Addl CEO hovin ECI Video Conference chhim

Aizawl : Election Commission of India (ECI) chuan rampuma state tina State Level Media Cell on Election te chu September 21, 2023 khan video conference hmangin inthlan chungchanga thil pawimawhte leh a bik takin media/social media hman tangkai dan tur an sawipui. 
    ECI chuan Media / Social Media kaltlanga mipuite hnenah inthlan chungchang inzirtir leh a bik takin first time voter leh thalaite chu inthlannaah phur taka an tel theihna tura kaihhruai a pawimawh thu an sawi a. State tina Media Cell-te chuan tunlai khawvel mila voter education and awareness lamah nasa lehzuala hma la turin an chah a ni.

Primary School Zirlaite Chhawmdawlna sem

Aizawl : September 21 khan Mizoram Primary Teachers Association (MPTA) ten zirlaite chhawmdawlna Zarkawt Community hall-a an sem a, School Education Minister Lalchhandama Ralte-in khuallian niin a hmanpui.
    Chairman Endowment Fund Sub-Committee report-in a tarlan danin Students Endowment Fund hi MPTA chuan zirlai naupang harsa chhawmdawlna dawng tur mi 36 a thlang chhuak a ni. He chhawmdawlna dawngtute hi pawi fai Rs. 5000/-, T-Shirt, Kekawr leh Lukhum pek an ni. MPTA chuan kum 2022 atang khan a sem tan a, naupangte leh an chhungte hi Science Centre, State Museum leh Millenium Centre-te fan pui. He chhawmdawlna hi Zirtirtute'n an thawhkhawm atanga sem a ni.

"Energy for Health” bultanna hawng

Aizawl : Health & Family Welfare Minister Dr. R. Lalthangliana chuan 'Energy for Health' program Mizoram chu Zemabawk Urban Primary Health Centre ah 21.09.2023 khan hawnna hun a hmang.
    SELCO Foundation, Mizoram leh Health & Family Welfare Department chuan Memorandum of Understanding (MoU), thawhhona thuthlung an lo ziak tawh angin he program kaltlang hian ram chhunga Health Centre 300 chuang zet chu solar hmangin kawlphetha leh eng pekchhuah tum a ni.
    "Energy for Health” hian Mizorama PHC zawng zawng leh sub-centre thenkhat a tuam ang a. PHC pakhat atana sum hman tur hi cheng nuai 7 atanga nuai 8 niin, Sub center pakhat solarise na tur chu cheng nuai 3 atanga nuai 4 ni tura ruahman a ni.

Mizoram sorkar sum enkawltute hun hmanpui

Aizawl: September 21, 2023 khan Chief Minister Zoramthanga chuan Mizoram Finance and Account Service Association (MFASA) General Conference vawi 28 na Woodland Hill, Zonuama neih chu khuallian niin a hmanpui.
    Zoramthanga chuam mi tinte hi ramin hma a sawn zel theih nana mahni zawn theuhva theihtawp chhuah tura koh kan ni, a ti. Finance & Account Service Association chu pawl lian tak ni lo mahse ramin a mamawh tak sum leh pai enkawl thiamna nei awmkhawm a ni a, a pawimawh hle a ti. Hmasawnna tura hmabak te chonaah ngaiin Finance lama mithiam te pawhin theih tawp lo chhuah tuin a chah. "Ram dangten an tih theih hi kan tihtheih lohna chhan tur a awm lo, rilru hmunkhat pua mahni zawnah theuh hma la turin kan zavaia koh kan ni," a ti.
    Inkhawm hi MFASA Vice President Ramchuana'n a kaihruai a, Rosiamliana, ECM in hunserh hmangin C. Lungmuanpuia, Secretary chuan report a pe a ni. 

NQAS Cerificate Aizawk leh Thingsulthliah PHC hnenah hlan

Aizawl : India rama hospital tha zual leh damlote tana him tehna, National Quality Assurance Standard (NQAS) hmanga endik an nih hnuin Aibawk Primary Health Centre(PHC) leh Thingsulthliah Primary Health Centre(PHC) te chu September 21, 2023 khan NQAS Certificate pek an ni.
    NQAS hnuaiah hian PHC damdawi in endikna standard hi 50 awmin, heng standard hrang hrang hnuaiah hian endikna point 1419-a la awm leh a. Hemi endikna point bakah hian Hospital Staff te’n interview an hmachhawn vek bawk. Damdawi in pahnihte hi July 24-27, 2023 khan State pawn atanga lo kal, NQAS External Assessor, Ministry of Health & Family Welfare, Govt of India an endik a. He’ng tehna hrang hrang hmanga tehnaah hian Aibawk PHC hian 89.38% hmuin, Thingsultliah PHC te hian 84.78% an hmu a ni.

