an kalpui hman avangin Project Monitoring Committee te chungah lawmthu a sawi a. An hnathawhte chuan rah tha a chhuah ngei dawn tih a tarlang.

   Member thar te an awm avangin inhmelhriatna hun an nei a, chumi zawhah Member Secretary thar Er. Lalthanzuala Ralte chuan project an endik 25 te report a pe a. Heng project tina thil fel lo nia an hriat an hmuhchhuah leh rawtna an theh luhte chu an sawiho nghal zel a. Hmalak zui dan tur thutlukna an siam a ni.