Women's Reservation Bill, 2023 pass

Aizawl : Parliament Special Session ni thumna nimin September ni 20-ah khan Assembly leh Lok Sabha-a hmeichhiate tana seat zaa 33% hauhna tur 'Women's Reservation Bill, 2023' chu September 21, 2023 khan Lok Sabha-in a pass.
    Lehkha ziaka vote laknaa tel MP (LS) Pu C. Lalrosanga pawhin he bill hi thlawpin a vote a ni. He bill atana vote laknaah hian Lok Sabha Member 454-in a thlawp zawngin an vote a, a thlawp lotu vote 2 a awm thung. He vote thlaknaah hian Prime Minister Narendra Modi bakah Union Home Minister, Amit Shah, Defence Minister Rajnath Singh leh Central Minister dangte an tel a. Eptu lamah Opposition Leader Adhir Ranjan Chowdhury leh Member dangte an tel bawk a ni.

Serchhip District Hospital building thar sakna tur lungphum

Aizawl : Health Minister Dr R Lalthangliana chuan khum 100 awm theihna tur Serchhip District Hospital building thar sakna tur lungphum chu 20.9.2023 khan a phum a. Serchhip District Hospital compound-a lungphum phumna hun hi hman a ni
    Serchhip District Hospital sakna tur sum cheng vaibelchhe 21 hi Power Grid Corporation of India Limited (PGCIL) atangin CSR kaltlanga hmuh a ni a. A sak man sen so zawng zawng za ah za an tum dawn a ni. Sum senso zawng zawng ruahman zat atang hian vaibelchhe 2.52 hi hospital hmanrua lei nan hman tur a ni bawk. PGCIL leh Mizoram Sawrkar chuan May ni 27, 2022 khan inremna thuthlung an ziak a. Hospital hi thla 36 chhunga sak zawh tura ruahman niin March 2025 ah peihfel hman tum a ni.

ZMC Private Cabin block hawng

Aizawl : State Referral Hospital - Zoram Medical College, Falkawn a Private Cabin Block sak thar chu 19.09.2023 khan Health & Family Welfare Minister Dr. R. Lalthangliana chuan khuallian niin a hawng.
    He building hi a project hming chu “Construction of Paying Cabin at Zoram Medical College, Falkawn, Mizoram” tih niin, sanction amount chu Rs. 1153.35 lakh a ni a. A sak phalna Administrative Approval chu 26.02.2020 khan hmuh a ni a, sanction amount chu Rs. 1153.35 lakh niin CSS (Rs. 225.80 lakh) leh Special Central Assistance (Rs. 927.73 lakh) atanga hmuh a ni.
    Room 49 - VIP Room 8, Semi Cabin 2 leh Cabin 39 awm tura ruahman a ni. Heng room 49 zinga 20 chu mi inphal mi 8 sum thawhkhawm tlingkhawm Rs. 54 lakhs bakah PMJAY, ZMC leh RKS of SRH atanga sum (leh bungraw thenkhat) thawhkhawm hmangin peihfel a ni.

Online-a chhiah pekna tlangzarh

Aizawl : Land Revenue & Settlement minister Lalruatkima chuan September 19, 2023 khan Assembly Conference Hall, Aizawl-ah Mizorama a bul tanna atan online (internet) kaltlanga chhiah pekna "online tax & zoram chhiah payment" a tlangzarh.
    Online revenue payment system hnuaiah hian land tax leh zoram chhiah pekna module hran ve ve awmin online portal “landtax.mizoram.gov.in” kaltlangin chhiah a pek theih tawh dawn a, a bul tan nan Aizawl Municipal Corporation (AMC) huam chhung atan hman phawt a ni ang a, a hlawhtlin dan azirin huang zauh a Mizoram pum tuam chhuah tum a ni. CSC hrang hrang kaltlangin chhiah hi a pek theih bawk dawn a, a tangkafaia pe duh dan Revenue office ah kalin a pek theih dawn a ni.

CM-in Police Sports Meet hawng

Aizawl : September 18, 2023 khan Chief Minister Pu Zoramthanga chuan Rajiv Gandhi Stadium, Mualpuiah XXI Mizoram Police Sports Meet, 2023 chu khuallian niin a hawng.
    XXI Mizoram Police Sports Meet, 2023 ah hian Police te chu contingent 12 ah inthen darhin discipline 18 ah inelna an nei dawn a, police infiammi 1107 an ten intihsiakna an nei a ni.
    Mizoram Police Sports Meet hi kum 1987 atang khan rokhawlhna a awm loh chuan kum tin buatsaih thin a ni a, kumin hi a tum 21 a ni.

National Integration Tour (NIT) 2023 a kal te Tourism Minister-in vailiam

Aizawl : Lakhimpur Battalion, 2 Assam Rifles buatsaih hnam inpumkhatna chawinunna tura ruahman, National Integration Tour (NIT) 2023 a kal Mizoram Journalist Association member 8, Zirtirtu 2 leh anmahni hruaitu turte chu September 18, 2023 khan Tourism Minister Robert Romawia Royte chuan Gajraj Hall, 2 Assam Rifles tualzawl atangin a vailiam.
    National Integration Tour 2023 a kalte hian vawiin hian Mizoram chhuahsanin Assam an pan a. An cham chhung hian Assam, Arunachal Pradesh leh Meghalaya State-a hmunhma pawimawh hrang hrangte an tlawh dawn a. Ruahman dan chuan September ni 26, 2023 hian tour zofelin Mizoram an rawn let leh dawn a ni.